10
येसु तनाङ बारा बळयिरिन लोहतह्तोग़
(मार्कल 3:13-19; 6:7-13; 13:9-13; लूकाल 6:12-16; 9:1-6; 21:12-17)
1 अस्के पया येसु माक कग़यवालोरिन, बारा मांतुन एरे केयतोग़. केयिसि माकु देयह्क-बूताह्कु पूंडलाहि, रोगह्किन-दुकह्किन सव्रे कीयलाहि अदिकर ईतोग़.
2 माट बळयिरोम बारा मन्कलोराङ पेदिर्क इह मताङ: मुने सिमोन (ओने पत्रु इंदुर) ओसो आंद्रेयाल, वेर तमोग़ इर्वुर मतोर; पया जेबेदिनाङ इर्वुर मग़्कु याकुब ओसो योहन;
3 पिलिप ओसो बार्तोलोम; तोमाल ओसो नना (नना सिद्वा एनवाल मन्ज तेला); अल्पुना मग़ि याकुब ओसो तदु;
4 सिमोन (ओग़ रोम सर्करता अडम पार्टितोग़) ओसो केर्योत नाटेनोग़ यहुदाल (वेग़े आक्रिते येसुन कोंटेतोरा कयदे पोसीतोग़). माटे येसुनाङ बारा मांदि बळयिरोम आंदोम.
5-6 माकु येसु इद्रम काग़्हच लोहतोग़: “मावा इस्रयेल देसेमतोर इतेके लेसताङ गोरेनलेह्का मन्ह्तोर, अदिह्के ओरकेने मीट अन्ह्टु; मति ओरिन विळ्सिसि दुस्राङ देसेह्कनाहि वातोरके मात्रम अनमाटु, अहे सामरिया पटटाङ नाह्कने नेङमाटु.
7 मीट अनेके ‘देवुळता राजेम कीयनाङ दियाङ एवताङ,’ इनजोर वेहचोर अन्ह्टु.
8 रोगह्लोरिन सव्रे कीसोर, हातोरिन जीवा अर्हचोर, मोंडरोगमतोरिन सुद्रे कीसोर, देयह्किन पूंडसोर अन्ह्टु. मीक नना पुनेमते अदिकर ईतन, अहे मीटवने पुनेमते दुस्रोरा सेवा कीम्ह्टु.
9 “अनेके मीवाङ नंडिने बंगरताङ, वेंटाङ, रागताङ कोताङ बह तासमाटु.
10 अहे जोर्का कांजमाटु, पिसवग़ जगा, पिसवग़ एल्पुसक, ओसो कयदे डुडि इविन ओयमाटु. मीट देवुळताय बूततोरिर इतेके लोकुर मीक दर्मम कीयना गावले.
11 मीटु बेदाय नाटे दाकिर, अस्के अगा बोग़ नेह्ना मन्ह्तोग़ ओना पता कीम्ह्टु. ओसो मीट पेसिस अनाह्जोम ओनगाने मन्ह्टु.
12 ओसो लोते नेङनेके ‘मीक सुकम आयि,’ इद्रमता बर्कत ईम्ह्टु.
13 अद लोतोरु बेस मीक जागा-पग़्सा कीयलाह गिर्दा आतोर इतेके मीवा वळ्ह्कतद बर्कत ओरगा मंदग़ा. मति ओर गिर्दा आयोर इतेके देवुळता बर्कत ओरगा मनो आयग़ा.
14 बेद नाटेनोर मीक एरे केवोर, मीवा कबुरतुन केंजोर, अद नाटेनाहि पेसनेके, देवुळि अद नाटेनोरिन जेक कीस्ता, इदिन तोहतलाह इनजि मीट मीवाङ काल्कना दुरातुन अगान दुल्पाटु.
15 इह केंजाट, नना वेहतह्नन, सोदोम-गोमोरा अव नाह्कनोरिन देवुळ ओरा लाग्वाङ कबस्कनेनाह्क मुने सिक्सा ईसि बूळे कीता. तान वीळिसि मीक एरे केवोर इव नाह्कनोरिनु नेयमता आक्रि दियाते देवुळि वेल्ला सिक्सा ईयग़ा.
16 “इद केंजाट, लोळ्ङानगा गोरेन लोहतपु नना मीक दुनियाते लोहतह्नन. अदिह्कु मीटु तरस्कना लेह्का सत्रल मन्ह्टु मति परेवाङ मतप नाळेह केवोरा लेह्का ओसो मन्ह्टु.
17 मति मन्कलोराहि उसरते मन्ह्टु. ओर मीकु कचिर्कनगा ओसीयनुर, तमाङ पार्तनाताङ लोह्कने मीक नल्ह्तनुर.
18 ओसो नाक नमताह्कु मीकु सर्करता मुनेह अहे राजालोरा मुनेह निल्पिह कीयनुर. अस्के मीटु ओरिह्कु ओसो यहुदि आयवोर दुस्रा जाततोरिह्कु नावा लोप्पा साक्सि वेहतकिर.
19-20 बेस्के मीक ओरा कयदे ईयनुर अस्के मीट मीवाय बुदते वेहवालोरिर आयविर आयकिर, मति मीवा देवुळबाबाना जीवा मीकु वळ्ह्कलाह बुदिङ ईयग़ा. अद ईतस्के, बेद बह वळ्ह्कना इद मीक अदे गट्काते एर्का आयग़ा. अदिह्के तेना लोप्पा मुनेन मीट आलिह केमाटु.
21 “विस्वसलेवोग़ तमोग़ बार तना विस्वसि दादानु ओसो विस्वसलेवोग़ तपे बार तना विस्वसि मग़िनु हव्कलाहि पोसीयनुर. विस्वसलेवोर मग़्क-मयस्क विस्वसिर तलोग़-तपेरा पेटळ तेदिसि ओरिन हव्कलाह वेहतनुर.
22 ओसो नावाय पेदिर मीक अरताह्कु दुनियातोर मीकु कोटुल कीयनुर, मति आक्रि एवनाह बोर दीरा पोस मन्ह्तोर, देवुळि ओरिन पिसिह कीयग़ा.
23 उंद नाटे बेस्के ओर मीक बोबा कीयनुर अस्के दुस्रा नाटे मीट पटादुळ विताटु. इह केंजाट, नना वेहतह्नन, इस्रयेलतोराङ सबे नाह्कने मीट नावा कबुर वेहतलाह मारिह कीयना मुनेने, नना, माने-मन्कना नडुम पुटटोनन देवुळदीपताहि मल्स वायकन.
24 “कग़यवाल तना गूरुह्क बेरोग़ आस्तोग़ा? अहे साकुर केवाल तना माल्काह्क बेरोग़ आस्तोग़ा?
25 आयो, कग़यवाल गूरुनलेह्का ओसो ओर्युलतोग़ माल्कानलेह्का आयना इचोने ओन्क बेसु. नना लोता माल्कनन मनजि नाके ओर देयह्कना मुक्याल इन्ह्तोर, मीट इतेके लोता मन्कलोरिर इनजि, मीक बेचोन एक्वा तिपल कीयनुर, इदिन सीताते तासाटु!
26 ओर तिपल कीयनस्के ओरिह्क रेयमाटु. सबे मकिह कीतव पोल्लोङ पङम्ने आयनुङ, इद्रमता वेला वायग़ा.
27 बेद नना मीक ईकळते वेहतह्नन, अदिन मीटु वेह्चते लोकुरा मुनेह पिंगम-पंगम वेहाटु. ओसो बेव नना मीवा केवदे वेहतह्नन, अविनु लोता पोग़ोन निचि, पोकुर कीम्ह्टु.
28 “बोर मेंदुदुन हव्क पग़यह्तोर मति जीवातुन इट पग़वोर, ओर मन्कलोरिह्क मीट रेयमाटु. ओरिन रेयवा, जीवातुन ओसो मेंदुदुन इव रेंडिन आसि पिववद किसबटटा सिक्सातगा बूळे कीया पग़यनद देवुळि, तान्के रेयाटु.
29 ऊळाटु, कोळ्का पिटेह्कु बाता बिसद मन्ह्ताया? इले, तेला मति मीवा देवुळदीपतोग़ बाबाना मर्जिलेवा अविस्कनग्डाहि उंदवने पोग़ोटाहि इळ्न अरसि डोलो.
30-31 मति मीट इतेके वेल्लाङ कोळ्का पिटेह्काय वीळिस देवुळबाबाना मुनेह एक्वा मोलातोरिर. ओसो मीवा लोप्पा कतम पुन्ह्तोग़, मीवा तलातगा बेचोक केल्क मन्ह्ताङ, इद वने ओग़ पुन्ह्तोग़. मीकु देवुळता मर्जिलेवा बातय आयो आयग़ा, अदिह्के मीटु ओर तिपल केवालोरिह्क रेयमाटु.
32 “बोरु लोकुरा मुनेह नाक विळ्सोर, ओरिन नना वने आक्रि नेयमता वेलाते नावा देवुळदीपतोग़ बाबाना मुनेह ‘वेर मावोरे!’ इनदकन.
33 मति बोर नाकु लोकुरा मुनेह ‘पुनोन’ इनदनुर, ओरिनु नना वने नावा देवुळदीपतोग़ बाबाना मुनेह ‘वेरिन पुनोन,’ इनदकन.
34 “ ‘वेग़ इद बूमते लोकुरिह्क सितुर कीयलाह वातोग़,’ इद्रम नावा लोप्पा इनमाटु. बाराह्क इतेके नना सितुर कीयलाह वावोन मति नना वाताह्के नाक नमवालोरु, नाक नमवोरु, वेरा नडुम जग्ळम पुटग़ा.
35 इतेके नयेनाह्के तपेना संगे पेकाल, तलिना संगे मयळि, अहे आतोना संगे कोयळि इद्रम वेर कोंटेङ आयनुर.
36 लोताय मांदि तमतमाये कोंटेनोर आयनुर.
37 बोर नाकाय वीळिसि तमाङ तलोग़-तपेरगा एक्वा जीवा कीस्तोर, ओर नावाङ कग़यलाह ओप्पोर. ओसो बोर नाकाय वीळिसि तमाङ मग़्क-मयस्कनगा एक्वा जीवा कीस्तोर, ओरवने नावाङ कग़यलाह ओप्पोर.
38 ओसो बोर तमा हव्कनागुटा कांजतप नावा पेदिर ओरिह्क अरताह्कु कोंटेङ, अड्सन्क आपलाह तयर आयोर, ओरवने नावाङ कग़यलाह ओप्पोर.
39 बोर इंजेके तमा कुदता जीवातुन पिसिह कीयलाहि ‘येसुन पुनोन,’ इन्ह्तोर, ओर आक्रिते बूळेम आयनुर. मति बोर नयेनाह्कु सबे पोहतह्तोर, ओरिह्क देवुळि पूना जीवा ईयग़ा.
40 “बोर मीक एरे कीस्तोर, ओर नाक वने एरे कीतप मन्ह्तोर; ओसो बोर नाक एरे कीस्तोर, ओरु नाक लोहवान बाबान वने एरे कीतप मन्ह्तोर.
41 ओर्विन देवुळता कबुरतोन ‘कबुरतोग़,’ इनजि बोर बेस ऊळिह्तोर, ओरिह्कु देवुळतेनाह कबुरतोनाय पाय्दा दोर्कग़ा. ओसो ओर्विन सेतेम मन्कन ‘सेतेमतोग़,’ इनजि बोर बेस ऊळिह्तोर, ओरिह्कु सेतेमतोनाय पाय्दा दोर्कग़ा.
42 इह केंजाट, नना वेहतह्नन, मियग्डाहि ओर्विह्क उड्लोन्क इंका ‘येसुनाङ कग़यवाल,’ इनजि उंद गिलसमेंड दळ्ङता एग़तेला उंडलाह बोर ईयनुर, ओरिह्कु इद दर्ममता पाय्दा देवुळताहि निटमे दोर्कग़ा.”