Polgo Hasia Pas Deli Tesalonaika Dabeba Asęani
Hasia nedebo tau sabo po
Te Tesalonaika moni hanu te nabis bulu dao, te Masedonia moni tǫ pedai sesegede elaluali. Tama Pol teba sabolama, tama Kraisde po hasia te Juda hani we bidi dabebolo pusali. Augwali hauwa homu hasegelama tama Kraisgo po wali pabo gagalali. Tama te Juda hani isiąwai we bidi augwali me hauwa tama tiali. Tama nosali Pol te Korin hanude bidibadi, agai te Timoti te Tesalonaika hanuba tagala palali. Te Timoti ma asama, tama agai Polbolo te Tesalonaika hani tomode pedalali sę po pusali. Te tibo po ola mabo bage Tesalonaikaba asama, tama Pol nogi posobo po obaso, e pas tomode Polgo aga digi nogi tau sabo po asęani. Tama boi bidi dabego augwali dene mani goli, te Tesalonaika we bidi augwali Krais bugagia wali pobaso, Pol dwagi yai homu eyu, te Godibolo buba hwi po asęani. Tama augwaligo te augwa hani isali we bidide homu hauwa ebaso, Polgo te Godigo da gų pagede ma hodalueibao po augwalibolo wei ponobo po asęyu, tama gasa tau sabo homu bomo mabo po me asęna tolali.
Pol dali aga deli sę ebo bagego me te Tesalonaika hani bagede augwaligo moni homu yali
1
(Dąį 1–3)
1 Pol, me Sailas, Timoti dali, da bidi selago te po dagebolo asęna tolobao, dage Tesalonaika bulude bidibo we bidibolo. Dage te God Aya me Genuai Bidi Jisas Kraisde wadolama bidibao. God agai dage olo tau selama, tama dage bugagia bidao, dago homugo tebo dao.
Tesalonaika we bidi augwaligo God dali konealubo po dąų olama, bugagia bidai
2 Tigidali sogo dago dage tigidali dali Godibolo buba hwi po weyu, dago bomo eyu, gedu haluasa po dage tau somainogo wabo dao.
3 Tama dago Aya Godibolo po obadi, dagego ebo dwagi yai kolesaga te dago gegeda pabo menio, te dago ma konebo dao. Dagego Kraisde duga homu tigidali mubaso, tama dagego dwagi yai sę ebo dao. Dagego duga hasi dwagi yai homu eyu, tau siyu ebaso, sę dene ebo dao. Tama dwagi yai homu eyu, dagego ‘Dago Genuai Bidi Jisas Krais mu aselama, da tau saibao,’ te homu eyu, tama bomo elama, dagego tonalubo dao. Tama dagego te sę ebo po dago ma koneyu, dago Godibolo buba hwi po wabo dao.
4 Dago abagi dabe, God agai dage godolo mu eyu, agai dage aga we bidi mu da olama, sa muyu yai dao, te si dago konebo dao. Tama tibaso, dago Godibolo nage usu dao te po wabo dao.
5 God agai dagebolo te homu yali dago mena tama koneaniwe? Dago te Godigo po dagebolo pusagasali sogo, te olo po dali naga wagasai menio. Te pode Godigo Mobo Bidi agai bomo mu eyu, tama dagego te po mu po dao homu yali, te dagego te pode homu si ebeo. Duga digi dago dage dali hodobo bidiyu tau sabo kolesaga, te dagego konebo dao.
6 Tama dagego dago kolesaga dali, te Genuai Bidi Kraisgo kolesaga dali te kolesaga si dagego wali pabo gilama. Polobadu augwaligo da dali, Genuai Bidi Krais dali dene mani gilama, dage me Godigo po sobadi, tama dage me dene salio. Dage dene sali goli, te Godigo Mobo Bidi agai dagego homu dwagi yai mu ilalio.
7 Tama tibaso, te Masedonia dali Akaia dali te genuai tǫ side bidibo Jisas wali pabo we bidi augwaligo dagego te dwagi yai sę yali po odama, tama augwaligo te tiwai inao, te po wai.
8 Dagego Genuai Bidigo po gasa we bidibolo pusubo te po te digibulu bulude odalio. Te po te Masedonia bulu dali Akaia te bulu side naga te po odai menio. Tigidali bulu bidi augwaligo dagego te Godibolo konealubo po dąų wabo po augwaligo odalio. Tama tibaso, dago dagego te sę ebo po te dago augwalibolo ma wagobeo.
9 Dage bidibo digi da asali sogode dagego yali sę po augwa digi augwaligo dabolo pusubo dao. Augwaligo da dali pusuyu, te po wai, ‘Augwaligo te tibo god tagaliyu, tama augwaligo homu God muba muai,’ te po wabo dao, tama dage bidabo ula sabo te God agai sę bidi dage bidibao, te po wabo dao.
10 Tama augwaligo te po wabo dao, dage te Godigo Ogwa dagalu tagalama e tǫba ma asobo sogo te dagego tonalubo dao, te po wabo dao. Te Godigo polobadu gų pagede ma hodolali bidi, te Jisas, tama te bidi agai da dali Godigo nosali sębę idali weyu tau sali bidi Jisas dao. Dagego te bidi asobo tonalubo po augwaligo dabolo pusubo dao.