Jonde Quraŋ 1
Jonji Quraŋ fuŋfuŋgaine ruaya.
Mimitaniŋ
Jonji manji jojoko naduŋgadunde buŋo oi sanaŋgaru miku goya. Maŋkekerisie ŋiŋigo noŋuŋ Anutu eru Yesu Kristo yokoke qakatoru dimaku maŋnoŋuŋ kikipe eku moakoŋ fukeru gogobeneŋ.
Goineji buŋo ikoine oi ŋiŋigo iŋi qaji yareru gobuŋ: “Yesuji Sombuŋ ŋi akoŋ fukega. Moreŋgo ya sosowo oi sembene fukega. Ore eru Yesuji moreŋ ŋi foriine so fukeru goya.” Buŋo ore eru goineji “Anutu manesiŋ gagobeneŋ,” miku eebobo fiine bokeru jijibu keoma goku ŋiŋigo goine kakane rosi eyarebi eru qouma rembeŋine gobuŋ. Buŋo rerekaine oŋuineji zioz egu bosembeaiŋ ore Jonji kajeqouŋ buŋoine quraŋgo iŋi quraŋgaru ruame wareya, “Yesuji Sombuŋ eru moreŋ ŋi moko akoŋ fukega. Moreŋgo gio bobo eru mamane roro oi ya sembene mata. Ore eru ‘Anutu manesiŋ gagobeneŋ,’ miku Madeine Yesu so bokekimiŋ eru ogopunoŋuŋ yoŋoke maŋnoŋunji jojoko naduŋgaduŋ eyareinebeneŋ. Manji jojoko oi yameŋ keku naduŋgaduŋ eeinebeneŋ.”
Quraŋ yoore mobe qoruine 6 oi iŋi:
Gogore fuŋne oi Yesu 1.1-4
Tatama eru qisiri maŋineo gogo 1.5–2.29
Anuture eru Satande odumade 3.1-24
Moro me gemo oi fuŋneyakuŋ osoeru maneinebi. 4.1-6
Manjokore fuŋne eru mimiti 4.7-21
Mamanesiŋ noŋuŋ sembene gbiŋ eekimiŋ 5.1-21
1
Gogo sanaŋinere buŋo oi Yesu Kristo
1 Nonji gogo sanaŋinere buŋo miiŋ ore quraŋ yo quraŋgago. Ronekoŋ gogore buŋo Rauji goko jiki yareya sosowo fukeya. Iŋoji go waperu moreŋgo wakiko oi jiŋonoŋunji ŋoneru menoŋunji sakiine bouabeneŋ buŋoine miko maneru gobeŋ.
2 Seŋgiŋbaŋgiŋ gogore Rauji fukeko niŋoji oi ŋoneru fuŋine kitiŋgaku miku munaŋ moge oŋuine dimagobeneŋ. Gogo tatariine tomiri ore Rauineji Mamaineke go waperu wakiru fuke noreya, niŋoji iŋore Biŋe buŋo mitaniŋgaru maŋ-ŋaŋuŋ romaeŋgaegobeneŋ.
3 Niŋoji Mamanoŋuŋ eru Madeine Yesu Kristo yokoke maŋnoŋuŋ kiperu moakoŋ fukeru gogobeneŋ. Ŋoŋo oŋuakoŋ maŋ-ŋaŋuŋ niŋoke kiperu moakoŋ gokimiŋ ore maneru ya ŋoneru manebeŋ, oi mitaniŋga ŋareegobeneŋ.
4 Jeribariji maŋnoŋuŋ puseko gokimiŋ ore buŋo yo ogopuneke mitaniŋgaru quraŋgagobeneŋ. Oŋu.
Ofoŋ tatamaineo uruŋu gokimiŋ
5 Biŋe buŋo iŋore Madeone maneru mitaniŋga ŋaregobeneŋ, oi iŋi: Anutuji tatamare Rau fukega eru iŋoreo qisiri mo so pega.
6 “Niŋoji iŋoke maŋnoŋuŋ kiperu moakoŋ gogobeneŋ,” oŋu miji miku jibu eebobonoŋunji roqowareqo eku qisirigo gogobeneŋ ine, buŋo ikoine miku eebobonoŋunji buŋo foriine so boyobeegobeneŋ.
7 Anutuji tatamainere maŋgo gokame niŋoji ore so eebobonoŋuŋ tatamainere maŋgo eegobeneŋ ine, botunoŋuŋgo maŋnoŋuŋ kikipe eku moakoŋ gobeneŋ Madeine Yesu Kristore dariji agiburaŋnoŋuŋ sosowo jureega.
8 “Maŋnoŋunji agiburaŋ so pega,” oŋu minobeŋ ine, noŋuŋ eadu ee ebeneŋ buŋo foriineji maŋnoŋuŋgo so dimaga. Mata!
9 Agiburaŋnoŋuŋ mifukegobeneŋ ine, iŋoji maŋine poretinde so jojofo buŋoine damaŋ so boyoberu agiburaŋnoŋuŋ bokeru eebobonoŋuŋ kekesiine sosowo jureega.
10 “Agiburaŋ so ebeneŋ,” oŋu mikimiŋ ine, buŋo Rauine odurebeneŋ Anutuji iko mimi ŋi oŋuine fukeko buŋoine maŋnoŋuŋgo so dimaga. Oŋu.