9
Jume dooce yeu bíttuahuakäme tekkil
(Mt. 10:5-15; Mr. 6:7-13)
1 Jesús jume ä dooce discíipulom náu tójaka, yäura úttiata am mákkak, jume lemooniom yeu am bébnakë béchïbo, éntok kökoreme tütenakë béchïbo.
2 Huanäi yeu am bíttuak, huaka Diosta reytaka nésahue bétana géntemmeu am nok ïaaka, éntok kökoreme am tüte ïaaka.
3 Huanäi ínel ámeu jiaahua:
—Katem jita huéhueria böot béchïbo, borooniata junne, bóosata, páanim, tómita junne. Huépülam jíbem súpeka kaate, kaa guooyim.
4 Ják jóapo enchim yájakäpem aane, enchim sájäu tájti.
5 Ják pueblopo kaa enchim mabethuakäpem yeu kaate, enchim guókim ámeu tóröchiata tátakeka, bem jüneenakë béchïbo kaa tüisi bem ayukähui.
6 Bempo éntok yeu sájaka, sïme pueblom bëkatana naa kaatey, juka tü nokta Diosta bétana huémta ámeu nokaka éntok sïmekut jume kökoreme tüteka.
Juan Bautistata mukukä bétana nokhuame
(Mt. 14:1-12; Mr. 6:14-29)
7 Jü rey Heroodes kobanaro nésahueme Jesústa bétana nokhuamta jíkkajak, jita benak ä jo sisimëhui. Huanäi át guómtilatukay. Bueïtuk huate ínel jiaahuay: “Juan kókkolam násuk jíabitela.”
8 Huate, juka profeeta Elíasta yeu machiak tíiyay. Huate éntok, jábe profeetam jume bannaataka kat‑riam jíabitek tíiyay.
9 Huanäi Heroodes ínel jiaahua:
—Tësune ínapo juka Juanta kóba chúktiatebok. ¿Jábesa júntuk ïri jü juebena jita ín áa bétana jíkkajähui?
Júnëli jü Heroodes ä bít báreka éiyay.
Jume mamni mil jïbuätuahuakame
(Mt. 14:13-21; Mr. 6:30-44; Jn. 6:1-14)
10 Jume apóstolim júchi yeu yájaka ä ejtejhuariak juka Jesústa sïmeta juka bem yáakä bétana. Huanäi am nüka, am núk siika, mékka ánia päria pueblo Betsaida ti téhuaakähui.
11 Të jü génte ä jüneriaka, áa sáukim sájjak. Huanäi am mabetaka juka tü nokta Diosta reytaka nésahue bétana huémta ámeu nookak, éntok huame tua jiokot éame kökoata am úhuak.
12 Të huanäi éntok kúpti táytek. Huanäi jume doocem Jesústau rúkteka, ínel áu jiaahuak:
—Juka géntetë sákatua. Éläpom sájaka pueblom o ranchom jariunake, buähuamta éntok ják bem jimyorenakëhui. Bueïtuk mékkate aane, ánia päriapo, kaabeta jóakäpo.
13 Huanäi Jesús ínel ámeu jiaahua:
—Emem am jïbuätua.
Huanärim ínel jiaahua:
—Mamni páanim éntok guoy kúchum jíbate jípure. Jëitu, jamak ítapo áman sájaka buähuamta am jínnurianake, ïri büru genteta béchïbo.
14 Jíba tuam jamak mamni mil yorememtukay. Huanäi Jesús ínel ámeu jiaahua jume ä discíipulommehui:
—Móchalem náu am jóiya, sincuecuentam.
15 Júnëlim sïmem náu jóiyak.
16 Huanäi jume mamni páanim éntok jume guoy kúchum nükari, téhuekau jikau remteka, tü nokta ámet chúppak. Huanäi am näikimteka, jume ä discíipulom am mákkak, jü gentetacham näikimte nésahueka.
17 Huanäi sïme jïbuäk, éntokim jóbuak. Huanärim dooce canastam tápuniak, yeu bëkamtayi.
Peero, Jesústa Cristo tíiya
(Mt. 16:13-19; Mr. 8:27-29)
18 Júnakoy júnen yeu siika. Jesústa áapola Diostau buanayo, jume ä discíipulom áamak aaney. Huanäi am temajek, ínel jíakari:
—¿Nechim jábë tíiya?
19 Bempo ä yómmiak:
—Huate enchi Juan Bautistä tíiya. Huate, Elías. Huate éntok, jábe profeeta jauhuey huéria mukilataka jíabitelame.
20 Huanäi ínel ámeu jiaahua:
—Emesu, ¿jáchisem ino bétana jiaahua? ¿Nechem jábë tíiya?
Huanäi Peero ä yómmiaka, ínel jiaahua:
—Émpë jü Diosta Cristo äbo yebisnakëhui.
Jesús ä muknakeu bétana am téjhuak
(Mt. 16:20-28; Mr. 8:30–9:1)
21 Të Jesús kúttilasi am téjhuak, kaabetau íkäi am nok sáhueka jáchin huéy junne,
22 éntok két ínel jiakari:
—Ínapo jü Yoremta Üusi yún jita kökosi kaa béj máchika inou huéenake. Jume yoiyöturim bétana, éntok jume tiöpopo chë áma nésahueme, éntok jume escribam nee omoutenake. Huanärim nee mënake, të báij taahuarim huéyne jíabitenake.
23 Huanäi sïmemmeu ínel jiaahua:
—Jábe júne ino sáu huée bárëteko, tókti áu nénkaka, chíkti táapo ä kúrus püaktiaka, ino sáu huéiye.
24 Bueïtuk sïme juka ä jíapsi jínëu báareme, ä tärunake, éntok sïme jábe ino béchïbo ä jíapsi tärukame, ïri ä jínëunake.
25 ¿Bueïtuk jítasu áma téunake jü yoreme sïme ániata yöoko, áu lütiätek, o áu tärukäteko?
26 Bueïtuk jü inot tihueme éntok ín nokiyi, ínapo jü Yoremta Üusi kétne ái tiunake, júnakoy lóoriapo yepsateko, éntok ín Átchay lóoriapo, éntok jume santo ángelesim lóoriapo.
27 Tëne én tua lútüriapo ínel jiaahua, jume huate imï aneme, katim bát kókkohuamta bínnake, Diosta reytaka nésahueu bíchäkatek júbua.
Jesústa takahua tábuiasi aú yáuhuak
(Mt. 17:1-8; Mr. 9:2-8)
28 Jesústa íkäi noksuko, guoj naiki taahuarim simsuko, ínel yeu siika. Perota, Juanta éntok Jacobota núk siika, káhuit jikau bíchaa, áman Diostau buan báreka.
29 Diostau ä buanayo, jü ä pujba täbuiasi bíttuk. Ä sánkohua éntok tósalisi éntok bélojkosi aayuk.
30 Huanäi éntok guoy yoremem áma yeu machiak, áamak ejtejhuaka. Moisés éntok Elíastukay.
31 Huanäi áme chíkola Diosta lóoria am machirialatukay. Jachin Jesústa simnake bétanam nookay, Jésús buere joära Jerusalémpo ahuä chupátuanakëihui.
32 Peero éntok jume áamak aneme, tüisim yetem jípurey. Tem búsalataka, Jesústa lóoria ujyória bitchay, éntok jume guoy yoremem áamak aneme.
33 Huanäi bempörim Jesústa tö sájako, jü Peero ínel áu jiaahua:
—Maestro, ¡türi ímï ito béchïbo! Báij jötamte ímï cháanake, huépülaik emo béchïbo, senuk Moiséjta béchïbo, senuk éntok Elíasta béchïbo.
Të Peero kaa jüneiyay jita ä nokähui.
34 Íkäi ä nokaysu, namu áme béppa yéjtekam páttiak. Huanärim guómtek, namupo kimuka.
35 Huanärim jiahuita jíkkajak jum namupo, ínel jíamta:
—Ïri ín Üusi ín nákëhui; áapörikem nok jíkkaja.
36 Chúkula juka nokta jíkkaijsukam juka Jesústa áapolaik áma anemta bitchak. Bempo kaabeta ejtejhuaariak. Huanäi huámechi taahuarimmechim kaabetau jíalek juka bem bíchakä bétana.
Jesús usita lemooniota jípuremta túutek
(Mt. 17:14-21; Mr. 9:14-29)
37 Yokoríapo, káhuit kóm sájaka, génte juebénaka am nankirika sajjak.
38 Huanäi jume géntem násuk senu yoreme tüisi kusisi ínel jiaahuak:
—Maestro, émounä nétane ín usië nee bít‑ria. Júkäi huépülaik jíbane üusek.
39 Íkäi jípure, huépul lemoonio espíritu ä jaajaatia. Senu huéchiapo chay tátayte. Huanäi huécheka sútatäti an tátayte. Tempo áman sósomöchia. Huanäi jü lemoonio espíritu kökosi ä tátabeka kaa ä tóij bábbare. Júnëli jiokot ä antuasuka béja ä tóttoja.
40 Em discíipulommeune jiokot jiausuk lemoniota yeu ä jaaria sáhueka, të katim áma yuumak.
41 Jesús ä yómmiaka, ínel jiaahua:
—¡Eme géntem kaita súalëram éntok jujuëna! ¿Jauhuey tájtine enchimmak annake jäni, éntok enchimmet kaa yúmaka? Inohuë ä huéria juka em üusi.
42 Huanäi juka usita áu yebisiseyo, jü lemoonio buíapo ä tátabeka, úttia sútatäti ä antuak. Të jü Jesús juka lemoonio espíritu jaiti machik béj‑reka nónokak. Huanäi ä tütek juka usita. Huanäi ä áchaytau ä nóttiriak.
43 Sïme ä yosireka taahuak, juka buéresi Diosta joähui.
Jesús ä múknake bétana am téjhua
(Mt. 17:22-23; Mr. 9:30-32)
Sïme át guómtilataka ä bitchay, juka Jesústa joähui. Huanäi éntok ä discíipulommeu ínel jiaahua:
44 —Íkärem tüisi jíkkaja, éntokem kaa ä koptia. Ínel yeu huéenake: ínapo, jü Yoremta Üusi ti téhuaakame, yoremem mámpo yéchana.
45 Të bempo kaa át jüneiyay, ïri nokichi. Dios ketune kee am pujtetuay, íkäi nokta bem jünerianakë béchïbo; át nátemay báreka júnem májhuey ïri nokichi.
¿Jábesu chë yöhue?
(Mt. 18:1-5; Mr. 9:33-37)
46 Huanäi jume discíipulom náu nok nássua táytek, jünee báreka jábesu áme násuk chë júne nésaunake jäni tíaka.
47 Huanäi Jesús am jüneriaka jita benak am éähui bem jiápsipo, ili usita nüka, áa náapo ä kétchak.
48 Huanäi ínel ámeu jiaahua:
—Jábe júne íkäi ili usita ín téhuampo mabetako, nee mabeta; jábe júne nee mabetakame, juka nee äbo bíttualata mabeta. Bueïtuk jü enchim násuk hua kaa áu jitaleme, huäri chë yörisi maachi.
Huä kaa itom béj‑reka huéeme, ito bétana huéiye
(Mr. 9:38-40)
49 Huanäi jü Juan ä yómmiaka, ínel jiaahua:
—Maestro, senukte két bitchak, lemooniom yeu jaasemta em téhuampo. Të kaa itomak huéiye; kíalïkute ä táktiriak.
50 Jesús ínel áu jiaahua:
—Katem ä taktaktiria; bueïtuk jü kaa itom béj‑reka huéeme, ito bétana huéiye.
Kuttilasi ámeu nookak, jü Jesús, Jacobotahui éntok Juantahui
51 Jesús, téhuekau jikau ä mabennäu tiempota yúmasey, jíapsita tutti yéchaka, kíkteka böota nüka Jerusaléniu bíchaa huémta.
52 Jume nokta huériame áapat bíttuak, sájakam Samaritanom pueblou kiímuk, áa bia sïmeta tüte béchïbo jum ä yebijnakepo.
53 Të katim mabethuak, bueïtuk böo Jerusaléniu bíchaa huémtat bem katë béchïbo.
54 Ä discíipulom íkäi bíchaka, Jacobo éntok jü Juan, junëlim jiaahua:
—Señor, ¿jache táijta jikat bétana itom ámet kóm bíttua ïaa, júnak táapo Elíasta am yáakä bénasi?
55 Huanäi áapo ámeu kúakteka, tepa béttesi ámeu nónokak, ínel jíakari:
—Eme kaa jüneiya jita espírituta enchim jípurëhui.
56 Jü Yoremta Üusi kaa jume yorem jíapsim mëseka äbo siika, ál‑la am jínëuseka.
Huanärim sékäna pueblou bíchaa sájjak.
Jume Jesústa guojaa báareme
(Mt. 8:19-22)
57 Böot am boojoay, Jesústau senu ínel áu jiaahuak:
—Señor, jákun em huëu bíchaa júnene emót chäka huéenake.
58 Huanäi Jesús ínel áu jiaahua:
—Jume ayesim guojöriam jípure, jume huikichim jikat rejteme, toosam; të jü Yoremta Üusi jitat ä mutekaka ä bönakeu júne kaa jípure.
59 Senukuu éntok ínel jiaahuak:
—Ino sáukë huéiye.
Áapo éntok ínel ä yómmia:
—Señor, nechë licensia bátne ín átchay mäa báare.
60 Jesús ínel áu jiaahua:
—Akë am tójja; éläpo jume espíritupo kókkolam bem kókkolam maanake. Émpë yeu sika juka tü nokta Diosta reytaka nésahue bétana nooka.
61 Huanäi täbuika két ínel áu jiaahuak:
—Señor, enchine guojaa báare, Señor, të báchë nee tójja amanne ín jóapo aneme tebotuaka sim báare.
62 Huanäi Jesús ínel áu jiaahuak:
—Jábe júne arau manseeram buísek, amáu remtekäteko, kaibu tüisi áma huéenake jum Diosta reytaka nésahuepo böochi.