82
Anutu iur kadoono pa zin peeze kan sananŋan mi zin aŋela sananŋan ta tipombolmbol zin
Mboe ki Asap
1 Anutu imender la lupŋana kini matan isu kar saamba,
mi ipamender zin merere pakan be iur kadoono pizin. Isombe:
2 “Niom tina, ŋiizi na kezem mbulu tiom sananŋana? Peeze ta kakamam, ina indeeŋe som.
Niom sombe kapamender zin tomtom be kitiiri sua kizin, na kalalae kizin wal sananŋan.
3 Niom tina kombot be koporoukaala zin wal ta len mburan biibi som na, mi zin moondo.
Mi niom bela kemender pa zin wal tau timbot ŋoobo mi zin wal ta len ulaaŋa sa som na, mi ku'uulu zin pa pataŋana kizin.
4 Mi zin wal ta len mburan biibi som, mi timbot ŋoobo ma tiru zalan na,
niom leyom uraata be motoyom pizin mi kakamke zin la wal sananŋan naman.
5 Tamen niom kakamam ta kembei som. Niom tina leyom ŋgar sa som.
Kawwa la zugut lene men.
Pa mbulu mi tutu boozomen ta ipombolmbol mbotŋana ambaiŋana isu toono, ta kapasaana ma isaana lup.
6 Ŋonoono, muŋgu aŋpaata yom be ‘anutu.’
Pa aŋsombe niom ta boozomen Anutu kor kana kat lutuunu bizin.
7 Tamen niom kozo ko kemetmeete raraate kembei ta zin tomtom toono kan.
Swoyom ko imap kembei ta zin bibip ki toono na, mi zoyom sa mini som.”
8 O Anutu, maŋga mi ur kadoono pizin wal sananŋan ta timbotmbot toono na.
Pa karkari ta boozomen ramaki toono kizin na, koroŋ ku men. Nu ta mborro zin.