9
पुटगुडिन येसु तोवनाह कीस्तोग़
1 अग्डाहि पेसिस दायह्पा येसुह्कु वग़ोग़ पुटगुडि कलियतोग़.
2 अस्के माट कग़यवालोरोम ओन ताल्ह्कतोम, “गूरु, वेग़ निटम बोनायो पापमतेनाह्के गुड पुट वातोग़. इतेके वेनाये पापमतुह्क, बारा वेनाङ तलोग़-तपेर कीतद पापमतुह्क वेग़ गुड पुट वातोग़ा?” इनजि ताल्ह्कतोम.
3 अस्के येसु माक इतोग़ “वेग़ पापम कीताह्कु आयो, ओसो वेनाङ तलोग़-तपेर पापम कीतोर इन्ज गुड पुट वावोग़, मति वेना मेंदुदगा देवुळता बेरा लाव दिसना इनजि वेग़ इद्रम पुट वातोग़.
4 नावा बाबाल बेव कबस्क कीयलाह नाक लोहतोग़, अविन नाकु इद बूमते मनेकेने कीया पोयतह्ता. बह इतेके ईकळ वायनद मन्ह्ता, अस्के बोन्के कबळ कीया वावो आयग़ा. अद्रमलेह्काने नाकु बेरा डीसाताङ कबस्क कीयलाह उचुके दियाङ पिसताङ.
5 नना इद दुनियाते मनाह्जोम इद दुनियाता वेह्चतन आंदन, इद्रमता गुडलेह्काडोरिन वेह्च ईया पग़यह्नन.”
6 इचोन इनजि ओग़ नेदगा उस्कतोग़, उस्कुलते चिक्ला कीतोग़. अह कीसि ओग़ पुटगुडिनाङ कोंडानगा अद चिक्लातुन ओकिसीतोग़.
7 पया येसु ओन इतोग़, “अन, सिलो इनदनद वेच्चातगा अनजि मोकम नोग़्म,” इनजि ओन लोहतोग़ (सिलो इद पेदिर इतेके लोहतोग़ु). पया ओग़ गुडि अनजि कन्क ऊरतस्के, ओग़ तोवयलाह आतोग़.
8 मुने बिचेम ताल्ह्किह्पा बोर ओन ऊळिस मतोर, ओसो ओनाङ एरेगुरेनोर ओन ऊळिस इंदुर, “उदिस बिचेम ताल्ह्किंदोग़ ओग़ वेग़ेया?”
9 बोर-बोर इतोर, “इंगो, वेग़ बिचेम ताल्ह्कवले!” ओसो उय्तुर इतोर, “आयो रा, वेग़ बिचेम ताल्ह्कवाल आयोग़, ओनाय लेह्का दिसवाल बोग़कोटे मंदनोग़, रा!” इनजोर इंदुर. अस्के वेग़ गुडि इंदलातोग़, “ननान रा, बिचेम ताल्ह्कवनन.”
10 “नीवाङ कोंडाङ पया बह बेस आताङ, डा?” इनजि लोकुर ओन ताल्ह्कतोर.
11 ओग़ इतोग़, “येसु पेदिरतोग़ वग़ोग़ मन्कल चिक्ला कीसि, नावाङ कोंडाह्कु ओकिसि, ‘सिलो वेच्चातगा अनजि कन्क ऊरा,’ इतोग़ अस्के पया नना अनजि कन्क ऊरतन, कन्क ऊरताहे नना इंजेके तोवयह्नन,” इनजोर इतोग़.
12 लोकुर ओन ओसो ताल्ह्कतोर, “अह इतेके ओग़ बेगाडोग़?” “बारायो, नना पुनोन,” इनजि ओग़ इतोग़.
परुसिर येसुना पट ऊळिह्तोर
13 पया ओर लोकुर गुडि आस मतोनु परुसिरके पोस ततोर.
14 (बेद दिया येसु चिक्ला कीसि, ओकिसि, पुटगुडिन बेस कीतोग़, अद दिया वारमता पोल्वादिया आंदु.)
15 पोस ततापया परुसिरवने “निमा बह तोवयह्निन?” इनजि ओन ताल्ह्कतोर. ओग़ इतोग़, “नावाङ कोंडाह्कु ओग़ चिक्ला ओकतोग़, अस्के नना अनजि कन्क ऊरतन, कन्क ऊरताहे नना इंजेके तोवयह्नन,” इतोग़.
16 तेन केंजिस उय्तुर परुसिर इतोर, “ओग़ मन्कल देवुळताह इलेग़, मतेके ओग़ पोल्वादियाते इद सव्रे कीयना कबळ केवोग़ आवेग़.” ओसो उय्तुर इतोर, “इंगो मति बोग़ाय पापि मन्कल इद्रमताङ बेह्राङ सीनान बह तोहता पग़यनोग़?” इद्रम तमतमाय वह्चिसि ओर रेंड तुंगानोर आतोर.
17 अदिह्कु ओर ओसो उंद देबा ओन पुटगुडिन ताल्ह्कतोर, “ओग़ नीवाङे कोंडान बेस कीतोग़ इनजि, ओग़ बेद्रमतोग़ मन्कल इनजोर निमा इह्निन?” इतोर. “एय, ओग़ देवुळता कबुरतोग़ मंदनोग़ इह्नन,” इनजि ओग़ इतोग़.
18-19 ओग़ गुडि मतोग़, मति इंजेके तोवयलाह आतोग़ इनजोर यहुदिराङ पेदल्क नम्का पोयवाये मतोर. अदिह्कु तोवयलाह आतोग़ गुडिना तलोग़-तपेरिन ओर केयतोर, केयिसि ताल्ह्कतोर, “बह, वेग़ मीवाये पेकला? मीवाये पेकाल इनजि निटमे वेग़ गुड पुट वातोग़ा? अह इतेक पया वेग़ बह तोवयलाह आतोग़?” इनजि ताल्ह्कतोर.
20 पया वेना तलोग़-तपेर इतोर, “एय, वेग़ मावाय पेकाल आंदोग़, ओसो वेग़ गुडिय पुटिस मतोग़, बह माट पुनोमा?
21 मति इंजेके वेग़ बह तोवयह्तोग़ो, इदिन माट पुनोम. ओसो वेनाङ कोंडान बोग़ पङ्ने कीतोग़, अदिन वने माट पुनोम. वेने ताल्ह्काटे, वेग़ इंजेके लेयोग़े आतोग़. बह आतदिन तनाय वेहतनोग़.”
22 यहुदिराङ पेदल्किन रेयिसि, वेना तलोग़-तपेर अह इतोर. बाराह्क इतेके देवुळ लोहवाल पिसिह केवाल येसु आंदोग़, इनजोर बोग़ कबुल कीयनोग़, ओग़ मावा मोळ्कनगा वायनायो, इनजि यहुदिराङ पेदल्क कतमतोर उकुम ईस मतोर.
23 अदे रेयतुह्कु गुडिना तलोग़-तपेर “वेग़ इंजेके लेयोग़े आतोग़, वेने ताल्ह्काट!” इनजोर इन्ज मतोर.
24 अदिह्क पुटगुडिन ओर परुसिर ओसो उंद मल्का केयिस इतोर, “देवुळता मुनेह किरिया कीसि नीक बह आतदिन सेतेमते वेहा. बाराह्क इतेके वेग़ मन्कल पापमतोग़ इनजोर माट पुह्नोम.”
25 “ओग़ पापमतोग़ो, बेद्रमतोग़ो, नना पुनोन. मति सिरप उंदिय पोल्लो नना पुह्नन, मुने नना तोवोन आसि, इंजेके नना तोवयह्नन.”
26 “अह इतेक ओग़ नीक बाताङ कीतोग़, नीक बह तोवनाह कीतोग़?”
27 “इंजेकेन मीक वेहन्दन बहे, तेला मति मीट बह केंजविर? ओसो उंद देबा केंजना गिर्दा मन्ह्ताया, मीकु? मीटवने ओनाङ कग़यवालोर आयना मन्ह्ता, बहे?”
28 अस्के ओर ओन सेरसेर वळ्ह्कतोर, “निमाने ओनाङ कग़यवनिन! माट इतेके मोसानाङ अडोङ नोमवालोरोम आंदोम, पुतिन!
29 देवुळि मोसा मुय्तोनु वळ्ह्कता इनजि माक एर्काये. मति वेग़ मन्कल बेग्डोग़ो, इदिन माट पुनोम.”
30 अस्के पया पुटगुडि ओरिन इतोग़, “इदे कोनि बेरा बामनद पोल्लो! ओग़ बेग्डोग़ इदिन मीट पुनविर, मति ओग़ इतेके नाक तोवनाह कीतोग़.
31 देवुळि पापि मन्कलोरा ताल्ह्कनदिन केंजो, इनजोर माक एर्काये. मति बोर देवुळतुन मोळ्किसि ताना पोल्लोते तिरियिह्तोर, ओरा ताल्ह्कनदिन देवुळ केंजिह्ता.
32 केंजाटु, पुटगुडिनु तोवनाह कीतोग़, इद्रमता गोटि बूम पुटटग्डाह बेस्केन आयो.
33 ओग़ मन्कल देवुळताह वावेके वेन्क इद्रमलेह्का बातय कीया वावो आवालि,” इनजि परुसिरिन पुटगुडि इतोग़.
34 अस्के ओर ओन गुडिन इतोर, “नीक इतेके पुटटाहे पापमता सिक्सा दल्गता, माक निमा काग़्हतह्निन?” अह इनजोर ओन पलत पेह्चीतोर.
निटम गुडिर बोरु
35 परुसिर पुटगुडिन पलत पेह्चीतोर इनजोरे येसुह्क इद पोल्लो एर्का आता. अस्के ओन पर्ह्किसि कलियतस्के येसु इतोग़, “बह निमा माने-मन्कना नडुम पुटटोन नमिह्निना?” इनजि ताल्ह्कतोग़.
36 “ए गूरु, नना ओन नमना इनजि ओग़ बोग़ आंदोग़, नाक वेहा,” इनजि ओग़ येसुन इतोग़.
37 अस्के येसु ओन इतोग़, “निम इतेक ओन ऊळतिन, नीवा संगे इंजेक वळ्ह्कवनन, ओनन ननाने,” इतोग़.
38 (“ए गूरु नना नमिह्नन,” इह इनजि ओग़ येसुन दंडुम अरतोग़.)
39 “नना लोकुरा पापम तोहतलाहि इद बूमते वातन. बोर लोकुर ‘माट ईकळते ताकिह्नोम,’ इनजोर पुन्ह्तोर, ओरिह्क देवुळता वेह्च दिसग़ा, इदिनेनाह्क इद बूमते वातन. ओसो बोर ‘तोवयह्नोम’ इन्ह्तोर, ओर निटमे तमा बुदते गुडिर इनजि नना तोहतकन,” इनजि येसु इतोग़.
40 अस्के अगा मतोर उय्तुर परुसिर इदिन केंजिसि, “बह माटवने बुदते गुडिरोम इनजोर इह्निरा?” इतोर.
41 अस्के येसु ओरिन इतोग़, “ ‘माट गुडिरा लेह्का ईकळते ताकिह्नोम, मति तोवयलाह, देवुळताहि कग़यलाह माक गिर्दा मन्ह्ता,’ इद्रम मीट इन्ज मतेके मीवा कसुर मनो आवालि, देवुळि मीक माप केवालि. मति ‘माट तोवयह्नोम, पूरा पुतोरोम,’ इनजोर जोल वळ्ह्किह्निर, अदिह्के मीवा कसुर अहे मन्ह्ता, देवुळि मीक माप केवो.”