1 Genuai Bidigo po me ma weyu, Mosesbolo te po wai, “Dagego enabolo lotu po waiabo ugwa be te nogo si wiegi yai name ugwa te sisi yai, me te mama yai, te augwaligo hobigo au ilai ugwago nigao. Tama hobi selama, te ensel mobo bidi piksa noma dabe te name ugwade hobolama nigao. Te name ugwa te hobigo wiegi yai au ebo sę mu koneai bidi, agai te tobage au ebo sę emainao. 2 Tama tigidali te name ugwa te dedeli au yai tiwai naga nogo si nigao. Te ugwa dabe bobobage te 12 mita, tama te genuai usu sabo te 2 mita dao. 3 Tama a naga name ugwa dali bogo badu hobolama, tama te genuai moni bage kilasa pelama, tama gasa name ugwa te tiwai a naga hobolao. 4 Tama te genuai name ugwa side wadolabo sisi ugwade te ring meba nigao. Tama te ring dabe te genuai ugwa si sesegede kękę pao. 5 Tama hasia te name ugwade te ring bidi sese si olama nogo si te sesegede bebe peyu, te gasa bidi sese si olama nogo si me te si wali name ugwa sesegede kęąo. 6 Tama dagego te bidi sese si olama nogo si huk te genuai ugwa si dali tama te deli ugwa tiwai naga pedelemainogo, bebe pabo te golgo nigao.”

7 “Tama nosali dagego te genuai name ugwa deli te eno ugwa be haluabo nigao. Tama te name ugwa dage te nogo si olama sągągo deli augwaligo te kibu meme nisigo nigao. 8 Te tigidali badu te deli tigi tiwai naga nigao. Bobobage usu ni sabo te 13 mita tama, te genuai usu ni sabo te 2 mita dao. 9 Tama a naga me badu dali hobolama, te bobobage ugwa deli tiwai naga pedelama, tama me sela me sela badu dali hobolama, tama te bobobage ugwa tiwai deli pedelaibao. Tama te me sela me sela wali te ugwa sigo pedelama, te ugwa be sunumi badu haluabo, te tama walolomainao. 10 Tama te bidi sese si olama nogo si ring te hasia ugwa sesegede kęnama, me te bidi si olama nogo si ring te ugwa si wali ugwade kęąo. 11 Tama dagego te bidi sese si olama nogo si huk bras nigilama, tama te huk dabe te ringba munama, te genuai ugwa si dali si bebe pelama, te deli ugwa tiwai naga elaluaibao. 12 Tama te usu sabo nai 1 mita te genuai ugwa te olo munalubo digi dagego te eno ugwa be tudi badude halalumainogo sula tagalao. 13 Tama te bobobage halubo ugwago te ugwa be bogo badu side bobobage aiya elaluama, te 50 sentamita me badu elaluyu, te me badu elaluyu yaibao. Tama tebogo te ugwa be tigidali mu halua sabo usu yaibao. 14 Tama te meme nisigo nigai genuai name ugwa, te nai ugwadu muabo gasa haluabo nai me si ma nigao. Me deli te omai sipsip wali te augwaligo mama pengo pilai tego nigao. Tama me deli te tamu ąįde bidibo hasa nogi sikau, te dabego waligo te ugwadu haluabo te nigao.”

15 “Tama dagego te ugwa be daga dolaluabo ni name dabe te ni akasgo nigao. 16 Te tigidali ni name deli deligo usu sabo te 4 mita, tama te ni name genuai usu sabo te deli deli te 66 sentamita dao. 17 Tama dagego te ni name dabe dolaluama, tama pagede dulama, te pęwadage sągą si si dula dula pelama, tama dagego tigidali ni name te tiwai naga nigao. 18 Tama dagego te tobage ni name bidi sese deli usu nabo te lotu ugwa be me bogo badu dolalumainogo eyu nigao. 19 Tama dagego te kapa silva selama, tama te gelali ni page tiwai nai te bidi sese si te dedage elalubo te ni name sągą bulabo digi nigao. Te page nai si si te ni name deli deli dologode munaluyu, te tigidali daga ni name page dąų elalumainao. 20-21 Tama dagego te tiwai naga te be gasa bogo badu me tama tiao. Te bidi sese daga ni name nigiyu, te bidi sese si silva te ni name page dąų wabo nai dabe nigilama, te silva pedai si te ni name deli delide muao. 22 Tama te be daga ni name te me sela me sela te ugwa be tudi badu, te sia ge dega sigi pabo badu, teba mumainogo nigao. 23 Tama te badu kona side te ni name si si nigiyu, tama dabelim yao. Te tama nigao. 24 Tama te be dili habu badu te kona ni name si pagede wadolama, tama tigidali ugwaba wadodolo holao. Tama dagego te si dali si habu badu tama tiao. 25 Tama te tudi badu te daga ni name te a naga olama nogo me badu sela elaluaibao. Tama nogo si olama nogo a naga tama me badu deli te silva te ni name page dąų wabo nai si usu nama, te deli deli usu dao.”

26-29 “Tama dagego te ni akas selama, tama te ni name tuabo bobobage ni meba nigao. Tama te bobobage ni dabe te ugwa be daga dolalubo ni namede dąų omainogo eyu, tama te wiegi yai kapa golgo te genuai ring dabe nigiyu, munalubo kęąo. Tama te dolalubo ni name tigidali me, te bobobage ni name tuabo ni dabe me, te nigo nigali nai tigidali te golgo haluao. Tama elama, tama te bobobage ni a naga tego te be me bogo badu dolalubo ni name dabede te ring dabego dąų wao. Tama bobobage ni meba te ni name ugwadu muyu, meba te ni name aiya badu muyu yao. Tama meba me tomode muyu, tama te be tudi badu gagalama, tama asama, tama te be gesabi baduba sabolaibao. Tama te be u bogo badu me te bobage ni namego tama naga tiao. Tama te be tudi badu daga, te sia ge dega sigi pabo badu, tede me te bobage ni te dolalubo ni name dabego ringba bulama, tama dąų walao.”

30 “Tama nosali dagego te lotu wabo ugwa be nigibo nai dabe silama, tama te be dodolobadi, te eno nagebolo e bulu dude ola mani te piksa subo tiwai yao.”

31 “Tama dagego te ugwa be tomode walabo name ugwa gasa au wiegi yai genuai nigao. Tama te wiegi yai tedela yai hobi dabe siyu, te sipsip nisigo nigai sisi yai hobi dabe me siyu, tama te sipsip nisigo nigai mama yai hobi dabe me siyu yao, tama tego te wiegi yai name ugwa me deli nigao. Tama dagego gasa haniani wiegi yai hobi dabego te ensel mobo bidi noma bugagia mu te ugwade hobolao. 32 Tialima, te ni akas selama, te pos ni me si me si nigao. Tama te pos dabe te golgo haluama, tama te pos dabe te silvago nigai page me si me si tede bulao. Tama te gol huk meba nigilama, tama te ugwa dabe dąų elalumainogo te posde kękę piąo, tede walomainao. 33 Tialima, tama te ugwa te huk dabeba walama, te bomo yai po dąų wai po asęai masigi sawali si elalubo halobage, te nai te walobo name ugwa tudi badu muao. Tama te ugwago te lotu wabo be tomode dąį tiwai togolama, tama be habu si elaluaibao. Te sunumi pąde te polalubo be habu nogi wabo te Tedali Gasagi Yai Be Habu dao, te name ugwa dąį tudi badu te habu te Tedali Gasagi Yai Mu Be Habu dao. * 34 Tama te bomo yai dąų wali po elalubo masigi sawali si elalubo halobage, aga te Tedali Gasagi Yai Mu Be Habu te be habu badu te halobage munama, tama te halobage po paliabo nai te halobageba muao, te dwai kolesaga yali sęgę sela sąbo madigi dao. 35 Tama tebol sai te gasa be habude muao, te nogi Tedali Gasagi Yai Be Habu dao, te ugwa be daga pąde, te sia ge pedalubo sesege pobase nogo badu muao. Tama ula ebo sole te gasa badu te be daga pąde muao, te tebol sai dolo si muao.”

36 “Tama dagego te wiegi yai genuai au yai name ugwa te ugwa be tų bagulabo nigao. Tama te wiegi yai au yai hobolama, te e tiwai hobi, te sis hobi me, te mama yai hobi me, te augwaligo sipsip nisigo nigai dao. 37 Tama te ni akas selama, tama a naga pos nigilama, te golgo haluao. Tama te pos dabede te huk gol kęnama, te ugwa walabode dao. Tama te page nai a naga te kapa brasgo nigao, dedage elalubo te pos dabe bulabo digi dao,” wali.