122
Te Jerusalemba wiegi yai pemene eyu wabo tęąbi po dao
1 Augwaligo enabolo walali, “Iya, tegoba,
da te Genuai Bidigo beba pinao.”
Augwaligo te tiwai po obaso,
te ena bugai haliga mu yalio.
2 Tialima, megi da, da sabolama,
tama te Jerusalem bagulali obo tomode dolalubao.
3 Augwaligo te Jerusalem ma nigilama,
tama te wiegi yai mu dodolama elalubao.
4 Te Israel hani dabe teba aselama,
te Genuai Bidiba puba hwi po wagasobo dao,
te polobadu agai augwaliba wali po
tiwai gilama ebo dao.
5 Te pesagede te po tų ebo be elalubao,
tama Israel king dabego te we bidigo
po tų odolama, tama po dodoliyu ebo dao.
6 Dagego te gedu haluasa po waiyąo,
te Jerusalem dabe bugagia dugulalumainogo yao.
Dagego te tiwai gedu haluasa po waiyąo,
“Te Jerusalem wei ebo we bidi dabe
augwa bugagia bidimainao.
7 Te Jerusalem obo tomode bidibo
we bidi dabe augwa te bugagia dugulalu,
te hwįbo menia somainao.
Tama king dali, te tobolu bidi dabe me,
te bugagia dugulalumainao,” wao.
8 Eno te abagi me hai namu homu koneama,
tama eno te tiwai po Jerusalemba obao,
“Eno homugo naga te bugagia bidiyu,
tama te hwįbo meni yaibao.”
9 Eno te dena Genuai Bidi, Godigo beba
homu kone paliyu,
tama eno te gedu haluasa po obao,
te nago tigidali nai te bugagia mu pedalumainao.