13
मंदिर बूळेम आयनदिना लोप्पा येसु वेहतह्तोग़
(मत्याल 24:1-2; लूकाल 21:5-6)
1 पया येसु मंदिरताहि पेसिस अनेके ओर्वोग़ कग़यवाल येसुन इतोग़, “गूरु, इद ऊळा! इद मंदिर बेचोन सोबा दिसिह्ता. तेन बेचोन सोबाताङ बंडाने दोहतोर,” इतोग़.
2 इतस्के येसु ओन इतोग़, “निमा इव बेराङ-बेराङ लोह्किन ऊळिह्निन इसि, इव इचोन बूळेम आयनुङ इतेके, इविस्कनगा बंडाता पोग़ोन बंडावने मनो आयग़ा, बूळे केवालोर कतम अर्हतनुर,” इतोग़.
विस्वसिराङ तिपल्कु
(मत्याल 24:3-14; लूकाल 21:7-19)
3 पया येसु मंदिरतग्डाह पेसिसि जय्तुन मराना गुड्रातगा अनजि मंदिरता मुनेहतके उदिस मतोग़. ओग़ वग़ोग़े मतस्के पत्रु, याकुबि, योहनि, आद्रियाल वेर ओनगा अनजि इद्रम ताल्ह्कतोर.
4 “गूरु, इव पोल्लोङ बेस्के बह आयनुङ? इव पोल्लोङ आयनुङ इनजोर तेना बाताल सीना दिसग़ा?” इनजोर ताल्ह्कतोर.
5 ताल्ह्कतस्के येसु ओरिन इतोग़, “मीक बोग़ाय नाळेह कीयना आयो इनजि उसरते मन्ह्टु.
6 वेल्लाटोर नावा पेदिर पोस वासि, ‘नना देवुळ लोहतोनन,’ इनजोर वेल्लाटोरिन नाळेह कीयनुर.
7 इहनाङ-अहनाङ नालुङ मूलाङ आसि लळय्क आस्ताङ इनजि मीक एर्का आयग़ा. अस्के मीट रेयमाटु. इव पोल्लोङ निटम इह आयनुङे, मति इचोट्के बूम मुळन्दो.
8 जातिना पोग़ोन जातिङ तेदनुङ, राजेह्कना पोग़ोन राजेह्क तेदनुङ. बेग इतेक अगा जागाङ-बूमिङ मेलियनुङ, दुकळ अरयग़ा. मति इद सबे वायनाङ पीळाना सिरप मोह्ङुल आयग़ा, ओसो इंका पका बेरा गोसा वायग़ा.
9 मीट उसरते मन्ह्टु. बह इतेके लोकुर मीक कोट-कचिर्कनगा ओसीयनुर, तमाङ पार्तनाताङ लोह्कने मीक नल्ह्तनुर, ओसो मीट नाक विस्वस कीतेनाह्क मीकु गुमसिरगा, राजालोरगा ओयनुर. अस्के मीट ओरा मुनेह नावा पोल्लोता साक्सि वेहतकिर.
10 मति मुने नावा पोल्लोता बेसता कबुर सबे जातिनोरगा पोकुर आयना गावले. अस्के पया बूम मुळन्दनद वेला वायग़ा.
11 बेस्के वेर मीकु ओरा कयदे पोस ईयनुर अस्के अगा वळ्ह्कवालोरिर मीट आयविर. देवुळता पवित्र जीवा मीकु वळ्ह्कलाह बुदि ईयग़ा. अद ईतस्के बेद बह वळ्ह्कना अहे वळ्ह्काटु. अदिनेनाह्क बाताङ वळ्ह्ककोम इनजोर मुनेन मीट आलिह केमाटु.
12 “विस्वस केवोग़ तमोग़ तना विस्वस कीतोग़ दादानु ओसो विस्वस केवोग़ तपे बार तना विस्वस कीतोग़ मग़िनु हव्कलाहि पोस ईयनुर. विस्वस केवोर मग़्क-मयस्कु विस्वस कीतोर तलोग़-तपेरा पेटळ तेदिसि ओरिन हव्कलाह वेहतनुर.
13 ओसो नावा पेदिर मीक अरतह्कु दुनियातोर मीक कोटुल कीयनुर, मति आक्रि एवनाह बोर दीरा पोस मन्ह्तोर, देवुळि ओरिन पिसिह कीयग़ा.”
येरुसलेमतगा वायनद गोसा
(मत्याल 24:15-28; लूकाल 21:20-24)
14 “ओसो उंद दिया इद्रम वायग़ा, एग़्ङ वायनदु मंदिरतुन कळ्वोग़ कीयनद बोमातुन पोलवद जागतगा निल्पिह कीतदिन मीट ऊळकिर. (मीट अर्ववलोरिर इदिन सीताते तासाटु.) अस्के यहुदा पटटे मनवालोर लोकुर कोंटेतोरग्डाह पिह्ट अरयलाह मेटानके वितिर.
15 बोग़ाय लोता पोग़ोन मतेके, ओग़ तना लोता बातालय ओयलाह लोनलोप्पा नेङमाकेग़.
16 ओसो बोग़ाय मन्कल पोलमते मतेके, ओग़ तना कोटजगातुन ओयलाह लोन मलमाकेग़.
17 अव दियाने नेलाङ हव्कतव आस्किह्क ओसो पाल उहतनव तलिस्किह्क बेचोटा गोसा आयग़ा!
18 अदिह्क मुसुर पेग़दस्के इद गोसा वामकि इनजोर देवुळतुन पार्तना कीम्ह्टु.
19 बाराह्क इतेके अव दियाने पका बेरा गोसा आयग़ा. अचोटा गोसा देवुळि बूम पुटिह कीतग्डाहि बेस्केन आयो वने, ओसो मुनेह बेस्केन वने आयो आयग़ा.
20 अव वायनव गोसाताङ दियान देवुळि कमि केवेक अचोन, बोग़े मन्कल पिसोग़ आवेग़. मति तनाङ आचतोर लोकुरिन पिसिह कीयनेनाह्कु देवुळि अव दियान कमि कीता.”
देवुळ लोहतोग़ राजाल लावते, डीसाते मल्स वायनोग़
21 “अद वेलाते बोग़ाय मीक इंदनोग़, ऊळाट, देवुळ लोहतोग़ राजाल इगाडोग़! देवुळ लोहतोग़ राजाल अगाडोग़! अस्के ओनाङ सेतेम पोयमाटु.
22 बाराह्क इतेके नना देवुळ लोहतोग़ राजानन, इनवालोर जोलहलोर, ओसो देवुळता कबुरतोनन, इनवालोर जोलहलोर, इद्रमतोर पुटनुर. ओर बामिह कीयनाङ कबस्कु ओसो सीनाङ तोहचि, देवुळ आचतोर लोकुरिन वने लेसिह कीयलाह ऊळनुर. मति ओर अह कीया पग़वोर आयनुर.
23 मति ऊळाट, नना इतेके सबे पोल्लोङ मीक मुनेन वेहतन, उसरते मन्ह्टु.
24 “अव दियानाङ तिपल्क मारताहे,
पोळ्द मांजो आयग़ा,
नेला दींचो आयग़ा.
25 उकाङ पोग़ोटाह इळ्न रालनुङ,
पोग़ोटा बूमतगा सबे मेलियनुङ.
26 अस्के माने-मन्कना नडुम पुटटोनन, नना बेरा लावते ओसो डीसाते मोयुलपोग़ोन उदिसि वायनदिन लोकुर ऊळनुर.
27 अद वेलाते नना नावाङ देवतुल्किन दुनियाता मूलाह्क-मूलाह्क लोहतकन. पया अवु इद बूमतगा सर्ने मनवालोर नावाङ आचतोर लोकुरिन गुम कीयनुङ.”
येसुना वायनद बेद्रम पुनदना
(मत्याल 24:32-35; लूकाल 21:29-33)
28 “गेळाताङ मरान ऊळिसि इद पोल्लो कग़याटु. आकिङ रालिह्ताङ अस्के डोय एरे एवता इनजोर मीट पुह्निर.
29 इद्रमलेह्का मीट वने इव पोल्लोङ आयनदिन ऊळकिर अस्के, सामि गट्नेन एवतपे मन्ह्तोग़, इनजोर पुन्ह्टु.
30 नना मीक सेतेम वेहतह्नन, इव सबे पोल्लोङ बेचानाह करल आयोङ आयनुङ, अचानाह इद पीळतोर बूळेम आयोर आयनुर.
31 पोग़ोटा बूमि, इळ्ता बूमि बूळेम आयनुङ, मति नावा पोल्लो मात्रम बेस्केन मायो आयग़ा.”
येसु वायनद वेला बोन्के तेळियो
(मत्याल 24:36-44)
32 “मति नना मल्स वायनद दियातुन, वेलातुन बोग़े पुनोग़. देवुळदीपताङ देवतुल्क वने पुनोङ, नना इंका पुनोन, सिरपि नावा बाबाल पुनतोग़.
33 नना मल्स वायनद दिया बेस्के एवयह्ता इनजोर मीट पुनविर. अदिह्क मीट वने उसरते मन्ह्टु, केपसोर मन्ह्टु.
34 इद बेद्रमलेह्का इतेके, ओर्वोग़ माल्काल दुस्रा देसेम दायना मताह्कु, तनाङ ओर्युलतोरा कयदे लोतुन विळ्सेग़. पया ओर्विह्क-ओर्विह्क उंद-उंद कबळ वेहेग़, अहे अनेके लोता पह्रा केवान उसरते मन इनजोर उकुम ईस अनेग़.
35 अद्रमलेह्का बेद दियाते मीवा सामि वायनोग़, इद मीक तेळियो, पोळ्द अनजोर वायनोग़ा, नडुम नग़्का वायनोग़ा, मुनेताङ कोग़्क कूसेङ वायनोग़ा, पङ आसोर वायनोग़ा इदिन मीट पुनविर.
36 अदिनेनाह्क अग़ ऊळसोर मन्ह्टु. नना दोम्ह्क्ने वातस्के मीक उंजवालेवा मनदनद ऊळतेके बेसु!
37 नना मीक वेहतनद पोल्लोतुन, नाक नमवालोर सबेटोरिह्क वेहतह्नन, अग़ ऊळसोर मन्ह्टु,” इनजोर इतोग़.