Oine enona ana abapotipoti nu kite.

Yudiya bwasumu nihi lolil, yaka nihi teli abapowon pwatanaa ge nihi ton wali powon Yehoba elana. Abapowon hi ginola pat elal. Mulaa abwe hi ginola al aiyan ge kopa elal.

Abapowon kakanununa iyoho lamwa 553 elana.

Nu kite al: Yudiya wali Pagan ana buki lamwa 73.

Ebo tonawanawa etega ni vin Yudiya etega wana limiya, inoke wana totuwalali etega wewel ni wage yaka totuwalali tonawanawa aena papakovana ni ul yoho. Hi ginol ola inoke tonawanawa hi awatauwan ge hi pamasal hi yaliyaya wana nem kaiwena.

Ebo limi o nige totuwalali i gagan, inoke tonlimi wewel ni wage ni pek wana bwabwali elana yaka totona aena ni ul.

Nu kite al: Yudiya wali Pagan ana buki lamwa 50-51

Helodi nu kite.

Aneloseyau heliya Yehoba wana elopapatuna, avaliya Yehoba hi miminaa labulabumwa. Nige sauga gegewena ta kikitel matalaa, yaa sauga enuna hi masal gamagalau elal hi kitel. Wali tuwalali bwabwatana te Yehoba wana gamagalau nihi matahikagil (Tuwalali 12:6-11, 27:23; Hibilu 1:14). Sauga enuna Yehoba i patunal baaba etega nihi pamasal gamagal etega elana. Aneloseyau wali tobwabwatana alana Maikol (Yuda 9). Anelose bwabwatana etega al alana Gabeliyel (Luke 1:19, 26). Yudiya aneloseyau hi kitel pwabwata ge hi awatauwagil nabiyan. Yaka buki Hibilu ana toleleli i pankitel Yeisu alana aneloseyau alaliya i bwata lake (Hibilu 1:4 ge i nok).

Yeisu wana tohago hi gewi, yaa gamwaliyaa ali gewi elulutega eluwa (12) i hilel ge alaliya i tun “apostolo” (Mataiyo 10:1-4). Heliya avaliya Yeisu hi nawanawa ge i pankitel, yaka i patunal wana tuwalali nihi ginol. Apostolo ana sapu heiya “bolo i patunal.” Wana yaomal ge wana lut al hi kite ge hi tabwa ana towasa. Heliya hi tabwa toabulilek houhouwel wali tohouwa. Buki Tuwalali elana Pol ge Banabas (Tuwalali 14:4) ge gamagalau enuna al alaliya i gan heliya apostolo, kaiwena heliya al ge Yeisu i hilel ge i patunal wana tuwalali nihi ginol. Pol Yemesa toto Yeisu talina i awa apostolo-an Galatiya 1:19 elana.

Bal iya Kenani wali yabowaine bwabwatana. Sauga Isileli hi ulutuk labi Kenani, yaka hi gewi hi kululuwa yabowaine Bal elana ge Yehoba ana en hi pek. Inoke Yehoba i hugaagil.

Bali ana awa i ola mwawin etega, nuwana i yapu. Enowana heiya pwatum, ana bwata i ola laesi. Bali ana siusiun ge ana tuwalali i ola witi. Yaa witi enowana i waisi hot, yaka molana i bwata, bali nige molana i bwabwata. Inoke Yudiya gamwaliyaa bali iya gamagalau bolo nige wali mani i bwabwata aliya bwabwatana.

Nu kite al: Witi

Vilan bateli ana sapu hi gewi. Etegana ebo gamagalau labui o ebo boda labui hi pebabateli-agil inoke ta ba bateli hi ginol. Bateli ya alana etegana al ta ba “kontalak.” Pana dimdim hi ba “contract” o ebo “covenant.”

Yehoba alonau ge gamagalau bateli enuna hi ginolil, yaa labui ali nuwatu i bwata. Etegana alonau Mosese ge boda Isileli hi ginol alana ta ba “Bateli houhouwena.” Yehoba i ba bolo wana logugui hi henapuan ni ahel wana gamagalau. Yaa anamusa nige gamagal etega bosowaina Yehoba wana logugui ni henapuan paolaola-ek, inoke bateli houhouwena eliyana nige gamagal etega i sasapu Yehoba matanaa.

Inoke Yehoba bateli vavaluna i ginol alonau ge gamagalau, i ba ebo gamagal etega ni abulilek Yeisu Keliso elana inoke ni awa sapusapu-an.

Uleya Yehoba i ba Mosese Bateli ana Dedewaga ni ginol ge ni teliya Aban Bwabwalena Hot gamwanaa Petupatupa Limena elana (Totagil 25:10-22).

Bateli ana Dedewaga iya dedewaga ebwakil elana hi ginoliya ge gold hi papi tuwana gegewena elana. Gamwanaa bugul eton. Toto ana nuwatu i bwata heiya pat mamanana sasapona labui toto Logugui Elulutega hi leliya tuwanaa (Totagil 40:20; Hibilu 9:4,5). Eluwana anaan manna enuna ulugomwa gamwanaa (Totagil 16:32-34). Etonina Eloni wana suki toto i titin (Hibilu 9:4; Ali Gewi 17:1-10).

Alana hi tun Bateli ana Dedewaga kaiwena dedewaga ginebi ge bugul bolo iyoho gamwanaa hi tabwa etotohi etega bateli toto Yehoba alonau ge Isileli hi pebabateli-agil kaiwena. Yehoba i baek Mosese elana i ba, “Na minaa Bateli ana Dedewaga ana heguna pwatanaa bwasumu labui opeliya gaganina ali luwaluwala.” (Totagil 25:22). Inoke Bateli ana Dedewaga i ola al Yehoba i minaa wana gamagalau gamwaliyaa ana etotohi.

Bateli ana Dedewaga kakanununa iyoho lamwa xxx elana ge iyoho Bateli Vavaluna lamwa 541 elana.

Sauga Isileli hi tagilem Itipita, gamagalau enuna heliya nige Isileli i oola hi tubwi eliyalil avaliyau hi tagil ge hi nawanawa. I ola al sauga hi tuk Kenani gamagalau enuna hi tubwi eliyalil, i ola Leyabi (Yosuwa 6:25) ge Gibiyon gamagaliliyau (Yosuwa 9). Heliya iyoho boda Isileli gamwanaa, yaa heliya nige Isileli towohiliyau i oola. He bosowaina ta papatini-agil gamagalau bolo nige Papua New Guinea gamagaliliyau hot i oola, yaa hi tabwa Papua New Guinea sitisen (citizen), toto pana dimdim ta ba, “naturalised citizen.”

Yudiya wali tapwalolo i talam te ebo wali bolau gotomwa yoho paganina nihi ahe, bosowailiya nihi tapwalolo Yehoba elana i ola Isileli hot, ali logugui maisena ya. (Totagil 12:48-49, 20:10; Yosuwa 8:33,35)

Deit iya Yudiya wali labi ebwakilina etega, enowana hi aan. Deit kakanununa iyoho lamwa 511 i awoni.

Nu kite al: Yudiya wali Pagan ana buki lamwa 28-29.

Donki bwasumu etega gamagalau hi heya pwatanaa yaka hi nawanawa, o ebo eusausan hi paheya elal. Donki kakanununa iyoho lamwa xxx elana, i ola al iyoho Bateli Vavaluna lamwa 110 ge 593 elal, ge iyoho al lamwa 600 i awoni.

Eloni iya Mosese talina, alona Mosese hi tuwalali ge Isileli hi nulil tagilagil Itipita. Eloni iya un Libai gamagalina ge Yehoba iya i hile i tabwa topowon houhouwena. Inoke Yudiya topowon hi hileliya Eloni tubutubunau gamwaliyaa.

Hibilu 9:4 i pamasal Eloni wana suki toto i titin iyoho Bateli ana Dedewaga gamwanaa. He liwanina i ola hiwe. Isileli enuna hi lovehawol Mosese ge Eloni kaiweliya. Yaka Yehoba i ba Isileli ali un maisena ge maisena ana tohouwa wana suki ni teli Petupatupa Limena elana inoke gamagal toto Yehoba i hile Isileli ni houwaagil wana suki ni titin. Lan i gan hi pwawa Eloni wana suki i titin. Inoke Yehoba i ba suki o hi teli Bateli ana Dedewaga gamwanaa. Liwanina iyoho Ali Gewi 17:1-10.

Yudiya wali epanapana hi ginola bwasumu kunisiliya o ebo kaliko babalona elana. Bwasumu kunisiliya hi hel tubwe i yapu ge i manamana. Yaka ebwakil hi pamilil ge hi anal, i ola kila lan ebe kenves (canvas) ta anal.

Abalahama, Aisake ge Yakobo epanapana hi patuwalali wali limi. I ola al sauga Mosese Isileli i nulil hi tagilem Itipita hi nawanawa uleya, epanapana hi patuwalali.

He kakanununa iyoho lamwa xxx elana.

Nu kite al: Epanapana Hagalena

Baliman maisena ge maisena Yudiya Epanapana Hagalena hi giginol. Hagali o kaiwena epanapana hi tatal ge hi miminaa, inoke hi nuwahikan te valila tubuliyau baliman poti hi nawanawa uleya hi kekenuwa epanapana gamwanaa. I ola al yaliyaya hi giginol ge hi ba mulolu Yehoba elana kaiwena witi ge bali ali pahipahi iyaka i mowasi. Inoke alana etega al Pahi I Mowasi Hagalena. Hagali ya ana yapu i ola wik maisena, ge ana sauga te sauga toto heliya wali labi elana waiwai ana sauga i momowasi ge tultul ana sauga i tetelipuna, heiya te Septemba ana abapwamowasi ge Okotoba ana abatelipuna.

Yudiya wali tapwalolo elana Gegi ana Yakiyakil ana Lan iya lan bwabwatana ge i bwabwalena. Lan o elana topowon bwabwatal wali tohouwa bulumakau melutauina etega ge goti etega ni lol. Inoke saliyaliya ni ahe ge ni ulutuk Aban Bwabwalena Hot gamwanaa Limi Bwabwalena elana ge ni seulanek Bateli ana Dedewaga pwatanaa. I ginol ola o gegi ana yakiyakil kaiwena, gegi bolo iya ge boda hi giginol baliman toto abwe i momowasi elana (Libai 16:14-16). Yaka abwe bulumakau o ge goti o tuwaliya hi ton olan abaholavi tolinaa (Libai 16:27).

Gegi ana Yakiyakil ana Lan bana te buki Hibilu ana toleleli i baaba Hibilu 9:7, 11-12 ge 13:10-11 elal.

Gegi ana Yakiyakil ana Lan ana sauga heiya Septemba ana abapwamowasi o ebo Okotoba ana abatelipuna. He Gegi ana Yakiyakil ana Lan i mowasi, yaka lan nimala panuna al inoke Epanapana Hagalena hi giginol.

Gilis nu kite.

Gilis iya kantli (country) etega. Labi Gilis ana taun bwabwatana alana Adenis, ge panuwana etega al alana Kolinita. Panuwa bolo ya heliya iyoho mep toto lamwa 334 elana.

Labi o gamagaliliyau ta ba Gilik gamagaliliyau. Yeisu wana sauga elana Gilik heliya wali edukeison i bwata ge gamagalau hi awatauwagil tage heliya tosiba. Saugena o pana Gilik iya anan bwabwatana ge tovavasili waiwaisal gegewel pana Gilik hi atena. Bateli Vavaluna ana toleleli buki hi leleliya pana Gilik elana.

Gol toto milaulauina hot iya yayaluwa bibikel ali del. Aneloseyau bolo valila avaliya Seitani Yehoba wana logugui hi pihigelgel-an, heliya yayaluwa bibikel, hi gewi Yehoba i yowanil hi miminaa gol toto milaulauina hot elana, hi matamatan yatala mowamowasena kaiwena.

Gosen iya labi etega Itipita gamwanaa. Sauga Yakobo alonau natunau hi na Itipita, kin i ba nihi miminaa Gosen (Abatelipuna 47:5-6).

Goti bwasumu etega Yudiya hi mamatahikagil. Yudiya goti hulina hi im ali hul, ge bunumwina hi an ali lolan. Goti heliya bwasumu etegana bolo hi powonan Yehoba elana. Goti kunisina hi ahe ali oine ana patuna hi ginoliya ge bugul enuna al hi ginoliya. Sauga enuna goti pupunona hi ahe kaliko hi ginoliya, yaa kaliko ya nige kaliko amnana waiwaisana i oola. He sipi pupunona te i meimei ge kaliko i waisa.

Goti ana bwata i ola sipi, yaa ali awa ge wali pagan i getoga. Sauga hi gewi Yudiya goti ge sipi hi mamatahikagil toyawel.

Goti kakanununa iyoho lamwa 66 elana.

Yudiya wali tapwalolo ana logugui etegana heiya bolau tuwaliya buhuna kunisina nihi gotomwa yoho. Ebo wawaya melutau inoke wana lan eit-ina gotomwa yoho paganina nihi ginol elana. Pagan ya i neem Yehoba wana logugui Abalahama elana. Abatelipuna 17:9-14 nu kite. He ginol ya etotohi etega, i pamasal heliya Yehoba wana hilihili gamagaliliyau.

Ekelesiya houhouwena gamwanaa Yudiya enuna hi ba tage toabulilek bolo nige Yudiya i oola gotomwa yoho paganina nihi ahe ga mulaa abwe nihi tabwa Kelisitiyani hot. Ge hi ba Mosese wana logugui enuna al nihi toulil. Nuwatu ya kaiwena ekelesiya houhouwena nogogo etega hi ginol Yelusalema elana (Tuwalali 15). Ge Pol i baaba kaiwena Loma 4 ge buki Galatiya elana.

Baliman maisena ge maisena Yudiya hagali enuna hi ginolil. Hagali ya elal hi nuwahikan hauna gun valila Yehoba i ginol kaiweliya. Wali hagali bwabwatal ali sauga eton. Houwan Nopalegi Hagalena alona ge Pwalawa toto Nige alona Yis Hi Vivikuhiya Hagalena. Labuina Pentikos Hagalena. Etonina Epanapana Hagalena alona ge Gegi ana Yakiyakil ana Lan. Hagali bolo ya hi neem Mosese wana Logugui elana. Hagali etegana al mulaa abwe i gan heiya Limi Bwabwalena ana Pwabwabwalena Hagalena. Hagali bolo ya maisena ge maisena abwe nu kite Abaloya toto ya gamwanaa.

Epanapana Hagalena nu kite, ge Pwalawa toto Nige alona Yis Hi Vivikuhiya Hagalena nu kite.

Hapi iya egalagalavenu wona anana kaiwena. Hapi kakanununa iyoho lamwa 642 elana.

Heliheliyam powonina bwasumona nige ginolina bwalibwaligel hi toton abapowon elana. Saliyana hi hol seuseulan abapowon bebena elal, yaka posana ge ginolina enuna hi ton abapowon pwatanaa. Yaka ginolina gegewena al hi ahe aanan hi ginoliya. Heliheliyam powonina ana nuwatu puna te avaliya Yehoba hi heliheliyam ge hi yaliyaliyaya. (Libai 3:1-5)

Nu kite al: Powon Pwabwalige

Bateli Vavaluna elana gamagalau ali gewi esopali alaliya Helodi.

Hibilu iya alan etega al Yudiya gamagaliliyau kaiweliya. Yudiya analiya alana te pana Hibilu.

Hisopa iya mwawin etega, nuwana ona kekeisi hi loyapu. Lalana kekeisi ona ge lamwana pupunoliya hi gan, inoke i waisa ta pahun wewel o ebo saliya elana yaka ta hol seuseulan o ebo ta abutek bugul etega elana. Kakanununa nu kite.

Hoga Galili kakanununa iyoho lamwa 26 i awoni, ge iyoho mep toto lamwa houwan hot elana, lamwa toto buki alana i awoni.

Yudiya ali kaliko waiwaisana i gan, yaa sauga enuna kaliko nihi ginol bwasumu ololal goti ge kamel pupunona elana. Kaliko o nige amnana i wawaisi tuwala elana.

Yudiya wali pagan etega, ebo tutuliya etega i yaomal, bosowailiya kaliko ololana o nihi galoi wali nuwanak etotohena. Ge hiwo papakovana nihi gagalo nihi teliya tuwaliyaa o ebo nihi misiyowa papakova gamwanaa. I ola al, ebo hi nuwanak wali gegi kaiweliya, sauga enuna nihi ginol ni ola al to.

Kamel iya bwasumu bwabwatana etega, gamagal i yapu luwai. Bosowaina gamagalau nihi heya pwatanaa yaka nihi nawanawa labi yayapona. I ola al bosowaina gamagalau bugubugul nihi gewi nihi usana kamel elana ge ni kalivai. Sauga enuna kamel pupunona hi ahe kaliko etega hi ginoliya, yaa kaliko ya nige kaliko waiwaisana i oola, ge amnana tuwalaa nige i wawaisi. Yudiya nige kamel bunumwina hi aan, kaiwena Mosese wana Logugui i ba ebo kamel bunumwina nihi an inoke ni pabikel.

Kamel kakanununa iyoho lamwa xxx ge iyoho al Bateli Vavaluna lamwa 141 i awoni.

Vilan “Keliso” iya pana Gilik vilanina ana sapu i olaolaek vilan “Mesaiya” iya pana Hibilu vilanina.

Nu kite al: Mesaiya

Lokolos iya Loma wali pagan, nige Yudiya wali pagan i oola. Ebo gamagal etega gegi bwabwatana ololana taulol i ginol ge ana logugui hi ginol ni yaomal, inoke hi lokolosan. Ebwakil nihi ahe kolos nihi ginoliya. Yaka gamagal o ana kolos ni kalivai abalokolos elana nihi tagahikan kolos elana, inoke kolos nihi pamilil ge gamagal ni kuki kolosa ana siga ni yaomal. Lokolos lomwanina i bwata ge abapulupuluwawi hot.

Ebo gamagal etega ana kolos i kakalivai, he i nanawa wana yaomal kaiwena. Inoke Yeisu ba kakanun etega i ginol i ba, “Ebo gamagal etega nuwana ni toulilau, ...lan maisena ge maisena ana kolos ni ahe ni kalivai...” (Luke 9:23). Ana sapu te totona ni talamwan lomwan ge yaomal elana.

Kolos kakanununa iyoho lamwa 74 i awoni.

Isileli tubuliyau bolo sauga houhouwena, sauga enuna tau etega lagonau hi gewi. I ola al sauga enuna tau lagonau hot i gan ge lagonau al hi gan, pana dimdim elana ta ba, “concubines.” Yowau bolo lagonau hot alaliya i bwata, yowau bolo lagonau al nige alaliya i bwabwata. Sauga enuna lagonau al heliya totuwalali loloyowanil. Sela wana totuwalali loloyowanina Hega i pek Abalahama elana lagona al (Abatelipuna 16:2-3). I ola al Yakobo lagonau Leya ge Letiyeli wali totuwalali loloyowanil hi pek Yakobo elana hi tabwa lagonau al (Abatelipuna 30:3-4 ge 9; Abatelipuna 35:22).

Buki enuna i ola hiwe: Gen 22:24; 25:6; 35:22; 36:12; Dan 5:2-3, 23.

Laiyoni iya bwasumu sosokana wana pan bwasumu ge gamagalau i anil. Laiyoni kakanununa iyoho lamwa 589 elana.

Lepelo iya kasiyebwa nanakina etega gamagal kunisina i an yaka i bon nabi. Lepelo wana kalapanet i mweyaha hot gamagalau enuna al elal. Inoke Yudiya wali logugui te ebo gamagal etega lepelo ni ahe, nige bosowaina gamagal o ni minaa panuwaa, yaa ni migetoga. Ebo gamagal etega tuwana waiwaisana ni nok labi toto i miminaa, ni yoga ni ba, “Nau ya bwaikikin,” yaka gamagal o ni atena tolepelo to. Gamagal tuwana waiwaisana nige tolepelo tuwana ni pipihikan.

Ebo sauga etega tolepelo tuwana ni waisi al, nige bosowaina totona ni sikal panuwaa. Houwan ga ni na topowon elana ge topowon tuwana ni hile. Ge Mosese wana Logugui i ba mulaa abwe ni tuk al Limi Bwabwalena elana, bwasumu ga ni powonan Yehoba elana ana abwabubun kaiwena, kaiwena valila kasiyebwa lepelo i pabiki.

I ola baliman 165 mulaa abwe Keliso i masal, panuwa Siliya wali kin etega iya Yudiya ali topihigelgel, alana Antiyokas Epipanis, i tuk Yelusalema yaka wali Limi Bwabwalena i pabiki-an. He bobu etega i powonan abapowon elana, yaa Yudiya wali logugui i lopwali bahi bobu nihi popowonan o ebo nihi aan. Enaa Yudasa Mekabiyas alonau wana tolohaveyan Antiyokas Epipanis hi pakokove, inoke Limi Bwabwalena Yelusalema hi pwabwabwalena al. Inoke baliman maisena ge maisena Yudiya Limi Bwabwalena ana Pwabwabwalena Hagalena hi giginol ge hi nuwahikan Yehoba i label ali topihigelgel Antiyokas Epipanis hi pakokove yaka Limi Bwabwalena hi pwabwabwalena al.

Hagali ya ana sauga i ola Disemba ana nuwanuwanaa. He hagali ya ana logugui nige i neneem Mosese wana logugui elana, yaa mulaa hot abwe hi telipuna-an.

Yudiya wali limi tapwalolo hi gewi hi minaa panuwa ona elal, yaa wali Limi Bwabwalena iyai te maisena, iya i minaa Yelusalema. Inoke Yudiya nihi na Yelusalema Limi Bwabwalena elana wali tapwalolo ana hagali kaiweliya ge ebo nuwaliya bwasumu etega nihi powonan Yehoba elana.

Limi Bwabwalena ana gana gamwanaa abamina ge bakubaku hi gewi. Bolo nige Yudiya i oola bosowailiya nihi nok bakubaku houwan elana, yaa nige bosowailiya nihi novevehe al. Tage ebo nihi novevehe al inoke Limi Bwabwalena nihi papabiki-an (Tuwalali 21:28).

Limi Bwabwalena kakanununa iyoho lamwa 181 elana ge iyoho al lamwa 510 i awoni.

He kaliko mamanana etega hi pakuki Limi Bwabwalena hi baba tomwaya i tabwa lum labui. Lum houwan alana Aban Bwabwalena. Lum labuina kaliko o gamwanaa alana Aban Bwabwalena Hot. (Hibilu 9:1-5 nu kite.) Aban Bwabwalena Hot i ola Yehoba wana abamina, ge nige bosowaina gamagal etega ni tuk elana iyai te Topowon Bwabwatana ni tuk pamaisena ya baliman maisena gamwanaa Gegi ana Yakiyakil ana Lan elana. Yaa sauga Yeisu i yaomal kaliko mamanana toto Aban Bwabwalena Hot ana ekaukaus i maleli (Mak 15:38). Toto ya i pankitela Yeisu wana yaomal eliyana kamwasa toto ta nok Yehoba manininaa iyaka i mwapwela, i ola Hibilu 10:19-20 ana pamasal.

Nu kite al: Yudiya wali Pagan ana buki lamwa 76-77

Yudiya wali labi elana panuwa maisena ge maisena wali limi tapwalolo i gan wali abamigogo. Inoke Sabwata maisena ge maisena nihi tapwalolowa to. I ola al hi patuwalali i ola abavavasili wawayau nihi pavavasilel buki matana ge Buki Bwabwalena kaiwena. Ge sauga enuna ebo gamagalau hi pakotil inoke kot nihi ginola to.

Limi tapwalolo gamwana kakanununa iyoho lamwa 178 i awoni.

Logugui ana topankite wali tuwalali te Mosese wana Logugui nihi pankite gamagalau elal. Heliya logugui o ana toatena waiwaisal. I ola al heliya Buki Bwabwalena gegewena al ana topankite. He Logugui ana topankite hi gewi hi minaa boda Palisi elana inoke hi panpankiti i ola boda Palisi wali panpankiti.

Nu kite al: Palisi

Kolos nu kite.

Masted iya ebwakil etega Yudiya ali awenuwa etega. He kila sauga enuna muka alana etega al ta ba masted, yaa Yudiya wali masted i getoga hot. Masted pwatumwina i kekeisi hot, yaa sauga i siun i tabwa ebwakil etega.

Nu kite al: Yudiya wali Pagan ana buki lamwa 32-33.

Vilan “Mesaiya” iya pana Hibilu vilanina, lahena pana Gilik elana heiya “Keliso”. “Mesaiya” ana sapu heiya “toto enonu hi hol pwatanaa.” Gamagal toto ebo enonu hi hol pwatanaa iya hilihili gamagalina. Sauga houhouwena ebo Yehoba gamagal etega i hile ni tabwa Yudiya wali kin, inoke enonu nihi hol gamagal o pwatanaa i ola etotohi etega. Bateli Houhouwena elana Yehoba i bateli abwe gamagal etega ni patuna wana gamagalau ni pwamwalil ge Yehoba wana abalogugui ni pwatanim. Inoke Yudiya gamagal o alana hi tun “Mesaiya”, kaiwena iya Yehoba wana hilihili gamagalina.

Nopalegi Hagalena hi ginol inoke hi nuwahikan valila Yehoba Isileli i pwamwalil i ahel hi tagila Itipita. Itipita ali logabola mowamowasena Yaomal ana Anelose i pain, yaka Itipita wali limi gegewel elal gamaun i tagapaaliga. Yaa Yehoba i ba Isileli limi maisena ge maisena sipi nihi tagapaaliga yaka saliyana nihi abutek limi ana nog kokowanaa ge ana ai labi labui elal. Sauga Yaomal ana Anelose i pain, ebo saliya i kite, inoke limi o i nopalegi gamaun nige i yayaomal (Totagil 12:21-27). Yehoba i ba baliman maisena ge maisena Yudiya Nopalegi Hagalena nihi ginol, inoke limi maisena ge maisena sipi etega nihi lol ge nihi anan toyawa.

Yeisu alonau ge wana tohago Nopalegi Hagalena enona hi an mulaa abwe Yudiya Yeisu hi lib ge hi lokolosan. Aanan o gamwanaa Yeisu beleid ge oine i ahe i pek hi an ge hi im, heiya te kila lan ebe ta giginol ta ba Babala wana Aanan o ebo ta ba Sakalameni. Inoke kila Yehoba wana pwamwalila Yeisu eliyana ta nuwahikan.

Yeisu i yaomala Nopalegi Hagalena ana sauga elana. Inoke kila Ista (Easter) ana sauga ta golugoluwa Nopalegi Hagalena ana sauga elana, heiya Mat ana abapwamowasi o ebo Eipul ana abatelipuna. Nopalegi Hagalena ana lan maisena ya. Pana dimdim elana alana hi ba “Passover.”

Nu kite al: Pwalawa toto Nige alona Yis Hi Vivikuhiya Hagalena

Oine iya hihiu etega, enona i luvi ge suina i balu. Pana dimdim elana alana hi ba guleip (grape). Oine suina eliyana wewel toto alana oine hi ginoliya, pana dimdim elana alana hi ba “wain” (wine), yaka hi im ge ana nuwatu i bwata elal. Yudiya wali labi elana oine ana eyowa hi gewi ge hi matahikagil.

Oine puna ana matahikan ana pagan etega i ola hiwe. Toeyowa lala bolo bebeyaunal ge bolo nige wali tabwa i wawaisi ni gotomwa yohil. Inoke abwe laliya vavalul nihi siun, yaka lala nihi enon bubun. (Diyon 15:2-3)

Oine kakanununa iyoho lamwa 15 ge lamwa 262 elana, ge iyoho al lamwa 249 i awoni.

Nu kite al: Oine enona ana abapotipoti

Nu kite al: Yudiya wali Pagan ana buki lamwa 18-27

Oine enona nihi ligin ana abapotipoti elana yaka nihi pulitatamwi inoke suina ni tagil ge suina nihi wage.

Nu kite al: Yudiya wali Pagan lamwa 22-23

Olibe iya ebwakil etega ana nuwatu i bwata Yudiya elal. Olibe enona elana enonu hi ginoliya, inoke hi patuwalali wali odam ana wewel, ali bon ana sawasawal, ge tuwaliya ana enonu. I ola al hi ahe ge aliya hi liligaya.

Olibe kakanununa iyoho lamwa 382 i awoni.

Oya Olibe iya oya etega Yelusalema labenaa, alana hi tun ola kaiwena olibe ana gungun iyoho.

Nu kite al: Yudiya wali Pagan ana buki lamwa 30-31

Palisi heliya boda o ebo ta ba pati etega Yudiya wali tapwalolo gamwanaa. Heliya logugui bolo Yehoba i pek Mosese elana hi atena bubun ge hi ba gamagalau logugui bolo o nihi toulil hoti. Yaka logugui hi gewi al hi ginolil Mosese wana Logugui ana tatalisi kaiwena ge ana etulan, ge hi ba gamagalau logugui bolo o nihi toulil (ololana Mak 7:2-4 elana). Wali nuwatu i tupa hot logugui ona ali paolaolaek kaiwena, yaa anamusa tapwalolo enowana hot hi kite luwai ololana wala ginol ni sapu ge Yehoba ta nunuwana-an (Luke 11:42).

Palisi hi nuwatu tage heliya “tosapu” kaiwena logugui hi toulil, yaka hi hanaha ge gamagalau enuna al hi teli lowagil hi ba tage heliya “togegi.” (Luke 18:9-12 nu kite.) Yeisu Palisi i awa tokakakawi-agil kaiwena hi ba tage heliya hi waisi yaa ateliya i biki. Ge Yeisu wali melteli logugui ona elal i awa nanakan. Inoke Palisi Yeisu hi hugaan kamwasa hi loya ge Yeisu nihi lopaaliga.

Nu kite al: Sadiusi ge Logugui ana topankite

Ta palopisai ana sapu heiya te Yehoba totona wana baaba ta baubaunan gamagalau elal. Ebo gamagal etega ni palopisai, sauga enuna ni ba pahuwala bugul etega mulaa abwe ni gan, ololana Tuwalali 11:27-28. Yaa sauga nihi gewi palopita ni baaba bugul etega sauga o i gan kaiwena, inoke gamagalau ni ba pagasisel o ebo ni ba pahenapol.

Bateli Houhouwena ana sauga elana palopitau hi gan Yehoba wana baaba hi baunan Isileli elal. I ola al hi ba pahuwala Mesaiya abwe ni nem ge hauna ni masal elana, ge hi ba pahuwala bugul enuna al kaiweliya. Bateli Vavaluna ana sauga elana al palopitau hi gan. Yayaluwa Bwabwalena wana guyau gamagalau enuna elal te nihi palopisai (Loma 12:6; 1 Kolinita 12:10). Yaa ebo gamagal etega ni palopisai, he tolaegan gamagal o wana baaba nihi hile ebo i sapu o ebo nigeya (1 Kolinita 14:29; 1 Tesalonaika 5:19-22; 1 Diyon 4:1).

Pentikos Hagalena iya Yudiya wali hagali bwabwatana etega. Nopalegi Hagalena i mowasi yaka lan ali gewi pipti (50) al inoke Pentikos Hagalena ana lan. Alan Pentikos Gilik analiya elana ana sapu te pipti.

Hagali ya elana Yudiya hi yaliyaya ge hi ba mulolu Yehoba elana kaiwena witi ana pahipahi ana sauga iyaka i telipuna. Inoke witi enuna toto enon houwan hi muloluan Yehoba elana. I ola al hi nuwahikan valila Oya Sainai elana Yehoba Logugui i pek Mosese elana kaiweliya.

Lan ebe kila Pentikos ta nuwahikan kaiwena Yeisu wana ha labulabumwa enaa, lan Pentikos elana Yayaluwa Bwabwalena i lau houwan hot toabulilek elal (Tuwalali 2:1-4).

Pentikos Hagalena alana Bateli Houhouwena elana hi ba Wik Seben Hagalena. (He wik seben heiya te lan pipti.) Alana etegana al hi ba Pahi Hagalena. Pentikos Hagalena ana sauga heiya Mei ana abapwamowasi o ebo Diun ana abatelipuna.

Sauga Isileli hi nawanawa uleya, Yehoba i ba Mosese limi etega ni ginol wali abatapwalolo alana hi ba Petupatupa Limena (Totagil 33:7-11). Bwasumu kunisiliya ge kaliko waiwaisana hi ahe hi ginoliya. Petupatupa Limena hi papatuwalali ana siga Kin Solomon Limi Bwabwalena etega i tal.

Petupatupa Limena kakanununa iyoho lamwa 555 elana.

Nu kite al: Yudiya wali Pagan ana buki lamwa 74-75

Yudiya wali poga enona i waisi, aliya bwabwatana etega.

Nu kite al: Yudiya wali Pagan ana buki lamwa 35

Yudiya wali tapwalolo powonina tomaha. Etegana bwasumu ginolina bwabwaligel hi ton abapowon elana. Bwasumona mwamwalina hi tomwa yaka saliyana hi ahe hi hol seuseulan abapowon bebena elal. Yaka hi puni ge hi kaine, inoke abwe ginolina gegewel hi teli abapowon elana ge hi ton olan.

Sauga gamagal bwasumu ni pwatanik Limi Bwabwalena elana tage abwe ni powon pwabwalige, yaka nimana ni teli bwasumu kokowanaa, inoke Yehoba powon o ni yaliyaya-an i ola gamagal lahena ge wana gegi ni yakil yoho (Libai 1:4). Powon toto ya ana nuwatu puna gamagal o nuwana alona Yehoba nihi tubwi bubun ge ni pamasal totona i talamwan Yehoba elana.

Bwasumu hi powon pwabwalige ana logugui iyoho Libai 1:3-9 elana.

Nu kite al: Heliheliyam Powonina

Nopalegi Hagalena i mowasi, lan i gan yaka Pwalawa toto Nige alona Yis Hi Vivikuhiya Hagalena ana sauga. Hagali ya ana lan ali gewi seben. He sauga enuna hagali labui hi ba toyawel, yaka Nopalegi Hagalena iyoho ya alan toto Pwalawa toto Nige alona Yis Hi Vivikuhiya Hagalena gamwanaa. Hagali ya elana hi nuwahikan Yehoba i pwamwalil wali miloloyowan Itipita elana. Sauga Isileli hi lou Itipita, hi lou pwamweyaha inoke nige bosowailiya nihi matamatan yis ni tuwalali ge beleid ni pouha. Inoke beleid toto hi ginola pwalawa nige alona yis hi vivikuhu hi an. Inoke hagali ya elana beleid ololana o Isileli hi aan hi nunuwahikan valila tubuliyau hi tagila Itipita (Totagil 12:15-20). Hagali ya ana sauga heiya Mat ana abapwamowasi o ebo Eipul ana abatelipuna.

Nu kite al: Nopalegi Hagalena ge Yis

Lan Sabwata ana sapu te lan veyaho. Abatelipuna 2:2-3 i pamasal lan sikis gamwanaa Yehoba panayawi ge bugulina gegewena i ginolil, yaka lan seben-ina i veyaho. Yehoba i ba gamagalau lan sikis nihi tuwalali yaka lan seben-ina nihi veyaho ge nihi tapwalolo (Totagil 20:8-10).

Yudiya logugui hi gewi hi ginolil Sabwata ana logugui, yaka logugui ona o hi pamasal hauna bosowaina nihi ginol lan Sabwata ge hauna nige bosowaina. (Diyon 5:10 nu kite.) Yaa lan Sabwata ana nuwatu puna hi kite luwai. Ebo gamagal etega wali logugui o ni leke, yaka hi huga. Inoke heiya te kaiwena hi huga sauga Yeisu gamagal etega i pwamolu Sabwata elana ge sauga tohago witi enona hi kibwaan ge hi an Sabwata elana.

Yudiya hi sabwata lan Satade elana, ge hi giginol i nem ana siga lan ebe. Kelisitiyani houhouwel hi tapwalolo Sande elana kaiwena lan o Yeisu i lutem yaomala (Tuwalali 20:7; 1 Kolinita 16:2). Inoke lan ebe Kelisitiyani ta gewi ta sabwata Sande elana, yaa enuna ta sabwata Satade elana i ola houhouwena.

Sadiusi heliya boda o ebo ta ba pati etega Yudiya wali tapwalolo gamwanaa, i ola Palisi. Palisi hi gewi, Sadiusi nige hi gegewi, yaa topowon bwabwatal ge Yudiya wali tologugui hi gewi heliya Sadiusi. Sadiusi Mosese wana Logugui hi toulil, yaa Palisi wali panpankiti ge logugui enuna nige nuwaliya i oola. Sadiusi nige hi aabulilek te aneloseyau hi gan o ebo toyaomal nihi lut. (Tuwalali 23:6-10 nu kite.) I ola al, Sadiusi Yeisu wana panpankiti hi awa nanakan ge hi lovakun bahi Yeisu ni bwabwata lakel. Inoke Yeisu hi hugaan.

Nu kite al: Palisi

Panuwa Yelusalema hi ginola oya enuna elal, etegana alana oya Saiyoni. He Limi Bwabwalena i minaa oya Saiyoni elana, inoke alana i bwata. Inoke sauga hi gewi alan Saiyoni hi teli Yelusalema bwalibwaligena alana etegana al.

Sauga enuna alan Saiyoni hi ba kakanun “Yelusalema toto natiya” bana, iya labulabumwa. Alan Saiyoni i ola ba kakanun Yehoba wana abamina bana. (Hibilu 12:22; Pankite 14:1)

Sameliya iya labi etega alana, ge i ola al iya labi o wali taun bwabwatana alana. Labi Sameliya iyoho labi Yudiya ge labi Galili ali luwaluwala. Sameliya heliya hapkas (half-caste) gamagaliliyau. Tubuliyau houhouwel heliya Isileli yaa labi tomaha tomaha gamagaliliyau hi tuk avaliyau hi alolon. Inoke Yudiya hot hi kite lowagil ge avaliyau hi pepihigelgel-agil. Wali pihigelgel puna etega te tapwalolo. Sameliya hi tapwalolo Yehoba elana yaa tapwalolo ana pagan enuna al hi paulutuk-an toto Yudiya nige nuwaliya. Ge Sameliya wali abatapwalolo bwabwatana i minaa Oya Gelisim labi Sameliya gamwanaa, yaa Yudiya hi ba gamagalau gegewel nihi na Limi Bwabwalena elana Yelusalema. Bwagana Yudiya Sameliya hi pihigelgel-agil, yaa Yeisu i nunuwana-agil nuwana ni ahel.

Sameliya iyoho mep toto lamwa houwan hot elana, lamwa toto buki alana i awoni.

Yeisu ge toekelesiya houhouwel wali sauga elana mani awa tomaha ona hi gan, enuna Loma wali mani, enuna Gilik wali mani. Wali mani ana koin etega alana i bwata heiya denaliyas (denarius), kila wala papasikal elana ta ba mani silba maisena. Saugena o ebo gamagal etega ni tuwalali eyowaa lan maisena inoke molana mani silba maisena (Mataiyo 20:2).

Wali mani etega al alana hi ba “talen” (talent). Talen iya mani bwabwatana etega inoke kila wala papasikal elana ta ba silba ali gewi tausan maisena, iyoho ta pwawa Mataiyo 25:15 ge i nok elana.

Wali mani etega al alana hi ba “mina”, iya i bwata kekeisi yaa nige i bwabwata hot. Inoke kila wala papasikal elana ta ba mani silba handeled maisena, iyoho ta pwawa Luke 19:13 ge i nok.

Sinamon hi ginoliya ebwakil sinamon kunisina elana. Sinamon bwalena i waisi ge molana i bwata. Yudiya sinamon alona enonu nihi vikuhu yaka enonu bwalena ni waisi inoke tuwaliya nihi paenonu. Bosowaina al sinamon ta patuwalali aanan bwalena ta pawaisi.

Sipi heliya bwasumu ali nuwatu i bwata Yudiya elal. Sipi pupunona hi ahe ali kaliko hi ginoliya ge bunumwina hi an ali lolan. I ola al sipi heliya bwasumu etegana bolo hi powonan Yehoba elana.

Sipi heliya bwasumu totounuwana hot ge nige hi gagasisi. Sipi ali tomatahikan i gan i nulil mwawin waiwaisana elana ge i matahikagil wanuka sosokal elal. Bulina tomatahikan sipi ni telel ali gana gamwanaa yaka iya nog ni kenu kaus.

Sipi kakanununa iyoho lamwa 66 ge 184 elal, ge i ola al iyoho lamwa 600 i awoni. Nu kite al lamwa 136, 246 ge 584 elal.

Nu kite al: Yudiya wali Pagan ana buki lamwa 40-41

Sisa iya Loma wali abalogugui wali kin bwabwatana. Saugena o Loma panuwa hi gewi hi pakokovel ge hi logugui-agil. Loma wali kin gegewel saugena o alaliya Sisa, alan o hi ahe tubuliya valilana etega elana.

Sodoma panuwa houhouwena etega yaa Yeisu wana sauga elana nige al i gagan. Panuwa etega al Sodoma gegelinaa alana Gomola. Sodoma ge Gomola wali pagan nanakina i bwata hot inoke Yehoba ginaha alona pat salpa kalakalasina i ligin lowanem labulabumwa ge i ton olagil. Yaa Lote Sodoma i lou luwan. Liwanina iyoho Abatelipuna 19 elana.

Takis ana toahi heliya Yudiya gamagaliliyau takis hi ahiahi Loma ana gamaman kaiwena, kaiwena Yeisu wana sauga elana Loma Yudiya hi logugui-agil. Inoke Yudiya hi gewi takis ana toahi hi pihigelgel-agil. Etega al sauga hi gewi takis ana toahi totoliya takis ana leit (rate) hi teli pwabwaya. Yaka toto gamaman kaiwena hi pek gamaman elana, ge tupwana hi kukuhikan totoliya kaiweliya. Inoke gamagalau ge Yudiya wali tapwalolo ana tohouwa al ge takis ana toahi hi kite lowagil ge hi towaagil. Yaa Yeisu i nunuwana-agil nuwana kamwasa waiwaisana ni pankitel.

Takis ana toahi etega kakanununa iyoho lamwa 83 elana.

Nu kite al: Yudiya wali Pagan ana buki lamwa 66-67

Taya ge Saidoni heliya nige Isileli panuwana i oola. Heliya hi wasawasa ge wasaliya i bwata. He palopitau houhouwel Isikel ge Eimos hi ba Taya wali gegi kaiwena nak nihi pwawa. Inoke sauga Yeisu labi Galili panuwana enuna i ba panapanak-agil kaiwena Wasa Waiwaisana hi towani, i papatini-agil Taya ge Saidoni elal (Mataiyo 11:21; Luke 10:13).

Taya kakanununa iyoho lamwa 99 elana. Taya ge Saidoni heliya iyoho mep elana toto lamwa houwan hot elana, lamwa toto buki alana i awoni, ge iyoho al mep toto lamwa 334 elana.

Lepelo nu kite.

Topowon bwabwatana topowon i houwaagil. Topowon bwabwatana kakanununa iyoho lamwa 548 elana.

Aen ulul nu kite.

Topowon bwabwatana ana kaliko etegana te babagal ana kama, hi am hikana ana holahola etegana alana ipod elana. Babagal ana kama gamwana i gan i ola nabwa. Ulim ge Tamim hi usana kama o gamwanaa. Topowon bwabwatana bosowaina ni patuwalali Yehoba wana nuwatu ni loyaan. (Totagil 28:30)

Nige ta aatena bubun Ulim ge Tamim heliya hauna kaba bugul o ebo ga hi papatuwalali ola. Yaa nuwatu enuna i ola hiwe. Tabam heliya pat enuna ali etotohi gaganina. Nel etega nihi neli Yehoba elana yaka pat bolo ya nihi alihin, inoke ga nihi tal ola, eliyana nel lahena nihi atena, ebo “Ee” o ebo “Nigeya.” He sauga enuna nige lahena etega ni mamasal (1 Samuwela 28:6). Tabam Ulim hi pamasal “Nigeya” ge Tamim hi pamasal “Ee.”

Nige ta aatena pat ali gewi ehila. Ebo pat labui ya, inoke tabam hi manamana bebeliya etega Ulim ge bebeliya eluwana Tamim. Ebo pat hi gewi, inoke tabam enuna Ulim ge enuna Tamim.

Buki enuna bolo hi liwan Ulim ge Tamim ali papatuwalali kaiwena i ola hiwe: Namba 27:21; 1 Samuwela 14:41-43; 23:9-12; 30:7-8.

Wewel Yolidani kakanununa iyoho lamwa 248 i awoni, ge iyoho mep toto lamwa houwan hot elana, lamwa toto buki alana i awoni.

Witi ana awa i ola mwawin etega, nuwana i yapu, ana miha i ola gamagal etega ana miha. Enowana heiya pwatum, ana bwata i ola laesi. Witi Yudiya aliya bwabwatana etega. Witi pwatumwina hi wowol i tabwa pwalawa, yaka abwe beleid hi ginoliya.

Sauga ebo enona i matuwa inoke puna hi tomwa, yaka hi hivat ge hi kin pamaisena. Hi kin i mowasi, yaka hi bibi inoke pwatumwina ginebi ge musana hi lau. Yaka abwe enona alona ge musana hi asiasi i ola hiwe. Sauga mana i towa, hi aliheyan hawahawala inoke musana mana i yu payou pwatumwina awawana i tal sikal bilibiliya. Kokoyavi hot ebo bulina i waisa tuwalali ya nihi ginol wali eyowaa. Enona alona ge musana hi ase i mowasi, yaka enona awawana hi ahe hi tagila panuwaa, yaka abwe hi wowol ge beleid hi ginoliya.

Witi ana siusiun ge ana tuwalali liwanina iyoho Yudiya wali Pagan lamwa 6-17.

Witi kakanununa iyoho lamwa xxx elana ge iyoho Bateli Vavaluna lamwa 27 i awoni, witi enona alona ge musana hi asiasi kakanununa iyoho Bateli Vavaluna lamwa 5 ge iyoho lamwa 140 i awoni, ge witi hi wowowol kakanununa iyoho Bateli Vavaluna lamwa 63.

Yayaluwa bibikel heliya Seitani wana elopapatuna gamagaliliyau. Heliya gamagal ololal gol, pat, ebwakil ge hoga gamagaliliyau. Yayaluwa bibikel bosowailiya gasisi nihi pek gamagalau hot elal inoke ginol ololana olaolal ge kukukula nihi awaawaginol, ge bosowailiya gamagal toto i kululuwa elal nihi labe. Yaa abwe gamagal o nihi ginol wana pagan i nak o ebo nihi pakasiyebwa. He bosowailiya al nihi ulutuk gamagal hot elana inoke wana baaba ge wana ginol nihi logugui-an. Sauga enuna gamagal toto hi holaviya elana nihi pabaaba. Yaka gamagalau gamagal o anana hi hago, yaa yayaluwa bibikena te i baaba, ololana Mak 5:6-10, 9:26.

Buki Bwabwalena liwanina elana Yehoba wana anelose iya labulabum gamagalina etega Yehoba i patuna i tuwalali ge i baaba iya alanaa. Buki hi gewi elal nige tage i baaba ya te Yehoba alanaa, yaa i baaba i ola iya Yehoba i ba “Nau,” he Yehoba bana, ololana Abatelipuna 16:9-10 ge 31:11, 13. Ge buki hi gewi alan “Yehoba wana anelose” ge alan “Yehoba” hi patuwalali labuii gamagal maisena bana, ololana Totagil 3:2 ge 4. I ola al, sauga Hega Yehoba wana anelose i kite, i awa Yabowaine-an (Abatelipuna 16:9,13). Nuwatu bolo ya kaiweliya, buki ana totalisi hi gewi hi ba Yehoba wana anelose iya Keliso i masal i ola Yabowaine wana elolopapatuna. Yaa totalisi enuna hi ba Yehoba wana anelose elolopapatuna ya i baaba Yehoba alanaa i ola Yehoba i baaba.

Yis iya beleid ana eawaawaginol etega. Ebo yis ta teliya pwalawa elana, yaka yis i tuwalali pwalawa gegewena i tuk solaan inoke pwalawa i pouha. Yaka abwe hi ton i tabwa beleid. Yaa sauga enuna Yudiya pwalawa ge wewel awawana hi vikuhu, nige yis hi tetelek, yaka hi ton. Beleid o kekeisi i gasisi, yaa beleid toto alona yis hi ginoliya i meimei.

Yeisu Yehoba wana abalogugui ana tuwalali i papatini-anek yis ana tuwalali elana (Mataiyo 13:33). Yis iyoho i tuwatuwalali pwalawa elana, i ola al Wasa Waiwaisana iyoho i tuwatuwalali gamagalau yawalila elana.

I ola al sauga enuna gegi paganina hi papatini-anek yis elana, kaiwena ebo nige ta mamatahikan bosowaina ni tuwalali yawalila elana ge ni apanak (Mataiyo 16:6,12; 1 Kolinita 5:7-8).

Beleid ana tuwalali bana Yudiya wali Pagan ana buki nu kite lamwa 16-17.