14
विस्वसते मेग़्कतोरु, मेग़्कवोरु गूनमते मनदना
1 मियगा बोर-बोर विस्वसिर, इद तिनदलाह पोलिह्ता, अद तिनदलाह पोलो इनजोर नोमिह्तोर, ओरु विस्वसते मेग़्कवोर आंदुर. ओरिन मीवा ऐंगे ओम्ह्टु, जेक तासमाटु. मीवाङ विचर्क मावाङ विचर्क कलियोङ इनजोर, ओरा संगे गिटोगटो आयमाटु.
2 विस्वसते मेग़्कतोर विस्वसिरिह्क बेदाय तिनदलाह पोलिह्ता इनजोर विस्वस कीस्तोर, मति विस्वसते मेग़्कवोर विस्वसिर जाळि-जबातुने तिन्ह्तोर.
3 अविङ तिनवालोरु, तिनवोरिन मीवा विस्वस कमि मन्ह्ता इनजोर पास्कमाकिर. अहे तिनवोरु, तिनवालोरिन मीट तपतिर इनजोर कसुर ओपमाकिर. बह इतेके मीक सबेटोरिन देवुळिये तना लोकुर कीता.
4 दुस्रोना सेवा-साकुर केवानगा कसुर ओपनद कबळ मीवा आयो. ओग़ कसुर कीतद केवद ओनाय माल्काल वेहतनोग़. अद्रमलेह्काने बोग़ाय विस्वसि कसुर कीतद केवद ओना माल्काल देवुळिये वेहतग़ा. देवुळिये ओना तोळ आताह्कु, ओग़ तना विस्वसताहि अरवालेवा देवुळता मुनेह बेस नितनोग़. अदिह्क अद्रमतोन कसुर ओपनदायो.
5 अद्रमलेह्काने बोर-बोर विस्वसिर बेदो उंद दियातुन नोमिह्तोर, बोर-बोर बार कतमे दियाङ बेसताङे इनजोर इन्ह्तोर. मति आपुना नोमळि देवुळतुह्क विचर वास्ता इनजोर, ओर्वोग़-ओर्वोग़ मन्कना विस्वस मनदना गावले.
6 दियाङ नोमवालोर सामिनेनाह्क नोमिह्तोर, अहे सबेटविन तिनवालोर वने सामिन जोहर कीस तिन्ह्तोर. इद्रम ओर सामिह्क मान ईसि तिन्ह्तोर. अविङ तिनवोर वने सामिह्क मान ईसि तिनोर आस्तोर. ओरवने सामिन जोहर कीसिये तम्क पोलनद जाळि-जबातुन तिन्ह्तोर. इतेके सामिह्क मान ईयना, इदे मोदुल पोल्लो आंदु.
7-8 नना इद्रम बाराह्क इह्नन इतेके, माटु मावाय अदिकरते ताकवल, मति सामिनाये अदिकरता इळ्न मह्नल. हातेकाय पिसतेकाय, सामिनाये मन्कलोरल आंदल. हातेके तान्के मान ईसि हायनल, पिसतेके तान्के मान ईसि पिसिह्नल.
9 डोलतोर ओसो जीवात मनवालोर विस्वसिरा माल्काल आयलाहिये, किर्स्तु डोलिस ओसो जीवा अरतोग़.
10 उंद दिया देवुळ नेयम कीयनद जागाता मुनेह माक सबेटोरिह्क नितना मन्ह्ता, इदिन पुनविरा? अस्के मावा मनमुळ देवुळतुह्क ओप्पग़ाया, ओप्पो इनजोर तान्के वेहतनद अदिकर मन्ह्ता. अदिनेनाह्क इंजेके मीवा ऐंगेटोग़ विस्वसिन कसुरतोग़ इनजोर बाराह्क मीट इह्निर? ओन उड्लोग़-बेरोग़ इनजोर बाराह्क पास्किह्निर?
11 सामि देवुळि वेहतद पोल्लो ताना सास्त्रमतगा मन्ह्ता, इदिन सीता कीम्ह्टु: “नना किरिया कीस वेहतह्नन, उंद दिया सबेटोर नावा मुनेह मिंडाङ कोटिस नाक मोळ्कनुर, सबेटोर नाकु देवुळि इनजोर कबुल आयनुर, इद निटम आयग़ा,” इनजोर रासतद मन्ह्ता.
12 इतेके माट ओर्वोग़-ओर्वोग़ मन्कल देवुळता मुनेह निचि, आपुनाङ कबस्कना इसब ईकल, अदे मावा नेयम कीसीयग़ा. अदिनेनाह्क मीवा ऐंगेटोग़ विस्वसिनगा कसुर ओपमाटु.
दुस्रोरिन विस्वसतुन विळ्सनाह केमाट
13 देवुळिये मावा नेयम कीयग़ा, अदिनेनाह्क माट इंजेटाहि ओर्विह्क-ओर्वोग़ कसुर वाटनदायो. मति ऐंगेटोर विस्वसिरिन विस्वसताहि लेसिह कीसि, पापमते अर्हतना लेह्का बाताले कीयनद आयो इनजोर सीता कीम्ह्टु.
14 येसुसामिना जीवा नाक पुन्पिह कीताह्कु, नाक सबे तिनदलाह पोलिह्ता इनजोर नना पुतन. मति बोग़ मन्कल बेदाय तिनदनदिन पोलो इनजोर विचर कीस्तोग़, कीसि तान तिन्ह्तोग़ इतेके ओग़ कळ्वोग़ आस्तोग़.
15 नावा विस्वस पका मेग़्कता, नना विचर वातद तिनदा पग़यह्नन इनजोर इह्निर, मति मीवा तिनमुळते मीवा ऐंगेटोग़ विस्वसिह्कु एग़्कुळ आतेके, इद बहु? ओन वने पिसिह कीयलाह किर्स्तु तना जीवा ईतोग़, अदिनेनाह्क मीवा तिनदना तिंडटे ओना विस्वसतुन बूळे केमाटु. अद्रम कीतिर इतेके मीट मीवा ऐंगेटोन निटमे जीवा केविर.
16 इतेके नना बेसे कीय्ह्नन, मुर्तिय तपोन इनजोर इह्निर, मति दुस्रोरा विचरते मीट तपिह्निर, अदिनेनाह्के मीवा बद्नम आस्ता. अदिह्क मीवा तिनदनद तिनमुळतुन आव्रे कीम्ह्टु.
17 केंजाट, देवुळि मीवा नडुम राजेम कीयना इतेके, तिनदनव-उनडनव पोल्लोनेके अचोन सीता केमाटु. सेतेमते ताकना, ओर्विना संगे ओर्वोग़ गूनमते मनदना, पवित्र जीवाता गिर्दाते निंदिस मनदना, इवे मोदुल पोल्लोङ आंदुङ.
18 इद्रम कीस किर्स्तुना सेवा कीतिर इतेके, मीवा ताकमुळ देवुळतुह्क विचर वायग़ा, अहे मन्कलोरवने मीक कदर ईयनुर.
19 अदिनेनाह्क माट ओर्विह्क-ओर्वोग़ गूनमते मनजि, ओर्विह्क-ओर्वोना विस्वसतुन मेग़्किह कीयलाह ऊळिङ.
20 देवुळि मीवा मुडगा बेद कबळ कीयलाह आता, तान मीवा तिनदनद पोल्लोतेनाह्क बूळे केमाटु. देवुळता मुनेह कतमे तिनदलाह पोलिह्ताङ निटमे, मति मीवा तिंडटेनाह्कु, ऐंगेटोर विस्वसिर पापमते अरयह्तोर इतेके, तान तितेके मीट तपिह्निर.
21 मीट अविङ, अंगुर जोमा तितेक-उटेक बाताल आयो, मति मीवा तिनदना-उनडना मेटे मीवा ऐंगेटोग़ विस्वसि विस्वसताह लेसतेक अचोन, मीट तान तिनवेकेन बेसु.
22 मीवा विस्वसता इसबते मीट तपविर, मति तान मीट देवुळता मुनेह मीवाय जीवातगा तासाटु, दुस्रोरा संगे गोटिङ केमाटु. बोग़ु नना तपोन इनजि कसुरलेवप ताकिह्तोग़, ओग़ देय्वातोग़ु.
23 मति नना बेद तिह्नन, अद देवुळता मुनेह पोलिह्ताया पोलोया इनजोर रेंड विचर्क कीस तिनवाल मात्रम, निटमे देवुळता मुनेह तपिह्तोग़. बह इतेके ओग़ देवुळतुन विस्वस केवाय तिन्ह्तोग़. इद्रमलेह्का बेदेतेला कबळि देवुळतगा विस्वस केवाय कीतेके, अद पापम आस्ता.