12
Jume tekipanualeerom jujjuëna
(Mt. 21:33-46; Lc. 20:9-19)
1 Huanäi Jesús ámeu noktáitek ejemplom ámeu jójjoaka, inel ámeu jiaahuak:
—Senu yoreme párasim eechak, éntok ä kóräituak, éntok áma párasim áma chiríjtia béchïbo erata yauhuak. Torejta éntok áma yáuhuak, jikat káteka etta suáyä béchïbo.
’Huanäi tattäbuimmeu ä reu nénkaka mékka bíchaa siika.
2 Huanäi párasim takai, huépülak ä sáuhuëu áman jaasek etta tekipánoammehui, huaka áma chúpukamta ä nüsáuhueka.
3 Të bempo ä buíseka, kökosä yáakä éntok kayta ä makaka ä simtúak.
4 Huanäi juchéntok senuk ä sáuhuëu ámeu jaasek. Huákärim éntok mamáasukä kóbat kökosä yáuhuak, éntokim tiusi ä yáakä ä simtúak.
5 Juchéntok senuk áman bíttuak, huákärim éntok mëak; éntok huate juebenam áman bíttuak, huatémim kökosi yáuhuak, huatémim éntok súhuak.
6 ’Të chúkula, ketune senu au bëyei, ä üúsihua ä nákëhui. Ket ámeu ä bíttuak ínel jíaka: “Jamak júnem ín üusi yörinake.”
7 Të huame etta tekipánoame júnen nau jiaahua: “Ïri ájäria jü ä átteanakeme, átä mënake, huanäi itou tahuánake jü ä attea éaïhui.”
8 Huanärim ä buíseka, ä mëaka, etpo yeutana ä jímmak.
9 Huanäi Jesús am temajek:
—¿Jáchisu ayúnake jäni hua nésahueme, párasim átteakame? Äbo sika, ímëi tekipanualeerom súanake, éntok jume ä páras échim tattäbuim mampo tóijnake.
10 ’¿Jáchem íkäi jïojteta júne kaa bit-la? Ínel jíamta:
Huä tetta huame káateleerom kaa huáatiakähui,
huäri ínel jum kari eskinapo tahuala ëni.
11 Jü Señor ä yáala íkäri, éntok itom bíchäpo sïmek béppa musäla maachi.
12 Huanärim at tekipanuatáitek jachin bem ä buíjtebonakëhui, bueïtukim at jüneïak áme bétana ínel íkäi ejemplota ä nokákähui. Tem juka juebena genteta majhuëi, huanärim ä tójakä sájjak.
Impuesto tómita bétana nátemaijhuame
(Mt. 22:15-22; Lc. 20:20-26)
13 Huanäi huate pariseerom éntok Herodíanom au bíttuak jita nokpo júne bem ä jaatíanakë béchïbo.
14 Huanärim au yájaka, ínel au jiaahua:
—Maestro, jünéate lútüriata em boojóoriahui, éntok kaabeta bétana emo suáyähui, bueïtuk yoremta jachin ä machíakäubechë kaa suuhua, ál‑lë tua lútüriai am téjhua juka Diosta böo. ¿Jachu lútüria jäni rey Césarta tómita itom maknakëhui? ¿Ata maknake ote kaa ä máknake?
15 Të Jesús éntok ámet jüneakä jítat júne bem ä jaatíabarëhui, huanäi ínel ámeu jiaahua:
—¿Jatchíakasem nee jióptua báare? Bueïtukem juka tómita inou huéria ä bit béchïbo.
16 Bempo éntok au ä tójjak. Huanäi ínel ámeu jiaahua:
—¿Jábesu ïri jü tómit yáari, éntok ï jïojteri jábeta tehuampo yáari?
Huanäi bempo ínel au jiaahua:
—Rey César ä átteak.
17 Huanäi Jesús ínel am yommiak:
—Juka Césarta áttea Césartem ä mákka. Juka Diosta attea éntok Diostem ä mákka.
Huanärim at guómtek hua ámeu ä nokákäubechi.
Kokkolam nasuk jíabitehuau nátemaijhuame
(Mt. 22:23-33; Lc. 20:27-40)
18 Huanäi huate saducéom au yájjak, jume kókkolam kaa júchi jíjiabitë tíame. Huanärim ä temajek:
19 —Maestro, Moisés ínel jïojtek, bueïtuk jábe ä sai mukuk, juka ä jubíahua kaa asóakamta tahuak, ä sailahua ä jubeka at usianake ä saila tehuampo.
20 Guoibúsanikam emo sayekai. Jü bathuéeme jubek huanäi muúkuk, të kaa usim jípurek.
21 Huanäi jü áa sáu huéeme ä juúbek, të ket muúkuk; huäri júne kaa usim at jípurek. Éntok jü bájikun huéeme ket jíba bénasi.
22 Jume guoibúsanika ä juúbek, tem kaa usim at jípurek. Chúkula éntok jü jámmut muúkuk.
23 Jum kókkolam jíabitëpo, bempörim jíabetek, ¿jábesu ä jubnake jäni, bueïtuk jume guoibúsanika ä jubekai?
24 Huanäi Jesús ínel ámeu jiaahua:
—Aachem tuïsi jijjïobe bueïtuk juka Diosta nooki jïojterita kaa enchim taaya béchïbo éntok juka ä úttiära.
25 Bueïtuk kókkolam násuk jíabitehuäpo kaabe emo jubnake, entok kíalim jume Diosta ángelesim téhuekapo aneme bénasi jíba emo jípunake.
26 Én éntok jume kókkolam jíabitelatunakëhui, ¿jachem kaa ä bit‑la Moiséjta jïojteri, Diosta jachin au nokákähui huam ili júya, zarzapo? Júnel ä jiapo: “Ínapone Abrahamta Dios, Isaacta Dios, éntok Jacobta Dios.”
27 Dios kaa kókkolámeu Dios, jíapsámeu ál‑la. Júnëlem tüisi jiób‑la.
Huä nésauri chë bathuéeme
(Mt. 22:34-40)
28 Huanäi senu escriba áma yépsak nau am noknássuai am jíkkaijlataka, éntok Jesústa tüisi am yómmiakau jünériaka, huanäi ä temajek:
—¿Jítasu jü Diosta nésauri bat huéeme sïmem béppa?
29 Huanäi Jesús ínel ä yommiak:
—Jü nésauri sïmem béppa bathuéeme ïri ájäria: “Íkäre jíkkaja Israel, jü Señor itom Dios, jü Señor huépülai jíbba.
30 Éntoke em Dios Átchay náknake chikti em jíapsimaki, éntok sïme em ái jünéribeyi, éntok sïme em úttearammea.” Ïri ínel jü nésauri bathuéeme.
31 Jü áa sáu huéeme éntok ket álë benna: “Emo bénasi yorémtë náknake em emo ériä bénasi.” Kaíta éntok nésauri chë bej‑re ímëi béppa.
32 Huanäi jü judíom ley am mamájtíame ínel au jiaahua:
—Türi, Maestro, lútüriate nooka Diosta huépülaitíaka, bueïtuk kaabe éntok aane áapörik béppa.
33 Éntok jü ito bénasi ä náknä bétana chikti itom jíapsimaki, éntok sïme itom ái jita jünériäubeyi, éntok sïme itom úttearammea, éntok ito bénasi yoremta náknähui itom ito ériä bénasi, chë júne bej‑re sïme hua Diosta bíchäpo naïkiari éntok animáalim taijpo tattahuame béppa.
34 Huanäi Jesús tüisi ä yómmiakäu jíkkajaka, ínel au jiaahua:
—Katë mékka áu aane Diosta reytaka nésahuebeyhui.
Huanäi naateka kábe jita au nátemaij báreka taahuak.
¿Crístota jábesä ä üusek?
(Mt. 22:41-46; Lc. 20:41-44)
35 Huanäi Jesús tiöpopo am majtiaka ínel ámeu jiaahua:
—¿Jáchisu júntuk jume escribam juka Crístota Davidta üusi tíiya?
36 Bueïtuk jü Espíritu Santo Davidta teniai ínel jiaahua:
Jü Señor ínel ín Señorbeu ínel jiaahua:
“In bata bétanë yejte, huame enchi béj‑reme em guókkim bétuk ín tahuáriäpo tajti.”
37 Jü David, áapo ä Señor rókka, ¿jáchisu júntuk ä üúsek téehua?
Huä gente juebenara éntok tua al‑léakä ä jíkkajai.
Jesús escribam nätuak
(Mt. 23:1-36; Lc. 11:37-54; 20:45-47)
38 Huanäi ínel ámeu jiaahua am majtíaka:
—Émoem suáya jume escribam bétana, téttëbem súpeka rejteka emo türeme, éntok jum plázapo bem tetébotuahuäu musäuleme.
39 Éntok jume baankom bat jokame türeme bempörim béchïbo jum nau yayáijhuäpo, éntok jïbuähuäpo junne;
40 entok huame jámut jókoptulam bem attea üuhuame, entok emo bit‑ïaka téebesim oraciónim jojohua. Ímechi chë júnee noki jiokot machisi ámet chúpatunake.
Jü jámut jókoptulata ofrenda
(Lc. 21:1-4)
41 Huanäi Jesús huam tiöpopo tómita nau totoijhuapo pújbapo káteka am bitchay, jachin huaka genteta tómita áma órehui jum kajompo, éntok juebena rikom yún tomita áma óreme.
42 Jü jámmut éntok póobetakä éntok jókoptulatakä áma yépsak. Huanäi guoi tómi kaa jaikik bejremta áma jóiyak.
43 Huanäi Jesús ä discíipulom núnuka, ínel ámeu jiaahua:
—Tua lútüriapone enchimmeu ínel jiaahua, ï jámmut póobe jókoptula chë yún áma ä jóiyak sïmem béppa jum kajompo;
44 bueïtuk sïme huaka bem ámeu yeu bïlata áma óorek; ïri éntok ä póobétukä násuk juka sïmeta ä jípurëu áma jóiyak, juka áy ä jïbuä éäu junne.