6
1-2 अदिनेनाह्क नना बह इह्नन: माट किर्स्तुना लोप्पाडाङ सुरुतव पोल्लोन विळ्सकल; इतेके अङ्ळमताङ पाय्दालेवव कबस्किन पोहचीयना, देवुळतुन विस्वस कीयना, सला (सिर्तम) ईयनव रिवज्क, कय्क तासिस बर्कत ईयना, डोलतोर ओसो वने जीवा अरयना, अमेसातुह्क ताकनदु देवुळता आक्रि नेयम, इव सबे पोल्लोङ माट सुरुते कग़यतव पोल्लोङ आंदुङ. माट इविस्किने ओसो कग़यसोर मनवल; इविन विळ्सिस अबर दाकल ओसो विस्वसते बुद पुतोर कग़यनव पोल्लोन कग़यकल.
3 देवुळता विचर मतेके माट अद्रमे कीकल.
4-6 बोर देवुळतगा विस्वस कीसि पया तमा विस्वसतुन विळ्सिह्तोर, ओरिन माट बेद्रम जर मल्हतकल? ओर देवुळता सेतेमता वेह्चतगा वास मतोर, पोग़ोटाहि देवुळ ईयनद बर्कततुन दोर्किह कीस तान पुन्ज मतोर; दुस्रोर विस्वसिरा संगे ओर वने देवुळता जीवातुन दोर्किह कीस मतोर. देवुळता पोल्लो बेसतल इनजोर पुतोर; वायनद कालमते देवुळि तोहचीयनद लावतुन बेस-नेह्ना पुतोर. अद्रमतोर तमा विस्वसतुन विळ्सतेक अचोन, देवुळता मग़िन ओसो वने हव्कनागुटातगा वेळ्हतप लेह्का, ओसो वने दुस्रोरा मुनेह ओना लजा रेहतप लेह्का कीस्तोर. अदिनेनाह्क ओरिन विस्वसलेवद अग़दाहि ओसो वने जर मल्हतलाह मुर्तिय पग़नाह आयो.
7 मुसुर पेग़दुन ऊतिस मनजि, अगा कास्तकारि केवालोर मन्कलोरेनाह्कु बेस अनम पंडिह कीयनद बूमतगा देवुळता बर्कत मन्ह्ता; उच्वुर विस्वसिर वने अद्रमता बूमलेह्काडोरे.
8 मति अद बूमि अकल रोंडा ओसो कोये जपिङ पुटिह कीता इतेके अद बाताले कबळतुह्क अरवो. अद बूमता माल्काल तान सरप ईयनोग़, अस्के अद बोळ्सना लायक मनदग़ा. वेर विस्वसताहि पेग़्के अरतोर मन्कलोर अद्रमता बूमलेह्काडोरे.
9 माट जीवा कीतोर विस्वसिरिर! माट इद्रमताङ रेय वेसनाङ पोल्लोङ इह्नोम, तेला मति मीवा ताकमुळतुन ऊळिसि मीक देवुळता पिसमुळ निटम दोर्कता इनजि माक बर्वस मन्ह्ता.
10 बाराह्क इतेके मीट देवुळतेनाह्क कबळ कीतिर; तान जीवा कीसि ताना मन्कलोरा सेवा कीतिर; इंजेक वने कीयलाह आतिरे. देवुळि सेतेमता मनाह्कु, इव पोल्लोन अद माग़्ङो.
11 मीट इद्रम कीसोर मनदना इनजोर मावा जीवा पर्ह्किह्ता: आक्रि एवनाह मीट आसा कीयनव पोल्लोन दोर्किह कीयनासाटि इद्रमताये जिद कीस मनदना.
12 अदिनेनाह्क लंडा आयमाटु; मति बोर मन्कलोर तिपल्किन आपसोर, देवुळतगा विस्वस ताससोर अद करल कीस मतविन दोर्किह कीस्तोर, ओरा लेह्काने ताकना.
देवुळि पूरा निटम विळ्सिस मतद पोल्लो
13-14 तिपल्किन आपसोरे देवुळतगा बह विस्वस तासना इनजोरे माक अब्रहम मुय्तोग़ बेस-नेह्ना तोहतोग़: “नीक निटमे वेल्लाये करयि-बर्कत ईकन. नीवा जालपिलतुनु बोल्गिह कीकन,” इनजि, तन्काय बेरोग़ इलवाह्कु देवुळि तनाय पेदिरते ओतता.
15 अब्रहम पया आरेम आयवा केमेन केपतोग़, केपिसि देवुळि पोल्लो विळ्सिस मतदिन दोर्किह कीतोग़.
16 मन्कलोर ओतिह्पा, तम्काय बेरोर मन्कलोरा पेदिर पोसि ओतिह्तोर; अद्रम ओततस्के पोल्लो दोहतह्तोर, ताना पेग़्के पोल्लो करल आता इनजोर अद तोहतह्ता.
17 नना विळ्सनद पोल्लोतुन बेस्केन देहोन आयकन इनजि, देवुळि तना पोल्लो विळ्सतदिन दोर्किह केवालोर मन्कलोरिन तोहतना मता. अदिनेनाह्क अद तनाय पेदिर पोस ओतता.
18 मावा मुनेह तासतद आसाता पोल्लोतुन पोसि, अद माक राका कीयि इनजोर माट देवुळतगा वित वातल. तनगा वित वावालोरिह्क दीरा ईयना इनजि देवुळि पोल्लो वने विळ्सता ओसो ओतता वने. देवुळि पोल्लो विळ्सनेक वने जोल वळ्ह्को, ओतनेक वने जोल वळ्ह्को. इव रेंड आस पोल्लोङ बद्लेम आयनव आयोङ.
19 माट आसा तासतल अद पोल्लो रेय वेसवाह मावा जीवातुन तासिह्ता; अद बेस्केन देगो, बेस्केन मायो. अद आसा माक देवुळताहि लेसलाह एवो, मति सबेट्क पवित्र जागातगा मनदनद देवुळतके सीदा ओसीस्ता.
20 अद जागातगा येसु मयेनाह्कु मुनेने ओळियतोग़. मेल्किसेदेकना लेह्कान ओग़ मावा अमेसातुह्क पेर्माल आतोग़.