127
Kampeŋana ki Merere ta ikam ma uraata kiti iur ŋonoono
Mboe kizin wal ta tizalla pa Yerusalem Mboe ki Salumo
1 Zin wal ta tiwwo ruumu na, sombe Yooba igaaba zin pa uraata kizin som, na tipunun sorok mburan pa ruumu tana.
Mi zin menderŋan ki kar biibi ta kembena. Sombe Yooba igaaba zin pa uraata kizin ma imenderkaala kar tana som, na tipamatmaata sorok.
2 Tana nu sombe pase pa Yooba som, mi kamam uraata pa berek ma ila mbeŋ na, nu punun sorok mburom.
Pa kampeŋana kini, ta ikamam ma tere uraata kiti iurur ŋonoono mi takamam kanda kini.
Tana zin wal ta Anutu leleene pizin na, kopon rru som, mi tikenne kat pa mbeŋ.
3 Mi lutundu bizin tomini. Yooba ipomosmoozo iti tomtom mi ikamam lende pikin.
Ina kampeŋana kini tau.
4 Tana naŋgaŋ kaibiim sa isombe ipeebe le pikin tomooto pakan,
nako leleene ambai. Pa zin ta ko timender pa urum.
5 Mi sombe tomtom sa ipeebe le pikin tomooto boozo, na ni ko leleene ambai kat pa kampeŋana tana.
Pa kaimer, sombe ziŋan ka koi bizin tiparzorzooro pa sua isu kar keteene, na lutuunu bizin tana ko timender pini mi tiuuli. Tana ka koi bizin ko tirao be tikoto i na som.