37
1 “Te be kulu wabo si da, ena wi elama, homu
menigasąbo dao.
2 Odao! Dagego be kulu wabo odao!
Te da Godigo hae olama, i bomonama te obao.
3 Agai te be sele tigidali buluba pelama,
te tǫ sabi simanigi paliba usu nigi pomainu ebo dao.
4 Tama nosali agai hąe olama,
i wabo po dago odobo dao.
Tama agai genuai bomo dago subo dao.
Tama te Godigo tama tibo si da,
te be sele ula tigidali buluba pela silibo dao,” wali.
5 “Godigo pedauwalidu gasagi yai po mu wabo dao,
te be kulukulu wabo tiwai, te dwagi yai mu dao.
Tama agai haniani sę mu eyu,
te dago kolesaga edelai mu dao.
6 Agai olo pogo obadi, te ais dali,
tulubage dali si tǫba tulubo dao.
Agai po obadi, genuai tulubage mu tulubo dao.
7 Te tobage kolesagago we bidigo sunumi pania sabo
dao, tama augwali sę ebo usu egobeo.
Agai te tama tibo da, te we bidigo agai
ebo sę dabe konemainu tibo dao.
8 Tama te tama tibo sogo da,
bulu hasa dabe augwa buluba geme duala sigi peyu,
te augwa bede bididubo dao.
9 Te bomai wali dabe augwa pesagedu
asobo gagalama, asobo dao.
Tama te genuai waligo moni kedau sesebo sogo
asobo dao.
10 God agai wali pona palobosi, te ais pedalobo dao.
Tama te genuai wę te ais gagalama,
tama mu dila pabo dao.
11 Agai wę hauwa te moni dagalu pǫba sabobo dao,
tama be kulu omainu elama,
be sele tigidali buluba pela silibo dao.
12 Godigo po obaso,
te pǫ dabe augwali tigidali tǫ pedai
buluba pela silibo dao,
te agai augwaliba ya wali sę emainu.
13 Me sogo da, agai we bidigo kolesaga
dodolomainu tagala palobo dao.
Tama me sogo da, augwali dwagi yai sę elama,
tau somainu ebo dao.
Tama me sogo da, agai tǫ ma usu ilimainu te dagalu
pǫ dabe tagala palobo dao,”
Elihugo te po wai.
14 “Jop, nage dua bidiyu, olo saganama,
tama homu kolesaga selama,
Godigo haniani bomai sę dabe Godigo ebo sę po sao.
15 Ma, nago Godigo te dagalu pǫ dabe
mena buluba pomainu ebo sę page koneaniwe?
Ma, agai te be sele ula ilibo sę page nago konea sai dawe?
16 Ma, nago Godigo te pǫ dabe
dagalude walalumainu ebo kolesaga nago
kone dawe?
God agai te tigidali homu kolesaga
elaluyu, agai te dwagi dwagi yai sę dabe ebo dao.
Tiali goli, nago te tobage homu kolesaga menio.
17 Te posolai wali te pada badu saut badu asobo si da,
tama teda nago tigi me, ugwa dali side posolo
genuai mu yaibao.
Nago magi sę me elama, te wali togologobeo.
18 God agai dagalu nigilama, tama diniginai.
Tama te dagalu te gesabidi subo nai dula
te brasgo nigai tiwai dao.
Mena tama tiali, nago agai te sę dabe ebo tau saibawe?
19 Ma, nage usu yali wida,
teda nago dago Godiba wabo po ola mao.
Magi baso meni. Dago homu kolesaga
kuna konea pisąbaso,
tama dago agai po tų ebode wabo po niga mubeo.
20 Ma, Godigo odali digi yaide,
eno po aga dali elalubaso da,
teda agai eno po wabo odaibawe?
Teda agai eno wabo po godolo me egobeo,” wali.
21 “Suama. Te waligo pǫ sela sąnama,
tama dagalu hania elama, giliga ula genuai mu
te ebao.
Tama dago te giligaba tonobo usu egobeo.
22 Tama me badu pada badu not badu
te moni ula mu dagaludu asobao.
Agai au da, te gol masigi tiwai dao.
Te da te God aga au te munama,
tama genuai ula dali, moni bomo dali si te asobao.
23 Tigidali Bomo Elalubo God te ugwanu mu elalubo,
tama da aga pąba pabo usu egobeo.
Agai genuai bomo mu elalubo,
tama aga doloba pai mu dao.
Agai te po tų dodolobo sę ebode
doloba pai kolesaga naga ebo dao.
Tama agai da olo dali aiyaba elalugobeo.
24 Tama tibaso, we bidi agade wi ebo dao.
Tama agai olo te bidi dabe augwaligo homugo
augwali homu kolesaga hauwa elalubao homu
ebode odobo menio,”
Elihugo te po wai.