27
Tigidali tǫ kantri te king Nebukatnesar dologode elalueibao wali
1 Te Sedekaia, te Josaiago ogwa, te Juda king pedelama bidali sogo, Genuai Bidigo ena Jeremaiabolo
2 te tama po wali, “Te ni nami pedai selama, te kukulu delage sobadi elama, tama te nigilama, te bidi dabego te sę ebo bulmakau mageba mubo tiwai yao, tama te nai dabe te naga magede digi domao.
3 Tama nago te po te Idom kingba toliyu, me te Moap kingba, me Amon kingba, me Tair kingba, me Saidon king dabe me po ola tolao. Te king dabe augwa ofisa bidi dabe te Jerusalemba aselama, te Sedekaia dali po miagasaibao. Tama te sogo nago te eno po augwaliba pusao, tama augwaligo te augwa kingba wagi paibao.
4 Te bidi dabeba te po walao. Ena te Israel Godigo obao, ena Tigidali Bomo Elalubo Genuai Bidigo eno e tama po dagego genuai bidi dabe dali elalubao,
5 ena digi eno e tǫ ena genuai bomogo nigali, tama me te eno te we bidi dabe nigali, me te tǫde bidalubo hasa sibi nigai. Eno digi ena homu wali peyu, eno te bidi dabe augwaliba tǫ dobabo dao.
6 Megi da, eno te dagego tǫ kantri dabe te ena sę bidi mawaibao, te Babilon king Nebukatnesarbolo mobao. Tama me te eno tigidali bulu uni hasa sibi me agaba menama, te aga dologode bidaibao.
7 Tigidali hani we bidi te aga dologode elaluama, te nosali augwali aga ogwa dologode bidama, te agai waigo wąį nǫų dabe dologode me bidaibao. Augwali te Babilon dologode bidada pedubadi, te eno Babilon dolabo bodolu muani sogoba usu naibao. Tama te sogo te tigidali tǫ kantri bomai king dabego te Babilon aiyaba elaluama, te augwa olo sę ebo bidi dabe tiwai mu pedelaibao,” te po wai dao.
8 “Tialima, te tǫ kantri we bidi me deligo te king Nebukatnesargo augwali tonalubo hagela homu eyu, te bidigo bulmakau tonalu, te ni nami pedai aga mageba munama, te aga sę emainogo ilibo hagela ebaso da, teda tǫ kantriba eno dwai dene umagia mu mawaibao. Te Genuai Bidi eno te boi bidi tagala palama, augwaliba hwįagasomainogo yaibao. Te augwa nai sǫą pelama, te augwali dwai gasi me saibao. Te tama kolesagade eno te king Nebukatnesargo te augwali te tǫ kantri we bidi mu silimainogo ilaibao.
9 Tama tialima, dage king dabego te profet dabego poba me te osola subo bidigo po, me te na yali po page pusubo bidigo poba, me te mada bidigo poba me olo munama igio. Te bidi dabego te tiwai po weyu, dage te Babilon king dologode bidigobeo waibao.
10 Tiali goli, augwaligo dage tibo po ola mobao, tama dagego augwaligo po homu dąų obaso da, teda eno dage te duga page bulu mude digibulu sela sąwaibao. Tama dage mu dolaibao.
11 Tialima, te tǫ kantri bidi hani dabe me deligo te Babilon kingo augwali tonalumainogo eyu, te bulmakau te bidigo aga magede te ni nami pedai munama, te aga sę ebo tonalumainogo ebo tiwai ebaso da, teda eno te we bidi dabe te augwa tǫde bugagia bidimainogo eyu, augwa gi sę emainogo yaibao. Ena Genuai Bidigo eno te po wai dao.”
12 Tama ena Jeremaiago, eno te tobage deli po naga te Juda king Sedekaiabolo me pusali. Eno agabolo te tiwai po wai, “Dage Juda te dagego mage te ni nami pedaiba mubo tiwai elama, te king Nebukatnesar, me aga we bidi dabe, augwaligo dage tonalumainogo ilao. Te dagego te tiwai eyu da, te dage bugagia bidaibao,” wali.
13 “Genuai Bidigo te po walio, te we bidi hani me deli te Babilon king dologode bidibo hagela homu ebaso da, teda te boi bidi dabego augwali ela muagasomainogo yaibao, tama augwali te nai meniama, isibadi, te dwai gasi selama isiyu yaibao. Tiyu, nage te naga we bidi dabe dali hagoma ebaso, tama te sę dabego dage dolobo dao.
14 Tama tialima, dagego te dage Babilon king dologode bidigobeo po wabo profet dabego po me odogio. Augwaligo dage tibo po naga ola mabo dao.
15 Ena Genuai Bidigo, eno po dolo obao, eno augwali me tagala palobeo, tiali goli, augwaligo eno nogide tibo po pusubao. Te dagego augwaligo po wali pobaso da, teda eno dage te duga tǫ kantride sela sąnama, te dage mu dolaibao. Tama dagebolo te profet po pusali bage, augwali me dolaibao,” eno te po te king Sedekaiabolo wali.
16 Tama eno te Genuai Bidigo po te pris dabeba, me te tigidali we bidiba, te tiwai pusali, “Ena Genuai Bidi, eno po dolo obao, dagego te tama tiwai po wabo profet dabego poba olo me mugio, ‘Te pąde tama augwaligo te Genuai Bidigo bede tigidali nai sela pali, te Babilonde munolubo nai dabe, tamadi tama augwaligo te Jerusalemba ma selasa asaibao.’ Te profet dabego dage tibo po naga ola mobao.
17 Dagego augwaligo po me odogio. Tiyu, te taun tigidali mu dolabuo. Te dage Babilon king dologode bugagia bidibaso da, te dage bugagia bidaibao.
18 Te augwali profet mu tama te Genuai Bidigo po augwaliba mabo da wida, teda augwaligo te Tigidali Bomo Elalubo Genuai Bidiba hanalu, agai te boi bidi dabego te Genuai Bidigo bede me munalubo doado bage, me te kingo bede munalubo doado bage dabe, me te Jerusalem tigidali pedai habu badu elaluali doado bage selama, te Babilonba me sela pigio po wao,” eno te po wali.
19-21 “Magi baso meni. King Nebukatnesar te Jerusalemba aselama, te king Jehoiakin sali, te Jehoiakimgo ogwa, tama agai te Juda tobolu bidi dabe me, te Jerusalem tobolu bidi dabe me selama, tama agai augwali Babilonba kalabus igi peyu odasa pali. Tialima, agai te wiegi yai nai meba te Jerusalemde elalumainu yalio. Agai te brasgo nigali genuai pos dabe sabeo, tama augwa te brasgo nigai tang ąį tubo genuai nai me sabe, tama augwa te brasgo nigai te dwasianu ąį tubo tang dabe gasaba bilabo nai dabe, te me sabeo. Tama me agai te eno bede gasa nai dabe me sabeo, te kingo bede me, te tigidali Jerusalem pedai badu elaluali nai me sabeo. Tialima, ena God, dage Israelgo Genuai Bidi, ena Tigidali Bomo Elalubo Genuai Bidigo, eno te tiwai po dageba wabo dao.
22 ‘Te boi bidi dabego te nai dabe doado bage selama, te Babilonba selasa paibao. Tama te nai te doado bage te Babilonde munalubadi, tama eno augwaliba homu kone ma palobo sogo me deli teba ma yagasaibao. Tama tebo sogo te eno augwali ma sela aselama, te augwali Jerusalemde ma munalueibao,’ te po Genuai Bidigo wai dao,” wali.