4
Te pakenga kia Jesus
(Mark 1.12-13; Luke 4.1-13)
1 Ko Jesus na hutiaki e te Spirit Tapu ki te tugatea ke pake e Satan.
2 Mugi i tena he'e kai 'anga o katoa haka haa ona 'ao ma te katoa haka haa ona poo, ko Ia na ongea to'a.
3 Ko te 'atua pake noko a'u kia Jesus o hai atu, “Ko Koe nimaa te Hosa o God, gea atu ki na hatu nei ke haka haagiu ai ni utunga.”
4 Ko Jesus noko haka tau kinai o hai atu, “Na 'oti i te hai ake na Kanukanu Tapu:
‘Ko pegea e he'e manga maa'ugi i na utunga,
kae maa'ugi ma'u i ba'i kupu gea ai a te 'Aitu.’ ”
5 Ma te kakabe e Satan ia te Ia ki te manaha tapu i Jerusalem, o hai ia te Ia o tu'u i te kunga e hu'ai ma'u'agunga i te Hage Tapu,
6 o hai atu kinai, “Ko Koe nimaa te Hosa o God, 'utu atu ki gago, na'e na 'oti i te hai ake na Kanukanu Tapu:
‘E hai ke go kaunaki mai ona ensel, agatu'u ia te Koe,
e hai ma'u kigatou go nekeneke ia te Koe i ogatou gima,
ke go noka te tukia te ba'e o 'Ou ki he hatu.’ ”
7 Ma te haka tau a Jesus o hai atu, “Na Kanukanu Tapu e konei na hai ake ma'u:
‘Noka te tuku ia te 'Agiki te 'Aitu o 'ou ki te hai lobo.’ ”
8 Ma te haka kabe haka hoki e Satan 'ia Jesus ki te ogo hu'ai ma'u 'agunga, o haka kite kia te Ia na kakai 'anga o te kege nei ma ona gaoi 'anga.
9 Kae hai atu, “Na me'a nei ngatahi e hai kau go haiga'a 'ia kia te Koe, i te poi toko tugi Koe o sogi kia te au.”
10 Hai atu kinai a Jesus, “Hinatu 'aatea ia te Au, Satan. Na 'oti i te hai ake na Kanukanu Tapu:
‘Manga sogi atu kia te 'Agiki te 'Aitu o 'ou,
ma te manga hai hekau kia te Ia launatasi.’ ”
11 Ma te hano 'aatea a Satan ia Jesus, kae boo iho na ensel o 'aabaki kia te Ia.
Ko Jesus noko haka tu'u te tohi'aki
(Mark 1.14-15; Luke 4.14-15)
12 Te 'aso na gongo ai a Jesus ko John kua tuku 'ia ki te hage kagohia, ko Ia na hoki ki Galilee.
13 Ko Ia na he'e noho i Nazareth, ka na hano o manga noho i Capernaum, te manaha pata i te gano i Galilee, i na kunga henua o na hanohano o Zebulun ma Naphtali,
14 ke haka maa'ogi ai nia noko gea kinai te taauga ia Isaiah:
15 “Na kunga henua o na hanohano o Zebulun ma Naphtali
i te pa'asi ki tai i te bai mimigo i Jordan,
ko Galilee te kakai 'anga o na pegea 'aatea,
16 te 'apitanga manga noho 'aki i te poo'uginga
kua 'oti i te hiina'i ki te maagama hu'ai hua'eha;
ko na pegea manga noho 'aki
o maikia i te kai mamate,
kua hetae kinai te maagama.”
17 Haka tu'u i na 'aso na o hano, ko Jesus na haka tu'u tena tohi'aki:
“Koutou sui tegeu'a atu,
iteme'agaa te Hakahua 'anga a te 'Aitu kua hitaiaki.”
Te mataa haka pogo 'anga ona pegea haka ako
(Mark 1.16-20; Luke 5.1-11)
18 Ko Jesus noko manga sehu i na pa'asi o te gano i Galilee. Ko Ia noko ina ki te hai haanau: ia Simon noko mate ko Peter, ma te taina ia Andrew. Ko kigaaua noko manga hai bugho i te gano, iteme'agaa ko kigaaua gua taangata tautai.
19 Ma te hai atu kinai a Jesus, “Tata'o mai ia te Au, ka kau hai 'ia ia te kougua ke go tautai pegea.”
20 Ko kigaaua na ghali o ti'aki ogaua bugho, kae tata'o ia Jesus.
21 Nimaa boo soo atu kigatou, ko Jesus noko ina ma'u ki tegaa hai haanau: ia James ma John, gua hosa o Zebedee manga i te baka ma tegaaua tamana. Noko manga gosigosi ogatou bugho, ma te hakapogo e Jesus 'ia te kigaaua.
22 Ma te ghali kigaaua o ti'aki te baka ma tegaaua tamana, kae tata'o ia Jesus.
Ko Jesus noko haka ma'ugi masaki
(Luke 6.17-19)
23 Ko Jesus noko sehu i ba'i kakai 'anga i Galilee, o manga ako i na Hage hai paaunga, ma te 'atigongo i te Gongo Gaoi o te Hakahua 'anga a te 'Aitu, ma te haka ma'ugi na pegea e iai te mou hage o na sa'o saga ma te masaki.
24 Te gongo o'ona na hohoga i ba'i kunga i Syria, ka ko pegea na kakabe ake kia te Ia na pegea masasaki i te mou hage o te sa'o saga songo, ma na pegea manga higosia ma'u i te mou haka gongonga, na pegea eketia i te haagiki ma na pegea he ghotoi 'aki, ma na pegea mamate pa'asi tasi, ka noko haka ma'ugi ngatahi e Jesus.
25 Na hu'ai tu'u pegea mai Galilee ma Decapolis, ma Jerusalem ma Judea ma na kakai 'anga i tegaa pa'asi i Jordan, noko manga he'agumaki ia te ia.