17
Umubhembu ʉmʉpɨtɨ nɨ shɨkhanʉ ishishamamu
1 Pe ʉmo mʉ bhaala abhakhabhɨzya saba bhe bháamɨle ni mbakuuli saba akhambʉʉzya akhatɨ, “Nzaaga, ɨntɨkʉlanje ulufundo lwe lʉkhayɨmwaga umubhembu ʉmʉpɨtɨ, we ayɨkhaaye pamwanya pa minzi aminji.
2 Abhamwene abhɨ nsɨ bhabhembushile nawo na bhe bhakwɨkhala mʉ nsɨ bhakholiilwe idivaayi inhali ɨya wubhembu waakwe.”
3 Pe uMupepu wa Mʉlʉngʉ akhaniishila, ʉkhabhɨzya akhandongola, akhantwala mu shilozu. Kʉnʉʉkwo ɨnhamʉlola ʉmwantanda apandile pa shɨkhanʉ ishishamamu. Ɨshɨkhanʉ shɨnɨɨsho shásimbiilwe kwonti amataawa aga kʉmʉshoolanya ʉMʉlʉngʉ, sháamɨle na matwe saba nɨ mpembe ishumi.
4 Ʉmwantanda wʉnʉʉyo ákwatile amenda amashamamizu na mashamamu. Áyibhingulanyiinye ni zahaabu, amawe agɨ nhela ɨmpɨtɨ ni luulu. Kʉ nyoobhe yaakwe álemile ɨshɨkoopa ishi zahaabu she shizuuye ɨzya kuviisya nɨ zya wubhiibhi zye zɨkʉlolesya uwubhembu waakwe.
5 Pa monji ɨya pamiiso yaakwe asimbiilwe ɨtaawa ɨlya kukwilu ɨlya kʉtɨ,
“UBABEELI ɄMɄPƗTƗ,
UNYINA WA BHABHEMBU
NɄ WƗ MBOMBO ZYE ZIKUVIISYA ƗZYA MɄ NSƗ.”
6 Ɨnhalola ʉmwantanda wʉnʉʉyo akholiilwe amabhanda ga bhafinjile bha Mʉlʉngʉ, kwe kʉtɨ amabhanda ga bhantʉ bhe bhakhafumwaga uwukeeti kʉ zya Yeesu. We namʉlola, inhaswiga nhaani.
7 Ɨleelo ʉkhabhɨzya akhambʉʉzya akhatɨ, “Khooni khe ukuswiga? Ɨne ɨntɨkʉbhʉʉzye ɨzya kukwilu ɨzya mwantanda wʉnʉʉyo nɨ shɨkhanʉ shɨnɨɨsho she apandile she shɨlɨ na matwe saba nɨ mpembe ishumi.
8 Ɨshɨkhanʉ shɨnɨɨsho she washɨlola shaamɨle shɨpʉʉma ɨleelo ishi shaafwa. Shitifume mu lyina itali ɨlya khiisi, ɨleelo ʉMʉlʉngʉ atɨshɨyazye. Bhe bhakwɨkhala mʉ nsɨ bhatiswije. Nalyoli abhantʉ bhonti bhe amataawa gaabho gatásimbiilwe mu shitaabu ɨsha wuumi kufuma akhabhalɨlo khe ʉlwalo ʉlwɨ nsɨ lwábhishiilwe, bhatiswije. Bhatiswije we bhashɨlola ɨshɨkhanʉ shɨnɨɨsho she kʉwandɨlo sháamɨle shɨpʉʉma, pe shɨkhafwa, ɨleelo shɨtɨzyʉshe!
9 “Ishi yɨkwanzɨwa ɨnjeele! Amatwe saba ganaago, magamba saba ge ʉmwantanda wʉnʉʉyo akwɨkhalɨla. Khabhɨlɨ, amatwe ganaago bhamwene saba.
10 Mʉ bhamwene bhanaabho saba, bhasaanʉ bhafuuye, weeka akʉjendeelela kʉtabhaala nu wunji ʉla ashɨɨlɨ kʉtabhaala. Ɨleelo we ayanda akhayɨtabhaala kʉ khabhalɨlo khashe.
11 Ɨshɨkhanʉ ishishamamu shɨnɨɨsho she sháamɨle shɨpʉʉma, ɨleelo akhabhalɨlo ɨkha shifuuye, ɨsheene wʉ mwene ʉwa naane, shɨlɨ peeka mʉ bhaala saba, khabhɨlɨ shoope ʉMʉlʉngʉ atɨshɨyazye.
12 Ɨmpembe ziila ishumi zye wazɨlola, bha bhamwene bhe bhashɨɨlɨ kwanda kʉtabhaala. Ɨleelo bhakhapeelwa ʉwaamʉlo ʉwa kʉtabhaala kʉ khabhalɨlo akhɨ saala yeeka peeka nɨ shɨkhanʉ shiila.
13 Ɨnsɨɨbho ya bhamwene bhanaabho ishumi yɨlɨ yeeka, khabhɨlɨ bhakhayiishipa ɨshɨkhanʉ shiila amakha nʉ waamʉlo waabho wonti.
14 Bhakhayilwa ibho nɨ Nyaana yɨ Ngoole, ɨleelo ɨNyaana yɨ Ngoole yɨkhayɨbhatola, kʉnongwa ye ʉweene we Mʉpɨtɨ wa bhapɨtɨ, khabhɨlɨ we wʉ Mwene wa bhamwene. Ɨyeene yɨtɨbhe peeka na bhantʉ bhaakwe bhe yɨbhabhɨlɨshɨɨye na kʉbhasaabhʉla na kʉbhabhɨɨkha kʉbha bhalandati bhaakwe abhasunde.”
15 Ʉkhabhɨzya akhambʉʉzya akhatɨ, “Aminzi ge wagalola pe ayɨkhaaye umubhembu ʉla, vɨpʉga vwa bhantʉ bhonti nɨ nsɨ zyonti nɨ ndongo zyonti.
16 Ɨmpembe ziila ishumi zye wazɨlola nɨ shɨkhanʉ shiila vɨkhayɨmʉpata umubhembu wʉnʉʉyo. Vɨkhayeega ivintu vwonti vwe alɨ navwo, khabhɨlɨ vɨkhayɨmʉlekha ishitali, vikhayimulya ɨnyama yaakwe, vwe vɨkʉsyala bhakhayɨpemba nʉ mwoto.
17 Kʉnongwa ye ʉMʉlʉngʉ abhapiiye ɨnsɨɨbho yeeka, ɨya kʉbhomba zye ʉweene akwanza. Khabhɨlɨ bhaashipe ɨshɨkhanʉ shiila ʉwaamʉlo waabho ʉwa kʉtabhaala, kufishila pe amazwi ge ʉMʉlʉngʉ álonjile gakhayɨkwɨla.
18 Ʉmwantanda ʉla we wamʉlola, ye nhaaya yiila ɨmpɨtɨ ye yɨkʉtabhaala abhamwene abha mʉ nsɨ.”