5
येसु पोल्वादियाते दुकह्न सव्रे कीस्तोग़
1 गळ्क मनेके येसु गालिल पटटाहि पेसिसि येरुसलेम सहरते यहुदिरा उंद पंडुमतगा अतोग़.
2 येरुसलेम सहरते गोरे-दर्वजा इनदनद अग़दगा उंदि वेच्चा मन्ह्ता, तेना पेदिर इब्रि पोल्लोते बेतेस्दा इनजोर तासतोर. ताना कचुलि एयुङ मंडाङ पंटव मताङ.
3 अवटे गुडिर, कूटालोर, कय्क-काल्क वाग़तोरु इद्रमतोर दुकह्लोर वेल्लाटोरे अगा जागा आस मंदुर (एतुन मेल्ह्तनदिन केपसोरे.
4 बाराह्क इतेके बेस्के-बेस्के देवतुलि अद वेचातगा रेगिसि एतुन गोकिह कींदु, इद्रम कीतस्के अद जागातगा बोग़ मुने अरन्दोग़, ओग़ तना दुकताहि सव्रेम आंदोग़.)
5 ओर दुकह्लोरगा डेडा-वीसा-आट (38) वर्सानाहि दुक अरतोग़ ओर्वोग़ मतोग़, ओग़ मुर्तिय ताक पग़वोग़.
6 ओग़ अगा वळ्ह्क अरतदिन येसु ऊळतोग़. वेग़ वेल्लाङे दियानाहि इहे मन्ह्तोग़ इनजोर येसु पुतोग़, पुताह्कु ओनगा अनजि इतोग़, “तमो, निमा नीवा दुकताहि सव्रेम आयना इह्निना?” इनजि ताल्ह्कतोग़.
7 “इंगो दादा, मति इद एतुन मेलतनस्के नाकु अद एतगा ओयलाह मावोर बोरे नाक तोळ इलेर. अदिनेनाह्क एग़ मेलियनेके दाय्ह्नन मति बोग़ाय नाक मुनेन पळयह्तोग़,” इनजि वेग़ इतोग़.
8 “असि, तेदा, नीवा माग़ि उळ्ह्च पोय्म, अह कीस अग़ पोस ताकसोर अन,” इनजोर येसु ओन वेहतोग़.
9 अस्के ओग़ मन्कल तोप्नेन सव्रेम आतोग़, आसि तना माग़ि उळ्ह्च पोसि दिग-दिग ताकसोर अतोग़.
अद दिया इतेके वारमता पोल्वादिया मता.
10-11 अदिह्कु दुकताहि सव्रेम आतोन यहुदिराङ पेदल्क इतोर, “नेंड पोल्वादिया इनजोरे पुनविना? नीकु माग़ कांजना कबळ पोलो,” इनजोर इतस्के ओग़ इतोग़, “बोग़ नाकु सव्रे कीतोग़, ओग़े नाक वेहतोग़ ‘नीवा माग़ उळ्ह्च अन,’ इनजोरे.”
12 “अद्रम इनजोर इनवाल बोग़ मन्कल आंदोग़, रा?”
13 मति ओग़ बोग़ आंदोग़ इनजोर वेग़ सव्रेम आतोग़ मन्कल पुनोग़. बाराह्क इतेके अगा वेल्लाय मुल मताह्कु, येसु तना पेदिर वेहवाये अद मुडग्डाहि पेसिस अन्ज मतोग़.
14 अस्के पया येसु वेन मंदिरते कलियिस इतोग़, “ऊळा, निमा दुकताहि तेग़्कतिन! मुनेटलेह्का इंजेक पापम केमा बहा, कीतेके मुनेट्काय एक्वा मल्स दुक अरयकिन,” इतोग़.
15 अग्डाह पया ओग़ अनजि “नाक दुकतग्डाहि तेग़्किह कीतोग़, ओग़ येसुये आंदोग़,” इनजोरे यहुदिराङ पेदल्किन वेहतोग़.
देवुळता मग़ि जीवा ईस्तोग़
16 अदिनेनाह्कु यहुदिराङ पेदल्क येसुनपेग़्के दल्गतोर, बाराह्क इतेके पोल्वादियाते ओग़ इद्रमताङ कबस्क कीस्तोग़ इनजोरे.
17 अस्के येसु ओरिन इतोग़, “नावा बाबाल नेंड एवनाहि कबळ कीसोरेन मन्ह्तोग़, पोल्वादियाते वने कीस्तोग़े. अद्रमे ननावने कबळ कीय्ह्नन,” इनजोर इतोग़.
18 येसु इह इताह्कु यहुदिराङ पेदल्क ओसो ओन हव्कलाह कोह्न्दुर, बाराह्क इतेके ओरा विचरते येसु रेंड कसुर्क कीतोग़. उंदि इतेके पोल्वादियाते कबळ कीयना, ओसो दुस्रा इतेके देवुळतुन “नावाय बाबाल,” इनजोर नना देवुळता बराबरतोनन! इतप वळ्ह्कना, इव रेंडे.
19 अस्के येसु ओरिन इतोग़, “इह केंजाट, नना वेहतह्नन, नना नावाय विचरते बेदाय कबळ कीया पग़वोन. मति नावा बाबाल कीयनव कबस्किन ऊळिसिये, नना ओना मग़नन इनजि अद्रमे कीय्ह्नन.
20 नावा बाबाल नाक जीवा कीसि तनाङ कीयनव सबे कबस्किन नाक तोहतह्तोग़. मीट बामना इनजोरे इविस्किह्काय बेह्राङ कबस्क कीसि नाक तोहतनोग़.
21 बहलेह्का नावा बाबाल हातोरिन तेग़्किह कीसि जीवा अर्हतह्तोग़, अहलेह्का ननावने बोन इतेक ओनु जीवा अर्हतह्नन.
22-23 बेद्रम नावा बाबाह्कु सबेटोर मान ईस्तोर, अद्रमे नाक वने सबेटोर मान ईयना इनजोरे, बाबाल बोनाय नेयम केवोग़, मति नेयम कीयनद पूरा कबळि नाक ईतद मन्ह्ता. बोग़ मग़िह्क मान एवोग़, ओग़ु मग़िन लोहतोग़ बाबाह्क वने मान एवपे मन्ह्तोग़.
24 इह केंजाट, नना वेहतह्नन, बोर नावाङ पोल्लोङ केंजिसि, नाक लोहतोना पोग़ोन बर्वस तासिह्तोर, ओरिह्क अमेसाता पिसमुळ दोर्कताये. देवुळ ओरिन तमा पापमता सिक्सा एवो, मति ओरु हानादीपता अग़दाहि पेसिस अमेसाता पिसमुळतगा अतोर.
25 इह केंजाट, नना ओसो वेहतह्नन, नना देवुळबाबाना मग़नन, हातोर मन्कलोर नावा आल्का वेंदनुर, इद्रमताङ दियाङ एवयनुङ, आयो एवतपे मन्ह्ताङ वने. बोर वेंदनुर, ओर जीवा अरयनुर.
26 बहलेह्का नावा बाबाल लोकुरिह्क जीवा ईया पग़यह्तोग़, अद्रमे ओग़ु नाक वने इद्रमे जीवा ईयलाह अदिकर ईतोग़.
27 बाबाल नाकु नेयम कीयनद अदिकरवने ईतोग़, बाराह्क इतेके नना माने-मन्कना नडुम पुटटोनन इनजोर.
28-29 मीटु इदिन केंजिस बयल आयमाटु. बाराह्क इतेके गुमयाना लोप्पा मनवालोर नावा आल्कातुन वेंदनुर, ओसो पलत पेसनुर, इद्रमताङ दियाङ वायनुङ. बोर सेतेमताङ कबस्क कीतोर, ओर कतमतोरे अमेसाता पिसमुळतेनाह्क जीवा अरयनुर. मति बोर लाग्वाङ कबस्क कीसोर मतोर, ओरु सिक्सा आयलाह जीवा अरयनुर.
येसुना लोप्पा साक्सि
30 “नना नावाय विचरते बातय कीया पग़वोन. बेद्रम बाबाल नाक वेहतह्तोग़, अद्रमे नना नेयम कीय्ह्नन. नना नावाय कुदता विचरते आयो, मति नाक लोहतोग़ बाबाना विचर मतप कीय्ह्नन, अदिह्क नावा नेयम सेतेम अरयह्ता.
31 नावा मेटे नना वग़ोनने साक्सि ईतेके, अद साक्सि नेयम कीयनस्के ताको.
32 नावा मेटे ओसो ओर्वोग़ साक्सि एवल मन्ह्तोग़, ओग़ नावा बाबाल. ओग़ नावा मेटे बाताल वेहतनोग़, अद सेतेमताये, इनजोर नना पुह्नन.
33 “ओसो ओर्वोग़ साक्सि एवल मन्ह्तोग़. मीटु देवुळता पेदिरते एग़ मीहवाल योहनिन ताल्ह्क वेहतिर अस्के ओग़ु सेतेमतुने वेहतोग़.
34 मन्कना साक्सितुन इतेक नना बर्वस केवोन, मति योहनिना पोल्लोतुन नमिसि, मीक अमेसाता पिसमुळ दोर्कना इनजि इव गोटिङ मीक सीता ईतन.
35 नावा मेटे वेहतनस्के योहन पोतना कंदिललेह्का वेह्च तोहवाल मतोग़. मीकु ओना वेह्च गय्क मताह्कु गिर्दा आयलाह बेस आता.
36 “मति योहनिना साक्सितुह्काय नयगा ओसो बेह्रा साक्सि मन्ह्ता. बेव कबस्किन मारिह कीयलाह नावा बाबाल नाक लोहतोग़, बेव बेरा डीसाताङ कबस्किन नना कीय्ह्नन, नाक बाबाल लोहतोग़ इनजोरे अवे कबस्क मीक तोहतह्ताङ.
37 नाक लोहतोग़ नावा बाबाल, ओग़वने नावा लोप्पा साक्सि ईतोग़. मीट इतेक बेस्केन ओना आल्कातुन वेनविर, बेस्केन ओना रूपतुन ऊळविर.
38 ओसो मीट ओना पोल्लोतुन मीवा जीवाते गडिह कीस तासविर, तासतेके ओग़ लोहतोन मग़िन मीट नमेरिर.
39 पवित्र सास्त्रम पुनजि माकु अमेसाता पिसमुळ दोर्कग़ा इनजि मीटु अग्डाङे कग़यसोर मह्निर. केंजाटु, इदे सास्त्रम नावा लोप्पा वेहतह्ता.
40 तेला मति अमेसाता पिसमुळतेनाह्क नयगा मीकु वाया वसो.
41 “मन्कलोर नाकु कदर ईतेकाय, एवेकाय, नाक पर्वा इले.
42 मति मीट बेद्रमतोरिर इनजि नना पुह्नन. मीटु देवुळतुन मुर्तिय जीवा केविर.
43 नना नावा बाबाना अदिकर पोस वातन, मति मीट नावाङ केंजविर. बोग़ाय दुस्रोग़ मन्कल तनाय अदिकरते वायनोग़ अस्के ओनाङ इतेक केंजकिर.
44 मीट ओर्विनेनाह ओर्वोग़ कदर पर्ह्किह्निर, मति वग़य देवुळतेनाह दोर्कनद कदरतुन बारा पर्ह्कविर, इतेके मीट बेद्रम विस्वस कीया पग़यकिर!
45 नना बाबाना मुनेह मीवा पेटळ तप तासकन, इद्रम इह्निर बहे, मति नना तप तासोन. केंजाट, मीटु मोसानाङ अडोनगा आसा तासिस मह्निर, ओग़ मोसाले मीवा पेटळ तप तासनोग़.
46 सास्त्रमते मोसा मुय्तोग़ नावाय लोप्पा रासिस तासतोग़, अद सास्त्रम नाके तोहतह्ता. इतेके अद सास्त्रमता पोग़ोन मीटु विस्वस तासिस मतेके, नावा पोग़ोन वने विस्वस तासेरिर.
47 मति मोसा मुय्तोग़ रासतद गोटटुने सेतेम पोयविर इतेके, नावाङ गोटिन मीट बह नमकिर?” इनजोर येसु इतोग़.