Iwarakha yo upachera i Napaolo wa
Attu o Ukorintho
Malhove o uholhelha
Iwarakha yo upachera i Napaolo wa attu o Ukorintho yaalhepiye ni akarumiya Napaolo iyaakha cho 55 baada yo uyaria wa Kuristo (nlhako wo 1:1). Ilha phi iwarakha yo upachera mu iwarakha pilhi chaalhempe aya Napaolo wo nlhoko wa attu anrumelhenlhe Kuristo o Ukorintho. Ni veekinaka yaalhempe ilha iwarakha ilha ikatema yaakhalha aya Uefeso ahinaya ulhakelha nkwaha aya wo Ukorintho yeetaka urwaa ni uhokolhia Umakedoniya (nlhako wo 16:5-9). Ilha iwarakha ilha phi waakhulha wa Napaolo wo malhove yeewa aya ukhuma wa attu anrumelhenlhe Kuristo yaachaka mwaha wo chittu cho uhilhoka lhoka chaapangiya munlhokoni mmo, ikhalhaka mwaha wo umwalhaana ni mihapo cho ishembwere. Iwani yo Ukorintho yaari ichuwaniaka wo mitheko chaya cho ishembwere, ihithikinehaka wiira nlhoko wa attu anrumelhenlhe Kuristo yaari akumaanaka ni yoyo mwaha uyo. Ikitabu yo iwarakha yo upachera wa attu o Ukorintho tho ihaana nlhako unohimiacha mwaha wo uttunana (nlhako wo 13).
Chiri nhina,
Napaolo anowaashikuria attu o Ukorintho ni unshukuru Nlhuku wo yayo manyaattu ayo (nlhako wo 1:1-9).
Tho, anohimiacha mwaha wiiwilhe aya unohimiacha umwalhaana mmilhokoni mwa attu anrumelhenlhe Kuristo o Ukorintho (nlhako wo 1:10-4:21).
Thothoni tho, anohimiacha mwaha wo mihapo cho ishembwere ni mwaha wo urweehaniya umilhatuni (nlhako wo 5-6).
Baada yo vavawo anoohimiacha meettuchiho anaacha nthelhi, ulhapelha isinyago, ulhapelha voonene, isadaka cho munnepani ni uhihimmwa nnookhwani (nlhako wo 7-15).
Anomalhiha wo uhimiacha mwaha unaacha anene ayo (nlhako wo 16).
1
1 Mii Paolo kiihaniye ukhalha karumiya a Kuristo Yesu wo uthanana wa Nlhuku. Mii ni munnihu Sostene,
2 ninoolhepa iwarakha uwiiha uwaninyu mwaatti nlhoko wa attu a Nlhuku nrii Ukorintho nhapihiye wo ulhutaana ni Kuristo Yesu, nkamweehaniya ukhalha attu a Nlhuku, vamoka ni attu onkhaye anrumelhenlhe Kuristo, Athithi, ari awihu ni hii.
3 Kinoulhapelhelhani nnema ni mpuha ukhuma wa Nlhuku Athumwanihu ni Athithi Yesu Kuristo.
Ibarakha cha Nlhuku
4 Kinonshukuru Nlhuku mahuku onkhaye alha wo nlhatu no uttuvani mwaattiva nnema wawe wo iphiro yo Kuristo Yesu.
5 Ukhalhawaya wo ulhutaana ni Kuristo nhovahiya nhakhu wo chittu chonkhaye, vamoka ni uhimiacha nretelhe ni uvahiya irusho cho uchuwelha.
6 Ukhalhawaya nttenga unonhimiechesha Kuristo we ikekhiaye uhokhomaalhihiya nhina mwinyu,
7 nhiwukuwelhiyaka mahalha ariyoothe o munnepani vanoweherera inyu upatakulhiya wa Athithi Yesu Kuristo.
8 Yoyo noukhomaalhihani mpaka umalhelha wiira mmwe mwoonia attu o uhikhuwachiya nihuku na Athithi Yesu Kuristo nne.
9 Nlhuku owiihanneni mwaattiva nkhalhe nlhoko mmoka ni Mwaamwanawe Yesu Kuristo Athithi ri o ukhulhuvelhiya.
Umwalhaana nlhoko wa attu anrumelhenlhe Yesu
10 Ashilhoko aka kinoulhepelhani wo nchina na Athithi Yesu Kuristo wiira mwiiwanane chittu chinolhumacha inyu, uhiiwanana uhikhalhe nhina mwinyu. Muupuwelheke wo irusho imoka ni nrima mmoka.
11 Ashilhoko aka, attu akina amuchi a Nakiloe, ahohimia ikekhiaye wiira khanneewanana munlhokoni mwinyu.
12 Ittu kinothanana aka uhimia etu phi ilhe kiiwilhe aka uwaninyu, kila mmoka noolhumacha chawawe, mmoka neera, “Mii kinaattwara Napaolo.” Nkina, “Mii kinaattwara Naapolo.” Nkina, “Mii a Nakefa”, ni akina, “Mii a Kuristo.”
13 Chani, Kuristo homianihiya? Chani, Napaolo phi akhomelhelhiye vansalaabani wo nlhatu winyu? Ama chani, mwaabatiiziye wo nchina ni Napaolo?
14 Kinonshukuru Nlhuku wiira akambatiizilhe ntu riyoothe munlhokoni mwinyu yaahikalheru Nakurispo ni Nagayo.
15 Wo chiichammo etu khaawo ntu nohalha uhimia wiira batiiziye wo nchina naka.
16 Eiyo, kahaabatiiza attu o unupani wa Nastefana nansho uthepa yayo, akambatinze ntu nkina riyoothe.
17 Ukhalhawaya Kuristo khaakirumme waabatiiza attu, nansho kirumilhe uhimiacha Malhove Orera, tho, keettuchinhe wo uhikhulhuvelha irusho cho malhove a attu, ikhalhe wiira machiri o nookhwa a Kuristo vansalaabani ahirukunushiye.
Kuristo ni machiri ni irusho cha Nlhuku
18 Ukhalhawaya nttenga wo nookhwa a Kuristo vansalaabani phi nlhove no ukumbafu wo alhe arii mu upoterani nansho wo hii noopolhiyeva, yoyo nttenga uyo phi machiri a Nlhuku.
19 Ukhalhawaya Malhove Matakatifu aneera,
“Kinootanganya irusho chaya attu o irusho,
Kinoorihelha utayi ushoma waya attu ashomilhe.”
20 Ri vayi etu, ntu o irusho? Ri vayi etu, owiittuchiha Ikekhia? Ri vayi etu ovanyiha o ilha ikatema ilha? Nlhuku hopanga irusho cho mwiilhaponi ukhalha cho uhikhalha maana.
21 Ukhalhawaya Nlhuku wo irusho chawe, attu o velhaponi khanonchuwelha Nlhuku wo iphiro yo irusho chaya ashinene. Vatulhi waya, Nlhuku hottuna woopolha attu anonrumelhelha alhe wo nttenga unohimiacha ihu, iphiro inooniya ni attu o irusho wiira yo uhikhalha maana.
22 Ayahudi anovekelha woona ithikineha ni Ayunani anaavia irusho
23 nansho hii ninonhimiacha Kuristo aakhomelhelhiye vansalaabani. Nttenga unoonia wa Ayahudi wiira itiyelhelho, ni ukumbafu wa attu ahiri Ayahudi.
24 Nansho wa onkhaye eehaniye ni Nlhuku alhe, Ayahudi ni Ayunani, Kuristo phi machiri a Nlhuku ni irusho cha Nlhuku.
25 Ukhalhawaya inoonia ukhalha phi ukumbafu wa Nlhuku, phi irusho upwaha irusho cha ntu ni ittu inoonia uhikhalha ni machiri wa Nlhuku, phi yo machiri upwaha machiri a attu.
26 Ashilhoko aka, muupuwelheke vano wiira ikatema veehaniye inyu ni Nlhuku enchi inyu khamwaarina irusho cho uchuwelha chittu cho munttuni enchi khayari attu o machiri ama attu o pilhi waapwaha attu akina.
27 Nlhuku ahothanlha chittu choonia wiira cho ukumbafu cho mwiilhaponi wo nlhatu no woolhihacha muru attu o irusho, tho ahothanlha chittu chihiri ni machiri wiira olhihache muru attu o machiri.
28 Nlhuku ahothanlha chittu cho uheulhachiya cho mwiilhaponi choonia wiira phi malhove o uhikhalha maana wo nlhatu no utanganya chittu choonia ni attu wiira phi chorera ata chahaariwo.
29 Paahi etu, khaawo ntu nooria wiifunelha iriyoothe mmiholho mwa Nlhuku.
30 Nlhuku mwanene phi uyo olhutaninheni mwaattiva ni Kuristo Yesu. Nlhuku homvaha Kuristo akhalhe phi uchuwelha wihu, ni ikekhia ni utakatifu ni woopolhiya.
31 Paahi etu, thoko Malhove Matakatifu chinohimia aya,
“Ntu neeshipa,
Efunelheke etu ntheko wa Athithi.”