81
Te genuai side wabo tęąbi po me deli e dao
1 Te wiegi yai pemene elama, te Godiba i wao,
te da tau seselalubo bidi dao.
Te Jekopgo God nogi ugwaba sabo tęąbi po wao.
2 Te wiegi yai musik te tobage temborin dali,
wiegi yai gita dabego, me te kulelede wao.
3 Te biugel bu wabo te genuai side
te gesi polua nanama,
tama te polua genuai pedalubo
sogode, te biugel bu waiyąo.
4 Te da Israel dabego bomo yai po elaluai.
Te Jekopgo Godigo te bomo yai po dabolo mawai dao.
5 Te polobadu Godigo te Isip dabe dali hwįgi pali sogo,
agai te bomo yai po da Israel dabeba mawai dao.
6 Eno te bidi me deligo dogonide
po odolama, tama te dego dogoni te eno konesiąwai.
Agai te tama po wali, “Eno te dagego nagede elaluali
sęgę tigidali tega sąwanio,” wali.
“Tama eno dagego te sę ebo basket dabe
te tǫba mumainu yai dao.
7 Te dagede genuai sęgę elalubaso,
tama enaba i wabo sogo, eno dage tau selama,
tama dage bugagia bidai.
Ena te geme dulalubo pesagede
te pǫ kulukulu wabo tomode ena bidibao,
tama eno dagego gedu haluasa po wabo odali.
Polobadu dage te Meriba wę ulu pedalubode bidibadi,
tama eno dage usu sai dao.”
8 “Eno we bidi dabeo, eno dageba
te bomai po mawainu ebao.
Mu tama, te Israel dabe, eno homugo
te dagego eno po odomainu homu ebao.
9 Dagego te gasa hani dabego tibo god wali me pigio.
Tama dagego gasa godiba lotu me wagimio.
Dagego ena deliba naga lotu waiyąo.
10 Ena naga ena Genuai Bidi da, ena dagego God dao.
Ena digi dage selama, te Isip taga soyu asai.
Dagego pedauwali a olalubadi,
tama eno te dage pedauwaliba nai muaibao,” walio.
11 “Tiali goli, eno we bidi dabego
te eno po me odisąwai.
Mu tama, te Israel dabego eno po wali
homu me isiąwai dao.
12 Tama tibaso, eno te augwa
hagoma ebo kolesagade
wali bilimainu sula tagalali,
tama augwa te mena augwa homugo ela palio.
13 Eno wei mu ebaso, tama eno hani bage
augwaligo te eno po odomainu homu yali.
Tama eno homugo te Israel dabego
te eno homu sesemane
wali pomainu homu ebao.
14 Te augwaligo tama tibaso da,
teda polo tama eno te augwaligo
boi bidi dabe doligi da.
Te eno boi bidi dabe augwali dali hwįnama,
tama augwali aiyaba mu elalualigi da.
15 Te ena wei homu isiąbo we bidi augwali,
teda augwali wi mu dwai elama,
tama enaba kidu sugunagasaibao.
Tama eno augwaliba te sesemane sogo dene magi dao.
16 Tiali goli, eno wiegi yai nai mu
dageba maiyabo homu eyu,
tama dage te buside elalubo tubo nai
te hani menama, tama dagego haliga
te pągąna peyu igi da,” wali.