PƆLU 'LƐTRƐ 'LA ꞊KPAA RƆMU ‑WA 'Ɛ TA ZESU 'YI MU 'Ɛ NI
Romɛ mu a 'lɛtrɛ 'ɛ ŋgblo
‑Dele Pɔlu 'le ɛɛ? Pɔlu ‑yaa Zuufu mi do ‑la ‑le. ‑Wa ‑yaa Silisi 'klɛɛn 'yi ‑wa 'nɛ do 'la ‑o ‑yaa 'bhɛ sii Taasi 'bhɛɛ‑ ta. 'Duŋ‑ ‑e gbaandia‑ Zeruzalɛmu ‑wa 'ɛ 'bhɛɛ‑ ta, 'bhɛɛ‑ ‑e yaa ‑laklu 'ɛ 'kpɛn ꞊kla 'bhɛɛ‑ ꞊nɔɔ. ‑E ‑yaa Zuufu mu 'sinii ta za mu 'ɛ ‑vavaladɛ ‑asiikɔɔ ‑e ‑yrɛnkpaa 'ebebele Zesu 'yi mu 'ɛ ta. 'Bhɛɛ‑ 'duŋ‑, Zesu 'pwɛle‑ ‑a ba yi do 'le 'ke ‑yoo ge 'zi ‑yrɛnkpalɛ Damasi Zesu 'yi mu 'ɛ ta, 'bhɛɛ‑ 'ke ‑ya 'gbu 'nale 'bhɛ ni, 'bhɛɛ‑ ‑e ꞊kla Zesu 'yi mi 'le 'tɛ. ‑E ꞊kla 'bhɛ a winbɔwo mi 'le Zuufu kle mu 'ɛ ba.
'Yee‑ Pɔlu ‑le 'lɛtrɛ 'lɛɛ‑ ꞊kpaa Zesu 'yi mu ‑lɛdo' 'la 'yaa‑ Rɔmu ‑wa 'ɛ ta 'mu ni: 'Mu ‑bebe ‑yaa Zuufu kle mu 'le, 'bhɛɛ‑ 'mu 'ke mu ‑yaa Zuufu ‑kpɔsɔɔ mu 'le. Pɔlu 'yee‑ 'lɛtrɛ 'lɛɛ‑ ꞊dia 'waati 'ɛ 'la ba 'ke ‑yoo ‑Waanbhaa' a ‑Jan 'Nrale‑ wo 'taa yaga mi 'ɛ ta Korɛnti ‑wa 'ɛ ta, 'ke ‑yoo zan niinalɛ ‑a ‑zanta' Zeruzalɛmu, 'bhɛɛ‑ ‑e ge boolazi Rɔmu ‑wa 'ɛ ta 'tɛ.
‑Waanbhaa' mɛɛ go ‑za 'yi gɔnɛ‑ 'la gbɛɛn‑, Pɔlu ‑yaa ‑a zi 'bhii‑ ‑e 'bhɛ wlan 'ɛ pe kpataakpa Rɔmu ‑wa 'ɛ ta Zesu 'yi mu 'ɛ ni. 'Bhɛla‑ ‑zayile, 'sɛwɛ 'lɛɛ‑ 'yi ‑jan ŋgblo 'ɛ 'bhɛ ‑le dɔɔ: «‑Waanbhaa' a ‑Jan 'Nrale‑.» 'Bhɛ ‑Jan 'Nrale‑ 'ɛ 'yi ‑le dɔɔ 'ke mɛɛ 'oo mɛɛ 'la zan 'e ꞊kpaa Krisi 'yi, ‑e 'bhɛ zan klɛ mɛɛ ‑lɛdɔɔle 'le ‑Waanbhaa' ‑yrɛ 'yi 'bhɛ zan a 'kpaleya 'te ma ‑a ‑yi. (Romɛ 1.17). 'Bhɛ ya 'ɛ 'yi, Pɔlu ‑yaa' 'sɛwɛ 'ɛ 'yiciɛnna ‑lɛ yaga:
‑A ‑lɛ ꞊lwa mi 'ɛ 'yi (Romɛ 1-8), Pɔlu ‑o ‑we 'zi 'toŋ mu ‑klɔsikunza 'pegee 'kpaleya Krisi 'yi 'ɛ 'mu ‑za plɛ 'ɛ 'pleŋza‑ 'ɛ 'bhɛɛ‑ 'le. Wlan 'ɛ ni, bhaaplɛŋ mu 'la waa ‑o Zesu 'yi ‑za 'yɔɔ‑ 'ɛ gbɛblɔɔle ‑o 'mu 'kpɛn ta: Zuufu kle mu 'pegee Zuufu ‑kpɔsɔɔ mu. Bhaaplɛŋ mu 'kpɛn ‑o 'ke ‑za 'yɔɔ‑ klɛ mu 'le ‑Waanbhaa' ‑yrɛ 'yi. 'Bhɛla‑ ‑zayile, ‑Waanbhaa' a yran ‑gbɛnɛ 'wlɛnle‑ ‑o ‑o ma. 'Duŋ‑ bhaaplɛŋ laa sɔ gole‑ ‑za 'yi pɛ 'kedo‑ 'kpɔ ma, 'ke yaa 'e go ‑a 'kpaleya do ‑kplɛn 'kpɔ ‑la ba Krisi 'yi. Lii 'Weŋ 'ɛ 'bhɛ ‑le ‑kɔɔ' klɛ ‑Waanbhaa' ‑nɛ mu 'le, 'bhɛ ‑le bhɔ ‑kɔɔ' ba 'ezin‑, 'bhɛɛ‑ ‑kɔɔ' sɔ ‑Waanbhaa' ba bole ‑yrɛ ma ‑si 'la ‑daŋ' 'laa ‑o 'bhɛ ma 'bhɛ 'srɔɔwole.
‑A ‑lɛ plɛ mi 'ɛ 'yi (Romɛ 9-11), Pɔlu ‑o ‑we 'zi 'ke Izraɛli mu 'ɛ 'pegee Zesu 'yi mu 'ɛ 'pleŋza‑ 'ɛ 'bhɛɛ‑ 'le ‑Waanbhaa' 'gbu zru maza 'ɛ ma. Zesu 'yi mu 'ɛ ‑waa' 'kpaleya 'ɛ kli 'ɛ da Zuufu mu 'ɛ 'mu ‑la ba 'elwale 'pe. 'Duŋ‑ bhaaplɛŋ mu gole ‑za 'yi a pɛ zi 'ɛ ta, ‑Waanbhaa' 'woo‑ Zuufu mu 'ɛ ꞊twa ‑a nɔɔ‑ ye ‑sɔ, 'bhɛɛ‑ ‑e 'bhɛ zi 'ɛ 'liigwa‑ Zuufu kle mu 'ɛ ni 'pe. 'Bhɛɛ‑ 'duŋ‑, 'yee‑ ‑Waanbhaa' laa 'e ‑baŋgolɛ 'woo‑ Zuufu mu 'ɛ 'yi; 'bhɛɛ‑ ‑a 'gbu 'liiwli‑ 'ɛ ta, ‑o ‑za sɔ a ni, 'bhɛɛ‑ ‑yoo 'sii zii' 'taŋii. Yi do ta, ‑e ‑yaa' ‑lileya 'ɛ ‑zrɔnna bhaaplɛŋ ‑vin mu 'ɛ ni gɔnɛ‑ 'la gbɛɛn‑ Zesu 'srɔyi, 'woo‑ Zuufu mu 'ɛ nu 'bhɛ ‑lileya 'ɛ dɔlɛ, 'bhɛɛ‑ ‑e nu ‑o golɛ ‑za 'yi 'tɛ.
‑A ‑lɛ yaga mi 'ɛ 'yi (Romɛ 12-13), Pɔlu ‑o ‑we 'zi 'ke Zesu 'yi mu 'taawogbɛya 'ɛ 'eke‑ 'yi 'bhɛɛ‑ 'le. ‑E pe ‑o ni dɔɔ ‑o ‑za 'sɔ 'eke‑ ni, 'bhɛɛ‑ ‑o bo 'bhɛ klɛle ma 'taŋii.
‑A ‑lɛyanyrɛ 'ɛ ꞊nɔɔ (Romɛ 14-16), Pɔlu ‑o zan ‑za mu 'la klɛlɛ, ‑e 'mu 'yipia꞊, 'bhɛɛ‑ ‑e mɛɛ ‑bebe 'pubwa, 'bhɛ 'pegee ‑e Rɔmu Zesu 'yi mu 'ɛ ‑liala dɔɔ ‑o bo 'kpaledomaya 'ɛ 'yi 'eke‑ pleŋ‑.
1
Pɔlu ‑o Rɔmu Zesu 'yi mu 'ɛ 'pubɔ‑ 'zi
1 'Mi Pɔlu 'la 'mi ‑o Zesu Krisi a yewonɛ 'le bhe, 'mi 'gbu ‑le 'lɛtrɛ 'lɛɛ‑ 'kpa zii' 'ka ni, 'ka mu 'la 'ka ‑o Rɔmu. ‑Waanbhaa' 'ŋ 'siila‑ 'kaa 'ŋ klɛ Krisi a winbɔwo mi 'le, 'bhɛɛ‑ ‑ye 'ŋ ꞊kpaa 'edaŋma ‑yaa' ‑Jan 'Nrale‑ 'ɛ 'wole‑ 'kaama‑ mɛɛ mu ni.
2 ‑Waanbhaa' 'yee‑ ‑Jan 'Nrale‑ 'lɛɛ‑ 'naza‑ ꞊kpaa 'elwaleta ‑sɔ ‑a *'lɛla‑ janwo mu 'ɛ 'lii ‑yaa' 'Sɛwɛ 'weŋ 'ɛ 'yi.
3 ‑A Gbe, ‑kɔɔa' Mɛɛzan Zesu Krisi 'ɛ, 'bhɛ ‑la ba ‑Jan 'Nrale‑ ‑le 'kɛle‑. Bhaaplɛŋ a pɛ yale zi 'ɛ zi, 'bhɛ ‑o 'ke ‑bhleŋgbe Davidi 'nranɛ‑ 'le.
4 'Duŋ‑ Lii 'Weŋ 'ɛ a pɛ zi 'ɛ zi, 'bhɛ bwelawoa gale ba, ‑Waanbhaa' 'a ‑zrɔnna mɔkpɛn' ni 'bhii‑ 'yele‑ 'ke ‑a Gbe 'ɛ 'le, 'bhɛɛ‑ ‑glɔɔya' ‑o ‑a 'kɔɔ.
5 'Yee‑ ‑kɔɔa' Mɛɛzan Zesu Krisi 'srɔyi‑ 'bhɛɛ‑ ‑Waanbhaa' ꞊lia 'o ma, 'bhɛɛ‑ ‑yoo' ꞊kla ‑yaa' winbɔwo mu 'le; 'kooko‑ 'wa klɛ 'bhɛɛ‑ 'trɛ ta 'si mu 'ɛ 'kpɛn ‑o kpa 'yee‑ ‑Waanbhaa' 'yi, 'bhɛɛ‑ ‑o 'taawo‑ ‑a ‑liiwli' ta.
6 'Ka mu ‑o 'ezin‑ 'bhɛ mɛɛ mu 'ɛ 'ke mu 'le, 'ka mu 'la 'ka ‑o Rɔmu ‑wa 'ɛ ta, ‑Waanbhaa' 'ka 'siila‑ dɔɔ 'ka klɛ Zesu Krisi a pɛ mɛɛ mu 'le.
7 'Ka mu 'la 'kpɛn ‑o Rɔmu, 'bhɛɛ‑ 'ka mu 'la ‑za sɔ ‑Waanbhaa' ni, 'bhɛ 'pegee ‑e 'ka mu 'la 'siila‑ dɔɔ 'ka klɛ ‑yaa' pɛ mɛɛ mu 'le 'edaŋma 'ke 'ka klɛ 'weŋ. Bhaa 'yee‑ ‑kɔɔ' Dɛ ‑Waanbhaa' 'pegee Mɛɛzan Zesu Krisi ‑li 'ka ma 'bhɛɛ‑ ‑o yilabla na 'ka ni.
Pɔlu ‑o ‑a zi 'bhii‑ ‑e ge Rɔmu Zesu 'yi mu 'ɛ taglin‑
8 'Mi 'an ‑Waanbhaa' 'ɛ 'pubɔ‑ 'elwale 'pe, 'ka 'kpɛn a ‑za ma Zesu Krisi 'tɔ 'yi; ‑amasrɔyi 'ka 'ka 'kpalawoa Krisi 'yi mɔkpɛn' ‑o 'bhɛ ‑jan 'ɛ 'wo zii' 'drunyan 'ɛ 'yi yrɛkpɛn‑ ꞊nɔɔ.
9 'Mi ‑Waanbhaa' 'la gba 'ŋ 'nii‑ 'ɛ 'kpɛn 'le, 'ke 'an Gbe 'ɛ ma ‑Jan 'Nrale‑ 'ɛ wo mɛɛ mu 'ɛ ni, 'bhɛ ‑o 'ŋ 'srɛ 'le dɔɔ 'naa ploo 'ŋ 'kpeelɛdanle ma 'kaa‑ ‑za ma.
10 'Ke 'ŋ 'yoo‑ 'ŋ 'seriwo zii' 'waati 'oo 'waati 'la ba, 'mi 'ŋ 'seriwo 'kaa‑ ‑za ma. 'Mi bo ‑sromabɔle ma 'yee‑ ‑Waanbhaa' ni dɔɔ 'kee‑ ‑swa ‑a ni ‑ya klɛ 'ke 'ŋ sɔ gele‑ 'pwɛlɛ‑ 'ka ta ye.
11 ‑Amasrɔyi 'ka 'ye ‑lrɔ 'gbu ‑o 'ŋ ma 'eglɔɔle, 'bhɛɛ‑ 'kooko‑ 'ke ‑kɔɔ' 'eke‑ ꞊ya, Lii 'Weŋ 'ɛ ‑za 'wlan 'la ꞊kla 'ŋ ni bhe, 'ka sɔ 'bhɛ 'ke 'srɔɔwole, 'bhɛɛ‑ faŋgandɔ 'ka ta.
12 'Bhɛ 'yi ‑le dɔɔ 'ke ‑kɔɔ' 'eke‑ ‑ya, 'kpaleya do 'kpɔ 'la ‑yoo ‑kɔɔ' 'kpɛn 'yi, ‑kɔɔ' sɔ faŋgandɔle 'eke‑ ta 'bhɛ 'yi.
13 'Ŋ nɛɛnɛ‑ mu, 'mi ‑o ‑a zi 'bhii‑ 'kaa 'yaango‑ 'bhii‑ 'ŋ 'ka ba geza 'ɛ 'yidɔ‑ gbɛ ‑bebewoa gban; 'bhɛɛ‑ 'kee‑ nu 'tɛnlɛ‑ ‑zɔn ma, 'duŋ‑ ‑o 'bhɛ 'saawoa‑ 'ŋ 'kɔɔ. 'Ŋ 'yoo‑ ‑a zi 'bhii‑ 'ŋ ge 'ka ba ye, 'kooko‑ ‑trɔn kpa 'ŋ 'woye‑ 'ɛ ma 'ka ba ye 'bhii‑ ‑trɔn ꞊kpaa ‑a ma gɔnɛ‑ 'la gbɛɛn‑ 'si 'bhɛɛke mu 'ɛ ba.
14 ‑Amasrɔyi mɔkpɛn' a ca ‑o 'ŋ ma ‑Jan 'Nrale‑ 'ɛ 'wo zayi': ‑wa ‑gblaan ta mu oo, ‑bɔn 'yi mu oo, 'sɛwɛdɔ mu 'pegee 'sɛwɛdɔ kle mu, ‑o 'kpɛn a ca ‑o 'ŋ ma.
15 'Bhɛla‑ ‑zayile, 'ka mu 'la 'ka mu ‑o Rɔmu, ‑a ‑lrɔ ‑o 'ŋ ma 'bhii‑ 'ŋ ge ‑Jan 'Nrale‑ 'ɛ 'wo 'ka mu ni 'ezin‑.
‑Glɔɔya' 'la ‑yoo ‑Jan 'Nrale‑ 'ɛ 'yi
16 ‑Amasrɔyi, ‑Jan 'Nrale‑ 'ɛ 'wole‑ 'ɛ, 'bhɛ 'laa ‑yraladɔ 'mi ma. ‑Glɔɔya' ‑le 'kɛle‑ ‑Waanbhaa' 'kɔɔ 'ke mɛɛ 'oo mɛɛ 'la zan 'e ꞊kpaa ‑a ‑yi ‑e 'bhɛ zan go ‑za 'yi. 'Bhɛ goza 'ɛ ‑za 'yi, 'bhɛ san Zuufu mu 'ɛ ma 'elwale 'pe, 'bhɛɛ‑ 'bhɛ ge 'tɛnlɛ‑ 'si 'bhɛɛke mu 'ɛ ma boolazi.
17 Wlan 'ɛ ni, ‑Waanbhaa' bhaaplɛŋ ‑lɛdɔɔ' ‑a 'gbu 'yrɛ 'yi gɔnɛ‑ 'la gbɛɛn‑, 'yee‑ ‑Jan 'Nrale‑ 'ɛ 'yele‑ 'bhɛ zrɔn; 'kee‑ san ‑a zisanyrɛ 'ɛ ma, 'kee‑ nu 'tɛnlɛ‑ ‑a ‑lɛyanyrɛ 'ɛ ma, ‑e 'bhɛ klɛ 'kpaleya drɔŋ 'ɛ 'bhɛɛ‑ ma, 'bhii‑ ‑a yɔɔndɛle ‑o ‑Waanbhaa' a 'Sɛwɛ 'ɛ 'yi gɔnɛ‑ 'la gbɛɛn‑ dɔɔ: «Mɛɛ 'la zan ‑lɛdɔɔle ‑o ‑Waanbhaa' ‑yrɛ 'yi, 'bhɛ zan nu bole ‑yrɛ ma ‑si 'ɛ 'srɔɔwolɛ 'bhɛ 'kpaleya ‑la ma ‑Waanbhaa' ‑yi.»
‑ZA 'YƆƆ‑ GBƐBLƆƆLE ‑O BHAAPLƐŊ MU 'KPƐN TA
‑Waanbhaa' a ‑kpan baale ‑o 'drunyan 'yi bhaaplɛŋ mu 'ɛ 'kpɛn ta waa ‑za 'yɔɔ‑ klɛle ma
18 ‑Waanbhaa' nu bhaaplɛŋ mu 'ɛ 'kitikanlɛ yran ma gɔnɛ‑ 'la gbɛɛn‑ waa ‑za 'yɔɔ‑ mu 'ɛ 'kpɛn 'pegee ‑o klɛza ‑yɔɔ' mu 'ɛ 'kpɛn ma, ‑e 'bhɛ ‑zrɔnna ‑o ni 'kee‑ da laflɛ' ma. Waa ‑lɛdɔɔkleya 'ɛ ma, waa to 'ke bhaaplɛŋ ‑bhɛɛke' mu ‑Waanbhaa' a wlan 'ɛ dɔ.
19 'Bhɛɛ‑ 'duŋ‑, mɛɛ sɔ ‑za yɛkɛ‑ 'la dɔle‑ ‑Waanbhaa' ba zayi', 'bhɛ gaanle laa ‑o ma; ‑Waanbhaa' 'gbu 'bhɛ ‑zrɔnna ‑o ni kpataakpa.
20 Wlan 'ɛ ni, ‑a 'san 'ke ‑Waanbhaa' 'drunyan klɛ, ‑yaa' ‑Waanbhaaya 'ɛ, mɛɛ 'kedo‑ 'kpɔ laa sɔ 'bhɛ 'yele ‑a ‑yrɛbhɛ' 'le; 'duŋ‑ 'o 'bhɛ ye ‑a klɛza mu 'ɛ 'mu ‑la ma. ‑E 'drunyan ta pɛ mu 'kpɛn ꞊kla ‑yaa' ‑glɔɔya' 'la ‑daŋ' 'laa ‑o 'bhɛ ma 'bhɛɛ‑ 'le, 'bhɛ 'pegee ‑yaa' ‑Waanbhaaya 'ɛ ma. 'Bhɛɛ‑ ‑bhaaplɛŋ ‑yaa' ‑glɔɔya' 'pegee ‑yaa' ‑Waanbhaaya 'ɛ dɔ 'bhɛ pɛ mu 'ɛ 'mu ‑la ma. 'Bhɛla‑ ‑yile 'zoo 'laa ‑o ‑o zi.
Bhaaplɛŋ ‑lɛdɔɔle klɛ ‑Waanbhaa' ‑yrɛ 'yi 'kpaleya ‑la ma
21 ‑Amasrɔyi ‑o ‑Waanbhaa' dɔ, 'duŋ‑ waa 'tɔbhɔlɛ 'bhii‑ ‑Waanbhaa', 'bhɛ 'pegee ‑yaa' pɛ ‑o 'ke 'pubɔ‑ 'la 'le, waa 'bhɛ 'nalɛ‑ ‑a ni. 'Bhɛɛ‑ drɔɔn', ‑o 'truu‑ ma jan mu 'te ‑la dan ‑o 'kpee, 'bhɛɛ‑ ‑o 'kpeejan‑ mu 'ɛ 'lɛdɔɔle laa ‑o, 'bhɛɛ‑ ‑gblo 'kpale‑ ‑o zru mu 'ɛ 'yrɛ ta.
22 ‑Woo 'gbu kun 'bhii‑ ‑zadɔ' mu, 'bhɛɛ‑ 'duŋ‑ ‑o ŋgblo laa ‑o ta.
23 ‑Waanbhaa' 'tɔbhɔle 'la 'bhɛ 'laa ga ‑titi, 'sani‑ ‑o nu 'bhɛ gbalɛ, ‑o 'bhɛ ꞊twa ‑a nɔɔ‑, 'bhɛɛ‑ bhaaplɛŋ 'la 'bhɛ ‑o 'ke 'siɛpɛ‑ 'le, ‑o 'bhɛɛ‑ ‑yrinɛ' mu ‑gbaa, 'bhɛ 'pegee maannɛ‑ ‑yrinɛ' mu, 'bhɛɛ‑ wi mu 'la 'taawo‑ 'mu dɔpɛ yiziɛ ta, 'bhɛ 'pegee wi mu 'la 'taawo‑ 'mu vi ta, ‑o 'mu ‑la ma ‑yrinɛ' mu ‑gbaa; 'bhɛɛ‑ 'duŋ‑ 'nii‑ 'laa ‑o 'mu 'yi.
24 'Bhɛla‑ ‑zayile, 'bhɛɛ‑ ‑Waanbhaa' ‑o ꞊twa ‑o 'gbu ma, ‑waa' 'triŋdɔ‑ maza mu 'la ‑o 'gbu zrubhɔ 'mu ma 'mu 'yi. ‑Asiikɔɔ ‑woo 'gbu 'flɛ mu 'ɛ 'triŋdɔ‑ ‑yraladɔ ma ‑yanbhɔɔya klɛlele 'eke‑ ba.
25 'Woo‑ mu ‑o ‑Waanbhaa' a pɛ wlan 'ɛ maniinaa 'ke bhla 'le. 'Bhɛɛ‑ ‑Waanbhaa' klɛpɛ mu 'ɛ, ‑o 'mu ‑la gba, 'bhɛɛ‑ ‑o 'mu ‑klɔsikun. 'Bhɛɛ‑ 'duŋ‑, ‑o ‑Waanbhaa' 'la 'bhɛ pɛ 'kpɛn ꞊kla, 'bhɛ ꞊twa ‑a nɔɔ‑, 'bhɛɛ‑ 'ke 'bhɛ ‑o 'ke 'tɔbhɔpɛ 'le ‑yikpɛnsee ta bhe! Amiina.
26 'Bhɛla‑ ‑zayile, ‑Waanbhaa' ‑o ꞊twa ‑o 'gbu a ‑yraladɔ ma ‑yanbhɔɔya ‑za mu 'ɛ 'yi. ‑Amasrɔyi, ‑Waanbhaa' ‑za 'la ‑dulaa' bhaaplɛŋ dɔgbɛya 'ɛ ta, ‑o na mu 'ɛ 'mu 'bhɛ mabɔɔla 'ke 'mu ge yilale 'mu 'tanyɔɔn le mu 'le 'bhii‑ 'gwlaan‑ mu 'ɛ gbɛɛn‑.
27 'Bhɛ klɛgbɛya do 'kpɔ 'ɛ 'yi 'ezin‑ bhe, ‑waa' 'gwlaan‑ mu 'ɛ, 'mu 'gwlaan‑ mu 'pegee le mu yilale 'ɛ 'eke‑ ba 'ɛ ꞊twa ‑a nɔɔ‑, 'bhɛɛ‑ 'woo‑ 'gwlaan‑ mu 'gbansaan ‑la zrubhɔ 'eke‑ ma 'bhii‑ le ‑lrɔ dɔ gɔnɛ‑ 'la gbɛɛn‑ 'gwlaan‑ ma. 'Woo‑ 'gwlaan‑ mu 'ɛ ‑o ‑yraladɔ ma ‑za 'yɔɔ‑ mu klɛ 'eke‑ 'le. 'Bhɛ 'yi, ‑o nilawoa bhe, ‑o 'bhɛɛ‑ ma ‑sra 'srɔɔwo‑ ‑o 'krowolele ‑Waanbhaa' 'kɔɔ.
28 Waa dɔlawolɛ ‑a ‑la 'ke ‑o ‑Waanbhaa' dɔ, 'bhɛla‑ ‑yile, ‑Waanbhaa' ‑o ꞊twa ‑o 'gbu 'kpeejan‑ ‑yɔɔ' mu 'ɛ 'yi; 'kooko‑ ‑za 'la 'bhɛ ‑gaale' laa ‑o ba ‑o 'bhɛɛ‑ klɛ.
29 ‑O zru mu 'ɛ 'pale‑ ‑o 'ke ‑za 'yɔɔ‑ 'ɛ 'kpɛn ‑glɔɔn 'le: ‑lɛdɔɔkleya plaza 'ɛ 'kpɛn ‑glɔɔn oo, ‑yɔɔya' oo, ‑yrɛbhɔ' maza ‑bebe mu oo, yiɛnya oo, zran oo, mɛɛ dɛza oo, gwledan zru oo, ‑dawli' oo, 'kpeejan‑ ‑yɔɔ' mu oo, bhla 'kpale‑ mɛɛ ma oo;
30 ‑o mɛɛ 'tɔsiɛ‑, bhɛɛ‑ ‑Waanbhaa' vɛnsi ‑o yin 'lii, ‑yrala' laa dɔ ‑o ma ‑za 'yɔɔ‑ klɛ yrɛ nɔɔ‑; 'bhɛɛ‑ ‑woo baa ‑o 'gbu 'yi, 'bhɛ 'pegee ‑woo 'gbu magbaandɛ; ‑o sɔ ‑za 'yɔɔ‑ 'ɛ 'kpɛn ‑glɔɔn klɛle‑, 'bhɛɛ‑ ‑woo ‑kala' mu 'le ‑o yapɛ mu 'ɛ ma.
31 ‑O yikanle 'laa ‑o, 'bhɛɛ‑ 'ke ‑woo ‑liiwli' ‑naa mɛɛ ni ‑za 'la klɛ zayi', waa 'bhɛ 'lɛsɔ‑; ‑o zru ‑o 'eglɔɔle mɛɛ ma, 'bhɛɛ‑ waa mɛɛ ‑bhɛɛke' 'yrɛnkla‑.
32 ‑O 'gbu 'duŋ‑ ‑Waanbhaa' a 'kiti 'ɛ dɔ: ‑o 'gbu 'a 'yaango‑ 'bhii‑ 'ke mɛɛ 'oo mɛɛ 'la zan 'bhɛ ‑za 'yɔɔ‑ ‑glɔɔn mu 'ɛ ꞊kla, 'bhɛ zan ‑o 'ke dɛpɛ ‑la ‑le. 'Bhɛɛ‑ 'duŋ‑, ‑o bole ‑o 'bhɛ ‑za 'yɔɔ‑ ‑glɔɔn mu 'ɛ klɛle ma. 'Bhɛ trala 'ezin‑, mɛɛ 'la zan mu 'bhɛ 'yansi za mu 'ɛ klɛ, ‑o dɔ 'bhɛ zan mu ‑la zita.