11
देवुळि तना इस्रयेल लोकुरिन ऊळिस जीवा लोपता
1 अदिनेनाह्क नना ताल्ह्किह्नन, देवुळि तना इस्रयेल लोकुरिन पूराय विळ्सिसीताया? आयो! अद्रम विळ्सो! विळ्सवाह्के कोनि नावा लेह्काडोरिन वने आचता. नना वने इस्रयेल मन्कनने आंदन, अब्रहमना जालपिलतोग़ बिन्यामिनना कूळतोनन.
2 इतेके बोरिन देवुळि तना लोकुर आयलाहि सुरुमुनेताहि आचिस तासता, ओर इस्रयेल लोकुरिन देवुळ विळ्सो. सास्त्रमतगा रासतदु देवुळता कबुरतोग़ एलियाना पोल्लोतुन मीट पुतिर इसि! ओग़ देवुळतुन पार्तना कीनेके इस्रयेल लोकुरगा इद्रम कसुर वाटटोग़:
3 “ए सामि! नीवा कबुरतोरिन ओर हव्कतोर. नियेनाह्क मोकिङ ईयनव गर्यान पिळ्हपळ कीतोर. बहाल पेनतुन मोळ्कवोनन नना वग़ोनने पिसतन. इंजेके नाक वने हव्कलाह ऊळिह्तोर!” इतोग़.
4 अस्के देवुळि ओन बेद पोल्लो मल्हता सीता मन्ह्ताया? “आयो एलिया, बहाल पेनतुन मोळ्कवोनिन निमा वग़ोनिन आयविन; अद पेनतुन मोळ्कवा, नाक मोळ्कवालोर एळुङ अजर्क मन्कलोरिन ओरा कयदाहि नना पिसिह कीस तासतन,” इनजोर देवुळि वेहता.
5 अद्रमलेह्काने इंजेके वने देवुळि दया कीस आचिस तासताह्कु माट उच्वुरे यहुदि लोकुरोम किर्स्तुन विस्वस कीतोरोम मह्नोम.
6 माट कीतव बेसताङ कबस्किन ऊळिस आयो, मति अद दया कीताह्के तान विस्वस कीयलाहि उच्वुरिन आचता. मावाङ कबस्किन ऊळिस आचता इतेके, देवुळता पिसमुळ माक कमय कीतप दोर्कालि, ताना दयाता पोल्लो आयो आवालि.
7 इंजेके ओरा इद्रम आता: वेल्लाटोर इस्रयेल लोकुर देवुळता मुनेह सेतेमतोर आयलाह ऊळतोर, मति आया पग़वोर. देवुळ आचतोर उच्वुर इस्रयेलतोर सेतेमतोर आतोर; पिसतोरिन बार ताना पोल्लोतुन केंजवाह कैंगम आनाह विळ्सता.
8 वेर कैंगम आयवालोरा लोप्पा देवुळता सास्त्रमतगा इद्रम रासतद मन्ह्ता: देवुळ ओरिन पका उस्कंडते मतप लेह्का कीस तासता. अदिह्के ओर कोंडाङ मन्जाय ताना सेतेमतुन ऊळ पग़वोर, केव्क मन्जाय ताना सेतेमता पोल्लोतुन वेनदा पग़वोर. नेंड एवनाह वेर अहे मन्ह्तोर, इनजोर रासतद मन्ह्ता. अद्रमलेह्काने आता.
9 दाविद राजाल वने इदे पोल्लोतुन वेहतोग़; ओग़ तना कोटुलतोरा पोल्लोतुन वेहतह्पा इद्रम इतोग़:
“ए देवुळि! ओय्कता वदतगा दोम्क्ने एग़्कतप लेह्का,
ओर सुकमते गाटो तिनदकल इनदह्पा, ओरा पोग़ोन तिपल वास अरयि.
ओर कोदुर ईसि, बोंदातगा अरयिर,
ओरा पापमता बूति ओरिह्क दोर्कि.
10 देवुळता सेतेमतुन ऊळ पग़वाह ओर गंगाते मनिर.
मोताते ओरा मोळ्ह्कोग़ अमेसा वग़्ङिस मनि,”
इनजोर इतोग़.
11 पया इस्रयेलतोर यहुदिर किर्स्तुन विस्वस केवस्के देवुळतग्डाहि अमेसा-अमेसातुह्क एग़तोर इनजोर नना इनोन. अद्रम आयमाकि वने! यहुदिर किर्स्तुनाङ केंजवाह्कु देवुळता पिसमुळ यहुदि आयवोरगा एवता. इदिन ऊळिसि यहुदिरा जीवा कर्विसाय नयगा वायिर, इनजि देवुळता विचर मन्ह्ता.
12 ओर किर्स्तुन पास्कतद पापम कीताह्कु, दुस्राङ जातिनोरिह्क देवुळता बर्कत दोर्कता, अह इतेके यहुदिर बेस्के किर्स्तुनेके पूरा मलयनुर, अस्के इंजेटदिह्काय वीळिसि दुनियामेटोरिह्क बेचोनो वेल्ला बर्कत दोर्कग़ा!
उच्वुर तेला यहुदिर विस्वस कीयनुर इनजोर पोलु आसा कीस्तोग़
13 यहुदि आयवोर विस्वसिरिर! इंजेके नना मीक वेहतलाह आतन: बेसता कबुर यहुदि आयवोरगा ओम इनजि देवुळि नाक बळयि इनजोर मियगा लोहता. इद पका बेरा सेवा इनजोर कह्टेम कीय्ह्नन.
14 इद्रम कीस नना नावाय यहुदि जाततोरिन जीवा कर्वनाह कीसेवेनन, अस्के मियगा मनदनद बर्कततुन ऊळिसि ओर उच्वुर तेला किर्स्तुन विस्वस कीसि पिसिर.
15 इतेके देवुळि यहुदिरिन जेक कीताह्कु, दुनियामेटोर लोकुरिह्क देवुळता संगे कलियलाह दोर्कता. इतेके इंजेके अद ओसोवने यहुदिरिन तनगा एरे कीयग़ा, अस्के अद बेचोन गिर्दाता पोल्लो आयग़ा! डोलतोर ओसो जीवा अरतप लेह्का आयग़ा.
16 इह केंजाट, कोडि इनजि इचुने ईतेकाय, पूरा अनम देवुळताय आंदु. ओसो मराताङ मडाङ देवुळता इतेके तानाङ कांदाङ वने देवुळताङे आंदुङ. अद्रमे यहुदिराङ तादोर-बाबोरिन देवुळ आचताह्कु, ओरा जालपिल वने देवुळता लोकुरे मन्ह्तोर.
17 यहुदिर देवुळता वाळुमतगा ओग़्सतद मराताङ कोमाना लेह्काडोर आंदुर. मीट यहुदि आयवोरिर टुटाता मराताङ कोमाना लेह्काडोरिर. ओग़्सतद मराताहि वळ्गा कोमान एळयिस अर्हतप लेह्कान, देवुळि विस्वस केवोर यहुदिरिन पोहता. पोहचि टुटातग्डाहि कोमान तचि अविस्कना जागातगा जोळे कीतप लेह्का, देवुळि मीकु ओरगा कलियिह कीता. अह आसि मुनेताङ कोमाङ आयिङ ओसो जोळे कीतव कोमाङ आयिङ, इव सबेटव उंदिय मराताङ मडाङ एग़ गुंजनाह्के पिसिह्ताङ.
18 अदिह्क मीट जोळेम आतोर यहुदि आयवोरिर, देवुळ एळयिस पोहतोर यहुदिरिन पास्कमाट. मीक पास्क वसनेके इद पोल्लोतुन सीता कीम्ह्टु: कोमाङ मडानेनाह्क एग़ गुंजोङ, मति मडाङे कोमानेनाह्क एग़ गुंजिह्ताङ.
19 मति मीट इनेरिर, “माक जागा कीयलाह कोनि, देवुळि अव कोमान एळयिस पोहता” इनजोर इनेरिर.
20 नना वेहतह्नन, निटमे! मति इद पोल्लोतुन सीता कीम्ह्टु: ओर विस्वस केवाह्के देवुळि ओरिन एळयिस पोहतप लेह्का कीता, मति मीट विस्वस कीताह्के मीक कलियिह कीता. अदिनेनाह्क पोंगसोर तिरियमाट! देवुळतुह्क रेयिस मन्ह्टु.
21 देवुळि ओग़्सता मराताहि कोळ्सतव कोमान वने तासवा एळयिस पोहता इतेके, मीट टुटाताहि ततव कोमाना लेह्काडोरिर, मीट विस्वसतुन विळ्सतेके मीवा बह आयग़ा?
22 इद ऊळाट, देवुळि दया कीयनद वने आंदु, सिक्सा ईयनद वने आंदु, इद पोल्लोतुन सीता कीस ऊळाट! विस्वस केवा तानाङ केंजवोरिन सिक्सा ईता. मति मीवा पोग़ोन बार दया कीता. मीट विस्वस कीसोर अतेकेने अद मीक दया कीसोरेन मनदग़ा. मीट विस्वसतुन विळ्सतेके मीक वने एळयिस पोहचीयग़ा.
23 अद्रमे देवुळि एळयिस पोहतविन ओसोवने मरातगा जोळे कीया पग़यह्ता; अदिनेनाह्क यहुदिर वने देवुळतेके मलसि किर्स्तुन विस्वस कीतेक अचोन, देवुळि ओरिन ओसो तना लोकुर कीया पग़यह्ता.
24 मीट यहुदि आयवोर विस्वसिरिर इतेके टुटाता मराताहि एळयतव कोमाना लेह्काडोरिर आंदिर, मति यहुदिर बार ओग़्सतद मराताङ कोमाना लेह्काडोर आंदुर. मीक देवुळि तना लोकुरगा कलियिह कीता, इतेके सुरुमुनेताहि देवुळता लोकुर मतोर यहुदिरिन तनगा ओसो वने मल्हच ततना, इदु देवुळतुह्क ओसोय अल्को पोल्लो आंदु! अदिनेनाह्क विस्वस केवोर यहुदिरिन पास्किसि पोंगसोर तिरियमाटु.
सबे इस्रयेल लोकुर पिसनुर
25 मावोर विस्वसिरिर! माटे पका तेल्वतोरोम इनजि मीट पोंगनदायो इनजोर, देवुळि इंजेके इस्रयेलतोरा लोप्पा पुन्पिह कीतद इद पोल्लोतुन मीक वेहतलाह आतन: यहुदि आयवोर बेच्वुर किर्स्तुन विस्वस कीयनुर इनजोर देवुळि विचर कीता, अच्वुर कतमतोर देवुळतेके वानाह्जोम उच्वुर इस्रयेल मन्कलोरा बुदि देवुळताङ केंजवाह कैंगम मनदग़ा.
26 मति ताना पया सबे इस्रयेल लोकुरिन देवुळि पिसिह कीयग़ा. इदे पोल्लो वेल्लाङ वर्साना मुने अद वेहच मता:
नना लोहवाल विळ्सिह केवाल येरुसलेमता सियोन मेटाताहि वायनोग़.
ओग़ नावा इस्रयेल लोकुरा पापि बुदतुन मायपिह कीयनोग.
27 नना ओरा संगे मुने करल कीतपु,
ओरा पापमतुन मापि कीसीकन,
इनजोर सास्त्रमते रासतद मन्ह्ता.
28 इंजेके वेल्लाटोर इस्रयेल लोकुर बेसता कबुरतुन नमवाह्कु, देवुळि ओरिन कोटुलतोर इन्ह्ता. ओर नमवाह्कु इद बेसता कबुर मियगा वाता, इद मीक पाय्दा आता. मति देवुळ ओरा पेदामुय्तोर अब्रहम, इसक, याकुब वेरिन आचताह्कु इंजेक वने इस्रयेलतोरिन जीवा कीस्ता.
29 बाराह्क इतेके, “मीवा जालपिलतुन नना नावा लोकुर आयना इनजि आचतन, ओरिह्क बर्कत ईकन,” इनजि देवुळि ओर पेदामुय्तोरिह्क करल कीस मता, अद पोल्लोतुन देवुळि बेस्केन माग़्ङो.
30 यहुदि आयवोर विस्वसिरिर! मीट मुने देवुळता पोल्लोतुन केंजवा मतिर, मति यहुदिर ताना पोल्लोतुन केंजवाह्कु, देवुळि मीक सीता कीसि मीवा पोग़ोन दया कीता.
31 मीक सीता कीसि दया कीतप लेह्कान, ओर यहुदिरिन वने उंद दिया सीता कीसि दया कीयग़ा.
32 इद्रमलेह्का “यहुदिर आयिर, यहुदि आयवोर आयिर, सबेटोर नावा पोल्लोतुन केंजवाह तमाय कैंगम बुदते ताकिर, अस्के सबेटोरिन सीता कीसि दया कीकन” इनजोर देवुळता विचर मन्ह्ता.
पोलु देवुळतुन जोहर कीस्तोग़
33 देवुळता बुदि बेचोन बेरा मन्ह्ता, अद पुनवद पोल्लो बेदे इले! अदिना लेका-जोका मुर्तिय कीया वावो. अद बेद्रम नेयम कीस्ता, बह बह कीस्ता इदिन बोग़े पुनदा पग़वोग़.
34 देवुळताङ विचर्किन बोग़ पुनदा पग़यह्तोग़?
तान बोग़ाय बुद वेहता पग़यह्तोग़ा?
35 बोग़ाय देवुळतुन नाक मल्हच ईम इनदलाहि,
मुने बातालाय करा ईस मतोग़ा? एवोग़!
36 बाराह्क इतेके, सबे देवुळतग्डाहिये पुटटाङ, तानाय कयदे सबे ताकिह्ताङ, तानेनाह्के सबेटव मन्ह्ताङ. तान्के अमेसा-अमेसातुह्क जोहर आयि! आमेन.