88
Bidigo te Godiba i weyu, te aga tau somainu yai.
1 God, Genuai Bidi, nago ena tau sabo da.
Te giligade eno nageba i weyu,
te ena nago tau somainu yai,
tama hulide me eno nageba
gedu haluasa po wabo dao.
2 Nago eno gedu haluasa po wabo odao.
Te nago ena tau somainu, eno nageba i wabo odao.
3 Te sęgę hauwa enaba pedalubaso,
tama te tebogo naga ena pąde isabo homu ebao.
4 Ena te gasa bidi dabe isainu ebo tiwai gilama yai.
Te eno bomo tigidali mu silalio.
5 Augwa ena tagalubaso,
tama ena te isali bidi dabe dali bidibao.
Ena te gasa bidigo ela muai bidi tiwai gilama,
tama te gų pagede munaluai.
Ena te bidi dabe nago te homu kone mu
gegeda palubo bidi dabe tiwai gilama yali,
tama te nago augwali munu ma tau sisąbo tiwai yai dao.
6 Nago ena te aiyanu mu yai dedage pageba sąnama,
tama ena te be hulia sai mude,
te aiyadu dologode mu bidai.
7 Nago haliga sębęgo ena mu elaluama,
tama te moni tamu ąį dinigo
ena mu mesegelibo tiwai yai dao.
8 Nago te ena abagi dabego ena tudi ola momainu ilali.
Nago ena te dwai mu pedalumainu elama,
tama augwaligo enade wi mu yai.
Tego ena kalabus ilama,
tama eno pedelabo usu meni yai dao.
9 Ena dene tolu, tama eno gedu dolama,
tama eno bugagia suabo usu isąwai.
Tama tigidali sogo eno gedu haluasa po nageba weyu,
te nago ena tau somainu yali.
10 Nago te isali bidi dabe tau sabo
bomai sę ebo da, agawe?
Te isali bidi dabe ma hodaluama,
tama nago nogi ugwaba saibawe?
11 Te gų pagede te isali bidi dabego nage dali po miyu,
te nago augwali sesemane wei mu
ebo da po wabo da, agawe?
Te dolabo bulude augwaligo nageba po weyu,
te nago augwali bugagia tonaluai
dao po wabo dawe?
12 Te gų pagede bidibo bidi dabego
te nago bomai sę ebo subo dawe?
Tama te dolabo pesagede bidalubo bidi dabe,
augwaligo nago te wiegi yai kolesaga
subo da, agawe?
13 Genuai Bidi, eno nageba i wabo,
te nago ena tau somainu ebao.
Te tigidali sogo kigamu eno
gedu haluasa po wabo dao.
14 Tiali goli, Genuai Bidi, magi baso
ena nago tudiba mubawe?
Magi baso nage enade geme duala sobawe?
15 Te ena gesi ogwa bidide digi
gagalasa, te e sogoba megi usu nagasobao,
ena te sęgę tolu, tama pąde ena isainu ebao.
Nago enaba te dene mabogo
te ena nogo sągą dili kimi isalio.
16 Genuai Bidi, nago haliga sębęgo ena mesegelali.
Nago ena dodolagia mu elama,
tama ena mu dolai dao.
17 Nago enaba te tiwai te giligade me hulide dali yai,
tama te bidi dabego ena te tigidali pedai badu
pobeasa bilali, te wę ge bo deyu,
te tǫ tigidaliba mesega sabo tiwai yai dao.
18 Nago te eno wiegi yai abagi dabego
ena tagalumainu ilali.
Te be hulia sabo naga te eno abagi bidalio.