5
Profetgo te Israel augwalide homu dene ebo balia wai
1 Dage Israel hani dabe, dagego te isai bidide wabo balia odao. Megi ena, Amos, eno dageba te balia obao, magi baso meni, dage te isai bidi tiwai yaibao.
2 Te tiwai balia obao,
“Te gesi wegi Israel, aga degasa dulalio,
ela mubaso, te ma hodalubo usu ebeo.
Aga te aga tǫde pila mubao,
te aga tau selama hodolabo bidi deli me meni dao.”
3 Magi baso meni, God Genuai Bidigo te Israel hanibolo te tama obao, “Te Israel taun me deligo te ami bidi dabe bidi sese umabo 1,000 te boi hwįboba tagala palama, te bidi sese a naga 100 ami bidi naga ma geasa asaibao. Te gasa taungo te bidi sese a naga 100 ami bidi tagala palu, te ami bidi nogo si naga ma geasa asaibao.”
Tigidali nai tonalubo Genuai Bidigo agai te Israel dabe augwaligo kolesaga dodolaibao homu yai
(Dąį 5:4-15)
Te Israel dabe augwali Godiba ma begasa aselama, te augwa bidabo ula sao wai
4 Te Genuai Bidigo Israel dabeba te tiwai po obao, “Dage isidali weyu, tama bidimainogo eyu, dage enaba geasa asiąo.
5 Dage te gasa tǫ kantri taun Berseba iba pelama, lotu me wagi pelamuo. Dagego ena te Betelde gegebo sę me elamuo, magi baso meni, te taun da mu dolaibao. Dage te u taun Gilgalba pelama, lotu me olamuo, magi baso meni, te Gilgal we bidi augwali gudulama, te gasa buluba kalabus paibao,” wali.
6 Dage te Genuai Bidiba pobaso da, te dage isisąma iyu bidaibao. Tiali goli, te dage agaba pisąbaso da, teda aga te genuai isi tiwai asama, te dage Josep aga bulali hani ulaibao. Tama te isigo te Betel hanu bidi dabe daibao. Te bidi me deligo te isi sula sawainu ebaso, usu me egobeo. Dage te Genuai Bidiba piąo, tama dage peyu da, teda dagego te bidada peyu, bidada pabo ula saibao
Te dwai kolesaga ebo bidi dabe te augwali dolaibao
7 Ae, hobede ya, dage po tų ebo dolobo bage, me dage te doloba pai kolesaga aiyaba elalubo bidi dabe, te dage tigidali mu dolaibao.
Genuai Bidigo te tigidali sę yabo bomo elaluyu, tama te dwai kolesaga ebo we bidi dolabo bomo elalubo dao
(Amo 1:2; 4:13; 9:5-6)
8-9 Godigo te hǫ dabe pedalumainu ilama,
tama tigidali ula ebo nai ugwadu elalubao.
Agai te be huliali hasegeleyu, tama te be posobo dao,
te ula elalubo hasegeleyu, tama be hulibo dao.
Tama agai te tamu ąį asomainu i ola asama,
tama agai te tǫba ugwadu gea palagasaibao.
Agai te bomai bidi dabe me doliyu,
te augwa bomai be dabe me dolobo dao.
Godigo digi te tobage tigidali sę ebo dao,
tama aga nogi e tiwai elalubao, Genuai Bidi dao.
Amosgo Israel dabe augwaliba te augwaligo haniani dwai kolesaga ebo po walali
10 Te doloba pai bidi dabe augwali te po tųba sabalobo sogo, te mu po naga weyu, te dage dwai kolesaga ebo bidi dabeba wado po obaso da, teda dagego te doloba pai bidi dabe wei homu me ebo meni.
11 Me, dagego te magi nai meni yai bidi dabego nai sainu anoma eyu, te dagego augwaligo tubo nai wi sabo dao. Tama tiyu, dagego augwali agabo dao. Tama tibaso, dagego dwagi yai be dabe masigigo sę yani goli, dage te bede bidigobeo. Te dagego wiegi yai wain gi bulali goli, dagego te gi dabede wain ąį me tugobeo.
12 Magi baso meni. Dagego sęgę dabe dwai mu elalubo eno koneani, tama eno koneani, dagego sęgę hauwa mu elalubao. Dagego dwai sę te wiegi yai bidi dabeba ebao. Dagego te dobo sę ebo bidi dabego nogode te mone ge dabe sabo dao. Tama te po tų ebo si, te magi nai meni yai bidi dabego gasa bidi dabe aiyaba elaluidali weyu, dagego te po tų dolobo dao.
13 Te we bidi augwaligo te tobage dwai kolesaga ebo sogo, te kolesaga koneai bidi, doloba pai bidi, agai pedauwali pania sai elalu, te agai po me deli augwaliba me wagobeo.
Wiegi yai kolesaga naga wali peyu, te God dage dali bidaibao
14 Dagego ma geasama, te dwai kolesaga wali pabo tųdu pabo tagalao, tama dagego te wiegi yai kolesaga naga wali piąo Tibaso, te dage bugagia bidaibao. Dagego te tama po wabo dao, “God, Tigidali Bomo Elalubo Genuai Bidi, aga da dali bidibao,” wabo. Dagego te wiegi yai kolesaga ebaso da, teda mu tamao, te God dage dali mu bidagameo.
15 Dwai kolesaga ebo tudiba muao, te wiegi yai kolesaga naga godolo eyu, wali pao. Dagego doloba pai po tų naga yao. Te dagego tama tiyu da, te Genuai Bidigo dage dolisąwai dwasianu me bidibo Josepgo hani bage homu dene eyu, tau saibao.
Genuai Bidigo dene mabo sę Israel dabe augwaliba yaibao
(Dąį 5:16–9:15)
Te Israel augwa hobedai gela waibao
16-17 Tialima, dagego te dwai kolesaga ebaso, tialima eno Genuai Bidigo aga Tigidali Bomo Elalubo God, agai te tiwai po obao, “Eno dwai dene mabo sę dageba yagasaibao,” wali. “Tama tialima, augwaligo dagede taun sunumi dabede gela bomo elama, ela paibao. Te we bidi deliba sisinibo madide me, te we bidi augwali noma dwai mu siyu, gela udaibao, te taun dabe tomode. Tama me augwa te taun bulu badu bidalubo olo we bidi dabeba i weyu, te balia ebo mu konea pai bidi dabego te bidi isaide te homu dene elama, balia wabo tiwai tau sagasomainu yaibao, dagede. Me te wain gi dabede bidaluali bidi dabe wiegi yai homu pemene ebo tagalama, te augwa dwai gela mu waibao.” Genuai Bidigo te po obao.
Te lotu wabo kolesaga dabego te Israel dabe tau me sogobeo wai
18 Dage tigidaligo homugo te Genuai Bidigo Bodolu Side asesa pedalumainao homu ebao. Tiali goli, dage hobede mu ebao. Mena wiegi yai sę mu dageba te side pedelaibawe? Dagego homugo te be posobo si da homu eba, agawe? Mu menio. Te be hulialubo side naga dao.
19 Te si asobo, dage geda mugobeo. E tiwai yaibao. Te bidi me deli te dwai hasa laionde wi pabo tiwai elama, tama aga te laion hasa tagalama, wi pobadi, te gasa moni dwai hasa me nogi bea te aga deliba gesabidi si unulama, tama beago aga gąų kelainogo yali. Tama te bidi te hasa bea wi pelama, tama aga be tomoba wi peyu, sana pabo homu elama, bugagia bidaiba homu yai. Tama toma tumainogo, aga te be dagaba nogo tola sigi pabo tiwai yali, tiali goli, tegoba, te be dagade bidali dwai hasamanigo aga gąų kelai dao, tama te bidi isai dao.
20 Awe, te tiwai me, te Genuai Bidigo muani bodolu side te be posobo ula me dwasianu pedalugobeo. Mu menio. Te be hulia sabo genuai sę pedelaibao. Te Amosgo po wabo silalio.
21 Genuai Bidigo te tama po obao, “Eno dagego te genuai lotu wabo si dabede homu pemene isąma, te eno augwali homu godolo me egobe dao. Hagelabo homu mu ebao.
22 Dagego te isiba tigidali ulama dabo ofa yabo nai sesebaso, me wit me ofa ebo goli, te ofa denami ebo eno me odogobeo. Dagego te bulmakau dabeba nai madubaso, te augwali nisalio. Tama dagego te bulmakau dabe te enaba ofa tiwai eyu, buba hwi wainogo sesali goli, eno te ofa dabe me sula tagalaibao.
23 Dagego lotu wabo balia munu me elamuo. Tama dagego te gita dabe me eligio. Ena odobo hagela ebao.
24 Tialima, eno homugo dagego te po tų ebo kolesaga dolo naga eyu, te gasa wiegi yai doloba pai kolesaga dabe naga eyu, tama te kolesaga sesemane sogo mu elaludu, te me sula sisąbo genuai wę me deli elalubo tiwai elalubaso, usu dao,” wali.
25 “Dage Israel dabe, te kibu be bidi sese si, te 40 yia ena dage dali te masigi kemi tǫ bulu pesagede bilali sogo, eno dagebolo hanalu, enabolo dagego te haniani ofa yao po wai menio.
26-27 Tialima, megi da, dagego ena tagalalio, tama dagego duga digi te nigali dwai god dabe piksa noma siba lotu obao. Tama dagego te me deli nogi king Sakut nogi yali, te me deli te nogi Kaiwan nogi yai, te aga piksa noma te dagalu hǫ tiwai nigai. Tialima, te eno dage te gasa tǫ pedai kantri me deliba kalabus igi pomainu tagala palaibao, te Damaskus taun pedai u badu. Eno dage te buluba tagala palobo sogo, dagego te tibo god si tolasa paibao.” Genuai Bidi aga te tama po obao. Aga nogi da, e tiwai, Tigidali Bomo Elalubo God dao.