7
पेदल्कना रिवजता लोप्पा काग़्हमुळि
1 उंद दिया उच्वुर परुसिर ओसो सास्त्रमगूरुर येरुसलेम सहरताहि वातोर. वासि येसुनगा जमा आतोर.
2 अस्के येसुनाङ उच्वुर कग़यवालोरिन तिनदना मुने कळ्वोग़ आतदिन एडलाह कय्क नोग़वाये गाटो तिनदह्पा वेर ऊळतोर.
3 परुसिर ओसो सबेटोर यहुदिर तमाङ तादोर-बाबोर कीतव रीत-रीवज्कना इसबते बेस कय्क नोग़्वा मुर्तिय गाटो तिनोर आंदुर.
4 आटुमताहि वातस्के एग़ मीवालेवा गाटो तिनोर आंदुर. मुनेतोर कीतव रीत-रीवजकना इसबते दळ्यान, एग़ उनडनाङ कसलान, इतुळताङ गंजिन तोमिंदुर. इद्रमलेह्का वेल्लाङे रीत-रिवज्किन नोमिंदुर.
5 अदिनेनाह्क परुसिर ओसो सास्त्रमगूरुर येसुनगा वासि इतोर, “नीवाङ कग़यवालोर मावाङ पेदल्कना मतद रीत-रिवजतुन बह माळोर? वेर तिनदना मुने कळ्वोग़ आतदिन एडलाह तमाङ कय्क बाराह्क नोग़वोर?” इनजि कट्ला कीतोर.
6 पया येसु ओरिन इतोग़, “मीट सोंङ केवालोरा लोप्पा, देवुळि मुने तना कबुरतोग़ यसयाल इनवाना मेटे सास्त्रमते मीवा लोप्पा बराबर वेहच मता: ‘वेर लोकुर तमा तोडटेने नावा मान कीस्तोर, मति वेर नावा पोग़ोन जीवा वाटोर.
7 वेरा मोळ्कनद वने जोले मन्ह्ता, नावा सास्त्रम काग़्हतना पोहचि, तमाङे अडोङ काग़्हतह्तोर.’ इनजोर वेहता.
8 मीट देवुळताङ अडोन माळना विळ्सिसि मन्कलोर कीतव अडोन माळिह्निर,” इनजोर इतोग़.
9 ओसो इतोग़, “मीट मीवाङ मुनेताङ रीत-रिवजतुन नोमसोरे देवुळताङ अडोन माळवा बह तपतिर?
10 इद केंजाटु, मीवा उंद तप नना वेहतह्नन. ‘निमा नीवा तलोग़-तपेरा मान तासा,’ इद्रम सास्त्रमते देवुळता कबुरतोग़ मोसाल वेहतोग़. ओसो ‘बोग़ तना तलोग़-तपेरा मान तासवा ओरा कदर रेहतह्तोग़, ओन हव्कना सिक्सा ईयना,’ इह वने वेहतोग़.
11 मति मीट मात्रम इद्रम इह्निर इतेके, बोग़ाय तना तलोग़-तपेरा पिसवग़तुह्कु ईयनविस्किनु देवुळतुह्क वाटटेके बार आयो, इह्निर.
12 अदिनेनाह्क मन्कल तना तलोग़-तपेन अय केवोग़ आस्तोग़. मीट इद्रम काग़्हचि ओरिन अय कीयलाह एविर.
13 इद्रम मीट मीवाङे रीत-रीवज्क पुटिह कीसोरे देवुळता पोल्लोतुन माय्पिह कीतिर. इद्रमताङ वेल्लाङे कबस्क कीय्ह्निर,” इनजोर इतोग़.
14 अस्के येसु लोकुरिन तनके केयिसि ओरिन इतोग़, “नना इंजेके बार इह्नन, तेन सबेटोर केंजिसि कग़याटु.
15 कय्क नोग़तेकाय, नोग़वेकाय, बेद मन्कना पोटातगा दास्ता, अद ओन देवुळता मुनेह करब केवो. मति मन्कना पोटाताहि बेव पोल्लोङ तोडटुह्क पलते पेसिह्ताङ, अवे ओन करब कीस्ताङ.
16 नावाङ केंजलाह बोन्क गिर्दा मन्ह्ता, ओग़ बेस केंजाटु.”
17 पया येसु मुडुन लोहचि तमा मतद लोन अतोग़. अतस्के ओनाङ कग़यवालोर ओनगा वासि, “कळ्वोग़ता पुन्पिह कीयनद पोल्लोतुन माक तेळियिह कीस वेहा, गूरु,” इनजोर इतोर.
18 येसु ओरिन इतोग़, “मीकाय इंका तेळियोया? बेद मन्कना पोटातगा दास्ता, अद ओन करब केवो.
19 बाराह्क इतेके, मन्कल तिनदनद ओनाङ विचर्कनगा अनो, मति पोटातगा दास्ता, पया पेल्कतेके पेसिह्ता, पुनविर?” इतोग़. इद्रम इनजि सबे तिंडि तिनदलाह पोलिह्ता इतोग़.
20 इनजि ओसो इतोग़, “मति मन्कना लाग्वा वळ्ह्कनदु तोडटुह्क पलत पेसिह्ता, अदु पोटालोप्पाडाहि वास्ता. तानेनाह्के मन्कन देवुळि जेक तासिह्ता.
21 बाराह्क इतेके मन्कना पोटालोपाडाहि पलत वायनवु लाग्वाङ विचर्कु मन्कन साट्याल कीयलाह ओस्ताङ,
22 कललाह वेहतह्ताङ, हव्कलाह ओस्ताङ, सिंड्रि-पोह्डेङ कीयलाह ओस्ताङ, लालुस कीयलाह वेहतह्ताङ, कोंटे कीयलाह वेहतह्ताङ, नाळेह कीयलाह वेहतह्ताङ, लजालेवा करब कबस्क कीयलाह ओस्ताङ, कुळ्सा कीयलाह वेहतह्ताङ, वह्चळ कीयलाह वेहतह्ताङ, पोमाडेङ कीयलाह वेहतह्ताङ, तेल्व लेवव कबस्क कीयलाह वेहतह्ताङ. इवे आंदुङ तोडटाहि पलत पेसनवु.
23 इद्रमताङ सबे लाग्वाव पोल्लोङ कोनि मन्कना पोटालोपाडाहि पेसिह्ताङ. पेसिसि मन्कनु करब कीस्ताङ,” इनजोर इतोग़.
यहुदि आयवद आंचाना विस्वस
24 गालिल पटटाहि पेसिस पया येसु तनाङ कग़यवालोरा संगे सोर-सिदोन एरियाते वातोग़. वासि उंद लोतगा मतोग़, ओग़ु नाक बोरे पुनमाकिर इनजोर विचर कीस मतोग़, मति इद पोल्लो आबुर आता.
25-26 अद नाटे उंद सुरिया पटटा पिनिके एरियाता आंचाळ मता, अद युनानि पोल्लो वळ्ह्किंदु. ताना उड्ला मयानु देयम पोस मता. पया अद आंचाळि येसु वातोग़ इनजोर केंजिसि, ओनगा वाता. वासि ओनाङ काल्क मोळ्कता. अह कीसि, “नावा मयनग्डाह देयमतुन पेसिह कीम, सामि!” इनजोर येसुन अर्जि कीता.
27 अस्के इस्रयेलतोरिन सव्रे कीयलाह येसुनगा बेद लाव मता, अदु दुस्रा जाततोरिह्क ओजो, इदिन तोहतलाह येसु तान इतोग़, “मुने पेकोर पंजिर, बाराह्क इतेके पेकोराङ आरिनु लोताङ नय्किह्क वाटिसीयना बेस आयो,” इतोग़.
28 इतस्के अद येसुन इता, “नीवा पोल्लो निटमे मन्ह्ता, सामि, मति पेकोर तिनदनाङ दळ्यानाहि पोवताङ पेसावर्किन वने लोताङे नय्क तिन्ह्ताङ,” इता.
29 पया येसु तान इतोग़, “निमा नावा पोग़ोन विस्वस कीतिन इनजोर नीवा पोल्लोते तेळियिह्ता, लोन अन! देयमि नीवा मयन विळ्सिस वितता,” इतोग़.
30 अस्के अद आंचाळि लोन वासि, पिला कटुदगा उंजिस मतदिन ओसो देयम वने विळ्सिस मतदिन ऊळता.
येसु एवडा मन्कन सव्रे कीस्तोग़
31 पया येसु तनाङ कग़यवालोरा संगे सोर-सिदोन एरियाताह पेसतोग़. पेसिसि दाकपालिस पटटगाह्क वासि, गालिल सम्दुर कचुल एवतोग़.
32 अचोटेन उच्वुर मन्कलोर ओर्वोग़ एवडान येसुनगा ततोर, ओग़ बोब्ळे वने मतोग़े. तचि “नीवा कयदुन वेना पोग़ोन तासिसि, वेन सव्रे कीम, सामि!” इनजोर येसुन अर्जि कीतोर.
33 कीतस्के येसु ओग़ मन्कन मुडग्डाहि उचुन अबर केयतोग़. केयिसि तनाङ वळ्स्किन ओनाङ केव्कनगा तोग़्किस तेंडटोग़. ओसो तनाङ वळ्स्कनगा उस्किसि ओना वेंजेटुन बोयतोग़.
34 अह कीसि पोग़ोन ऊळिसि पोस नेस्कतोग़, नेस्किसि ओग़ मन्कन तमा पोल्लोते “इप्पता!” इतोग़. इप्पता इतेके “पङ्ने आम” इद्रम अर्तम आस्ता.
35 पया येसु अद्रम इताहे ओग़ मन्कनाङ केव्क पङ्ने आताङ ओसो ओना वेंजेग़ वने बेस आता, ओग़ पया पङ्ने वळ्ह्क बोटटोग़.
36 अगा मतोरिन इद पोल्लोतुन बोरिह्के वेहमाट इनजोर येसु ओरिन उकुम ईतोग़, मति ओग़ बेचोन वेहमट इनजोर वेहतोग़, अचोन ओर मन्कलोर अद पोल्लोतुन पोकुर कीया बोटटोर.
37 पया लोकुर पका बामिसि इद्रम इंदुर, “येसु बेद कीतोग़, अद सबे बेस-नेह्ना कीतोग़, एवडालोरिह्क वेंदानदु, मूकालोरिह्क वळ्ह्कन लाव ईस्तोग़,” इतोर.