34
Genuai Bidigo king Sedekaiade po elaluai
1 Genuai Bidigo po Jeremaiabolo mani, te Babilon king Nebukatnesar aga ami dabe daligo te Jerusalemba me Judago taun dabe hwįagasali. Nebukatnesargo amigo te tigidali tǫ kantri bidi dabe dali, te tigidali we bidi dabe dali, te king Nebukatnesargo tonaluai. Tialima, Genuai Bidigo Jeremaiabolo te tiwai po wali,
2 “Ena Genuai Bidi, ena dage Israelgo God, eno te po obao, nage te king Sedekaiaba pelama, agabolo te tiwai po wao. Ena Genuai Bidi, eno te taun te Babilon kingba menama, siago ulumainogo yaibao.
3 Sedekaia, te nage agade wi me pogobeo. Menio. Te augwaligo nage pageabi elama, te nage agaba sela pelama, te duga si dolalu, po miaibao. Tama augwaligo nage te Babilonba odasa paibao.
4 Tialima, Juda king Sedekaia, te Genuai Bidi eno gasa po bugagia odao. Eno e tiwai po nagede elalubao. Augwaligo nage me ela mugobeo.
5 Menio. Te nage bugagia bidama, te nage isaibao. Te nage isali sogo da, te augwaligo wiegi yai denami ilibo hano holobo pauda te nageba genuai nogi mayu ulaibao, te polobadu nago wąį nǫų dabe te Juda king bidali sogo yali tiwai nageba yaibao. Te augwa hobedai gela weyu, te po waibao, ‘Dago genuai bidi, hobede mu ebao,’ tama waibao. Ena Genuai Bidigo, eno te bomo yai po dąų wali tiwai gilama tiwai pedelaibao,” wali.
6 King Sedekaia te Jerusalemde bidibadi, tama profet Jeremaiago te po tigidali agabolo pusugi pali.
7 Te sogo te Babilon kingo ami bidi dabego te Jerusalemba hwįagasobo sę elama, te taun Lakis me Aseka taun side hwįani. Te boi bidi dabego te tǫ kantri Judade te tigidali gasa taun te bomai obo elaluali te salio, tama te taun sela naga elaluai dao, te Jerusalem, me Lakis, me Aseka, te taun dabe.
Te Juda dabego te olo sę ebo bidi dabeba dwai sę yalio
8 Te king Sedekaia dali, te Jerusalem we bidigo dali, te bomo yai po dąų weyu, te augwalide olo sę ebo bidi dabe, olo sę ebo we dabe tagala palama, olo pomainao po wai dao.
9 Augwa te tama po dąų wai. Te Israel dabe me deli augwa abagide olo sę ebo bidi me olo sę ebo we bidibaso da, teda aga tonalubo bidigo aga olo pomainogo tagala palao. Te Juda dabego te augwa abagi dabe te olo sę ebo bidi me olo sę ebo we bidimainogo me elamu dao.
10 Te tobolu bidi hauwago me, te gasa we bidi hauwago me, te dąų wali po te usu da wali, tama tigidali dąų weyu, augwa te olo sę ebo bidi me, olo sę ebo we me tolalugobeo wali. Augwa po mia selama da, teda augwa olo pomainu tagala palai.
11 Tialima, nosali augwa homu hasegelama, te bidi dabe me we dabe ma selama, tama augwali te olo sę ebo bidi me, olo sę ebo we pedalubo sę ma yalio.
12 Tialima, te sogo Genuai Bidigo po Jeremaiabolo te tiwai wali,
13 “Ena Genuai Bidi, ena te Israelgo God dao, eno bomo yai po dagego wąį nǫų dabe dali dąų wali. Eno augwali te Isipde sali, te kalabus sę yali bulude, tama eno augwali odasa aselama, tama nosali eno te bomo yai po augwali dali dąų wali. Te dąų wali bomo yai pode te tiwai po wali,
14 ‘Te a naga olama, me badu si te kibu be tigidalide, dagego te duga abagi dabe te olo sę ebo bidi me we dabe te tagala palama, te augwa olo pomainao. Te abagi dabe dagego olo sę ebo bidi, me olo sę ebo we dabe, te dagede olo sę ebaso da, teda augwaligo dagego sę ebo te kibu be a naga me badu delide naga sę emainao, tama nosali dagego augwali olo tagala palao.’ Te dagego wąį dabego te po koneani, tiali goli, augwaligo eno po odama, te augwaligo wali pabeo,” wali.
15 “Hasia dagego me te po wali me pisąwai. Tialima, te sesabi elama gana bidisiąbadi, te dagego haliga begelama, te doloba pai kolesaga eno gedude yalio. Te dage deli deligo te abagi dabeba weyu, augwali munu me te olo sę ebo bidi me sę ebo we bidigio wali. Tama me, dage te eno bede dolalu, te eno gedude bomo yai po dąų wali, te abagi dabe augwali olo pomainao olama, tagala palai dao.
16 Tialima, megi da, dagego homu ma hasegelama, tama te we bidi dabe augwa homu wali pelama, te olo bilali, dagego augwali ma selama, te augwali dagego olo sę ebo bidi me sę ebo we ma pedelali. Te kolesaga yaligo te dagego eno genuai nogi aiyaba elaluali tiwai yali dao,” wali.
17 “Te pagede, ena Genuai Bidi, eno te tama po obao. Dagego eno po wali me pisąma, te dagego te ama dabe, me abagi dabe, augwaligo dage tagalama, pomainao po wabeo. Tama tialima, odao. Ena Genuai Bidi, eno dagebolo weyu, te eno dage tagala palaiba po odubao. Awe, te dage tagala palama, isigi pagameo. Te boi bidi dabego dage ela mueibao, te dage dwai gasi selama isaibao, te dage nai me sǫą pelama, nasigo isaibao. Tama te gasa tǫ kantri we bidi dabego eno te sę dageba yali po odolama, te augwali wi elama, nogo hogwayu, midigi dwai mu yaibao.
18 Dagego te bomo yai po eno gedude dąų wali sogo, dagego te bomo yai po dąų wabo kolesaga wali pelama, tama dagego te bulmakau me deli elama, te pedali asegai si pedelai. Tama dage te bulmakau pedali asegai si badu tomode bilali. Tialima, nosali dage we bidi hauwago te dąų wali bomo yai po bolali. Tama tialima, eno augwali dagego te elali bulmakau yali tiwai pedelaibao.
19 Eno te bulmakau pedai asegai si tomode bidali we bidi tigidalide te tiwai sę yaibao. Te Juda me Jerusalem tobolu bidi dabe, me te kingo bede bidibo ofisa bidi dabe, me pris dabe, me te gasa we bidi dabe tigidali dao.
20 Te augwali eno te boi bidi dabego nogoba munama, te boi bidi dabego augwali ela mueibao, tama te ba dabe me hasa dabego te augwaligo tigi tuagasaibao.
21 Tama me, eno te king Sedekaia dali, te aga ofisa dabe dali, te augwali ela muabo boi bidi nogoba mueibao, te Babilon kingo ami dabe nogoba mueibao. Mu tamao, te Babilon dabego dage tagalama palio,
22 tialima, ena Genuai Bidi, te eno po obaso, te augwali ma aselama, te Jerusalemba hwįnama, te taun saibao. Tama augwaligo te taun siago ulaibao. Tama eno te Juda taun tigidali dolama, tama te taun dabe olo elalu, tama bidi tede me bidigobe dao,” wali.