2
येसु एतुनु अंगुर जोमा मारियिह कीस्तोग़
1 पया मूंड दियाने गालिल पटटा काना नाटेनगा बोनाङो मर्मिङ मताङ, अगा येसुना तलोग़वने मता.
2 मर्मिह्कु येसुनु ओसो माक कतम ओनाङ कग़यवालोरिन वने केयिस मतोर.
3 पया अगा अंगुर जोमा मारताह्कु, येसुना तलोग़ ओनगा वासि “इंजेके ओरगा अंगुर जोमा मारता, बाबा! बेदाय कीमु,” इनजोर इता.
4 अस्के येसु तान इतोग़, “बायि, निमा नाक बाराह्कु वेहतह्निन? नावा डीसा तोहतनद कगो इंका एवोये,” इतोग़.
5 पया अदु मर्मिनगा सेवा-साकुर केवालोरिन इता, “वेग़ मीकु बाताङ वेहतनोग़, अहे कीम्ह्टु.”
6 यहुदि लोकुर तिनदना मुने तमाङ कय्क-काल्क नोग़यना रिवज ओरा मता. इद रिवजतेनाह्कु अगा उंद-उंद अळ्का एळुङ-आट कुळाङ पोयतवु बंडानाङ आरुङ अळ्काङ (आंडाङ) तासतव मताङ.
7 “अव अळ्कानगा एग़ निहाटु,” इनजोरे येसु सेवा-साकुर केवालोरिन वेहतोग़. अस्के ओरु अव अळ्कान सीग निहतोर.
8 पया येसु ओरिन वेहतोग़, “इंजेके उचुन तेंडिसि, कुळ्प ऊळवाल मुक्यानगा ओम्ह्टु.” अस्के ओर ओतोर.
9-10 पया ओग़ मुक्याल अद एतुनु उचुन ऊतिस ऊळतस्के, अद एग़ पूरा अंगुर जोमा मारियिस मता. इद बोग़ ततोग़ इनजोर ओन्क मुर्तिय तेळियो, एग़ निहवालोरिह्क इद पोल्लो एर्का मता. अस्के कुळ्पता मुक्याल मर्मपेकान केयिस इतोग़, “बोराय पूलापूला अंगुर जोमा मुने ईस्तोर, तान लोकुर उंनि मिटस कीस्तोर पया रासजोमा ईस्तोर. निमा मात्रमि पूला अंगुर जोमा इंजेक एवनाह पिसिह कीस तासतिन,” इनजि मुक्याल इतोग़.
11 इद्रमि येसु गालिल पटटा काना नाटे, इद मुनेटा बामिह कीयना सीना कीसि, तना डीसा तोहतोग़. अदिह्कु माट ओनाङ कग़यवालोरोम ओग़ देवुळ लोहतोग़ राजाल मंदनोग़ इनजि ओन नमतोम.
येसु मंदिरते वमवालोरिन पूंडिह्तोग़
(मत्याल 21:12-13; मार्कल 11:15-17; लूकाल 19:45-46)
12 मर्मिङ मारतस्के येसु तलिना, तमोरा संगे, ओसो माट कग़यवालोरा संगे कापेर्नाग़ वातोग़, अगा माटु उचुके दियाङ रोमिस मतोम.
13 यहुदि लोकुरा आवना पंडुम एरे एव्स मताह्कु, येसु येरुसलेम सहरतके पंडुमतगा अतोग़.
14 अगा यहुदिरा मंदिरतगा येसु अतस्के, लोकुर देवुळता मोकतुह्क अरयनव कुराङ, गोरेङ, परेवाङ पिटेङ वमिंदुर. ओसो सर्करताङ कोताङ मंदिरतगा वाटलाह ताकोङ आंदुङ, अदिह्कु अव कोताङ बद्ला कीसि यहुदिराङ कोताङ एवालोर अगा उदिस मंदुर. वेरिन कतमतोरिन येसु ऊळतोग़.
15 ऊळिसि, ओग़ नोंडेना उंद जेट्ला एन्टोग़, अह कीसि सबे वीकुरतोरिनु मंदिरताहि पूंडटोग़. गोरेङ, कुराङ, इविन वन पूंडिसि, कोताङ बद्ला केवालोराङ बलानु कप मुळ्ह्चि कोतान लीकिसीतोग़.
16 परेवाङ वमवालोरिन ओग़ इतोग़, “इविस्किन इग्डाहि पलत ओम्ह्ट! नावा बाबाना लोतुन आटुम पंडमाट!” इनजि वेग़्हतोग़.
17 पया
“नना पूरा जीवा कीसि नीवा लोतुन पवित्र तासकन,”
इद सास्त्रमते दाविद राजाल रासतद पोल्लो माक कग़यवालोरिह्क सीता वाता.
18 येसु इद्रम कीताह्कु यहुदि लोकुराङ पेदल्क ओनगा वासि इतोर, “नियगा इद्रम कीयलाह अदिकर मन्ह्ता इनजि माकु बेद सीना तोहतकिन?”
19 येसु ओरिन इतोग़, “इद मंदिरतुनु अर्ह्चिम्ह्ट, तेन नना मूंड दियाने ओसो तेहतकन,” इनजोर इतोग़.
20 “अलाले, इद मंदिरतुन दोहतलाह रेंड वीसाङ आरुङ (46) वर्साङ आताङ, इतेके निमा तेन मूंड दियाने बह तेहतकिन?” इनजि ओर येसुन इतोर.
21 मति येसु यहुदिरा मंदिरता लोप्पा वळ्ह्कोग़ आसि, मति तनाय मेंदुदा लोप्पा वळ्ह्किस मतोग़.
22 मनेक मनेके येसु हासि ओसो तेग़्कतस्के माक कग़यवालोरकु इद पोल्लोता सीता वाता. अस्के सास्त्रमते रासतदिन ओसो येसु वळ्ह्कतदिन माट नमतोम.
23 येसु आवना पंडुमता वेलाते येरुसलेम सहरते मनदह्पा, वेल्लाटोर ओनाङ बामिह कीयनाङ सीनान ऊळतोर. ऊळिसि येसुये देवुळ लोहतोग़ पिसिह केवाल आंदोग़ इनजि ओर नमतोर.
24-25 मति लोकुर इह-इह मन्ह्तोर इनजि बोग़ाय येसुन वासि वेहतना गर्ज इले, बाराह्क इतेके मन्कना पोटालोप्पाडाङ गोटिङ ओग़ पूरा पुनजिये. सबेटोराङ विचर्किन पुनजि ओग़ु ओराङ पोल्लोनगा बर्वस तासोग़ आंदोग़.