5
Wain gi balia po
1 Eno ena abagi me delide balia po waibao.
Te baliago aga wain gi po pusali.
Te ugwadu bulu du dwasianu
mede tǫ ili hauwa me elaluali.
Tede eno abagigo wain gi tede yali.
2 Agai tǫ elama, tama masigi tigidali sela sąwai dao.
Tama dwagi dwagi yai wain nologo bulali.
Te gi tomode agai be sęani,
te aga tede bidiyu, te gi tonaluainu.
Tama te masigi pesage me delide agai
te wain du mimiabo digi te nai
nigali, tǫ dedage nigali.
Tigidali sę silibo si, agai te homu yali,
‘Eno ni wain du bugagia mu walaibao,’ homu yali.
‘Tama wain du pusu mu yaibao.’ Tiali goli, meni.
Te ni dabe du bugagia me walobeo.
Tama te du dabe dwasianu mu elama,
tama pedauwalide ha yali.
3 Tama tibaso, eno abagigo te po wali,
“Dage Juda we bidi, me Jerusalem hanu
we bidi, dagego enabolo walao.
Te dego tiabo sę yaliwe? Enawe?
Ma, eno wain gigo dawe?
4 Eno koneani. Eno dwagi yai sę yali,
te gide dwagi yai wain du walaiba weyu,
tiali goli magi baso mu te wain du
dwasianu mu walama,
tama pedauwalide ha yaliwe?
Te gi tonalubo sę me deli te eno bugagia dolo ebewe?
5 Megi da, dagebolo ena wain gide yaiba homu yali po
dagebolo eno pusa mawaibao.
Te eno wain gi obo hųgia sąwaibao.
Awe, te obo dolama, tama te bulu hasa dabe te gi
tomoba pelama,
tama te wain ni tulama, dolomainu yaibao.
6 Te eno te tǫ dolama, tama busi holama, nosai holiyu,
tama te sesane ni dabe holama,
te gi halua somainu yaibao.
Tama eno te wain ni ma tonalubo sę ma egobeo.
Te me eno te gi tǫba tulubage me
tulamo olama, habu selaibao,”
eno abagigo te po wali.
7 Te Juda we bidi, me Israel we bidi,
te Genuai Bidigo Tigidali Bomo Elalubo Bidigo
wain gi tiwai dao.
Agai godolo mu elama, agai augwali
bugagia mu tonalubo dao.
Te we bidi dabego wiegi yai doloba pai
kolesaga naga emaina homu ebo dao.
Tiali goli, augwaligo dwai kolesaga ebo dao.
Agai homugo augwaligo gasa
we bidi dabe dali wiegi yai kolesaga
emai homu ebo dao.
Tiali goli, augwaligo gasa we bidi aiyaba elaluama,
tama augwaligo augwali dali boi bidi
homu kolesaga ebo dao.
Tama te aiyaba elaluali we bidi dabego i wabo agai odali.
Te dwai dwai haniani kolesaga ebo we bidi dolaibao
8 Dage te tǫ dabe, be dabe hauwa
abelama, duga naga pesage
hola sabo bage, dage dolaibao.
Te tamadi tama dagego tigidali tǫ me,
bulu me, sese sela silaibao.
Tama gasa bidi dabe meba bidabo bulu menia saibao.
Tama dage naga tama bidaibao.
9 Eno odali, Genuai Bidi Tigidali Bomo Elalubo Bidigo
te po wabo eno odali,
“Mu tama, te genuai dwagi yai be dabe
dolama, te olo elaluaibao.
Awe, bidi dabe te wiegi yai be dabe me bidigobeo.
10 Tagala, augwaligo wain gi hauwa bulu badi goli,
me wain du dabe hauwa me walogobeo.
Tama augwaligo dwasianu wain ąį naga nigaibao.
Tagala me, augwaligo nogo si begi
te wit ge augwaligo te gide bulai.
Tama te wit ininama, augwaligo
togolama, te begi deli digi bueibao,”
Genuai Bidigo te po wabo eno odali.
11 Dage dolaibao.
Dage te kigamu hulide hodaloama,
wain wę tuyu, te haniani bomai
wę tubo bage, dage dolaibao.
Dagego te wę tulama, polodubadi be
huli sesabi edelebo dao.
12 Te nai daa tuyu, wain wę tuyu,
me haniani musik gitago eliyu, genagego eliyu,
hąbidigo eliyu ebo, te dagego mu koneani.
Tiali goli, Genuai Bidigo yainu ebo,
te sę dabe dagego munu me konebeo.
Dagego te sę dabe te olo nai dabe da homu ebo dao.
13 Tama tibaso, Genuai Bidigo te po wali,
“Mu tama, eno we bidi dabe dagego
ena konebo hagela yali.
Tama tibaso, boi bidi dabego dage gasa buluba me
kalabus elama, odasa paibao.
Te genuai bidi dabe nai menia saibao.
Te olo we bidi dabe te ąį nogone eyu bidaibao.
Tama augwali mu dolaibao.
14 Megi dage wiegi yai homu elama,
gana paide dagego daa hauwa mu te tubao.
Tiali goli, mu tama, te gų pagede te kele ą olama,
tama te Jerusalem bulu genuai bidi dabe,
me olo we bidi dabe dalainu polo no munalubao,”
Genuai Bidigo te po wali.
15 Te tigidali we bidi hale mu yaibao.
Tama te we bidi augwa digi augwa nogi
ugwa sabo we bidi dabe
augwali nogi mu menia saibao.
16 Te agai doloba pai kolesagago Genuai Bidi Tigidali
Bomo Elalubo Bidigo
te we bidi dabego bomo aiyaba elaluaibao.
Tama aga deli naga genuai nogi saibao.
Tama agai te dwagi yai doloba pai kolesaga naga ebogo
agai te we bidibolo ola mawaibao,
aga te tedali gasagi yai mu dao.
17 Te hanu dabe sese dolaibao.
Tama nosai dabego bulu mesega saibao.
Tama sipsip kibu de meme kibu sigo
te mone hauwa elaluali bidi dabego
be elaluali pesageba nosai tuagasaibao.
18 Te dage dolaibao.
Dagego te gasa bidi dabe ili po walama, sęgę te soba.
Te sęgę dabe dage tigi dagana selama,
tama dagego sela sąbo usu egobeo.
19 Dagego te po wabo dao,
“Dago odobo Israel dabego God,
aga te Dwagi Yai Doloba Pai Kolesaga Naga Ebo
God dao.
Ma, agai dabolo magi sę me yabo homu
ebaso da, teda agai polo emainao.
Tama tibaso, dago sulama, tama dago
aga homu kolesaga koneaibao.
Awe, agai te sę polo emainao,” wabo.
20 Dage dolaibao.
Te dagego haniani nai hasegelama,
tama te po wabo dao,
“Dwai kolesaga te wiegi yai dao,
te wiegi yai kolesaga te dwai dao,” wabo dao.
Me, dagego te po wabo dao, “Te hulia sali te ula dao.
Me, te ula ebo te ma huli sali dao,” wabo dao.
Tama me dagego te po wabo dao,
“Te ha ebo nai te pusu ebo, ma te pusu ebo nai te kelede
ha ebo,” po wabo dao.
21 Dage dolaibao.
Te dage bidi duga homugo dagego
kolesagago gasa bidi dabego kolesaga aiyaba
elaluali dao homu ebo bidi dabe, dage.
22 Dage te bomai wę tubode genuai
nogi elalubo bidi dabe, dage dolaibao,
te dagego bomo de kolesaga si da,
te haniani wę sįsįbo delide naga dao.
23 Te dagego po tų odobo sogo da,
dagego te augwaligo nogode te ili po wabo
po tų abelebo masigi dagego selama,
tama te dwai sę yali bage olo taga palobo dao.
Tiali goli, dagego te po sęgę
meni yai bidi dabego po bugagia osola subo menio.
24 Tama tibaso, dage te ni sasia pabo
tiwai elama, tama te ni pedali mobia pelama,
tama te ni yabe dabe tau elama,
tegalubo tiwai yaibao.
Te dwai sę dage tigiba polo tama pedalaibao,
te isigo nosai delama, silibo tiwai tama yaibao.
Magi baso meni.
Dagego te Genuai Bidi Tigidali Bomo Elalubo Bidigo
bomai po sela sąbaso,
dagego Israel dabego God tudi ola mabo.
Aga te Dwagi Yai Doloba Pai Kolesaga
Naga Ebo God dao.
25 Tama tibaso, Genuai Bidi agai
aga we bidi dabe dali sębę eyu,
te sębę posolo mu ebao.
Tama megi da, agai nogo ugwa
sagua selama, dolainu no munalubao.
Agai nogogo deli sogo elebaso,
te tigidali tǫ dabe bulu du dabe
elebaso, memenege elama,
bulu du dabe aluasa dulaibao.
Tama we bidi hauwa isila paibao.
Tama augwaligo tigi dabe te hanu sunumi dabede
olo pobele bage dabe munalua pabo ąǫ yaibao.
Genuai Bidi agai tama tiaibao.
Tiali goli, te tama tibogo Genuai Bidi agai sębę
siligobeo.
Menio. Agai nogo me ugwaba me dodolalubao.
26 Genuai Bidigo te digibulu
ami bidi dabe aga we bidi dolagasomainu i wabo
sa muaibao.
Awe, te digibulu mu bidibo bage
asomainu eyu, agai ho bomonama waibao.
Tama te ami bidi dabe bomona togwa asaibao.
27 Te ami bagego bidi dabe da,
te bomai bidi dabe naga dao.
Te augwali me deli sągą dili telega
elama, tulaluainu yai me menio,
o te agai gedu godege magana pai me menio.
Augwaligo kibu waligo te gudali ugwa
bugagia kęnama, asaibao.
Augwaligo bomai su sągą sendol guda sesa paibao.
Te togwa pabo ąǫ isąwai me gudugobeo.
28 Augwaligo ene da, mu poa pai.
Tama augwaligo enesigi dolama,
tama enabo no sealubuo.
Augwaligo hos dabe da, boma pai mu dao.
Tama te hos dabego sągąde kapa dabe
te dila pai masigi tiwai, tama togwa pogobeo.
Augwaligo karis dabe bomona mu pabo dao.
Tama te karis wili dabe da, te wali ebo ąǫ ebo dao.
29 Te ami bidi dabego te hai wabo te
laion yowigo bulu hasa ela munama,
dągą wabo tiwai waibao.
Augwaligo boi bidi dabe toulama, tama sela paibao,
te laion yowigo bulu hasa elama,
sela pabo tiwai yaibao.
Tama bidi mego augwali ma sogobeo.
30 Tama te sogo boi bidi dabe aselama,
Juda bulu dolagasaibao.
Tama augwaligo kulukulu genuai mu waibao,
te tamu wę holama, wę kemi saneba
asiyu, u wabo tiwai yaibao.
Tama te bidi dabego te buluba tonagasobo si da,
teda augwaligo te bulu sisi pǫgo mesega
selama, giliga ula sininai suaibao.
Tama te bulu mu hulia sai suaibao.