30
Devit me, aga ami bidi dabe dali, augwaligo te Amalek dabe dali hwįani
1 Te Devit dali, aga ami bidi dabe dali, te sela sogo solama, tama augwali te augwa taunba sabolali, te Siklak taun, tama augwaligo te Siklak taun dolai sualio. Devit te Filistia ami dabe dali bidali sogo te Amalek dabe aselama, te saut badu bidali Juda we bidi dali hwįagasali. Tama augwaligo te Siklak dabe dali hwįnama, tama augwali aiyaba elaluama, tama te taun siyu, te taun siago ulali.
2 Tama te Amalek dabego te Siklak taunde bidali we wai tigidali sali. Augwaligo te deli me te me elibeo, menio. Augwaligo te tigidali selama, te augwa dali pali.
3 Nosali Devit te aga ami dabe dali augwali te Siklak taunba sabolama, tama augwaligo te taun siago dai sualio. Tama augwa te tama koneani, te Amalek dabego te Devitgo we wai me, te aga ami dabego we wai me selama, tama tigidali augwali dali selama pai yalio.
4 Tialima, Devit dali, te aga ami bidi dabe dali, augwali te dwai gela mu ola pidubadi, te augwa bomo siligi pabo si teba usu nani.
5 Tama te Amalek dabego te Devitgo we si me sela pali, te Ahinoam me Abigel, tama augwali si te augwali dali pai sualio.
6 Te Devitgo bidi dabego homugo te boi bidi dabego te augwaligo we me wai sela pali homu elama, tama augwa haliga sęgę elama, tama Devitba wado po wali. Tama tialima, augwaligo agaba te masigi sąnama, tama aga ela muaibao wali. Tama Devit aga genuai sęgę mu elaluali. Tama Devitgo gedu haluasa po, te aga Genuai Bidiba wali, tama Godigo aga homu kolesaga dąų walalio.
7 Tama tialima, Devitgo te pris Abiatarbolo wali, te Ahimelekgo ogwa da. Agai te tama po wai, “Te pris ugwa seselama, tama dago te Godigo homu sulama koneaibao.” Tialima, Abiatargo te Devitba sesalio.
8 Tama Devitgo Genuai Bidiba hanalu wali, “Te bidi dabe augwali te eno pobeasa pabo usu yaibawe? Tama ena pobaso da, teda eno augwali suabo usu yaibawe?” Tama Genuai Bidigo agabolo te po wali, “Nago augwali pobeasa pao. Te nage augwali paboba sabolama, tama augwali elama, tama te dagego we me wai dabe augwali ma dobola saibao,” te po wali.
9-10 Tama tialima, Devit dali, te aga 600 bidi dabe dali, augwa hogodama peyu, te Amalek dabe pobeasa pali. Augwali pali, te wę Besorba sabolama, tama bidi meba te ma pabo usu meni yani. Te tama 200 bidi usu nama, te węde bidali, magi baso meni, te augwali tigi te hagela eyu, tama augwa te wę nogelama pabo usu ebeo. Tama tibaso, Devit dali te 400 bidi naga augwali te Amalek dabe pali wali pai.
11 Te Devitgo ami bidi dabe augwali pelama, tama te Isip bidi me deli te ogwa bidi sulama, tama augwaligo aga te Devitba odasa asali. Tama augwaligo aga te bret meba me, wę me menama,
12 tama te ni fik du wai dwasianu me deli duani te augwa olali te me selama, tama te wain du wai duani si me augwa te wai ilali, te tama nai meba mawai. Aga te nai me wę tusiąbadi, te sela sogo mu nai sili bidai, tama aga te nai sigo mu selama, tama bomo meni yai. Tama tialima, aga te nai tula silibo si da, aga te bomo ma salio.
13 Tialima, Devitgo agaba hanalu wali, “Te nage tonalubo bidi de dawe? Nage mena bulu bidi dawe?” Tama aga te po wali, “Ena te Isip bidi da, tama ena te Amalek dabego sę bidi me deli dao. Ena te gasi sobaso, tama ena tonalubo bidigo ena ede bididubadi taga pali, tama enaduba ede te sela sogo bidai dao.
14 Da te saut te Juda tǫ pedai badu pelama, te Keret dabe dali hwįyu, te Juda dabe dali, me te Kalep dabe dali te hwįgi pelama, tama augwaligo doado bage sobadi yali. Tama da te Siklakba pelama, tama te taun siago ulubadi yali,” te po wali.
15 Tialima, Devitgo agaba hanalu wali, “Nago te Amalek dabeba ena odasa pobaso da, te usu yaiba, agawe?”
Tama agai te po wali, “Eno usu yaibao. Tiali goli, nago te Godigo nogide te bomai po dąų waliyu, te nago ena munu me ela musiąyu, ma ena te tonalubo bidigo nogoba magobe po wao,” wali. Tialima, Devitgo te bomai po agaba dąų walali.
16 Tama te Isip bidigo Devit te Amalek dabeba sela pali. Te Amalek dabe te tǫ pedai badu digi bidalu, tama augwa te genuai nai daa tubo sę eyu bidali, magi baso meni, augwaligo te Filistia dabede me te Juda dabego tǫde me, te doado bage hauwa umabo mu sali.
17 Tialima, Devit te aga ami dabe dali te kigamu digi mu pelama, tonalugi pelama, tama augwali pelama, te wąbi hodolama hwįani. Tama augwaligo te Amalek dabe dali hwįdubadi, te pio mu igi palio. Tama augwaligo te Amalek dabe hauwa ela muani. Te 400 bidi naga te kamelba duagi pelama, tama augwa wi palio. Tiali goli, te Devitgo hanigo te gasa Amalek tigidali ela muanio.
18 Tama Devitgo te aga we si ma dobola siyu, te gasa tigidali we dabe me, te wai dabe me sobadi, te Amalek dabe sela soali doado bage tigidali me, te ma sai dao.
19 Te augwa doado bage deli te me hagabeo. Te aga ami dabego wai tigidali, te tigidali bidaluali. Tama augwa te tigidali ma dobola sai.
20 Tama augwaligo te Amalek dabego bulmakau me, sipsip me, tigidali sali. Tama te ami dabego te kibu dabe polasa sela soyu, tama augwa hae olama i weyu, te tiwai po wali, “Te e kibu dabe da, te Devitgo naga dao,” wai.
21 Augwali pelayu, tama te bomo meni ebaso, te Devit dali painu yali, te augwali te wę Besorde bidali te 200 bidi dabe tonalu bidibo madiba sabolali. Te bidi dabe asiyu, te Devit dali asali te we bidi dali deliba gesabidi sisinama, tama Devit te augwali pąba pelama, te augwaliba siade da po walio.
22 Tiali goli, te Devit dali pelawali te ami bidi mebago, te augwali bidi dwai, tama tiyu augwa te po wai, “Te bidi dabe augwali te da dali me pabeo. Tama tiyu, dago te boi hwįyu sali doado bage te augwali somainu me egobeo. Te augwa we wai naga selama, tama pomainu yaibao,” wali.
23 Tiali goli, Devitgo te po wai, “Ama dede dabeo, dagego te tobage tiwai po me wagimio, magi baso meni, Genuai Bidigo digi te doado bage dabolo mani. Agai da tonalu, tama da tau sobaso, te dago taun dolali bidi te dago augwali aiyaba elaluali dao.
24 Dego te dagego pode usu da po waibawe? Te po wabo bidi me deli te menio. Dago te doado bage bugagia te tigidali bidiba te deli tiwai si naga dobolama, sesa paibao. Te bidiyu, te doado bage tonalu bidali bidi dabego sabo doado bage deli te tiwai te hwįgi pali bidi dabego me saibao,” wai.
25 Tama Devitgo te kolesaga eyu, te Israel augwa bomai po me deli te pedalumainu yai. Tama tiyu, te Israel dabe augwa te bomai po sesemane sogo wali pai dao.
26 Devit te Siklak taunba ma begasa pelama, tama agai te hwįyu sali doado bage meba selama, tama aga abagi dabeba tolali, te Juda dabe polalubo tobolu bidi dabeba tolai. Tama agai augwaliba te tiwai po wali, “Te dage wiegi yai homu ilibo doado bage dao. Dago te Genuai Bidigo boi bidide te doado bage hauwa sali, tama dago me badu dage mobao.”
27 Devitgo te wiegi yai homu pemene ilibo doado bage te e tama taunde bidibo bidi dabeba tolali, Betel me tama te taun bulu Rama te Juda pedai te saut badu elaluali, tama te Jatir buluba me,
28 tama te Aroer me Sipmot buluba, me Estemoa buluba,
29 me Rakalba, me te Jeramel dabego taunba me, te taun bulu Kinba me,
30 Horma, me Borasan, me Atak,
31 me Hebron, te e tama bulu dabeba te doado bage tolali. Tama agai te doado bage meba te aga dali te aga ami bidi dabe augwali te polobadu bilali te bulu tigidaliba usu nama tolalio.