11
1 नना किर्स्तु ताकतद अग़दे ताकिह्नन. अद्रमलेह्का मीट वने नना ताकनद अग़दे ताकाटु.
विस्वसिर मोळ्कलाह जमा आतस्के तला मुस्क वाटनद पोल्लो
2 मीट नाक सबे पोल्लोने सीता कीय्ह्निर, अहे नना मीक काग़्हतव पोल्लोना लेह्काने ताकिह्निर, बेस-नेह्ना कीय्ह्निर.
3 मति ओसो उंद पोल्लो मन्ह्ता इदिन मीट पुन्ह्टु: किर्स्तु इतेके ओर्वोग़-ओर्वोग़ कोय्तोना तलालेह्का आंदोग़, कोय्तोग़ बारा आंचाना तलालेह्का आंदोग़, अहे देवुळि बार किर्स्तुना तलालेह्कान आंदु.
4 मीट मोळ्कलाहि जमा आय्ह्निर अस्के बोग़ाय कोय्तोग़ पार्तना कीनेके, इलवेके देवुळता जीवाता दळ्मते वळ्ह्किह्पा, तना तला मुस्क वाटटेके, तना तलातुन, इतेके किर्स्तुन मान एवप लेह्का कीस्तोग़.
5 मति आंचाना पोल्लो दुस्रा: पार्तना कीयह्पा इलवेके देवुळता जीवाता दळ्मते वळ्ह्किह्पा, आंचाळि तला मुस्क वाटवेक अचोन, तना तलातुन, इतेके मुजोन मान एवप लेह्का कीस्ता. अद तनाङ केल्किन कोग़ियतप लेह्का लजाता पोल्लो मन्ह्ता.
6 अदिनेनाह्क पार्तना कीयह्पा, देवुळता जीवाता दळ्मते वळ्ह्किह्पा आंचाळि तला मुस्क वाटवेके, तनाङ केल्किन कोग़ियि. केल्किन कोग़ियनद, बोळ्कल कीयनद आंचाह्क लजाता पोल्लो मतेके, तना तला मुस्क वाटवद वने अचोने लजाता पोल्लो आंदु.
7-9 देवुळि कोय्तोन तना लेह्का पंडटा. मुनेतोग़ कोय्तोग़ आंचानाहि पुटिस वावोग़, मति देवुळिये ओन पंडटा; पंडटाह्कु ओनेनाह्क देवुळतुह्क मान दोर्किह्ता. अदिनेनाह्क ओग़ पार्तना कीयह्पा तला मुस्क वाटनद आयो, वाटटेके देवुळता मानतुन मुचतप लेह्का आयग़ा. आंचान बारा देवुळि कोय्तोनग्डाहि पंडटा. देवुळ आंचानेनाह्क कोय्तोन पंडो, मति कोय्तोनेनाह्क आंचान पंडटा. अदिह्क आंचानेनाह्क कोय्तोन्क मान दोर्किह्ता. अह आसि अद पार्तना कीयह्पा तना तला मुस्क वाटनदे.
10 विस्वसिरा मुल जमा आतस्के, सबेटोर ओप्पनद रीतते मोळ्किह्तोर इनजि पोग़ोटाङ देवतुल्क वने ऊळसोर मन्ह्ताङ, इदिन सीता कीम्ह्टु. अविस्कनेनाह्क वने आंचाळि, नावा तलाता पोग़ोन नावा अदिकर मन्ह्ता इनजि ओप्पनद रीतते तना तलातुन मुचिस मोळ्कना.
11 बह मतेकाय सामिना संगे जोळेम आतोरगा, कोय्तोग़लेवा आंचाळ मनदा पग़वो, आंचाळलेवा कोय्तोग़ मनदा पग़वोग़.
12 सुरुमुनेतद आंचाळि कोय्तोनग्डाह तयर आता. इंजेक कोय्तोग़ आंचानग्डाह पुटिह्तोग़. मति सबेटव देवुळता मेटे तयर आताङ.
13 आंचाळि देवुळतुन पार्तना कीयह्पा तला मुस्क वाटवा मनदनद ओप्पिह्ताया? मीटे विचर कीस ऊळाट.
14-15 कोय्तोग़ आंचान लेह्कान केल्किन लाट बेर्सिह कीयनद ओन्क लजा वास्ता. मति आंचाळि तनाङ केल्किन लाट बेर्सिह कीयनद तान्क सोबा आस्ता इनजोर सबेटोर पुतोर. तना तलातुन मुचलाह इनजोर देवुळि तान्क केल्क ईता.
16 इद पोल्लोता लोप्पा बोग़ाय नावा संगे गिटोगटो आयना इतेके, ओग़ पुनेग़, नना इद्रमे काग़्हतह्नन, सबे नाह्कने विस्वसिरा मुडोर वने इद्रमे कीस्तोर.
सामिना कुळ्पि
17 इंजेके ओसो उंद पोल्लो मन्ह्ता, मीट कीयनद नाक विचर वावो: मीट मोळ्कलाह जमा आय्ह्निर, मति जमा आयनद पाय्दा आयवालेवा, मीवा नुस्कन आसोर मन्ह्ता अले.
18 मुने इद पोल्लो: मीट विस्वसिरा मुलु जमा आतस्के, मीवाङ ओर्विह्क-ओर्वोनाङ पोल्लोङ अरवोङ इनजोर नना केंजतन. नना केंजतद पोल्लोतगा उचुन सेतेम मनदग़ा इनजोर इह्नन.
19 मियगा पोल्लोङ अरवोर मनदनुरे, अस्केन बोर देवुळतुह्क निटम विचर वानाह ताकिह्तोर इनजोर मीट सबेटोर मन्कलोरिह्क एर्का आयग़ा.
20-21 मीट सामिन सीता कीयनद कुळ्पि इनजोर जमा आय्ह्निर, अस्के मीट दुस्रोरिन केपवा आपुना-आपुना गाटोतुन तिनदलाह गाबरते मह्निर. बोग़-बोग़ कग़्वते मन्ह्तोग़! बोग़-बोग़ तिनजि-उनजि मन्ह्तोग़! इद्रम आतेके तेन सामिना कुळ्प इनजोर बह इह्निर?
22 इद बह कीतिर अय? लेवोर विस्वसिरिह्क बेसता गाटो तूसवा ओरिन लजा कीय्ह्निर, इद्रम कीस देवुळता मुडुन पास्किह्निर! इद्रम कीयना वाटो जमा आयनामुने, मीवाङ लोह्कने तिन्ज वातेक बेसु. इद पोल्लोतुन नना बाताल इनजोर वेहतकन? बेस-नेह्ना कीयलाह आतिर इनदकना? आयो! मुर्तिय अद्रम इनोन.
23 इदिना लोप्पा नना मीक काग़्हतव पोल्लोन सामि नाक वेहतोग़. अद इद्रमि: येसु किर्स्तुन तना ऐंगेटोग़ नाळेह कीस पोसीतोग़, अद नग़्का येसुसामि आरतुन पोयतोग़.
24 पोसि देवुळतुन जोहर कीतोग़. पया आरतुन किळ्हचि तनाङ कग़यवालोरिह्क तूसिस ईयह्पा इद्रम वेहतोग़, “इदु! मियेनाह्क नना ईयनद नावा मेंदुलि! नाक सीता कीयलाह मीट वने आरतुन किळ्हचि तिनदनद कीसोर मन्ह्टु,” इनजोर वेहतोग़.
25 अद्रमलेह्काने तितापया, अंगुर जोमा मतद बट्कितुन पोयतोग़, पोसि “इदिन उन्ह्टु! इद बट्किता अंगुर जोमा, नावा नेतुरता सीना आंदु. पूना रीतते मन्कलोरिन पिसिह कीकन इनजोर देवुळि करल कीता. नावा नेतुरि तान तोहचीयनद सीना आंदु. मीट इद्रम बेस्के उनडकिर, अस्के नावा नेतुर मियेनाह्क पोवता इनजि सीता कीस उन्ह्टु,” इतोग़.
26 बह इतेके सामि वानाह्जोम बेस्के-बेस्के जमा आस आरतुन तिह्निर, बट्किता अंगुर जोमातुन उह्निर, अस्के सामि मियेनाह्क डोलतोग़ इनजोर पोकुर कीकिर.
27 अदिनेनाह्क नना पोग़ोन रासतपु सामि डोलतदिन तोहतनद आरतुन, अंगुर जोमातुन बोग़ाय ओप्पवद रीतते तितेक-उटेके, ओग़ सामिना मेंदुलतुन, ओना नेतुरतुन पास्किह्तोग़.
28 अदिनेनाह्क ओर्वोग़-ओर्वोग़ मन्कल, मुने तन्क पर्ह्किस ऊळेग़. ऊळिस पया सामिन सीता कीयनद आरतुन तिनेग़, अंगुर जोमातुन उनेग़.
29 सामिन सीता कीयनद आरतुन, अंगुर जोमातुन तिनवालोर-उनवालोर, ताना अर्तमतुन बेस पुनिर. बाराह्क इतेके सामिना मेंदुलतुन पास्कवालोर तमाय पोग़ोन सिक्सा वानाह कीस्तोर.
30 अदिनेनाह्क मियग्डाहि वेल्लाटोर मन्कलोर लावलेवप आतोर, दुक अरतोर, वेल्लाटोर डोलतोर वने.
31 मति माट कुदतुन बेस-नेह्ना पर्ह्किस ऊळतेके, देवुळि मावा पोग़ोन सिक्सा वाटो.
32 मति उंद पोल्लो मन्ह्ता: विस्वस केवोर मन्कलोरा संगे माट बूळेम आयना आयो इनजोरे, सामि माक सिक्सा ईसि सुद्रे कीस्तोग़.
33 अदिह्क मावोर विस्वसिरिर! सामिना कुळ्प तिनदलाह जमा आय्ह्निर, अस्के ओर्विह्क-ओर्वोग़ केपाट.
34 बोन्काय कग़्व वसतेके ओग़ तना लोन तिंज वायेग़, अस्के मीट जमा आतस्के सबेटोरिह्क आलनाह तिनदा दोर्कग़ा. अद्रम केवेके देवुळताहि सिक्सा दोर्कनाह आयग़ा. इंजेके पिसताङ पोल्लोन बह कीयनद नना मियगा वातस्केन वेहतकन.