11
Jesus apel John jounpoapdaij
(Luke 7:18-35)
1 Anjoauwo ma Jesus ne doari Ah kioang kaweiddok oang Nah sohnpadahk eijek roahmenno, Ih inla jang o pwa Ih en padahk apel kapahrak nehn arai koaujoan kan.
2 John jounpoapdaij, mine nehn kalpwuhj, rongda pwa da Christ wihwia, kadarla nah sohnpadahkkok ipen Jesus, kalelpoak.
3 “Koah oar ma John jounpoapdaij ma pirin indoa, ke kamain pel kajkajik emen sohrohr?”
4 Jesus japoang, “Pwurla pwehng John da ma kamwai rong apel kapang:
5 Majkun kan kapangda wija, mwoasor kan alu, irai kan ma anki lepa mwehula, pongpong kan rongda wija, mehdi kan mourda, Rongmwahu ne pel kalohk oang armaj joamwoahmwoa kan.
6 Meid pai emen ma johpwa pwurjang Ngoahi.”
7 Anjoauwo ma nihn John sohnpadahkkok pwurpwurla, Jesus sapda siksikoahng pokonno doahr John: “Da kamwai inlahki nehn japwsoahn ipen John pwa kamwai en kapang? Alek pas ma kin jahjahjahkki enngo?
8 Da kamwai inlahng kapang? Armaj men ma kapwasda inenin mwehu? Irai ma kin kapwasda mwehu kin mine nehn soahnpaj in nahmwarki kan.
9 Doari da kamwai inlahng kapang? Joukohp men? Eh mehlel, kamwai en kapang pwa ih laplap jang joukohp men.
10 John ioar ma puk joaroawi pwa: ‘Koahs pwa, Ngoah pirin kadarwe Noai jounpakairro mwohn koawoa, ma pirin koaunopda allo mwohn koawoa.’
11 Ngoah pwehng kamwai in mehlel: Johpwa armaj men ma mour nehn jampah laplap jang John jounpoapdaij; a ih ma keiou siksik nehn Wein nehnloannge laplapjang John.
12 Jang nehn rehn kan ma John kapkapahrak leldo apkas, Wein nehnloannge apwalkihda mwoakid inenin nauna pwi, apel iraihok ma wia mwoakid pwiai jong en koldi.
13 Mwohn John jounpoapdaij, Joukohp kan ohroj apel kojonned en Moses sikoa doahr Wein Nehnloannge.
14 A ma kamwai nimen kamehlele, John ioar Elijah ma kokohppok sikoa ma pirin indoa.
15 Armaj men ma mine sioa, a ih en rong!
16 “Da Ngoah kak karjahkihoang armaj en rehn pwiai? Irai doahroar jerihkan mwindi nehn market kan poangpoanglahng epwi:
17 ‘Kamai koajkoajoang in malau oang kamwai, a kamwai johpwa nimen kahlek; kamai koaulki koaul en mehdi, a kamwai johpwa nimen joang!’
18 John indoa, ih kaijihjol apel johpwa nim wain, a armaj ohroj pwa, ‘Ih dirkihla ngen jaus.’
19 Anjoauwo ma Nihn-Armaj indoa, Ih mwinge apel nimnim, armaj ohroj pwa, ‘Kapang woal menen! Ih mijen mwinge apel sohn nim jakau men, Ih pirienki jounrik daksis apel armaj jekenken kan!’ En Koahs loalkoang kadehdehda ah wihwia pwung kan.”
Apwal oang Kamwai, Kahnihmw riau ma joah Wikla
(Luke 10:13-15)
20 Doar Jesus sapda kajalehda Ah japwungki koaujoannok ma Ih wiahda loapdirin Ah manmannok, pwa sowoahk johpwa koaluhla apel wiliakapwla.
21 Ih pwehng irai, “Ia woahr nauna oang koawoa Chorazin! Pel ia woahr nauna oang koawoa Bethsaida! Pwa ma manmannok ma ne wiawihoang kamwa, wiawihoang Tyre apel Sidon, ira ne likkoaukihda likkoaun injinjuwed pel kamwroahdihoang moalkoahr pohra, pwa en kajalehda ira ne koaluhla apel wiliakapwla oh mehj.
22 A Ngoah pwehng kamwa, Ngoah nimen kamwahn kidal, pwa nehn rehnin kadeikko Koahs pirin kajalehda Ah kalahngan oang sohn Tyre pel Sidon koalik jang kamwa.
23 A oang koawoa, Capernaum, koah nimen pwoakdahlahng koawoa nehnloannge? Koah pirin kerpwihekdihla nehn ehl! Pwa manmannok ma ne wiawihoang koawoa, wiawihoang sohn Sodom, irai nen minehr lel rehnnoauwe.
24 Ah koah en kidal pwa rehnin kadeikko, Koahs nen kajalehda Ah kalahngan oang Sodom koalik jang oang koah!”
Koammoal oang armaj pwunod
(Luke 10:21,22)
25 Anjoauwo Jesus pwa, “Joamoai, Koaun in nehnloannge apel jampah! Ngoah kalahnganki oang koawoa, oamw kajalehioang irai ma joaloalkoang kan dahkij ma Koah oakihjang irai ma loalkoang apel koahiok.
26 Maing Joamoai, ioar me ma Koah kupwurki en wiawi.
27 “Joamoai ne kioang Ngoahi me ohroj. Johpwa emen kidal Nahu likin Jamahu, pel johpwa emen kidal Jamahu likin Nahu apel irai kan ma Ih pilda en kajalehioang.
28 “Kamwai indoa ipoai, kamwai ohroj ma koakoahkla apel soausoaukihla amwai wijik kan; Ngoah en kakoammoalihla kamwai.
29 Kamwai oaloa aproahda Oai mihn wijikke, apel sukuhl jang Ngoahi, pwa Ngoahi ma aksiksik apel nehn kapehd karkarahk, kamwai nen oaloahdi koammoal nehn ngenimwaikan.
30 Pwa Oai mihn wijikke moangoai apel Oai kasoausoau marahra.”