19
Te king Hesekiago agai sęgę yai po te profet Aisaiabolo pusigi pali
(Ais 37:1-7)
1 Tama te king Hesekiago te Asiria bagego wali po dabe odali, tama aga homu sęgę mu ebaso, tama aga bulubo ugwa pisila sąwai. Tama agai te homu dene ebo bulubo ugwa bulama, tama aga te Genuai Bidigo tempel be tomoba pali.
2 Tama te king Hesekiago te kingo be tomode sę ebo bidi Eliakim i wali, te bidi te kingo be tonalubo bidi da, me te bidi Sepna dali, te bidi te kingo kuskus bidi da, tama me te pris sę kibu be hauwa yali bidi dabe dali. Tama agai augwali te profet Aisaia sugi pomainu tagala palali, aga aya Amos da. Tama te bidi dabe me tigidali te homu dene eyu, te tobage ugwa naga bubulu pali.
3 Tama augwali pelama, te profet bidi Aisaia pageba sabolama, tama augwaligo te profet bidi Aisaiabolo e tama po wali, “Kingo te po wali, ‘Megi e tama side da, teda moni homu sęgę ebo sogo dao,’ wali. ‘Tama te Asiria hani augwaligo dabolo tama te hale yabo po umabo po weyu, posobo po walio. Da te we me deli haliga yai we gagawai dao, tama te wai ame nabo sogo te pedalobao, tiali goli te we te wai ame nabo te bomo menio,’ wali.
4 ‘Asiria king bidigo aga sę ebo gavman ofisa bidi tagala palali bidigo aselama, dago God dolo agai dwai po mu wagasalio, dena Genuai Bidi dao, aga te tigidali sogo bidada peyu, bidada pabo God dao. Tialima, te aga dolo te dwai po wali aga odali bogo, tama aga digi te po wali bidibolo wei ponoyu, sęgę mawaibao,’ wali. ‘Tama teyu, dago homugo nago te God dolo gedu haluasa po wao, tama agai da dwasianu hani bidibo tau somainao,’ kingo te po wali,” augwaligo te po wai.
5 Te profet bidi Aisaiago te king Hesekiago ola tolali po odali,
6 tama te po sela asali bage augwalibolo e tama po wali, “Dage te king pageba ma peyu, tama te Genuai Bidigo e po tama aga dolo pusao. Genuai Bidigo e tama po wai, ‘Nago augwaligo te dwai po wali te pode moni homu elama, nage wi igio,’ wali. ‘Te po wali bidi dabe augwali da, te Asiria king bidigo olo sę ebo bidigo ena dolo te po wali dao.
7 Magi baso meni, ena Genuai Bidi, eno te Asiria king bidigo homu begela tagalama, tama agai po me deli odobo si, teda agai dage tagalama, aga buluba ma begasa paibao,’ wali. ‘Tama aga te Asiria bulude bidibo sogo, tama eno te me badu bidi homu begelama, augwaligo moni ge hwągo aga ela mumai yaibao,’ Genuai Bidi Godigo te tama wali,” Aisaiago te po wali.
Te Asiria hani augwaligo te Jerusalem taun dolabo po ma wali
(Ais 37:8-20)
8 Te Asiria bulu bidi gavman ofisa bidigo e tama po odali, te king Senakerip te Lakis taun tagalama pali po odali. Tibaso, te ofisa bidi aga te Jerusalem bulu tagalama, tama aga ma begasa pelama, tama te bidi pali page koneainu kegegi pai, kingo te taun Lipna hani dali boi hwįgi pobaso, tama agai aga teba sugi pali.
9 Te Asiria hani augwaligo boi hwįyu bidali, tama me badu bidi dabe aselama, te king Senakerip e tama po wagasali, “Te Itiopia bulu king bidi Tirhaka aga ami soldia bidi dabe dali, augwali asama, nage dali boi hwįagasobao,” wali. Te king Senakerip agai te po odobaso, tama agai pas asęnama, te me badu bidi nogode munama, tama augwaligo te king Hesekiabolo magi pali, magi baso meni, te agai homugo te taun Jerusalem agai sabo homu eyu, tama tiai dao.
10 Te king Senakeripgo pasde e tama po wali, “Eno koneanio, te nago konealubo god, te agai te po wai, agai ena sula tagalama, tama eno dage aiyaba elaluama, te Jerusalem taun me sogobe,” wali. “Tiali goli, te ili po dao, tama teyu, nago homugo agai te wali po mu da homu eyu, konealugio,” wali.
11 “Naga digi naga konea palio, da Asiria hani king bidi dabego ebo kolesaga da, dago te gasa bulu hani bidi dabe dali boi hwįgi pabo kolesaga, dago naga augwali mu dolobo dao. Nago homugo eno te nago bulu dolobe da homu eyuwe, a?
12 Polobadu eno wąį nǫų dabe augwaligo gasa bulu taun Gosan, me te taun Haran, tama me te taun Resep, tama te hanu dabe dolai dao. Tama augwaligo te Beteden hani augwali te Telasar taunde bidibadi, ela muna silai dao,” wali. “Tama augwaligo god dabego te hani augwali me tau sabeo,” wali, “tama augwali bugagia me bidibe. Mu menio.
13 Te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te taun bulu hani king bidi dabe augwali me bidiba, agawe? Menio. Dago augwali tigidali ela muna silai dao,” Senakeripgo pasde te po wali.
14 Te king Hesekiago agai te king Senakeripgo tolali pas agai te bidi dabego nogode agai sali. Agai te pas asęani po neda silama, tama agai te Genuai Bidigo tempel be tomoba selasa pali. Tama agai te pas te Genuai Bidi bidibo pesage pąde muani, tama agai pisaganama, tama bugagia dodolama, muani.
15 Tama te king Hesekia agai te Genuai Bidi dolo gedu haluasa e po tama wali, “Genuai Bidi, nage da Israel hanigo God, tama nage e bede naga sę ebo ensel mobo bidi si noma si ugwadu daide bidibo dao, tama nage king naga te dugabo ni namede dugulalubao. Nage te nage God mu dao, te nago naga te e tǫde te tigidali bulu hani dabe tonalubo dao. Naga deli naga te tǫ me, te dagalu me, naga naga nigai dao,” te po wali.
16 “Genuai Bidi, eno homugo nago olo bugagia munama, tama eno gedu haluasa po wabo odao, tama naga te da tigide te dwai nai pedalabo nago bugagia suao,” wali. “Tama eno homugo augwaligo te dwai po wali te nago odao, te king Senakeripgo agai nage dali posobo po wabo, God nage tigidali sogo bidada pabo bidi dao.
17 Genuai Bidi, dago koneanio, te Asiria king hani augwaligo te umabo we bidi mu tama augwaligo elama, silibo dao, tama augwaligo taun bulu me tama dolobo dao,” wali.
18 “Tama me te king bidi dabe augwaligo te hani we bidi dabe augwaligo te tibo god noma nigali piksa dabe tigidali selasa pelama, siaba tigidali ulali. Te tibo god dabe da, polo dolobo god dabe da, magi baso meni, te god dabe da, te da tibo god dabe da. Te god dabe da, bidigo digi te ni dabe te masigi dabe selama, te nogogo nigai god naga dao.
19 God, dago Genuai Bidi, megi tama eno homugo nago da tau selama, te megi te king Senakeripgo nogode nago tama nago da ma dobola sao,” wali. “Tama tiyu, tigidali tǫde hani we bidi dabe augwaligo nage bugagia mu konemainao, nage deli mu God mu dao.” Te king Hesekiago te God dolo gedu haluasa po weyu, e tama po wai dao.
Profet bidi Aisaiago te king bidibolo te Godigo po ola mani
(Ais 37:21-38)
20 Awe, te profet Aisaia, aga aya nogi Amos, te Aisaiago te king Hesekia e tama po ola tolali, “God, Israel hani dena Genuai Bidigo, e tama po walio, agai te nago gedu haluasa po wali te agai odalio.
21 Tama megi te agai te king Senakerip dali naga po elalubao wali, te Asiria king bidi. Genuai Bidigo e tama po wali, ‘Senakerip, te taun Jerusalemgo te nage dali te gisugu dwai mu weyu, tama nage dali posobo po weyu, tama nage dali dwai bidi mu da olama, tama dwai mu da wabuo,’ wali.
22 ‘Senakerip, tama nago te posobo po weyu, tama te po dwai weyu, tama te naga digi naga nogi ugwaba siyu, tama teyu, nago hagoma ebao,’ wali, ‘nago homugo nago te tibo sę de dali ebawe? Nago te tama tibo kolesaga ena dali tama tibao, Israel hanigo God, God ena da dwagi yai bidiyu, tama te doloba pai kolesaga naga tigidali sogo ebo dao.
23 Nago po te naga sę ebo gavman ofisa bidi dabe augwaligo ola menama, tama augwali nago nogi ugwaba mu salio,’ te po wali, ‘tama augwali ena dolo posobo po walio. Senakerip, tama augwaligo pedauwalidu nago e tama po digi po wali, nage te naga te boi hwįbo karis hauwadu dolaluyu, tama nage te Lebanon moni te bulu du tobolu muba holobao, wali. Tama nage te Lebanon bulu te ni dulu tomoba mu tula pobao wali, tama te bulu te bidi bilisąbo madigi pelama, tama nago te ni bǫ dabe te bobobage bobobage ni dabe naga togwao, tama te dwagi dwagi yai ni saipres me togwao wali.
24 Tama nago me po tama wali, nage te gasa bulu taunba pabo sogo, te nage tubo wę da nage me habuge me ebeo. Te nage te wa pai buluba pabo sogo me, te naga te tǫ togalide me te wę pągąna sai elalua pai dao, tama tiwai wę te naga hani augwaligo tama me te wę tuai dao. Tama tialima, nage te Isip buludu te pobadi me, nago sągągo sula sąwai dao.’ ”
25 “ ‘King Senakerip, nago konebeo, polobadu digi eno nage tama sę emainu dąį ilai dao. Ena digi nagebolo tama bomo menama, tama nago te bomai obo elalua pabo taun dabe dolomainu bomo eno nage mawai dao. Tama nago eno homu kolesagadu wali peyu, tama nago te taun dabe dolama, tama augwali te moni masigi pesage tiwai nigilama, tama te moni pobele bage tiwai pesage holao, eno te homu polobadu elama, tama nago tama tiai dao.
26 Tama te taunde bidali we bidigo augwali wi dwai mu yali, tama augwaligo homu kolesaga teba dąų mu wali, augwaligo tama teyu, augwa bomo mu sia sali. Augwali e tama tiwai bidaluali, te nosai giliga doloyu, wa pabo tiwai gilama mu tiwai, mu tama augwali bidaluali, te posola pai wali te giliga asobo badu asali. Te nosai te be pedu ugwa badu holai, tama te nosai dabe holala pali, te nosai dabe te nosai te posola pai wali asobo sogo dila pai elalubo nosai menio.’ ”
27 “ ‘Tiali goli, eno nage bugagia mu konea palio. Te eno nago homu kolesaga konea palio, tama me te eno nago homu kolesagago ebo sę eno subo dao, tama te tigidali nage pabo bulude me. Tama me te eno koneani, te nago ena dali sębę mu genuai ebo, te eno koneanio.
28 Nago ena dali sębę ebo eno sualio, tama te nago te hagoma eyu, wabo po me, tama te kolesaga me eno koneanio, tama te naga digi naga nogi ugwaba sabo. Tama te megi eno nage dali eno bomai po mu obao. Tama eno te huk selama, tama eno te nago guniba muaibao, tama me te eno te ain dage te bidi dabego te kibu hos gunide mubo ain dage eno selama, tama eno te nage pedauwalide munama, dąų walaibao. Tama tilama, te nosali eno nage te naga asali te tųdu te nage eno kegasa paibao,’ God Genuai Bidigo te po wali,” Aisaiago te po ola tolali.
29 Tama te profet bidi Aisaiago te king Hesekiabolo e tama po me deli ola mani, te king Hesekiago agai te e tama sę ebo sulama, dąį ilimainu, tama te king Hesekia agai te tama sę ebo sulama, tama agai koneagameo, tama te tigidali sę dabe te Genuai Bidigo wali po gilama te Asiria king bidi Senakerip tigide mu pedalama, sęgę saibao. Te profet bidi Aisaiago te po wali, “Tama nago te tama tibo sę ebo subaso da, teda te dąį nago suao. Tama te megi tama bidibo kibu bede me, tama te nosali bidibo kibu bede me, te dagego tuabo nai bulubo usu me egobeo, te boi bidi dabe pąde bidibaso. Tama tialima, dagego te sia gagawai nai wit dabe tama te dagego gide olo dali pedalai nai tiwai duga selama, tuaibao,” wali. “Tiali goli, te sela wabo kibu bede, te dagego gide nai bulama, tama duga nai selama, tuaibao,” wali. “Tama te ni wain me duga bulama, tama duga te ni wain du me duga selama, tama tuaibao, te sela wabo kibu bede.
30 Tama te Juda hani we bidi augwali, te boi bidi dabego te augwaligo te Juda hani augwali mu dolobo munu me usu egobeo, tama augwali bugagia mu bidaibao, tama augwali hani te umabo mu ma pedalaibao, te sia gagawai nai te wit tiwai te gide bulama, te umabo mu mubo tiwai mu ma pedalaibao,” wali.
31 “Te boi bidi hani augwaligo te Jerusalemde bidibo tigidali we bidi dabe munu me mu dologobeo. Menio. Te dwasianu hani augwali me bidaibao. Tigidali Bomo Elalubo Genuai Bidigo agai te dila pai homu kolesagago te nai nosali mu pedalaibao homu yali,” Aisaiago te Hesekiabolo te po wali.
32 Tama agai po me wadolama, tama wali, “Tama te Genuai Bidigo e tama po ma wai, ‘Asiria king bidi dali, te aga ami soldia bidi dabe dali, augwaligo te Jerusalem taun tomoba asobo usu egobeo, tama me te augwaligo te ene me deli te taun tomoba enebo usu egobeo. Te ami soldia hani augwaligo te boi hwįbo awa me deli selasa, tama augwali te taun pąba asobo usu egobeo,’ wali. ‘Tama augwaligo te tǫ selama, te taun obo banis pąde sisiniyu, tedu holomainu ebo usu me egobeo, tama augwali te tǫ tųde dolaluyu, boi hwįabo, te me menio.
33 Ena Genuai Bidi da, tama eno te Asiria king bidi homu begelama, te tama aga asali tųdu ma begasa paibao. Tama tiyu, aga te e Jerusalem bulu taun tomoba asobo usu me egobeo.
34 Eno tama tiwaibao, magi baso meni, eno ena genuai nogi tobade, tama me te polobadu eno sę bidi Devit dali po dąų wali po tobade tama tiwaibao.’ ” Aisaiago te Genuai Bidigo te tama wali po te king Hesekiabolo pusa mani.
35 Tialima, megi hulide tama, te Genuai Bidigo sę ebo ensel mobo bidi me deli te Asiria hani bidibo pesageba pelama, tama te 185,000 ami soldia bidi elama, isilali. Tama te do kigamu mu te king Senakerip aga hodaluama, te ami soldia bidi dabe isali tigi suali.
36 Tama tialima, te aga dali, te me badu ami soldia bidi dabe dali, augwali me bidaluali, tama augwali hodaluama, tama augwali te Asiria pabo bulu tųdu ma geasa pali, tama te king Senakerip aga te Nineve taunba bidigi pali.
37 Tama nosali me sogo deli aga te lotu be tomoba pelama, te Nisrokba lotu po wabo sę edubadi yaide, te Nisrok te aga tibo god da. Tama aga ogwa si, me nogi Adramelek, tama te me wai nogi Sareser da, tama te augwa sigo te ge pedai bainat hwą selama, tama te lotu be tomoba pelama, te augwa si aya king Senakerip elama, isilali. Tama tilama, nosali augwa si te Ararat buluba wi pelama, bidigi pali. Tama tiali, te aga te gasa ogwa me, aga nogi e dao, Esarhadon, aga te ogwago aga ayago te king yali sę selama, tama aga te Asiria king nigilama bidali.