34
Israel dabego tǫ dąį dabe
1 Genuai Bidigo te po te Mosesbolo te Israel
2 dabego yabo po dabe mani. Agai te po wali, “Dage te bulu Kenan tomoba peyu da, te bulu eno dage mawaiba, dagego te bulu tigidali mu sese tama saibao.
3 Te bulu dąį te nai meni yai bulu augwaligo Sen wabo, te bulu du gagalama, tama te Idom bulu dąį tama magi usu tama soali dao, te saut badu polobadu. Tama te giliga asobo badu da, te saut badu sigi wę Detsi badu dąį dao.
4 Tama te magi te saut badu polobadu te Akrabim bulu du badu pabo sunumi badu, te odogo te bulu du dabe tomodu soayu, te odogodu todogo soayu, Sen badu tama soayu, tama te bulu Kades Barneaba tama usu nigi paibao. Tama te dąį te Hasaradar badu begasa soayu, tama Asmon bulu usu nigi paibao.
5 Tama te magi te Asmon bulu tagalama, Isip dali dąį wę dulu dulama, tama moni tamu ąį Mediterenianba usu nigi paibao,” wali.
6 “Te moni tamu ąį Mediterenian pąbadu elalubo tǫ, te da te dagego dąį tiwai te giliga dega sabo badu elaluaibao.”
7 “Te not badu magi te moni tamu wę Mediterenian tagalama, bulu du Horba tagaligi paibao.
8 Tama te bulu du Hor tagalama, odogo bulu Hamatba tagaligi paibao. Tama te magi pelama, bulu Sedatba sabolama,
9 tama Sifronba saboligi paibao, tama te bulu Hasarenanba usu nigi paibao,” wali.
10 “Te giliga asobo badu magi da, te Hasarenandu gagalama, tama pelama, Sefamba saboligi paibao.
11 Tama te magi te bulu Sefam tagalama, pelama, te saut badu te bulu Riplaba sabolama, giliga asobo badu Ainba sabolama, tama te sigi wę Galili nambis sesegedu dwasianu bulu duba usu nigi pelama, tama sigi wę Galili giliga asoboba saboligi paibao.
12 Tama dąį te sautba pelama, tama Jordan wę dulu dulama, tama sigi wę Detsiba saboligi paibao. Te da, te dagego bulu tǫ sesege dąį dao,” Genuai Bidigo Mosesbolo te po wai.
13 Tama tialima, Mosesgo Israel dabe augwalibolo walali, “Genuai Bidigo te tǫ te 9 wąį hani bidi dabe, me te Manase hani bugai me badu, dage tama bagego tǫ magi yalio. Dagego duga satu gagali yao, duga te tǫ bugulama, dąį elama sainogo tama iyąo.
14 Te Ruben hani, me te Gat hani, me Manase hani bugai, augwali augwa tǫ polo sai dao.
15 Augwaligo te giliga asobo badu te Jordan wę u badu te Jeriko pąde salio,” Mosesgo te po wai.
Te tǫ dobabo sę te tobolu bidi dabego tonaluali
16 Tama Genuai Bidigo Mosesbolo te po wali,
17 “Te pris Eleasar, me Josua te Nungo ogwa, augwali sigo te tǫ te we bidibolo dobawaibao.
18 Tama nago te Eleasar de Josua si tau sabo tobolu bidi dabe me sa muao,” wali.
19 Tama Genuai Bidigo te bidi dabe sa muani. Te Juda hanide da, te Jefunego ogwa Kalep magi ilali.
20 Te Simeon hanide da, te Amihutgo ogwa Selumiel magi ilali.
21 Tama te Benjamin hanide da, te Kislango ogwa Elidat magi ilali.
22 Tama te Dan hanide da, te Jokligo ogwa Bukui magi ilali.
23 Tama te Manase hanide da, te Efotgo ogwa Haniel magi ilali.
24 Tama te Efraim hanide, te Siptango ogwa Kemuel magi ilali.
25 Te Sebulun hanide, te Parnakgo ogwa Elisafan magi ilali.
26 Te Isakar hanide, te Asango ogwa Paltiel magi ilali.
27 Te Aser hanide, te Selomigo ogwa Ahihut sa muani.
28 Te Naptali hanide te Amihutgo ogwa Pedahel sa muani.
29 Genuai Bidigo te bidi dabe naga sa muani, te Eleasar dali Josua si te bulu Kenande tǫ togola dobayabo bidi dabe, te Israel we bidi dabebolo dobayabo bage, te Kenan bulude.