Solomongo wiegi yai po
25
(Dąį 25–29)
1 Te po da, te Solomongo meba ma wali pęwadage po dao. Te Juda king bidi Hesekaiago kuskus bidi dabego augwaligo te po dabe ma asęai dao.
2 God Genuai Bidi aga homude digi te nai hauwa geme dualaluai. Tama tiyu, dago genuai nogi agaba mayu yali. Tiali goli, kingo te dade geme dualalubo homu kolesaga page hauwa te page hanilainu gegebo sę ebo dao. Tama tiyu, dago genuai nogi agaba mabo dao.
3 Dago te kingo homu kolesaga tigidali me koneainu ebaso, usu me egobeo, te dago te mena nai te dagalude elalubo konesiąbo tiwai, me tama mena nai te tamu ąį page dologode elalubo konesiąbo tiwai ebo gilama ebo dao.
4 Te augwaligo silva kakali sela sąbaso da, teda te silva wiegi yai pedelama, tama bidigo te wiegi yai pou plet nigibo dao.
5 Tama tiwai naga, te augwaligo te dwai kolesaga ebo bidi dabe sela sąyu, tama augwali te king dali munu ma bididali weyu tibaso da, teda te kingo doloba pai kolesaga mu eyu, tama te bulu tǫ pedai kantri te bomai bulu pedelaibao.
6 Te nage king dali bidibaso da, teda nago te nage genuai bidi da homu eyu, tama nago te genuai bidi dabego ebo kolesaga tobage me igio.
7 Tiyu, nage te genuai bidi dabe dali bidibadi, tama nosali te genuai bidi me deli sabolama, tama augwaligo nage sela sąyabuo. Te tiwai pedalidali weyu, hasia bolo nage olo bidi dabe dali bidibaso, tama nosali te augwaligo nagebolo weyu, te genuai bidi dabe dali bidigi pao waibao.
Te bidi me deligo te kolesaga me deli ebo subaso,
8 nago homugo agai te dwai kolesaga eba homu elama, tama nago asesa polo te aga po tųba sela mugio. Te gasa bidigo te sę ebo mu koneama, tama nosali agai nago po aiyaba elalubaso da, teda nago magi yaibawe?
9 Te nago magi nai me delide te naga abagi dali te po elalubaso da, teda nage pelama, naga te abagi dali digi dodolao. Tiali goli, nago te naide te geme wali po odolama, nago te po aga dali me pusugio.
10 Tiyu, te bidi dabego nosali odoyu, nago te geme dualubo po wabo meni da po obaso, te augwaligo nage hale ebo sę ilabuo. Tama augwaligo homu dwai nage dali sesemane yabuo.
11 Te bidigo te wiegi yai homu kolesaga me deli te hanilama, mu pusubaso da, teda agai po te wiegi yai piksa te augwaligo te golgo nigilama, tama te silvago au ilali tiwai ebo dao.
12 Te wiegi yai homu elalubo bidigo, agai te aga abagi dodolobo sę ebaso, tama te abagigo homugo te wiegi yai po da homu ebaso da, teda te abagigo te wiegi yai au ebo gol sabo tiwai ąǫ ebao.
13 Te po selasa asobo bidi, agai te aga tonalubo bidi dabego agabolo mani po dolo pusubaso da, teda agai augwali te wiegi yai pemene ilibao, te kedau yai węgo te bidi te augwa gide te nai sabo sę ebo sogo te pemene ilibo tiwai ebao.
14 Te bidi dabego te nai me deli mawainu te po me deli dąų wali, tama augwaligo te nai masiąbaso da, teda augwali te pǫ me wali asobo tiwai yali, tiali goli te tulubage me tulubeo.
15 Te nago po dua digi weyu, tama nago wado po polo wasiąbaso da, teda nago te nago po odisąbo homu ebo bidi dabego haliga begelaibao. Tama nago te hagoma ebo bidi dabego homu hasegelibaso me, te usu yaibao.
16 Nago te tubo nai bunu ge hani meba te nide elalubo subaso da, teda nago te naga usu naga tuao. Tiyu, nago nai hauwa tuyu, te nage haliga pągąna pelama, tama nage bugabuo.
17 Tama nage te naga abagigo beba sesemane sogo me pidugio. Tiyu, agai nage hagela eyu, tama agai nage wei homu me egobeo.
18 Te bidigo aga abagiba te tibo po kodilama obaso da, teda te bidigo te abagi te bainatgo me sesemonego enebaso, ma aga te wąbi dagego elibo tiwai ebo dao.
19 Te nago koneani, bidi me deli aga te tibo po wabo bidi, tiali goli nago homugo te dwai sogode agai nage tau saiba homu yali da, teda nage te kele dwai bidigo nai tuainu ebo te tiwai ebao, ma te nage sągą dwai bidi bilibo te tiwai yainu homu ebao.
20 Te nage pelama, te homu sęgę mu elalubo bidi sugi peyu, tama nago te wiegi yai homu pemene ebo balia po wagi pobaso da, teda nago te bidi dwasianu me tau sabeo. Mu menio. Nage te agai holobo ugwa te kedau sogo nago peda sabo tiwai ebao. Ma, nago te aga tigi selali elalubadi te bidigo te selali keniba tamu gelibo tiwai ebao. Nago agai homu sęgę ma gininibo tiwai ebao.
21 Te naga boi bidi nasi ebaso da, teda nago aga nai mao. Te aga wę nogone ebaso da, teda nago aga ąį mao.
22 Te tiwai nago ebaso da, te nago aga yali kolesagade hale mu ilibaso, tama te Genuai Bidigo te nageba wiegi yai sę mu bugagia ilaibao.
23 Te posobo po wabogo te bidigo gesabidi tuluga siyu yaibao, te waligo te tulubage sela asobo tiwai ebo dao.
24 Te bidi agaduba deli te be pedude dugulaluali da, te kolesagago te be tomode te wado po me po hauwa wabo we dali bidibo kolesaga te aiyaba elaluali.
25 Te wiegi yai po odali bidi me deli te digibulu badu asai baso da, teda aga te wiegi yai pemene eyu, te bidi te bulu pali madi te tigi mu poma pobaso, te kedau yai ąį tubo tiwai ebo dao.
26 Te doloba pai bidi aga te dwai bidigo te dwai sęba kekemainu eyu da, teda te wiegi yai ulu wę dunugu pedalubo tiwai ebao.
27 Te bidigo te tubo nai hani hauwa mu tubaso da, te wiegi yai mu me ebeo. Tama te bidi dabego te genuai nogi agaba momainu ebo sę dene ebaso me, te kolesaga me te wiegi yai me ebeo.
28 Te bidigo aga haliga sębę ebo te pania sisąbaso da, teda te gasa bidi dabego aga aiyaba elaluaibao. Te tobage bidi te obo bagulisiąwai elalubo hanu me deli tiwai elalubaso, tama te boi bidi dabe te tomoba pelama, tama dolaibao.