61
Te Devitgo asęani balia po me deli dao.
Te bidigo gedu haluasa po weyu, te Godigo aga seselalumainu wai
1 O God, te eno nageba i wabo te nago odao.
Te nago eno gedu haluasa po waboba
bugagia olo muao.
2 Ena te ena bulu pesage digibulu bidibao,
tama eno haliga te sęgę mu ebao.
Tama tibaso, te eno nageba i weyu,
te nago ena tau somainu ebo dao.
Nago ena te geme dualabo
pesage me deliba odasa pobaso da,
teda te boi bidi dabego ena me dologobeo.
3 Magi baso meni, nago naga ena
te bugagia seselalubo dao.
Nage naga te eno bomai obo elalubao,
tama tiyu, te boi bidi dabego
ena me dolainu ebaso, te usugobeo.
4 Eno homugo te godolo mu eyu,
ena te nago bede bididubadi,
te ena isibo sogoba usu nabo homu ebao.
Tama ena nage pąde bugagia bidiyu,
te kakaruk wai te aga idago bogo
dologode bugagia bidibo tiwai gilama yaibao.
5 God, te tigidali naide eno nageba
te po dąų walali, te nago odalio.
Tama nago te nai dabe enabolo mawai,
te nago nogi ugwaba sabo we bidi
augwaliba mabo tiwai gilama yalio.
6 Nago te king te bidibo ula dali
te hauwa kibu be bidimainu yao.
Nago aga te tǫde sesabi elama, bidimainu yao.
7 God, nago gedude te aga sesemane sogo
te king bidimainu ilao.
Nago aga sesemane godolo mu ebaso,
tama te nago aga sesemane sogo bugagia tonaluao.
8 Nago tama tibaso da,
teda te tigidali side te eno polobadu
te po nageba dąų walali po, te eno wali peyu,
tama eno nago nogi ugwaba sabo tęąbi po
te sesemane bidada pabo sogo udaibao.