Kijilikoau Jang Jude
Jude
Oarlap
Kijilikoau jang Jude ne insingdi pwa en kalke jang joauloang kan jounpadahk likamw kan ma kin sikoa pwa irai pwojon Christ. Nehn kijilikoau mwosmwos oauwe, ma audoapoa enkennoar doahroar nihn Peter kijilikoau kariauwo, Jude kangoangehki irai kan ma pirin wadek, irai en “en peiki pwojonno ma Koahs kioang Nah armaj kan pehn oauwoar doari.”
Audoapoan Kijilikoau
Sapin kijilikoau 1-2
Wihwia, padpadahk, apel imwla nauna oang irai jounpadahk likamw kan 3-16
Kangoang sihkei en kolkol pwojonno 17-23
Kapkap in kapai 24-25
1
1 Jang Jude lidu in Jesus Christ apel rien James —
Oang irai kan ma Koahs ne pangin, ma mohmour nehn limpoak in Koahs Jahm apel jilajil in Jesus Christ:
2 Mahk, popohl apel limpoak en kadirihla kamwai.
Jounpadahk Likamw kan
3 Oai pirien kan! ngoah jongjong in wia uhwen oai kak ohroj en insingkihwehng kamwai koamoaurro ma ngoahi apel kamwai ankihpene, a ngoahi ken poahmda anahn in oai en insingwe anjoau karwaro pwa ngoahi en kangoange kamwai en peiki pwojonno ma Koahs kioang Nah armaj kan pehn oauwoar doari.
4 Pwa epwi armaj ma joah pwojon Koahs ne dildo in rir nehn pwungasaikai nehn joh emen soahk, irai armaj pwi ma kapingihda padahk in kalahngan in asai Koahs pwa en doaroa arai siahk nauna kan, apel irai armaj pwi ma kin joik Jesus Christ, ma ioarroar asai Joumaj apel Koaun. Mehjwa, Puk Joaroawi ne kohpda kadeikko irai ne oaloahdi.
5 Pwa mihndahr ma kamwai kidal joang pwiai ohroj, ngoahi nimen kasmankihoang kamwai mwomwen en Koaunno pak oau kapisla mihn Israel‑ok jang Egypt, a mwuhr kamwomwla iraihok ma johpwa pwojon.
6 Kamwai samanda sohnloanngok ma johpwa minminehioar nehn uhdahn dohiarai pwunngo, a kerpwihla pein arai wijahn koaujoanno: irai ioar ne joalkihdi jihn pahrang poaspoas nehn wija ros mojullo pehn jampah, wijahu ma Koahs kolkol irai oang Rehn Laplappo ma irai pirin kadeik.
7 Saman Sodom apel Gomorrah, apel kahnihmmwok ma koaroannoang ipara, ma sowoahkan ne wia doahroar da sohnloanngok ne wiahda; irai ne mweidla irai oang siahk in nenek apel siahk jamin: Irai ne wiahla kilel janjal oau oang irai, ma loklokki koaloklok in oai joahsuk.
8 Pel doahroar, joangoan armaj pwiai anki kaudiahl ma wiahng irai en kajaminihkihla palwoaroarai ki irai dihp; irai lioassoang en Koahs manman apel koauwe lingin irai kan ma mine nehnloannge.
9 Sohnloang laplappo, Michael, pel johpwa wia joanngoauwe. Nehn ah akmai oang Jehsen, anjoauwo ira akpwungki palwoaroan Moses, Michael kalke jang ih en kadeiki Jehsen ki lal in koauwehk, a ih pwa, “Koaunno en kadeiki koawoa!”
10 A armaj pwiai pallan joang ohroj irai johpwa woahwoahki, irai doadoahkki lal in koauwe; apel mehpwiok ma irai kidal jangin pein arai poapoahm doahroar mahn ingkel, ioar mehpwiai ma koauwehla irai.
11 Ia woahr nauna oang irai! Irai ne pwilihla Cain wud nehn allo ih wud loaloa. In oadoan mwani, irai ne kioang pein irai oang japwunngo ma Balaam wiahda. Irai pallan doahroar en Korah pallanda koajoandi, a doari, doahroar ih, irai kamwomwla.
12 Nehn arai johkin mehk in jakjakau, irai ioar doahroar mwei pwirejrej pwi nehn amwai kamdipw in limpoak kan. Irai kin injinohkihoar pein irai. Irai doahroar koasoau ma eng kin pohkjili apwen joh wud mwoardihjang. Irai ioar doahroar suhkoa ma johkin uhwa mihndahr nehn anjoau in roak, suhkoa kai ma ne wijwijda koalohrai apel ioar ne mehdi douluhl.
13 Irai ioar doahroar no sihkei in nehn madau, ma arai siahk kamehk kan kin pwokdo doahroar pwuroar. Irai ioar doahroar ujuhkan ma kin moahljili, ma Koahs ne kasohrohrihla dohiarai poaspoas oau nehn wijahu ma keiou ros mojul.
14 Kadaudok kaijuh inendi jang Adam ioar Enoch ma ne kohpda oh mehj doahroar armaj pwiai: “Koaunno pirin indoa pasoahng Nah sohnloang joaroawi kid dir pwi
15 en kioang kadeik pohn ohroj jang in siahk in joah pwojon kan irai ne kin wiahda, apel oang lal nauna ohroj ma irai ma joah pwojonnok ne sikoa uhwoangki Ih!”
16 Irai armaj pwiai ioar kin anjoau ohroj lipahned apel karaun epwi armaj sohrohr; irai kin kapwaihahda pein arai inoang nauna kan; irai kin lehmwsikki pein irai apel kapinga epwi sohrohr pwa irai oaloahdi da irai mwehuki.
Kangoang apel Kaweid kan
17 A rioai kan, samsaman padahk kan ma nihn asai Koaun Jesus Christ wahnpoaroan kan ne pwehng kamwai mwowoa.
18 Irai pwehng kamwai “Anjoauwo ma imwlahn anjoau indoa, armaj pirin pwokda ma pirin kapiski kamwai, irai ma ken kapwaihahda pein arai inoang ma uhwoang Koahs.”
19 Ioar irai armaj pwiai ma wiahda jaminmin, irai ne koaunkihda inoang in ahnpen armaj, ma johpwa anki Ngenno.
20 A kamwai, oai pirien kan, kakloakihla amwai pwojon keiou joarwiho. Kapkap nehn manman in Ngen Joarwiho,
21 apel pein kamwai en mine nehn limpoak in Koahs, nehn amwai joujowi asai Koaun Jesus Christ pwa nehn Ah mahk, en kioang kamwai mour poaspoas.
22 Kamwai kadekkoang irai kan ma kin peikajal.
23 doaroahla epwi nehn amwai doapwoahjang irai nehn oai; apel oang epwi sohrohr kajalehda mahk doaloahki mijik, a lioassoang arai likkoau kan, ma ne jaminkihla pein arai inoang juwed kan.
Kapkap in Kaping
24 Oang Ih ma ioar kak en kolkol kamwai jang kipla apel wahdo amwai mwakelkel apel peren mwohn Ih ma ling —
25 oang Ih ma ioarroar Koahs asai Jounkoamoaur, ki oadoan Jesus Christ asai Koaun, klohri, wahu, rojon apel manman, jang di ohroj mehj, apkas, apel allaluhla oaroain! Amen.