30
Te Devitgo asęani balia po me deli dao.
Bidi me deligo te Godiba usu da po olama, gedu haluasa po wai
1 Genuai Bidi, nago ena ma selama,
tama nago ena te boi bidi dabego aiyaba
elaluama, te kęnę omainu me ebeo.
Tama tibaso, eno nago nogi te ugwaba mu sobao.
2 Genuai Bidi, nage eno God da,
tama eno gedu haluasa po nageba olama,
tama nago ena usu ma ilai dao.
3 Genuai Bidi, ena isibo bidi tiwai yai digi,
tama nago ena ma hodolali.
Ena te isai bidi dabego pesageba dulali.
Tiali goli, nago enaba te bidibo ula ma mawai dao.
4 Dage te Genuai Bidi dali homu kęą pai we bidi,
dagego te aga nogi ugwaba sabo tęąbi po wao.
Aga da, te dwai sę isąbo
tedali gasagi yai God mu dao.
Tama agade me, te agai yali sę tigidali homu koneama,
tama agaba usu da po weyu, gedu haluasa po wao.
5 Magi baso meni, agai wado po
te pęwadage sogo naga waibao.
Tama agai homu wiegi yai daba elama,
tama da bugagia wiegi yai ilaibao.
Te tigidali sogo da tǫde bidibo sogo te tama tibo dao.
Te hulide eno gedu ąį dulali, tiali goli te kigamu da,
eno te wiegi yai homu pemene ma yaibao.
6 Polobadu te ena bugagia mu bidibaso,
tama eno te tiwai po wali,
“Te magi nai me deligo ena dwasianu degelainu ebaso,
usu me egobeo,” wali.
7 Genuai Bidi, nago enaba wiegi yai sę mu eyu,
tama ena te bomonama dolalumainu eyu,
te bulu dude dolalubo bomai be tiwai gilama ilali.
Tiali goli, nage geme duala sali sogo,
te sogo ena wi elama, aiyaba mu dulai dao.
8 Tama Genuai Bidi, eno nageba i wali.
Te nago ena tau somainu,
te eno nageba bomonama usu da po weyu,
gedu haluasa po wai dao.
9 Tama eno te po wai,
“Te ena te isai madiba pobaso da,
teda te mena wiegi yai nai pedelaibawe?
Te ena gų pageba pobaso da,
teda tebogo de tau sogowe?
Te isali bidi dabego nago nogi ugwaba somainu
te homu eba, agawe?
Te augwaligo nageba pusuyu, te nago sesemane sogo
augwali wiegi yai bugagia ilibo da
homu ebo po waiba, agawe? Menio.
10 Genuai Bidi God, nago eno
wabo po odao, tama te olo tau sabo
wiegi yai kolesaga enaba yao.
Genuai Bidi nago ena tau sao.
11 Nago eno homu sęgę elaluali te sela sąnama,
tama nago ena te wiegi yai homu
pemene tęąbi po omainu yali.
Hasia ena te bidi isaide gela wabo bidi tiwai yali.
Tiali goli, nago eno gela wabo hasegelama,
tama eno homu pemene wiegi yai mu ilali.
12 Tama tialima, eno pedauwali me pania sogobeo.
Te eno nago nogi ugwaba sabo tęąbi po waibao.
Genuai Bidi, nage eno God da,
te eno sesemane sogo nageba usu da weyu,
gedu haluasa po waibao.