6
Magadzaw ahəl wakità aŋa mapəzlay
1 Mok uwana magadzaw azə̀ɓ wakità masəlay məɗəf uwaga à ahàl, kiya uwaga gənəŋà adzəkà mapəzl masəlay matera. Mok uwana adafətalla à ama ala, matera aŋa azlatatak ufaɗ uwaga la sifa agòɗ: “Sà à waŋ”, matsənay aŋa kuda aŋha bokuba habaga.
2 Kiya uwaga gənəŋà pəlis meɗekuga asà à uda. La pəlis uwatà la afik kà, dza la afik alàk la ahàl, tavàl garamusa. Ahàd la makəɗaslay kà mats à atà à ahəŋ.
3 Magadzaw afətà à masəlay masəla la ama ala. Gətsənà masəla aŋa azlatatak ufaɗ uwaga la sifa agòɗ aya: “Sà à waŋ.”
4 Ŋgaha pəlis anik asà à uda aya mativga vikuza. Dza uwana la afik aya kà, masla masəlla guvəl à gudəŋ à vok, kà azladza aŋa makaɗ vok kà à atà kà atà. Tavàl magol katsakar à ahàl.
5 Ŋgaha aya magadzaw afətà masəlay mamakər la ama ala, ŋgaha gətsənà mamakər aŋa azlatatak ufaɗ uwaga la sifa agòɗ: “Sà à waŋ.” Gənərə̀z, ŋgaha gənəŋà pəlis marsiga, dza uwana la afik kà daram la ahàl.
6 Gətsənàŋ tatak anik atsə̀n la tataka azlatatak ufaɗ uwaga la abà la sifa, bokuba kuda aŋa dza. Masla agòɗ: “Sili aŋa sləray mavakay tekula aŋa dza kà asukway pəra kà hi tsergi nagoda tekula pəra, ama mərakala kà, nagoda makər.” Agòɗ à dza aŋa pəlis aya: “Kà aŋa amàl la iyaw aŋa matavəruk maməsliga kà, tadza à ahəŋ kiya uwanay”, agòɗal.
7 Ŋgaha magadzaw afətà masəlay maufaɗ la ama ala, ŋgaha gətsənàŋ maufaɗ aŋa azlatatak uwaga la abà la sifa, agòɗ: “Sà à waŋ.”
8 Gənərə̀z à awtày, ŋgaha gənəŋaŋà pəlis uwana kuforuh ruhga. Dza uwana la afik kà, sləm aŋha kà: Mamətsay, ŋgaha mezewi anəfay la tsəh. Tavà à atà ndzəɗa kà aŋa makaɗ à gay tekula aŋa maufaɗ, aŋa gudəŋ à vok à gay. Tadàkaɗah atà la katsakar, la may, azladza anik tadàmatsah à ɗuvats à abà ŋgaha azlatatak fəta tadàkaɗah azladza anik aya.
9 Kiya uwaga magadzaw afətà à masəlay mazlo la ama ala. Ŋgaha gənəŋà azlamasasəɗok aŋa azlamamatsay la slaka uwana takaɗah tatak à Zəzagəla. Takàɗ azladza uwaga, kà uwana tazà gay Zəzagəla, ŋgaha kà uwana tagə̀ɗ à gay aŋa Yesu à afik.
10 Mok uwana gənəŋà atà tawiyà la kuda zləkkà, tagòɗ: “Sufəl, kak tsikasla, kak dziriga. Azladza uwaga la vəɗah, la gudəŋ la vok takàɗ anu, ma mana kaɗehəŋ aŋa maɗàh à atà seriya à gəl ma, ŋgaha kà seriya aŋa matəɗ atà à gel suwaŋ ma?”
11 Ŋgaha tatsòkwàh atà à lukut meɗekuga à abà, tagòɗ à atà: “Basàwwàŋ ŋuv aya, say takaɗ azladeda aŋkul, uwana tanəfa Zəzagəla, bokuba uwana takàɗ akul dadàŋ. Baŋa takàɗ atà bokuba uwana Zəzagəla agòɗ kà pəra, seriya adàgay la ahəŋ.”
12 Ŋgaha aya magadzaw afətà masəlay maməkwa uwatà la ama ala. Gənəŋà kutso aɓəlakà à vok, afats apakà marsiga. Ama təla kà apakà mativga vikuza bokuba aŋiz.
13 Azlatsetsiliŋ tasòkw à ahəŋ la zagəla bokuba mayyay ahàf ŋuwazlaga, uwana magol kular asakwə̀ŋ à ahəŋ.
14 Zagəla azalà tuwiz, bokuba uwana takə̀l tatak à abà. Azlagudəŋ uwana iyaw akàs atà à gay à adi tazàhla. Azlagudəŋ gesina taɓàɗàhà vok la slaka aŋatà la abà.
15 Kiya uwaga azladza gudəŋ à vok gesina tahàɗàhà vok à gudəŋ à afik, ŋgaha tahàɗàhà vok à azlatsakur uwana à agu la tataka azladzəgəla la abà. Azlamayà la azlauwana azlamayà aw gesina tahòy kà mahaɗàh vok à ahəŋ. Amiyaka azlasufəl, la azlamadzahaga, la azlaməŋga aŋa azlaslodzi, la azlagorobu, la azlauwana sləm aŋatà atsən ala, gesina aŋatà tahàd kà mahaɗ vok à ahəŋ.
16 Atà tadàvà kuɗa à azlagudəŋ la azladzəgəla: “Fətèkàw anu à gəl, kamkam, tsakàw anu à ama, kà dza uwana la kursi la afik aŋa manəŋ anu aw, ŋgaha kà magadzaw aŋa madukw à anu seriya à gəl aw!
17 Iyay, mavakay aŋa məŋ mapak ləv aŋha kà adaslay. Uwa à uwana aslay aŋa matəfal à gay ala uwa? Dza la ahəŋ aslay aw”, tagòɗ.