18
God te tǫgo sospen sene nigibo bidi tiwai dao
1 Genuai Bidigo ena, Jeremaiabolo, te tama po walio,
2 “Nage hogodama, te tǫgo sene nigibo bidigo beba pobaso, te eno po nagebolo mawaibao.”
3 Genuai Bidigo te tama obaso da, teda ena te tǫgo sene nigibo bidigo beba dulama, tama eno te bidigo sene me deli nigidu sualio.
4 Tialima, te sene wiegi yai me pedalubeo. Tama te bidigo te sene mu dolama, te agai nigali tǫgo digi te gasa sene aga homugo digi me nigalio.
5 Tialima, Genuai Bidigo enabolo te po mawai,
6 “Ena Genuai Bidi, eno dage Israel we bidi dabe dali po elalubao. Te eno dageba te sene nigibo tǫde yali sę tiwai egobe da homu eba, agawe? Dage Israel dabeo, dage eno nogode elalubao, te tǫ te sene nigibo bidigo nogode elaluali tiwai elalubo dao.
7 Me sogo eno te we bidi hani me deliba hanilama weyu, ma te tǫ kantri we bidi augwali me te eno ela gudulama, te aiyaba elaluyu, te dolabo po hanilama, augwaliba wabo dao.
8 Tialima, te hani we bidigo augwa te dwai kolesaga ebo tagalobaso da, teda eno homu me hasegelama, tama eno te dwai kolesaga augwaliba yaibao wali te sę eno me ebo meni dao.
9 Me ma, te me sogo eno te we bidi hani me deliba po hanilama weyu, ma te tǫ kantri me deli eno te augwali dąų waliyu, bomo mayu, tama augwali bugagia bidaibao po hanilama wabo dao.
10 Tialima, te augwaligo eno gedude dwai kolesaga idu, te eno po odisąbaso da, teda eno homu hasegeliyu, te eno wiegi yai sę augwaliba yaibao po wali sę, te eno ebo meni dao,” wali.
11 “Tama tiyu, Jeremaia, nago te Juda dabe me Jerusalemba te tama po walao, ‘Ena Genuai Bidi, eno te po obao, odiąo. Eno te dageba dwai sę yabo sisi ela mubao, awe, tede eno homu kone palobao. Tama tiyu, dage deli deligo te duga dwai kolesaga ebo tagalama, te wiegi yai kolesaga naga wali pao,’ te po wao.
12 Tialima, Jeremaia, te we bidi dabego nago po wei ponoyu, te tama po waibao, ‘Tagalao, da hagela ebuo. Dago dena homu kolesaga digi wali paibao. Da deli deligo hagoma eyu, te dena dwai homu naga wali piduaibao,’ augwaligo te po waibao,” wali.
Te we bidi dabego Genuai Bidi homu kone ebo tagalali
13 Tama tibaso, Genuai Bidigo po ma weyu, te tama po wai,
“Ena Genuai Bidi, eno po dolo obao.
Te gasa we bidi dabeba hanalu wagi pao.
Te augwaligo te we bidi mebago dwai kolesaga mu yali
po odali,
te Israel dabego yali tiwai eba, agawe?
Eno te Israel hani mu sai dao,
bidigo te bidi dali pagela pisąwai
gesi we sabo tiwai yali.
Tiali goli, augwaligo dwai sę mu yali.
14 Te me sogo te bobobage masigi bulu du pesage
te Lebanonde ais menibo homu eba, agawe?
Te bulu dude kedau yai wę sula sabo homu eba, agawe?
Mu menio.
15 Tialima, ena we bidi augwaligo ena homu kone me
isąma tagalali.
Tama augwa te wiegi yai denami ilibo hano ebo ofa te
tibo godiba ebao.
Tama tebo kolesagade augwali tulaluama,
te polobadu wiegi yai sunumi wali pabo tagalali.
Te megi da, augwa te dwai sunumi wali pabo dao.
16 Tialima, te augwa tǫ dolama,
te olo pesage bulu tiwai pedelaibao.
Tama te gasa hani we bidi te badu asobo sogo,
augwa sulama, dwai midigi siyu,
te wi umagi ebo dao.
17 Tama te boi bidi dabego eno we bidi dabeba
hwįągasobo sogo da,
teda eno augwali te boi bidi dabede wi pomainogo
ilaibao,
te wali giliga asobo badu asiyu,
te nai dabe sesela sąbo tiwai yaibao.
Te augwali eno tudiba munama,
tama te augwali dolainogo ebo sogo
eno tau me sogobe dao,” te po wali.
Te we bidi dabego Jeremaiabolo dwai sę yabo homu yali
18 Te we bidi dabego te tama po wali, “Tegobao, dago te Jeremaiabolo magi sę yabo sunumi gegeinao. Agai po te mu po me wabeo. Te pris dabego augwa bomo yai po dabolo pusubo sę me tagalogobeo. Te wiegi yai homu kolesaga me koneai bidi dabe, augwa wiegi yai po me tagalogobeo. Tama te profet dabego me, te augwa profet po pusubo sę me tagalogobeo. Tama tialima, dago te Jeremaiago poba olo me mugobeo. Menio. Dago aga po tų naga inao,” te po wali.
19 Tialima, ena, Jeremaia,
eno gedu haluasa po te tiwai wali,
“Genuai Bidi, eno gedu haluasa po odao.
Eno homugo nago eno boi bidi dabego enaba wabo pode
homu kone palomainogo ebo dao.
20 Te wiegi yai kolesaga ebo bidiba,
te bidi dabego dwai kolesaga agaba wei ponobaso
usu da, agawe? Menio.
Tialima, te boi bidi dabego ena dolainogo ebao,
augwali te tǫ dedage dogobo bidi tiwai ebao,
te hasa dabe teba tulalumainogo tiaibao.
Nago te eno polobadu yali kolesaga homu kone palao.
Te ena nage pąba aselama, te nageba hanalu,
te nago haliga sębę tagalama,
te bidi dabeba wiegi yai sę bugagia yao po wai dao.
21 Tialima, megi da,
eno homugo nago te augwaligo wai dabe te nai sǫą
pelama,
nasi eyu, isimainogo ilao homu ebao.
Tama te boi bidi tagala palomainogo elama,
te bidi dabego meba ela mumainogo ilao.
Tama te bidi meba dwai gasi selama, isimainogo yao.
Tama te gesi ogwa bidi dabe da,
te boi hwįgi pabode isimainu yao.
Tama te augwa we dabe sibi te wai meniama,
te bidi me meni yaibao.
22 Te polo tama mu nago te boi hwįbo bidi dabe
te hwįagasomainu tagala palama,
te augwali dolomainogo ilao,
te augwa wi mu genuai eyu,
te dwai gela mu omainao.
Te eno boi bidi dabego ena pageabi elama,
ena dolainogo ebao.
Augwali te bidigo hasa tulalumainogo te tǫ dedage
nigibo tiwai ebao,
te bidigo sųgų sabo wa munama,
te hasa tumainogo ebo tiwai ebo dao.
23 Tiali goli, Genuai Bidi, nago koneai,
augwaligo ena ela muabo po mia salio.
Tama tiyu, nago te sęgę me sela sąyu,
te augwaligo yali dwai sę sela sągio. Menio.
Nago augwalide haliga sębę elama,
te gasa bidi dabego augwali aiyaba
elalumainu yao,” te po wai dao.