11
येसुना गोत्याल लाजरि हास्तोग़
1 मरियाल ओसो ताना अकालि मार्ताल, इव बेतनि इनदनद नाटे मंदुङ, अविस्कनाय तमोग़ लाजर पेदिरतोग़ दुक अरस मतोग़.
2 येसुसामिह्कु अतर्नेयदे काल्किन ऊसता, तानाङ केल्कने ओनाङ काल्किन उम्चता, अद इदे मरियालि.
3 “गूरु, नीवा गोत्यल लाजर पकाय दुक अरतोग़,” इनजि ओनाङ अकास्क येसुह्क कबुर लोहताङ.
4 इद कबुर केंजिसि येसु इतोग़, “इद दुकि ओना जीवा तिंदलाह वावो, मति देवुळता डीसा तोहतलाह अहे इवटे देवुळता मग़िह्कु, इतेके नाकु मान दोर्कना, इनजि अद दुक पुटटा.”
5 मार्तलि, मरियालि ओसो लाजर, वेरिन येसु जीवा कींदोग़.
6 तेला मति लाजरना दुकता कबुर केंजिसाय, येसु बेद नाटे मतोग़, अगाने ओसो रेंड दियाङ आनाह मतोग़.
7 ताना पया ओग़ु माक कग़यवालोरिन इतोग़, “दट, माटु ओसो यहुदा पटटे दाकल.”
8 “गूरु, अग्डोर यहुदिराङ पेदल्कु इसालिये नीक बंडाङ उकिस हव्कलाह ऊळिंदुर, ओसो निमा अगा बाराह्क दायना कीय्ह्निन?” इनजि माट येसुन इतोम.
9 पया “देवुळ तासतद कगो एववा ओर नाकु बातय कीया पग़वोर आयनुर,” इदिन वेहतलाह येसु माक इतोग़, “केंजाटु, पोळ्दमेटाङ पूरा बारा गंटाङ मन्ह्ताङ. बोग़ाय पोळ्द मनेक ताकतेके, ओग़ कोदुर एवोग़ आस्तोग़, बाराह्क इतेके इद दुनियाता वेह्चि ओनगा मन्ह्ता.
10 मति बोग़ु ईकळते ताकिह्तोग़, ओग़ु कोदुर ईयनोग़, बाराह्क इतेके ओनगा वेह्च मनो आस्ता इनजोरे.”
11 इचोन वळ्ह्किसि येसु माक इतोग़, “मावा गोत्यल लाजर उंजिस मन्ह्तोग़; ओन नना तेहता दाय्ह्नन.”
12 “गूरु, ओन्क निद्रा वातेके, निमा अनवेकाय ओग़ तनाय तेदनोग़,” इनजि माट येसुन इतोम.
13 येसु लाजरना हामुरता लोप्पा वळ्ह्किस मतोग़, मति निद्राते दोर्कनद आरमता लोप्पा ओग़ वळ्ह्किह्तोग़ बहे, इनजोर माट कग़यवालोरोम येसुन अह इतोम.
14 अदिह्क येसु माकु पङ्ने वेहतोग़, “लाजर डोलतोग़.
15 ओसो मीवा विस्वस बोल्गग़ा इनजि, ओग़ डोलतस्के नना ओनगा इलेन आसि, इदे नाक बेसु. मति बार आयो, दट, माट ओनके दाकल,” इनजोर इतोग़.
16 अस्के तोमाल (इतेके एमोह पेकाल) माक इतोग़, “दट, माटवने गूरुना ऐंगे दाकल, वेग़ हातेके माटवने वेनाय संगे हायकल, पिसतेके वेनाय संगे पिसकल,” इतोग़.
येसु हातोरिन तेग़्किह केवानन इन्ह्तोग़
17 येसु मावा संगे बेतनि नाटे एवतस्के, लाजरिन गुमयातगा तासिसि नालुङ दियाङ आताङ, इनजोर माक तेळियता.
18-19 इद नाग़ येरुसलेम सहरताहि जोक-जोक कोसमेंड जेक मताह्कु, वेल्लाटोरे यहुदिर येरुसलेमताहि लाजरनाङ अकास्किन अळनेके माने कीयलाह वास मतोर.
20 येसु वास्तोग़ इनजि मार्तलि कबुर केंजताह्कु, ओन अनजि कलियता, मति तन एलळ मरियालि लोने उदिस मता.
21 मार्तलि येसुन कलियतस्के येसुन इता, “गूरु, निमा इगा मन्ज मतेके नावा तमोग़ डोलोग़ आवेग़.
22 तेला मति इंजेकाय निमा देवुळतुन बेद ताल्ह्ककिन, अद नीक ईयग़ा इनजोर नाक एर्काये,” इनजि इता.
23 अस्के पया येसु तान इतोग़, “नीवा तमोग़ जीवा अरयनोग़, मार्ता.”
24 “इंगो गूरु, आक्रिते हातोर जीवा अरयना वेलाते वेग़वने जीवा अरयनोग़ इनजि नाक एर्काय मन्ह्ता,” इनजोर अद इता.
25 येसु तान इतोग़, “हातोरिन तेग़्किह केवानन, ओसो ओरिह्क जीवा एवानन ननान आंदन. बोर नाक नमिह्तोर, ओरु हास मतेकाय ओसो जीवा अरयनुर.
26 बोर नाक नमसोर मन्ह्तोर, ओरिह्क अमेसाता पिसमुळ दोर्कग़ा, ओराङ जीवाङ देवुळताहि बेस्केन एग़ोङ आयनुङ, इनजि इद पोल्लोतुन निमा सेतेम पोयतह्निना?”
27 “इंगो गूरु, इद बूमते देवुळ किरिया कीस वेहतपु तना मग़ वावाल मतोग़, ओग़ किर्स्तु इतेके निमान आंदिन, इनजोर नना नमतन,” इनजि मार्तलि इता.
28 इचोन वळ्ह्किस अद पेसिस अता, अनजि मरियान कुस्क्ने केयिसि, “गूरु वातोग़, रि, ओग़ नीक केयिह्तोग़,” इनजि वेहता.
29 इद पोल्लो दोर्कताहे मरियाल पोर्क तेदिसि दरिमरिते ओनगा अता.
30 (येसु इंका नाटे ओळियवाय मतोग़, मति मार्तलि बेद जागातगा ओन कलियिसि, अदे जागाते ओग़ मतोग़.)
31 बोर यहुदिर मरियान माने कीयलाह वासि, ओर तानाय संगे लोप्पाडकेन मतोर. अद चेट्ने तेदिस दायनदिन ऊळिसि, अद गुमयातके अळयलाह दास्ता बहे इनजि ओरवने तानाय पयाह पेसतोर.
32 येसु रोमिस मतोग़ अद जागाते मरियाल एवतस्के, ओन ऊळिसि ओनाङ काल्क अरता, अरसि इता, “गूरु, निमा इगा मन्ज मतेके नावा तमोग़ हायोग़ आवेग़.”
33 ताना संगे वातोर यहुदिरा ओसो ताना अळयनदिन-केयनदिन ऊळिसि, लाजरना हामुरतुह्कु येसु तना जीवाते पका नारज आसि दिरदिर साङतप आतोग़.
34 पया ओग़ ताल्ह्कतोग़, “ओना सेत्तातुन मीट बेगा तासतिर?” अस्के ओर इतोर, “वास ऊळा, गूरु.”
35 अस्के येसु अळतोग़.
36 तेन ऊळिस, यहुदिर तमतमाय इतोर, “अलालेय, वेग़ लाजरिन अचोन जीवा कींदोग़ बपोम!”
37 अग्डोर उय्तुर इसि इंदुर, “वेग़ पुटगुडिन वने तोवनाह कीतोग़. इतेके लाजरिन हायना-हामुरताहि बह पिसिह कीया पग़वोग़ा?”
येसु लाजरिन जीवा अर्हतह्तोग़
38 पया येसु ओसो उंद मल्का लाजरना हामुरतुह्कु तना जीवाते पकाय नारजते मनजि गुमयातगा एवतोग़. लाजरिन पांजातग तासिसि, अग़दगा बेरा आदि तिळ्प कीसि तासिस मतोर.
39 “तिळ्प कीतद आदतुन तेंडाटु,” इनजोर येसु अग्डोरिन वेहतोग़. “आयो गूरु, ओन तासिसि नेटुह्क नालुङ दियाङ बार आस्ताङ, अदिह्क ओना सेत्ता पकाय एग़्स्िकस मंदग़ा!” इनजोरे हातोना अकालि मार्ताल इता.
40 अस्के येसु तान इतोग़, “निमा नमतेके देवुळता डीसातुन ऊळकिन, इद्रम नीक वेहन्दन बहे, केंजविन निमा?”
41 अदिह्क पया ओर अद आदतुन तेंटोर. अस्के येसु पोग़ोन ऊळसोर इतोग़, “ए बाबा, निमा नावा ताल्ह्कनदिन केंजतिन इनजोर नना नीक जोहर कीय्ह्नन.
42 निमा नावाङ अमेसाये केंजिह्निन इनजोर नाक एर्काय मन्ह्ता. तेला मति निमा नाक लोहतिन इनजोर सर्ने निच मनवालोर लोकुर पुनदना इनजि नमनेनाह्कु नना इद्रम वळ्ह्कतन.”
43 इद्रम वळ्ह्किस येसु बेरा आल्काते आळो कीतोग़, “ए लाजर, पलते पेसिस वाय!”
44 अस्के ओग़ पांजालोप्पा मतोग़ु हाता मन्कल पलत पेसिस वातोग़. तेला मति ओनाङ कय्क-काल्कु हामुर-गेंदेने ऊर्सताङ मताङ, ओना तोडटुन इंका सर्ने दुपटटे ऊर्ह्च मतोर. “वेन लेहचीम्ह्ट, अनेग़!” इनजोर येसु ओरिन वेहतोग़. अस्के ओर अहे कीतोर.
पेर्मालोर येसुन हव्कलाह कोहतह्तोर
(मत्याल 26:1-5; मार्कल 14:1-2; लूकाल 22:1-2)
45 मरियान कलियलाह वातोर यहुदिर, येसु बह-बह कीतोग़, अदिन ओर कतम ऊळतोर. ऊळिसि अग्डोर वेल्लाटोरे ओन नमतोर.
46 मति अग्डोर उय्तुर बार कीतोर, परुसिरके अनजि, येसु बह-बह कीतोग़, अदिन कतम ओर वेहतोर.
47 अदिनेनाह्क पेर्मालोर ओसो परुसिर वेरु यहुदिराङ सेह्नलोरिन केयिसि मीटिङ उदिह कीतोर. अस्के पया इतोर, “ओग़ इतेके वेल्लाङे बामिह कीयनाङ सीनाङ तोहतह्तोग़. माट बह केमेन मनदनाया?
48 माट ओन अहे विळ्सतेके कतमतोर ओन नमिसि ओन राजाल कीयनुर, अस्के रोम सर्करताङ सीपय्कु वासि मावा मंदिरतुनु, मावा देसेमतुनु बूळे कीयनुर,” इनजि इद्रमताङ पोल्लोङ पट आसि वळ्ह्कतोर.
49 ओरग्डाहि वग़ोग़ कयपाल इनवाल अद वर्सा मोदुल पेर्माल मतोग़, ओग़ पया ओरिन इतोग़, “मीक बातय तेळियवालेवा वळ्ह्किह्निर!
50 पूरा देसेम बूळेम आयना वाटो वग़ोग़ मन्कल लोकुरेनाह्क हायना, इद मीवाये पाय्दाता मन्ह्ता, इचोनतेला मीक तेळियो!”
51 इद गोटि ओग़ तनाय बुदते वळ्ह्कोग़, मति अद वर्सा ओग़ मोदुल पेर्माल मताह्कु, यहुदिरा देसेमतेनाह्क येसु हायवल मन्ह्तोग़ इनजि देवुळि ओना संगे कबुर वेहच मता, अदिह्क ओग़ अह वळ्ह्कतोग़.
52 सिरप अद देसेमतेनाह्क आयो मति सबे देसेह्कने मनवालोर देवुळताङ मग़्क-मयस्किन ओंडे कीयना इनजि येसु हायना मतोग़.
53 अदिह्क ओर अद दियाताहि येसुन हव्कलाह कोह्न्दुर.
54 अदिनेनाह्क येसु अस्केडाहि येरुसलेमते मनवालोर यहुदि लोकुरगा सबेटोरिह्क दिसनाह वेलियोग़ आंदोग़. मति पेळ्ह्कल बूम एरेटा एप्रायिम इनदनद नाटे माट कग़यवालोरा संगे पेसिस वातोग़, वातापया माट अगाने मंदोम.
55 अस्के यहुदिरा आवना पंडुम एरे वास मता. पंडुमता मुनेन सोक आयनद रिवजतुन माळना इनजोरे तमा-तमा नाटेनाहि वेल्लाय मुलु येरुसलेमतके अतोर.
56 ओर अगा येसुन पर्ह्कसोरे मंदिरतगा निच मनजि, तमतमाय वळ्ह्कलाह आतोर, “मीट बह इह्निर रा? ओग़ पंडुमतग वायनोग़ा, वावोग़ा?”
57 मति पेर्मालोर ओसो परुसिर ओन पोयतना इनजि “ओग़ बेगा मन्ह्तोग़ इनजि, बोन्काय एर्का आतेके माक कबुर ईम्ह्ट, ऊळाट!” इनजोर वेर अगा वातोर कतमतोरिह्क उकुम ईसि.