61
Mu zola kuvwanda bantangu nyonso na Yinzo ya nge
1 Mukunga ya Davidi. Mukunga yina ba twadisaka na mfumu ya miyimbidi, ba ke yimbilaka yawu na muningu ya nsambi.
2 Nzambi, kuwa kulooka ya munu,
kuwa mbote lusambulu ya munu!
3 Katuka na bandilu ya ntoto,
mu ke na kusambila nge na ntima ya kulemba.
Twadisa munu na ditadi ya nene yina me lutila kuzangama na munu.
4 Samu ti nge kele kiswamunu ya munu,
yinzo ya mutela ya yinda ya lukengolo na mantwala ya bambeni.
5 Mu zola kuzinga bantangu nyonso na Yinzo ya nge ya lele,
mu kuzwa kiswamunu na yisi ya mapapu ya nge.
Kupema
6 Ya tsyelika, Nzambi, nge ke kuwaka balukanu ya munu.
Nge me pesa mvwilu ya nge na bayina ke zitisaka Nkumbu ya nge.
7 Bwela bilumbu na luzingu ya ntinu,
bamvula ya yandi kubwelama bambandu na bambandu.
8 Yandi vwanda na kiti ya kintinu bantangu nyonso na ntadisi ya Nzambi.
Sala ti kukwikama ya nge na luzolo ya nge kukeba yandi.
9 Na yina, mu ke yimbila nge bantangu nyonso,
mu ke lungisa balukanu ya munu ya konso kilumbu.