Jonde Quraŋ 2
Jonji Quraŋine ruame 2 fukeya.
Mimitaniŋ
Biŋe Quraŋ yoore rau iŋoji iŋoyoŋunde tina “Minebobo mo,” miya. Iŋoji quraŋ oi “Yoro ŋigo eru iŋore odumadepu,” yoŋore ruaya. Buŋo soŋsoŋine oi maŋkekerisie kufufuŋ more soso buŋo. Odumade oi kufufuŋ eko yoro ŋigo oi yoŋore siŋaŋ. Biŋe Qurande buŋo pompoŋine yoji manjoko naduŋgaduŋ enimiŋ ore maŋ bapakare nobeega eru qaqaji jijibuine yoŋoji ŋiŋigo qaji yarebi buŋoyaŋunji egu saueinde siŋaŋ bobo buŋo fukega.
Buk yoore mobe qoruine 4 oi iŋi:
Buŋo fuŋfuŋgaine 1-3
Manji jojoko oi ya qoruine 4-6
Buŋo kekesiineji egu saueinde siŋaŋbobo buŋo 7-11
Qurande buŋo koruŋ qoruine 12-13
1
1 O ŋigo sari, Anutuji roosoe guko maŋkekerisie kufufuŋpugo siŋaŋ yaberu dimage. Nonji ŋoŋo buŋo foriinere so maŋ wombuŋneji jojoko eŋareego. Nakekoŋ matayoŋ, ŋiŋigo buŋo foriine mane mukugobi, sosowo yoŋoji oŋuakoŋ ŋoŋo manji jojoko eŋareru gogobi. Nonji minebobo fukego eru goke buŋo mimane enimi ore wareru quraŋ quraŋgago.
2 Buŋo foriineji maŋnoŋuŋgo dimaku noŋuŋke tatariine tomiri pe ropeiŋ. Nonji Biŋe buŋo ore eru manji jojoko eŋarego.
3 Noŋuŋ buŋo foriine boyoberu manji jojoko naduŋgaduŋ eku gogobeneŋ ine, Mama Anutu eru Madeine Yesu Kristo yokoji ŋonemaiŋ eru yauŋmoriri norebire womoo goinebeneŋ.
Manji jojoko eru buŋo foriine oi moko boyobeinebi.
4 Mamaji manjokore mimiti buŋo noreya, ore so akoŋ gonde kufufuŋpugo goineji buŋo foriinere so eeboboyaŋuŋ eba eku gogobi. Nonji mosiyaŋuŋ oŋuine ŋonebe jeribari soguine enareega. Oŋu.
5 O yoro ogone ŋigo soguine, damaŋ yoo mimiti buŋo quraŋga garego, oi buŋo gariine mata. Buŋo fuŋfuŋgaineone fuŋgaru maneru wapebeŋ, nonji buŋo oi moke quraŋgaru iŋi mitiga garego: Noŋuŋ maŋnoŋunji jojoko naduŋgaduŋ eku goinebeneŋ.
6 Manji jojoko naduŋgaduŋ eku gokiminde buŋo migo, ore foriine oi iŋi: Noŋuŋ Anuture mimipaŋ buŋo sosowo reŋgaru eebobonoŋuŋ eba eku goinebeneŋ. Sosowo ŋoŋoji mimipaŋ buŋo fuŋfuŋgaineone maneru go wapebuŋ, oi iŋi: Ŋoŋo maŋ-ŋaŋunji manjoko naduŋgaduŋ eku goinebi.
7 Sinefuru ŋiŋigoji Yesu Kristore iŋi mi bofukeegobi: “Munaŋqoqo Rauineji moreŋ ŋi saki fuineke fukeiŋgo embimbiŋgaya.” Oŋu mi bofukeru eadu ebi bojiqojibu fukeega. Sinefuru ŋiŋigo oŋuine oi Kristore tifego dimaku kiso eteegobi. Ŋiŋigo oŋuine kokoineji moreŋine moreŋine roregaru kosa ra wareru gogobi.
8 Niŋoji mande gio babeneŋ foriine maŋ-ŋaŋuŋgo fukeya, oiji jibugaru egu jaŋgaru mataeiŋgo manego. Ore eru sinefuru ŋiŋigoji bojiqojibu egu eŋarenimiŋ ore sisiŋaŋ ee eku goinebi. Oŋu gobi maŋ-ŋaŋunde foriji so jibugako Ofonji furiŋaŋuŋ sosowo ŋare foreiŋ.
9 Kristoji buŋo qaji noreya, moji oi so qakatogayoŋ, oi odureru buŋo jikigako bojiqojibu miega, iŋoji Anutu tomiri mo goga. Uri yoŋoji Kristore Biŋe buŋoo qakatogobi, yoŋoji Mama eru Made yokoke sanaŋgaru gogobi.
10 Moji Biŋe buŋo jumuine oi so roru ŋoŋoreo warega, ŋoŋo iŋore mijeri so miku piŋaŋuŋgo so keporebi ropeine.
11 Moji iŋore mijeri miiŋ, iŋoji sembeneinere yobiŋke poregame paiineo ropeko sogokoŋ kukuganimi. Oŋu.
Buŋo tatariine
12 Nonji ŋoŋore buŋo boakoŋ quraŋgabeminde aŋi manegoyoŋ, oi papia rekaineo iŋkji quraŋgabemiŋgo so maneru bokego. Ŋoŋoreo iqi wareru jiŋo mai ŋaberu buŋo mi manekimiŋ ore odigaru oori ego. Qoturekimiŋ, damaŋ oo aŋibaŋi ŋeku mimane eku jerinoŋuŋ fuke foreru maŋnoŋuŋ puseko gokimiŋ ore manego.
13 Anutuji ŋigo ogogo siŋaŋ giore roosoeya, ŋigo sari iŋore kufufuŋpuji momojoyaŋuŋ ruabi goreo foga. Oŋu.