Profet Habakukgo Po Elalubo Buku
Hasia nedabo po
Te bidi Habakuk aga te Genuai Bidigo wali po pusa mabo profet bidi me deli dao. Tama agai po te kantri Babilon boma pai mu elalubadi pusai dao. Agai Babilon dabego kolesaga dwai mu ebo sualio. Augwali te hwįnama, gasa meba hani dolobo bage dao. Tama te tialigo Habakuk aga homu kone hauwa tua pomainu ilalio. Agai Godibolo e tama po hanalu wali, “Eno koneani, nage doloba pai bidi dao, tama tibaso, nago te dwai kolesaga ebo bidi dabe po tų ela mabo dao, tama augwalibolo dwai pe wei ponobo dao. Tiali goli, te bidi dabego te bidi meba dwanu wiegi yai bidi dabe dolobo sę ebao. Tama nago olo bidiyu tonalubao. Nago magi baso te tama sę ebawe?” Habakukgo te po hanalu wali. (Te Dąį 1, ves 13de suao.)
Te hanalubo po polobadu elaluai, tama megi me me te elalubao. Tama Godigo wei ponabo me te me elalubao. Agai te po wali, aga digi aga te tigidali nai page bidi dao. Tama aga homugo digi me aga digi bodolu mani sogo agai te tigidali nai dabe dodolaibao. Tama te sę pedalisiąbadi, te doloba pai kolesaga ebo we bidi dabe augwali bidabo ula elaluama me bidaibao. Magi baso meni, augwaligo Genuai Bidide homu dąų olalubaso. Habakukgo me pogo te po wali. Godigo te dwai bidi dabe me dene mawaibao po wali. Tama te buku siligi peyu, te Godigo nogi ugwaba sabo balia po me elalubao. Tama Habakuk aga bomai homu dąų wali me ola mani.
Habakuk agai homu sęgę yali po pusubaso, Genuai Bidigo agai po wei ponanio
1
(Dąį 1–2)
1 Te Genuai Bidigo te sęgę yai po dabe te profet Habakukbolo te nade subo nai tiwai elama, ola mani.
Habakukgo te we bidigo ebo dwai kolesaga po Genuai Bidibolo pusa mani
2 Genuai Bidi, hauwa sogo mu eno nage i wabo dao. Nisu mu nago eno i wabo odama, tama nago da Juda dabe tau saibawe, tama te dwai nai dabe daba pedalobo naigo da dolidalio?
3 Eno sęgę hauwa mu te we bidiba pedalobo suali. Magi baso nago te sęgę pedalumainu sula tagalobawe? Mena tama tibaso nago te sę dabe te we bidiba te dwai sę dabe pedalobo sulama, tama nago magi sę me deli isąma ebawe? Te tigidali badu te dwai bidi dabe augwaligo te we bidi dolama, me augwa nai dabe me doliyu ebao. Tama te bidi dabe augwa hasi wado po olama, subigila hwįyu ebao.
4 Tama te we bidi augwaligo po tų ebo si, augwaligo te nago bomai po wali pisąma, tama augwaligo homugo te bomai po te olo nai dao tiwai homu ebao. Tama sesemane sogo te bidi dabego doloba pai kolesaga wali pabeo. Te dwai bidi dabego te doloba pai bidi dabe aiyaba elaluama, tama nago bomai po te hųgia sabo dao.
Genuai Bidigo aga we bidibolo po me deli mani
5 Tialima, Genuai Bidigo aga we bidibolo e tama po pusa mani. “Dagego meba gasa kantri we bidi bugagia suao, tama dage noma dwai mu saibao. Magi baso meni. Tamadi tama eno augwali tomode gasagi yai nai me pedelemainu elama, tama dagego te sę yali po odobode da, teda dagego homugo te mu dao homu me egobeo.
6 Odao. Eno te Babilon dabe augwali bomai hani mu pedelemainu ilaibao. Te bidi dabe augwali te bidi dwai dabe dao, tama augwali hwįbo bomai bidi dabe dao. Megi augwali ami bidi dabe tigidali kantri dabeba pelama, augwali polo aiyaba elaluama, tama augwali tonalubao.
7 Augwaligo tigidali bidi hani augwalide wi dwai mu emainu ilibo dao. Tama te dwai bidi dabego bomai po deli me wali pabo menio. Augwaligo augwa homu kolesaga wali naga pabo dao, tama augwa nogi naga ugaba sabo dao,” wali.
8 “Te Babilon bage augwaligo hos kibu dabe omagia polo udabo dao. Tama augwaligo meba tigidali bulu hasa dabe omagia udabo edelama, mu udabo dao. Tama te hos dabego dolama mu hwįyu ebo dao. Tama augwaligo hwįbo kolesagago te hulide bilibo te uni yowigo hwįbo kolesaga edelama mu ebo dao. Te hos kibu dabe augwali sasamano pelama, tama te hwįabo bidi dabe augwali te hosde dualama, tama augwali digibulu bulu mude hogodama, tama udulama, tama hwįainu pabo dao. Te bage augwali te ba kemodagego te hasa dabe ela tuainu te bogo si pobea selama, tǫba tulalubo tiwai elama omagia mu udawaibao,” wali.
9 “Te augwaligo ami dabego augwaligo te magi yali te kantri dolo pelama, tama te kantri dolama, tama bomonama, te we bidi selama, te kalabus sę igi pomainu ilibo dao. Te bage augwaligo te sali te kalabus dabego namba te hauwa kisu mu, te ąį sanede kemi sane tiwai dao, bidigo augwali nedemainogo ebaso, te usu egobeo.
10 Te Babilon bage augwaligo te king dabe, me te kantri ofisa bidi dabe gisugu mena tagalubo dao. Augwaligo te taun dabe dolabo homu ebaso da, tama te taun dabe bomai obo elalubaso da, tagalao, augwaligo gisugu mayu ebo dao. Tama augwaligo te obo sesegede augwaligo tǫ du holama, tama augwali tedu te oboba ugwaba holama, tama taun tomoba pelama, tama te taun me te taunde nai dabe sese tama sabo dao.
11 Augwaligo hwįbo silama, tama augwali deli sogo mu augwali gasaba omagia mu polo pabo dao, te wali soabo tiwai tama ebo dao. Te Babilon bidi dabe augwaligo god me deli wali pabo menio. Augwaligo augwa homu kolesaga me augwa bomo wali pabo dao. Tama augwaligo te tobage haniani dwai sę ebaso, augwaligo genuai sęgę mu elalubao,” Genuai Bidigo aga we bidibolo te po walali.
Habakukgo konila po olama, Genuai Bidibolo ma walalio
12 God, polobadu mu me, megi tama me, nage Genuai Bidi me te bidibao. Eno Genuai Bidi, nage te tedali wiegi yai doloba pai kolesaga ebo God dao, tama nago da isimainu sula tagalogobeo. God, nage eno Genuai Bidi dao, tama nage te bomai masigi tiwai dao, tama da te tudi badu te tiwąį madide duala sabo tiwai dao. Nago te Babilon dabe magi elama, tama augwali bomo ilama, tama augwaligo da tonalubo sę emainu magi ilai dao, te dago dwai sęgę wei ponoyu tiai dao.
13 Te Babilon dabe augwali te tibo po wabo bidi dabe dao, me augwali te haniani dwai sę ebo bidi dabe dao. Mena tama mu tibaso, nago augwali nago sę emainogo sula tagalobawe? Eno koneani, nage doloba pai mu elama, tama nago dwai kolesaga ebo bidi dabe po tų ela mayu, tama augwalibolo dwai pe wei ponobo dao. Tiali goli, te Babilon bidi dwai dabego te bidi meba dwasianu wiegi yai bidi dabe dolobao, tama nage ma olo dulaluyu tonalubao. Nago magi baso tama tibawe?
14 Te Juda we bidi augwali sųgų o sagado dabe meni. Menio. Tialima, nago magi baso augwali tagalama, tama augwali tobolu bidi meni yai bidiyu, olo te sųgų me sagado dabe tiwai bidimainu tagalobawe?
15 Tama te Babilon dabego te we bidi selama, kalabus ilibo dao, te bidi dabego te sųgų dabe tubo hukugo me sųgų sabo wa umbengo sabo tiwai ebao. Augwaligo augwali kalabus ela silama, tama augwali wiegi yai homu eyu, hae ulugu wabo dao.
16 Te tama tibo kolesagago augwaligo nai dabe hauwa mu selama, sisinibo dao. Tama augwaligo augwa bomo te augwa tibo god tiwai ilama, tama te tibo god nogi ugwaba selama, tama te bomogo nogi ugwaba sainu ofa eyu ebo dao.
17 Te Babilon dabego augwa boi bidi dabe hobede dwasianu me ebo menio. Tiali goli, Genuai Bidi, nago augwaligo hwįnama, tama meba kantri dabe dolomainu sesemane sogo sula tagalaiba, agawe?