56
Te Filistia dabego Devit te Get taunde pageabi elama, tola sobaso, tama Devitgo te gedu haluasa po weyu, te Godiba gela wali. 1 Samuel 21:10-15 tede elalubo po suao.
Te Godiba konealubo homu dąų wabo bidigo gedu haluasa po wai
1 God, nago te olo tau sabo
wiegi yai kolesaga enaba yao.
Te bidi dabego ena pobeasa biliyu,
tama ena dali hwįyu ebao.
Te boi bidi dabego sesemane sogo dwai enaba ebao.
2 Tigidali sogo giligade
te boi bidi dabego ena dali hwįai.
Te bidi hauwago enaba boi bidi ebo dao.
3 Te Tigidali Bomo Elalubo God Mu,
te ena magi nai me delide wi ebo sogo,
eno konealubo homu nageba dąų mu wabo dao.
4 Eno konealubo homu Godiba kęą pelama,
tama eno agai mu poba homu konealubao.
Tama tiyu, eno agai nogi ugwaba sobao.
Eno konealubo homu Godiba munama,
tama ena te magi nai mede wi me egobeo.
Te bidi dabego mena sę enaba yaibawe? Menio.
5 Tigidali sę eno yainogo ebadi goli,
te boi bidi dabego dolobo sę yai.
Te sesemane sogo augwaligo homugo
te ena dolabo sunumi gegebo sę yai.
6 Augwa deliba sisinagaselama, geme dualalubo dao.
Te augwaligo ena bilibo bugagia tonalu,
tama ena augwaligo ela muabo
homu eyu, te tama tibo dao.
7 God, nago te augwa ebo kolesagade dwai dene mao.
Nago augwalide haliga sębę eyu,
tama augwali mu dolama, aiyaba mu elaluao.
8 Nago ena te sęgę toliyu,
tama ena te dwai dene me eyu,
tama ena te gela udubo te nago koneai.
Tialima, nago tede homu konealu elama,
tama te naga bukude te nago asęai dao.
9 God, eno nage koneanio.
Nago ena tau sainu yai.
Tama tialima, nosali eno nageba
gedu haluasa po waibao,
te nago te boi bidi dabe pobebaso,
tama augwali wi paibao.
10 Eno te Godiba homu konealu,
tama eno agai dąų wali poba homu konealuai.
Tama tiyu, eno agai nogi ugwaba sabo dao.
Mu tama, eno te Genuai Bidigo
dąų walali poba homu kone palama,
tama eno aga nogi ugwaba sabo dao.
11 Eno konealubo homu te Godiba dąų obaso,
tama tiyu, te eno magi naide wi me egobeo.
Te bidi dabego mena sę enaba yaibawe? Menio.
12-13 God, te polobadu eno yaiba
olama po dąų wali sę, te sę eno yaibao wali.
Nago ena ma dobola saligo tama, ena me isibeo.
Nago ena tau saligo
te boi bidi dabego ena me aiyaba elalubeo.
Tama tialima, God, ena te nage dali
sesemane sogo bilibao,
tama ena te nago ulade bilidubadi,
te ena isiboba usu naibao.
Tama eno nageba usu da mu weyu,
tama eno te usu da wali po dąį iliyu,
te eno ofa me deli yaibao.