3
Makəɗ gəl à ahəŋ gudəŋ à vok
1 Sə̀l azlagay uwanay gəpə̀hkala lela: La makəɗ gəl à ahəŋ gudəŋ à vok kà, azlakaslà zlazlaɗaga adàgahay la ahəŋ.
2 La haɗay gà kà, azladza tadàgahay azlaməna mawoy gəl aŋatà pəra, azlaməna mawoy sili, azlaməna mazigən gəl, azlaməna zlapay. Tadàvatsah gay à Zəzagəla à vok, ŋgaha tadàkasah gay aŋa azlababa aŋatà aw. ‘Kikay’, tadàgoɗ à azladza uwana tazlak atà aw, atà tadàsləkaw azlatatak dziriga aŋa Zəzagəla aw.
3 Tadàgahay dzaŋdzaŋ, vok mahamay aŋatà adàgay la ahəŋ aw, tadàgahay azlaməna masàh gəl, ziruwi aŋatà adàgahay la ahəŋ aw, tsetsi dadàŋ aŋatà la ahəŋ aw, tadàgay azlaməna məzam aŋa dziriga.
4 Tadàtah kaf à azladza anik à gəl, tadàɗahah azlatatak kusoŋu gà, tadàgahay azlaməna zlapay, tawoya à ahəŋ kà uwana asa à vok aŋatà pəra kà Zəzagəla.
5 La huma yewdi aŋa azladza kà: ‘Anu azlaməna manəf Zəzagəla’, tagoɗ. Ama tsa tadàpəsew ndzəɗa aŋha. Hòy à azlatsəhay dza uwaga à ahàl.
6 Azladza anik aŋatà tadàha à huɗ gày aŋa azladza, ŋgaha tatapahla azlamis guɓguɓga aŋatà, kà manəf atà. Azlamis uwaga taɗaha tsakana məŋga, tanəfa à azlatatak mawisiga gesina uwana tatawwal à tsəh.
7 Azlamis uwaga, asa à atà matapla azlatatak, ama tasla aŋa masəl tatak dziriga tetuw aw.
8 Kà uwana azladza mawsiga uwaga kà, tatsəɗ gay à dziriga à tsəh, kiya uwana uwarà Yanes atà la Yambərəs taɗahàŋ à Musa à vok. Madzugway aŋatà kà mawisiga, tavà ləv aŋatà à Zəzagəla la dziriga aw.
9 Ama tadada à huma kərkər aw, kà uwana azladza gesina tadàsəl atà azlakusoŋu. Kiya uwana apakà vok kà la Yanes atà la Yambərəs uwaga.
Sawaray makəɗ gəl à ahəŋ
10 Ama kak kà, kanəfa gi la matapla gulo la abà, la maday, la madz à ahəŋ, la madiŋal gəl à vok, la mabasiŋ, la masal ŋgaha la matsizlla à ahəŋ gulo la abà gesina,
11 la matərəɓay ŋgaha la mas ŋgərpa gulo la abà babay. Kak, kasəl gesina tatak uwana aɓəzà à gi, mok uwana gi la Antiyews, la Ikoniyum, la Lisətəra, à ŋgərpa uwana gəsàh. Ama Sufəl Zəzagəla apə̀lla gi ala la uwaga la abà gesina.
12 Haɗay gà, kəla uwabeyuwi uwana asal madz à ahəŋ la dziriga, la maham gay à vok la Yesu Kristu la abà kà, agay la ahàl aŋa azladza kà matərəɓəŋ.
13 Ama azlaməna magolla dza tadàda à huma à gay kà kaykay, kà mavavaràh azladza anik à bada à abà, atà la aslasl gəl aŋatà, kà tadàvavarah gəl aŋatà.
14 Ama kak kà, dzà à ahəŋ la uwana la abà katapla, la uwana kaɓəzal la ləv tekula. Nəfà azlatatak uwaga, kà uwana kasəl dza uwana atapàkala kà masla atapàkala ala lela.
15 Dagay la bəzi gà, kasəl wakità Zəzagəla lela, masla la uwana avà à ka haŋkəli uwana adala ka à maɓəlay à abà la madiŋ gəl à Yesu Kristu à vok.
16 Dèwdèw uwana tatsetsèr à wakità Zəzagəla à abà kà, uwaga kà afaɗ gay aŋa Zəzagəla, kà mapəhla dziriga ala, kà madukwla mawsiga la vok ala kà matsizlla anu ala, ŋgaha kà mapəhanula maday dziriga uwana akəs à Zəzagəla à gəl.
17 Uwana Masasəɗok Zəzagəla aɗahàŋ kiya uwanay kà: Kà kəla dza uwana anəfa Zəzagəla aŋa magay maɗàh vok à ahəŋ gà, ŋgaha mahənla gà, kà aŋa sləray delga gesina.