34
Devit te Abimelek dali bidiyu, tama Abimelekigo aga elidali weyu, aga te wabo pabo bidi tiwai bilibaso, tama te Abimelekgo aga sela sąwani. Te Devit pelama, nosali tama te e balia po asęai dao. 1 Sml 21:13-15 suao.
Godigo wiegi yai sę Devitba ebaso, tama agai Godigo nogi ugwaba sai
1 Te eno Godiba usu da weyu,
gedu haluasa po weyu,
tama eno aga nogi sesemane sogo ugwaba sobao.
2 Te Godigo ena tau sali homu elama,
tama eno agaba wiegi yai homu pemene ebo dao.
Te sęgę tolobo we bidi augwa te po odama,
tama augwa bugai homu mu emainao.
3 Dago te Godigo genuai nogide po pusubao.
Dago agai nogi ugwaba sao.
4 Eno te Genuai Bidiba usu da weyu,
te ena tau somainu gedu haluasa po wali,
tama agai eno gedu haluasa po wabo odali.
Agai te eno homude wi ebo tigidali sela sąnama,
tama megi da, ena haliga nagame yai bidibao.
5 Te tigidali we bidigo sęgę elaluali,
tiali goli te augwa Genuai Bidiba
konealubo homu dąų weyu,
te augwa wiegi yai homu pemene yaibao.
Tama tiyu, te augwa konealubo homu
dąų wali te me dolobeo,
augwali tede hale munu me egobeo.
6 Te sęgę elalubo bidi dabego
te Genuai Bidiba gedu haluasa po obaso,
tama agai te augwaligo
gedu haluasa po wabo odolama,
tama augwa te tigidali sęgęde
te augwali tau sali.
7 Te Genuai Bidigo mobo bidi ensel
te Genuai Bidi dologoba pelama
bidibo we bidi dabe pąde bidiyu,
tama agai augwali tau sobaso,
te augwali me dologobeo.
8 Genuai Bidigo wiegi yai kolesaga
dabolo ebo dao.
Duga digi te usu bugagia selama, suiąo,
tama te dagego koneyu,
te Genuai Bidi wiegi yai mu da waibao.
Te Genuai Bidiba konealubo homu
dąų mu wabo bidigo da,
aga te bugai haliga mu elama bidaibao.
9 Te Genuai Bidigo we bidi dabe,
dage te aga dologode bidao.
Magi baso meni, te aga dologode
bidibo bidi dabe da,
te augwali magi nai deli me sǫą pogobeo.
10 Awe, te boma pai ogwa bidi laion dabe me sogo
te bulu hasa dabe sǫą peyu,
tama augwali nasi eyu, augwa bomo kimi isaibao.
Tiali goli, te Genuai Bidi wali pabo we bidi dabe da,
augwali te wiegi yai nai dabe me sǫą pogobeo.
11 Te dage konea sabo homu ebo bage, dage aselama,
tama eno poba olo bugagia muagasao.
Eno dage ola menama,
tama dage te Genuai Bidi dali wi eyu,
aga dologode sesemane bidimainu yaibao.
12 Magi ebowe, te nago homugo
te nago bidibo ula bugagia
pedalumainu homu ebawe?
Tama nago homugo te nago bidibo ula
te sesabi elama bidimainu eyu,
tama nage te bugagia bidiyu,
te wiegi yai pemene yabo homu ebawe?
13 Te homu nago wei eyu, godolo ebaso da,
teda nago te po dwai me wagio,
tama nago tibo po me olamuo.
14 Tama nago te dwai kolesaga ebo te tudiba muao,
tama wiegi yai kolesaga naga wali pao.
Nage te gasa we bidi dabe dali
te bugagia bidabo sunumi gegeyu,
tama te sunumi naga dolo wali pao.
15 Genuai Bidigo te doloba pai bidi dabe tonalubao,
tama agai te augwaligo usu da weyu,
gedu haluasa po wabo odobo dao.
16 Tiali goli, agai te dwai sę ebo bidi dabe wei isiąyu,
tudi ola mabo dao.
Tama agai te augwali ela muyu,
tama te we bidigo augwali homu
kone ma egobeo.
17 Te doloba pai we bidi dabego
te Genuai Bidiba usu da weyu,
gedu haluasa po obaso,
tama agai augwaligo wabo po odobo dao.
Agai augwali tau siyu,
te sęgęgo augwali me elalugobeo.
18 God te sęgę elalubo we bidi dabe pąde bidaibao.
Tama agai te we bidigo konealubo homu
dąų wali te dolainu ebaso,
te augwali tau sabo dao.
19 Mu tama, te sęgę hauwa
te doloba pai bidiba pedelaibao,
tiali goli, te Genuai Bidigo aga tau siyu,
tama te sęgę dabego aga aiyaba me elalugobeo.
20 Genuai Bidigo aga mu tonaluaibao,
tama agai tigigo dili me deli me
togwa pogobeo.
21 Te dwai sę ebo bidi dabego haniani
dwai kolesaga ebogo augwa digi isaibao.
Tama Genuai Bidigo te doloba pai bidi
dabeba dene mabo boi bidi dabeba
dwai dene mu ilibo dao.
22 Godigo te aga sę bidi dabe ma selama,
tama augwa bidibo ula dali bidaibao.
Tama tigidali we bidigo homu agaba kęą pelama,
te agai augwali tonalumainu eyu,
te augwali me hagagobeo. Mu menio.