9
1 इनजि ओसो ओरिन इतोग़, “इह केंजाट, सेतेमते नना वेहतह्नन, मियग्डाहि उय्तुर नावा संगे मनवालोरिर, हायनामुनेन देवुळि तना लावते राजेम निल्पिह कीयनदिन मीट ऊळकिर,” इनजोर वेहतोग़.
येसुना रूप मिळ्न्दिह्ता
2 आरुङ दियाङ आतापया, पत्रु, याकुबि, योहनि, वेर मुवुरिन येसु तना संगे पोसि अलग उंद बेरा मेटापोग़ोन ओतोग़. अगा अतस्के ओर ऊळनेके, ओना रूप मिळ्न्दता.
3 ओनाङ गेंदेङ इचोन वेडिसि तिर्मिळ्सिंदुङ इतेके, इद दुनियाते बोग़े गेंदेङ उकवाल वने अचोन वेडिह कीया पग़वोग़, अचोन वेडिस मताङ.
4 अस्के मोसा मुय्तोग़, एलिया मुय्तोग़, वेर इर्वुर मुनेतोर देवुळता कबुरतोर, येसुना संगे वळ्ह्कनदिन ओर ऊळतोर.
5-6 ऊळिसि पत्रु, याकुबि, योहनि वेर पका रेयतोर, पया पत्रु, “सामि, माट इगा मह्नल इतेके बेस आता, माट इगा मूंड मंडाङ पंडकोम: उंदि नियेनाह्कु, उंदि मोसा मुय्तोनेनाह्कु, उंदि एलिया मुय्तोनेनाह्कु,” इतोग़. इव पोल्लोङ पत्रु बाताल वळ्ह्किंदोग़ अद तना तन्ह्के तेळियो.
7 अद्रम इनेकेने ओरा पोग़ोन वेल्लाय उंद मोयुल वासि ओरिन मुचता, मुचतस्के अद मोयुलताहि उंदि इद्रमता लेङ केंज वाता, “वेग़ नावा जीवा कीतोग़ मग़ि आंदोग़, वेनाङे मीट केंजसोर मन्ह्टु,” इता.
8 पया चट्नेन वेर मुवुर इके-अके ऊळतोर, मति अगा तमा संगे येसुन विळ्सिस बोग़े बह दिसोग़.
9 पया मेटाताहि रेगनेके वेर मुवुरिन येसु उकुम ईस वेहतोग़, “माने-मन्कना नडुम पुटटोनन डोलिस मनजि ओसो तेग़्कनाह्जोम मीट नेंड बेद ऊळतिर, तान बोन्के बह वेहमाटु,” इतोग़.
10 इतस्के ओर अद पोल्लोतुन सीतात तासतोर, मति “डोलिस मनजि ओसो तेग़्कनदिना अर्तम बाताल आस्ता,” इनजोर तम-तमाय वळ्ह्किंदुर.
11 पया ओर येसुन ताल्ह्कतोर, “गूरु! देवुळ लोहवाल राजल वायनामुनेने, ओना अग़दुन ओपे कीयलाह एलिया मुय्तोग़ मल्स वायनोग़ इनजोर सास्त्रमगूरुर बाराह्क इन्ह्तोर? नीवा अग़दुन ओपे केवाये एलियाल वातदिन माट इंजेकेन कुदि ऊळतोम अले!” इनजि ताल्ह्कतोर.
12 येसु ओरिन इतोग़, “एलियाल मुने वासि सबेटविन बेस ओपे कीयलाह वास्तोग़ निटमे! मति नना उंद पोल्लो वेहतह्नन, ‘माने-मन्कना नडुम पुटटोग़ पका तिपल एतनोग़, लोकुर ओन पास्कनुर,’ इनजोर वने रासतद मन्ह्ता. अद पोल्लोतुन वने मीट सीता कीयना.
13 मति नना मीक वेहतह्नन, एलियाल इतेके वातोग़े, तेला मति सास्त्रमतगा ओना लोप्पा रासतप लेह्कान, तम्ह्क बह विचर वाता, अहे ओर ओनु तिपल कीतोर,” इनजोर इतोग़.
देयम पोयतोन येसु सव्रे कीस्तोग़
14 अद्रमे ओर नाल्वुर आसि मेटाताहि रेगिसि दुस्रोर कग़यवालोरगा वातोर. वासि ऊळनेके ओरगा वेल्लाय मुल जमा आस मतोर, ओसो सास्त्रमगूरुर ओरा संगे वळ्ह्किंदुर.
15 अस्के येसु वायनदिन ऊळिसि सबेटोर बामतोर. बामिसि ओनगा वितिस मनजि जोहर कीतोर.
16 पया येसु तनाङ कग़यवालोरिन ताल्ह्कतोग़, “ओरा संगे मीट बाताङ वळ्ह्कलाह आतिर?” इनजोर ताल्ह्कतोग़.
17 अस्के मुडाहि ओर्वोग़ मन्कल इद्रम केयतोग़, “गूरु! निमा नावा मग़िन सव्रे कीकिन इनजोर नना नियगा ओन ततन. ओन देयम पोयता, अदिह्क ओग़ वळ्ह्क पुनोग़.
18 अद ओन पोयतेक अचोन नेल उकिह्ता. अस्के ओना तोडटुह्क बोमुल पेसिह्ता, पल्क वने कोग़किह्तोग़ ओसो मेग़्किह्तोग़. इद देयमतुन पेहतलाह नीवाङ कग़यवालोरिन वेहतन, मति ओरा संगे आया पग़वो,” इनजोर वेहतोग़.
19 अस्के येसु इतोग़, “ए विस्वस लेवोरिर, मीवा संगे बेचानाह नना मंदकन! मियेनाह्क नाक कयर वास्ता. अले ओग़ पेकान नयके ताट,” इतोग़.
20 इतस्के ओग़ पेकान ओनगा ततोर, ततस्के देयम येसुन ऊळताहे ओग़ पेकान तेल्हचि नेल अर्हचीता. पया ओग़ तोडटुह्क बोमुल पेहचोरे दोळ्गिंदोग़.
21 येसु पेकाना तपेन ताल्ह्कतोग़, “वेग़ बेस्केडाह इद्रम आस्तोग़,” इतोग़.
22 इतस्के पेकाना तपे इतोग़, “उड्लस्केडाहिये पोयता, इद देयम वेना जीवा तिनदलाह बेस्के किसतगा, बेस्के एतगा अर्हचीस्ता. मति निमा बेदाय कीया पग़तेके माक जीवा लोपिसि, मावा पोग़ोन दया कीम,” इनजोर इतोग़.
23 येसु ओन इतोग़, “ ‘निमा बेदाय कीया पग़तेके कीम’ इनजोर बाराह्क इह्निन? देवुळतुन विस्वस केवाल मन्कह्क सबे आया पग़यह्ता,” इतोग़.
24 इतस्के ओग़ पेकाना तपे कनिर्क पेहचि, “सामि, नना विस्वस कीय्ह्नन, मति इंका पका विस्वस कीनाह नाक तोळ ईम,” इनजोर केयतोग़.
25 पया लोकुर वित वासि अगा जमा आयनदिन येसु ऊळतोग़. ऊळिसि “एय वेग़ पेकान एवडाल, मूकाल कीतद देयमतिन, नना नीक उकुम ईय्ह्नन, वेग़ पेकानाहि पेसिस अन. ओसो बेस्केन ओनगा मल्स वामा,” इनजोर दगा ईतोग़.
26 ईतस्के देयम केयिसि, ओग़ पेकान पका तेल्हचि पेसता. पेसतस्के पेकाल डोलतप लेह्का आतोग़, वेल्लाटोर लोकुर “डोलतोग़,” इंदुर.
27 मति येसु ओना कयदुन पोसि तेहच निल्पिह कीतोग़. अस्के ओग़ पेकाल नितोग़.
28 पया येसु तनाङ कग़यवालोरा संगे तमा जागातगा वातोग़, वातस्के बोरे लेवस्के कग़यवालोर येसुनगा वासि ताल्ह्कतोर, “माट अद देयमतुन बह पूंड पग़वोम? गूरु!” इतोर.
29 इतस्के येसु ओरिन इतोग़, “देवुळतुन पार्तना कीतेकेने इद्रमताङ देयह्किन पूंड पग़मुळ आस्ता, इलवेके पग़नाह आयो,” इनजोर इतोग़.
तना हामुरता लोप्पा ओसो येसु वेहतह्तोग़
30-31 अद्रमे पया येसु ओसो ओनाङ कग़यवालोर अद जागातुन विळ्सिसि अतोर. अनेके ओर गालिल पटटुह्क अतोर. दायह्पा तनाङ कग़यवालोरिन काग़्हतना मताह्कु तमा दायनद पोल्लो बोरिह्के तेळियना आयो इद्रम येसुना विचर मता. पया येसु तनाङ कग़यवालोरिन इतोग़, “माने-मन्कना नडुम पुटटोनन, नाकु कोंटेतोरा कयदे पोस ईयना मन्ह्ता, ओर नाक हव्कनुर, मति नना मूंड दियाने ओसो जीवा अरयकन,” इनजोर इतोग़.
32 मति येसु वेहतद पोल्लो ओरिह्क तेळियो. अद पोल्लोतेनाह्क ओन ताल्ह्कलाह वने ओर रेयिन्दुर.
देवुळता राजेमते बेरोग़ बोग़?
33 अद्रमे पया ओर कापेर्नाग़ वातोर, वासि तमा जागातगा अतोर. अतस्के येसु ओरिन ताल्ह्कतोग़, “अग़दे वानेके बाताङ कट्लाङ आंदिर?” इतोग़.
34 अस्के “माट बारा मन्कलोरग्डाहि सबेटोरिह्क बेरोग़ बोग़,” इनजोर ओर अग़दे वानेके कट्लाङ आस मतोर. अदिनेनाह्क ओर बाताले वळ्ह्कोर केमेन आस मतोर.
35 पया येसु उदतोग़, उदिसि बारा कग़यवालोरिन तना एरे केयिसि इद्रम इतोग़, “बोन्काय सबेटोरिह्क बेरोग़ आयलाह ऊळिह्तोग़, ओग़ बुदते सबेटोरिह्क उड्लोग़ आयेग़ ओसो सबेटोरा सेवा केवाल आयेग़,” इतोग़.
36 इनजि ओर्वोग़ उड्लोग़ पेकान तचि ओरा नडुम निल्पिह कीतोग़. पया ओन ओग़्ङिसि ओरिन इतोग़,
37 “बोग़ु, वेग़ उड्लोग़ पेकाना इद्रमतोग़ ओर्वोग़ पेकानाय नावा पेदिरते एरे कीस्तोग़. ओग़ नाक एरे कीतपे ओसो बोग़ु नाक एरे कीस्तोग़, ओग़ सिरप नाके आयो, मति नाक लोहतोन वने एरे कीस्तोग़,” इनजोर इतोग़.
38 इतस्के योहन येसुन इतोग़, “गूरु, नीवा पेदिरते ओर्वोग़ मन्कल देयह्किन पेसिह कीयह्पा माटु ऊळतोम. ओग़ मावा तोळतोग़ आयवाह्कु, माट ओन रोमिह कीतोम,” इनजोर इतोग़.
39 इतस्के येसु इतोग़, “बोग़े देवुळता लावताङ कबस्क नावा पेदिरते कीसि, चट्नेन नावा अडम वळ्ह्क पग़वोग़. ओन मीट रोमिह केमाटु.
40 बह इतेके बोग़ माक विरुद केवोग़, ओग़ मावोग़े आंदोग़.
41 इह केंजाट, नना मीक सेतेम वेहतह्नन, मीट किर्स्तुनाङ कग़यवालोरिर इनजि उंद गिलसमेंड एग़तेला उंडलाह बोर ईयनुर, ओरिह्क इद दर्ममता पाय्दा देवुळताहि निटमे दोर्कग़ा.”
पापमता लोप्पा येसुना काग़्हमुळि
42 “बोग़ आयि उड्लोर पेकोरा लेह्का नाक नमवालोरग्डाहि बोन आयि, ओना नयगा मतद विस्वसतुन विळ्सलाहि पापम कीनाह कीयना मुने, ओना वेळेटगा पका पूहतद जेता बंडातुन दोहचि, ओन सम्दुरतगा वाटिस ईतेकतेला बेसे आयग़ा.
43 केंजाट, नीवा कय नीवा विस्वसतुन रोमिह कीतप कीतु बार इतेके, कयदुन बोग़ाय डायिस पोह्चीतेक बेस आवालि, इद्रम निमा येसुनगा विस्वसतुन विळ्सोन, इनजि जिद कीमु. बाराह्क इतेके नीवाङ रेंड कय्क मनजि देयमदीपता बेस्केन पिववद किसबटटा सिक्सातगा दायना वाटो, कोलल आसि अमेसाता पिसमुळते दायना, इदे नीक पाय्दाता.
44 (देयमदीपतग्डाङ पुळ्क बेस्केन डोलोङ ओसो अग्डा किसु बेस्केन पिववो.)
45 अहे नीवा काल नीवा विस्वसतुन रोमिह कीतप कीतु बार इतेके, कादुन बोग़ाय डायिस पोह्चीतेक बेस आवालि, इद्रम निमा येसुनगा विस्वसतुन विळ्सोन, इनजि जिद कीमु.
46 बाराह्क इतेके नीवाङ रेंड काल्क मनजि देयमदीपता सिक्सातगा दायना वाटो, कूटल आसि अमेसाता पिसमुळते दायना, इदे नीक पाय्दाता.
47 ओसो नीवा कोंडा नीवा विस्वसतुन रोमिह कीतप कीतु बार इतेके, कोंडातुन बोग़ाय पेग़्ह्चीतेक बेस आवालि, इद्रम निमा येसुनगा विस्वसतुन विळ्सोन, इनजि जिद कीमु. बाराह्क इतेके नीवाङ रेंड कोंडाङ मनजि निमा देयमदीपता सिक्सातगा दायना वाटो, उंदिय कोंडा मनजि अमेसाता पिसमुळते दायना, इदे नीक पाय्दाता.
48 देयमदीपतग्डाङ पुळ्क बेस्केन डोलोङ ओसो अग्डा किस बेस्केन पिववो.
49 “किसु सबे सामनतुन वेडिह कीस्ता, अद्रमलेह्काने तिपल्क सबेटोरिन पवित्र कीस्ताङ. इद पोल्लो देवुळतुह्क बातय मोक ईयह्पा तान पवित्र कीयलाह ताना पोग़ोन ओवुर वाटना लेह्काडा आंदु.
50 ओवुर बेसे मन्ह्ता, मति ओवुरता मिटस बार अता इतेके तान बेद्रम मिटस कीकिर? मीट ओवुरता लेह्का मिटस केवालोरिर मन्ह्टु ओसो ओर्विह्क-ओर्वोग़ कलियिस गूनमते मन्ह्टु,” इनजोर येसु इतोग़.