7
Coohiyerana co Mahumu
Mt 15.1-20
1 Mayowantikha ni mafarisi akina, akhumaka o Yerusalemu, yahothukumana ntotho wawe Yesu.
2 Yahoona wiira owiitthuca awe akina yanalya nkatthe ni matata oohirya, manaaya woohinyawa.
3 Mafarisi ni Ayutta othene khanlya woohinyawa ratta ratta, toko calemalenlyaya atthu ookhalayi.
4 Waturuwaya uparasa, khayalya ihinaya unyawa; ni cihaawo tho citthu cinci cikina cimpankaya attharaka citthu cookhalayi, toko urapiha ikahi, myaapu, ni myaapu co ncukhuma ni mikori.
5 Yahonkoha vano, mafarisi ni mayowantikha: Owiitthuca aa ahiwelelaka citthu cookhalayi, alyaka ahinyawile, isiyani?
6 Yesu ahaakhula: Hohimya ratta nnapiyu Isayiya, awacakani nyu, atthu o mirima miili, toko cantikhiyaya:
Mphwinko ula unakittitthimiha ni mattere,
nanso nrima aya unkhala uttayi waka.
7 Anakilapela vathiru,
ni yeetthucihaka malamulo a atthu paahi.
8 Ahiyaka nlamulo na Nluku, phuttharaka coohiyerana ca atthu, toko urapiha myaapu ni ikahi ni citthu cinci colikana nnya.
9 Ni aheerela: Nnahiya ntteeliyaka nlamulo na Nluku wiira nthareke coohiyerana cinyu.
10 Musa, mweeco, heera:
Wattittimihe athumwanaa na anumwanaa;
ni
Ntthu nohala walapha athumwane na anumwane attarusiye ni eeviye.
11 Nyu nanso nneera: Ntthu nohala wahimerya athumwane atthuna anumwane: Itthu yahalaka wuvahani nyuva phi ila 'korpan' manaaya, itthu yoovahiya Apwiya.
12 Ciicammo khanonhiyera ntthu itthu yowapankela athumwane atthuna anumwane,
13 mmalihaka ciicammo nuulumo na Nluku nlattu wo coohiyerana cookhalayi cinvahenyu. Ni napanka citthu cinci toko nnya.
Cinapankiha atthu ukhala aharamu
14 Eehanaka tho mphwinko, Yesu anawahimerya: Nkiviriyane othene, ni mwavye wiiweha.
15 Khiiwo iri utaa wawe ntthu, ineera inakenle nhina mwawe, phoorya untatusa iharamu; nanso inkhuma muntthuni, ila phinoorya untatusa iharamu.
16 Ntthu urina manyaru uwiiwelela, eewe!
17 Wakenlyawe mpaani, nahile mphwinko, owiitthuca awe yahonkoha manaaya nlikanihero nna.
18 Ahaakhula: Nyu ciicammo khaneeweha? Khannocuwela wiira, citthu cothene co utaa cinkela muntthuni, khacinoorya untatusa iharamu,
19 nlattu khinkela munrimani, nanso nnapwiipwini mwawe, ni wahoolo inakhumela wanipuroni waya? Ciicale anahimya wiira coolya cothene cooreera.
20 Ni ahohimya tho: Itthu inkhuma muntthuni, yeeyo phinontatusa iharamu.
21 Nlattu nhina nrima wantthu phinkhumaya moopuwelo oonanara: ulavalava, wiinya, wiiva,
22 uraruwa, isoyo, wunlela coonanara, uthepya, uhilemeliha irutthu, urama, ukufuru, wiicona, uhiwacera itthu yomaana.
23 Citthu nnye cothene coonanara cinkhuma nhina, ni cinantatusa ntthu nharamu.
Nthiyana Nkananeya
Mt 15.21-28
24 Akhoolaka nipuro nne, ahorwaa nttetthe wo Tiro ni wo Sittoniya. Ahokela mpani ni khatthuna wiira acuweliye ni ntthu, nanso khoonrye wiipitha.
25 Vano wohipica nthiyana arina mwanawe mwanthiyana avariye ni nnepa woonanara weewilyawe wuulumaciya ca Yesu, ahowa unkhoromela wamettoni wawe.
26 Ari nthiyana nsenci, olapo yo Siriya-Fenisiya, ni ananlepela wiira oomole ncini wa mwanawe.
27 Ahaakhula: Wareerihe, toko, avone oopacera asaana; woona khavanreera ukusa nkatthe wa asaana ni warihela asilapwa!
28 Ale mweeco, yahomwakhula: Khweeli, Pwiya, nanso hata asilapwa analya vathivaya meeca coolya ca asaana cimmora-mora.
29 Yesu ahomwiirela: Nlattu wo nuulumo nna, urweke, ncini nookhuma mwa mwanaa.
30 Ahoturuwela uwaani ni ahomphwanya mwamhima nonkomile wakorini. Ncini nahonhiya.
Ntthu oohiiwa ni oohuulumaca navonihiya
31 Nakhumile tho nttetthe wo Tiro, ahowela o Sittoniya, mpaka ntthiya no Kalileya, aphulanihaka nttetthe wo Kapole.
32 Yahomwiihera ntthu oohiwa, ni wanrikarikela wuulumaca, ni yahonlepela wiira anthatele ntata.
33 Yesu antamihaka waatthuni ahonhela makokho mmanyaruni ahonsuwela ni ukwanya nlimi ni isene.
34 Ni awusaka miitho wirimu ahohihimerya, eeraka: 'Effatha' manaaya 'wiihule.'
35 Manyaru yahonhulya namarweele, nlimi nawe nahontthukuwa ni ahopacera wuuluma ratta.
36 Yesu aheera wiira hinhimerye ntthu itthu yeraneele, nanso waatepawe waateliha, phaatepaya umwarusela.
37 Atikhinacaka, yaanawiira: Cothene nopanka cotikhineeha, heewiha atthu uhiwa, ni wuulumaciha atthu oohuulumaca.