9
किर्स्तुना बळयिरा अदिकर
1 किर्स्तु मीक कीतप लेह्का, नाक वने उगसताङ अडोनाहि विळ्सिह केवोग़ा? नना किर्स्तुना बळयिनन आयोना? मावा येसुसामिन ऊळतोनन आयोना? सामि नावा मेटे कबळ कीताह्कु, मीट नयग्डाहि येसुना कबुर केंजिसि विस्वसिर आतिर.
2 नना मियगा किर्स्तुना बळयि आस वाताह्के, मीट इंजेके सामिना संगे जोळेम आतिर. अदिनेनाह्क मीट नावा कबळता सीना लेह्कान मह्निर. अदिह्क दुस्रोर नाक किर्स्तुना बळयि इनजोर इनवेकाय, मीक तेला नना किर्स्तुना बळयिनने.
3 मति किर्स्तुना बळयिना लेह्का केवोन इनजोर नाक उच्वुर पर्ह्किस ऊळलाह आस्तोर. ओरिन नना इद्रम पोल्लो मल्हतह्नन, बेस केंजाट:
4 माट मीवा नडुम सेवा कीताह्कु, मावा पिसना-पिसवग़ता जबब्दर मियगा इलेया?
5 अद्रमे किर्स्तुना दुस्रोर बळयिर, सामिना तमोर, पत्रु, वेर तमाङ मुतेस्किन बेके अतेकाय ऐंगे ओयना लेह्कान, विस्वसि मुतेन पोस वेलियलाहि माक वने अदिकर मन्ह्ता.
6 कबळ केवालेवा मियगा उदिस तिनदलाह नना, बर्नबस, सिरप माक इर्वुरिह्क अदिकर इलेया? मीक बेसता कबुरतुन पोकुर कीयलाहि मावाङ कोताङ बाराह्क कर्सा केवेरोम?
7 सीपय कबळ केवाल मन्कल तनाङ कोताङ कर्सा कीसि अद कबळ कीस्तोग़ा? लका ओग़्सतोग़, अविस्कनाङ पंडिङ तिनवा मनदनोग़ा? कोंदाङ-एर्रेङ अय केवाल, अविस्कना पाल उनवा मनदनोग़ा?
8 नना सिरप मन्कलोरा विचरतेन वेहोन;
9 मोसानाङ अडोनगा वने इदे पोल्लो रासतद मन्ह्ता: “विसनद कोंदा कळातगा विसिह्पा तिनि” इनजोर रासतद मन्ह्ता. सिरप कोंदानेनाह्क देवुळि इद पोल्लो वेहो.
10 मयेनाह्क वने इद पोल्लो वेहतह्ता. वीतवालोर मन्कलोर ओसो विसवालोर मन्कलोर अनम तिनदकन इनजोरेने आसा कीसोर तमा कह्टेम कीस्तोर. अद्रम किर्स्तुना कबळ केवालोर वने बोर मन्कलोरगा सेवा कीस्तोर, ओरा कयदे तिनदनद आसातेने कबळ कीस्तोर.
11 बूमतगा वंजिङ वीतना लेह्कान मीवा जीवातगा विस्वसताङ पोल्लोन वीततोम. इतेके ताना बद्ला मीट माक कोताङ ईस तोळ ईकिर इनजोर ऊळतोम. इद बह मीक मोतालेह्का मन्ह्ताया?
12 किर्स्तुना दुस्रोर सेवकिर मीवाङ कोताने तमा तिनदलाह तमा अदिकर इन्ह्तोर. ओर अद्रम आस्तोर इतेक ओरिह्काय वीळिसि माक पकाय अदिकर मन्ह्ता. तेला मति मीवाङ कोताना अग़ ऊळिस मनोम, किर्स्तुना बेसता कबुरतुन नमलाह एग़्कुळ आयनदायो इनजोर माट सबे तिपल्किन आपिसि केमेन मह्नोम.
13 इह केंजाट, यहुदिरा मंदिरतगा बूमयालोरिह्क ओसो वडेरिह्क, मोक ईतद ओसो कोड वाटटद मादग्डाहिये तमा पिसवटुह्क दोर्किह्ताङ इनजोर पुतिरे!
14 अद्रमलेह्काने किर्स्तुना बेसता कबुरतुन पोकुर केवालोरिह्क, अद कबुरतुन केंजिसि विस्वस केवालोर तिहतना इनजोर सामि उकुम ईतोग़.
15 नाक तिहाट इनजोर मीक वेहतलाह नाक अदिकर मन्ह्ता, मति नना इचानाह बोने अद्रम इनोन. इंजेक मन्कलोर नाक तिहिर इनजोर वने इव पोल्लोङ रासोन. कोताङ एनवालेवा सामिना कबळ कीतन इनजोर नना निटम पोंगसोर तिरियलाह आतन. बोग़ाय नना पोंगनद पोल्लोतुन मायिह कीयना बद्ला नना डोलतेक तेला बेसु.
16 किर्स्तुना बेसता कबुरतुन पोकुर कीयलाह आतन इनजोर नना पोंगसोर तिरिय पग़वोन. अद कबळतुन देवुळि नावा पोग़ोन वाटटा, नाक तान कीयाय पोयह्ता. केवेक अचोन देवुळि नाक पकाय सिक्सा ईयग़ा.
17 नना नावा विचरते बेसता कबुरतुन वेहतना इतेके नाक बूत दोर्कलि, मति इद कबळतुन देवुळि नावा कयदे कीसीता. अदिनेनाह्क नाक विचर वावेक वने इद कबळतुन कीयाय पोयह्ता.
18 पया नावा बूत बातालि? नावा अदिकरतुन विळ्सिसि किर्स्तुना बेसता कबुरतुन पुनेमते पोकुर कीय्ह्नन इनजि पोंगलाह दोर्किह्ता. अदे नावा बूति.
बेसता कबुरतासाटि पोलु बेद्रम पिसिह्तोग़?
19 नना कोताङ एनवाह्कु बोनाय ओर्युलतोनन आयोन, तेला मति वेल्लाटोर मन्कलोरिन किर्स्तुनगा ततनेनाह्क, सबेटोर मन्कलोरेनाह्क ओर्युलतोना लेह्का आतन.
20 नावा ऐंगेटोर यहुदिरा संगे मनदह्पा, ओर कीयना लेह्कान कीय्ह्नन. मोसानाङ अडोने ताकवालोरा संगे मनदह्पा, नना वने अव अडोना लेह्कान कीय्ह्नन. नाक इतेक अडोन नोमवेक वन बार आयो, मति ओरिन किर्स्तुनगा ततनेनाह्क नना वने ओरा लेह्कान कीय्ह्नन.
21 मोसानाङ अडोन नोमवोरु यहुदि आयवोरा संगे मनदह्पा, नना वने ओरिन किर्स्तुनगा ततनेनाह्क मोसानाङ अडोन पुनवप लेह्कान मह्नन. देवुळताङ अडोन पास्कोन, मति निटम किर्स्तुनाङ अडोन माळिह्नन.
22 पोहचीतप मनवालोर मन्कलोरिन किर्स्तुनगा ततलाहि, नना ओरा लेह्कान आतन. बह आय उच्वुर तेला पिसिर इनजि, बोर बह मन्ह्तोर, अह लेह्काने नना वन आतन.
23 बेसता कबुर मतपु नावा ताकमुळ आयि इनजोर, बेसता कबुरतासाटि सबे कीय्ह्नन.
24 कग़्सनगा वेल्लाटोर मन्कलोर कग़्सलाहि दास्तोर, मति गेल्सवाह्के इनम दोर्किह्ता इनजोर पुतिर. मीट वने देवुळताहि इनम एतना लेह्कान पिसाट.
25 कग़्सनगा गेल्सवालोरिह्क आकिने पंडटद सोबाता गीळि केग़पिह कीस्तोर. अद वतनव आकिने पंडटद आंदु. तान दोर्किह कीयलाहि ओर तमाङ मेंदुस्किन आव्रे कीस ताकिह्तोर. माट बारा बेस्केन वाग़वद गीळि दोर्किह कीय्ह्नल.
26 अदिनेनाह्क नना सीनातगा एवयकन इनजि जिदते वितिह्नन. निसान लेवगा एसवाना लेह्का आयोन.
27 मति दुस्रोरिह्क पोकुर केवानन नाके देवुळि इनम एवा मनमाकि इनजोर, नना कुदतुन आव्रे कीसि, बेसता कबुरतुन पोकुर कीयनद सेवा बेस आयना इनजि, नावा मेंदुलतुन कय इळ्न तासिह्नन.